اختكم في الله تحتاج اليكم

[دمعة ولاكن]

السلام عليكم
كنت كتبت موضوع هنيا نخبركم بلي تفهمنا يجي يشوفني في الخدمة 2 دقايق برك و على اساس هذا سمانة يجي و راهي فاتت سمانة ماجى ما سقى ماحتى حجا هذي ماشي المرة الاولي لي تصرالي هكدا بديت نشك بلي بيا حجا ماشي طبيعية هدي لعشية بكيت حتى خرجو عينيا مفهمتش وراه المشكل علاش ديما نفس لحكاية
قبل 3 سنوات كان واحد حاب يخطبني دار مستحيل باش نقبل بيه منقولش بلي تكبرت عليه او دللت مرديتش لخبر حتى سقسيت عليه و على اخلاقوا ثم قبلت وقلتلوا يجي لدار تخيلوا مزاد سقسى موالاوا مريت بظروف صعبة بزاف وصابتني كابة خاصة انوا اختفى هكدا بلا سبة و بلا مبرر منذاك نتلقاه في طريق ندير روحي عادية لامن من داخل نتحرق باش نعرف علاش سرلي هكدا هذا العام بدلنا مقر العمل تعنا و لينا قدام دارهم يوميا نشوفوا وكل مانشوفوا نتحرق من داخل لاكن ديما نبان قوية و غير مهتمة اليوم و انا مروحة شفتوا و شفت طفل صغير معاه قلوا بابا تمنيت نموت مقولش عندي مشاعر اتجاهوا لا والله ومستحيل نخمم في واحد مزوج بصح حسيت بلي بيا حجا معلبليش واش هي و علاش ديما تسرالي نفس الحكاية
كرهت روحي و كرهت زواج و ليت نحشم نقعد مع جماعة نخاف يسقسوني على الزواج كامل متحيرين عليا دارنا خوالي صحاباتي حتى اني سكرت برتابل باش واحد مايسقسي عليا كامل متحيرين عليا حتى في خدمة لبنات كامل يسقسوني حطيني انا لي رني نتكبر بصح والله خاطيني جميع واحد نقبل بيها نلقاه اختفى لاه معلبليش
صحباتي يقولولي ارقى وانا منقدرش نروح عند راقي بلا محرم ماما قالت ابي باش يديني لاكن ابي مايمنش بهذوا رقاة راني نتحرق من داخل كل يوم و ديما نبان وحدة قوية بشوشة ديما قبل مانرقد مسمع سورة البقرة و نقرى قران وراني ملازمة الاستغفار لاكن مكين حتى حجا تغيرت في حياتي منها تخرجت و بدى معيا هذا سناريو منكذبش عليكم اي واحد يجي يخطب نقول نرفض دوك قبل مايسرلي واش راه يسرى ديما ومن بعد نشهد و نستغفر و نستخير و نقبل و تسرالي نفس حكاية و الله كرهت
ادعولي يفرج عليا هذي المحنة و تاني حبت تقولولي كيفاش نرقي روحي بروحي
مرنيش مقلقة من زواج و لا جهلت ولا مانمنش بالمكتوب لاكن واش يسرلي مرهوش طبيعي
ادعولي امانة امانة
كثرت عليكم لاكن ريحا نتخنق كرهت حياتي منكذبش عليكم نتمنى كل يوم لي نغمض عيني مزيدش نفطن

[OUSSAMA2015]

( و قل لن يصيبنى الا ما كتب الله لنا )
و
(عسى ان تكرهو شيئ و هو خير لكم)
متتقلقيش نورمال بلاك يعطيك ربي جزاء انتضارك و صبرك رجل افضل من الذي كان خاطبك يحسدك عليه الناس
متتقلقيش نورمال

[* الحلم سكر *]

بين هاذا كامل ما جاش في بالك انو ربي سبحانه بعدو عليك هو و غيرو سواء باسباب او دونها لانو ما يصلحش او مافيهش الخير و تاكدي لي يصلح لغيرك ماهوش بالضرورة يصلح ليك
مع اني ما نحبش نحكي على حياتي الخاصة لكن لاني حسيت بيك راح نصارحك بشي

مريت بمرحلة بحياتي من كثرة الناس لي يقلك وقتاه و وقتاه ;و و و تساءلت و الله نفس اسئلتك و بكثرة و باستغراب كان من بين لي فشل مشروع الخطوبة و كيما قلتي جارنا انسحب دون اسباب و تقريبا الباب في الباب *** و اخر معروف بمنطقتنا انهم ناس ملاح و بمالهم و ماخاصهم والو و يحبلك لي يتقدمولها
بعد سنوات اكتشفت انو جارنا انتهازي و ماذي و حتى امو رماها على جال المادة * هذا لي قلت نعرفوه و الباب في الباب و انسحب دون اسباب *
اما الاخر لي شابع ماديا ذار مشروع كبير سرق للناس دراهمهم و هرب و لليوم هو مطلوب قضائيا و يبحثو عليها
هذا لي متذكرتو و غيرهم الكـــــــــــــــــــــثيـــــــــــــــــــــر و الاسباب لي تساءلت عليها عرفتها بعد مدة طويلة انو ربي سبحانه يحبني و يخاف عليا اكثر من خوف على نفسي
الوقت اللي تبكي فيه و تقولي علاه قول يا رب سلمتلك امري و راضية بقضاءك
جربيها و شوفي النتيجة
احذري ربي سبحانه يبتلينا احيانا و انا بغيت نسقسيك هل في ابتلائك تحبي ترضي فيكون لك الرضا ام تسخطي و يسخط عليك ربي سبحانه ؟؟؟؟؟

العني ابليس قومي حالا اتوضاي و صلي ركعتين و قوليها من قلبك راضية بحكمك يا رب ... استغفري في سجودك و ادعي المولى سبحانه عز و جل ادعي الكريم يكرمك من فضله و نتحداك اذا ما رتحـتيش
ما تخليش الشيطان يقلك من بعد و استناي و حتى الردود اقرايها من بعد روحي اختي صلي و استغفري و ادعي و راح يجي نهار و نقراو اخبار كيفاه ربي سبحانه فرج عليك و رزقك من اوسع ابوابه الللهم امين يا رب عاجلا غير اجل
ربي معاك

[إكليل]

أصبري فالصبر مفتاح الفرج و إلتزمي بأخلاقك فهي تاج على رأسك و كما قالت الأخت التي سبقتني لعل فيها خيرا و من خطبك قد لا يصلح لكي

[dalal 28]

حطي مشكلتك في قسم الرقية الشرعية ان شاء الله يعاونوك الاخوة الاعضاء
ربي يفرج عليك ويرزقك الزوج الصالح