غيره قاتله

[مشكلتي]

السلام عليكم و رحمة الله تعالى و بركاته
أنا شاب عمري 21 سنة و عندي خويا يكبرني بوحد العامين و نص ,يعني تقدر تقولوا بلي راه بالتقريب نتيجي في العمر و هو خويا الوحيد من بابا و ما ربي يرحمها و حالتنا المادية ميسورة و الحمد لله
مي والله هبلني بالغيرة ديالو يغير مني كيما نقولو بالعامية شي عجب
مالجري الوالد ديالنا يفضلو عليا بزاف موفرلو كل شي "سيارة اخر طراز و محل قطع غيار السيارات و بيت و راح يزوجو هذا العام بالبنت ألي حابها"ربي يبارك عليه و يزيدلو ان شاء الله بويسك عيب عليا نحصي خيرات الناس مي حبيت نقرب الصورة لاكثر
و انا الوالد بالتقريب الهدرة مايهدرش معايا على خاطر مانتفاهمش مع الزوجة الثانية ديالو"تزوجها لان والدتي الزوجة الاولى توفيت ربي يرحمها"
علابيها راني حاير علاه ديما يعس فيا ؟ لكان لبست يعسني و لكان درت اي حاجة تلقاه يعكس فيها و امبعد يدير كيماها
تخيلو يا خاوتي يغير حتى من الخليقة ديالي بويسك و الحمد لله ربي رزقني بحسن الوجه , و تلقاه ديما يقارن روحو فيا و انا ديما نقلو يا راجل الزين للنسا و هو ماحبش يحشم, و من فوق هاذا ديما يدبر عليا وحد الدباير ........!!!!!! مي والله مانحبش نعاندو و عمبلي لكان عاندتو الحل الموجود هو العراك"مي يبقى كبير عليا و زيد عليها و الله نعزو بويسك راه من ريحة ما ربي يرحمها"
مام القراية الحمد لله اخذت هذا العام شهادة ليسونس اعلام الي و حاب باذن الله نكمل ماستر و ممكن دكتوراه و هو ديما يدبر عليا و يقلي بركاك من القراية ماعندك مادير بيها غير حبس و ازرب تصالح مع مرت باباك باه تقل لبابا يفتحلك محل .
والله حيرني مافهمتش لهو يحوس على مصلاحتي لا ماهوش حابني نزيد في المستوى العلمي ديالي خاصة انو هو شهادة متوسط ماعندوش
بويسك انا الماديات ماتهمنيش و عمري بالعمر ماشفت المستقبل ديالي من الزاوية ديال بابا و مرتو ألي تكرهني وحابتني نكون خاتم في اصبعها كيما خويا و بابا
عمبلي يا خاوتي بلي طولت عليكم و بالاك دخلت شعبان في رمضان كيما هدرت على هم خويا و زدت هم مرت بابا
مي انا ألي هامني انو ترشدوني إلى سواء السبيل "كيفاش نخلي خويا يتعامل معايا كي المعاملة ألي بين معظم الأخوة و اهم حاجة يحبس من غيرتو؟"
و شكرا مسبقا

[مراد12345]

في مثل هذه الأمور

مادمت متأكدا من ذلك

أحرص على مصلحتك كما يحرص هو على مصلحته

وأبقوا أخوة

[ghaza_01]

اذا عاملك بالسيئة عاملو انتا بالحسنة و اجرك عند ربي
حاول اهدر مع الاب تاعك و افهم منو

[TOKYO]

خويا كبر خاطرك و ادا كان خوك نصحك هو تاني يخاف عليك ربما كاين بعض غيره او انانية بالصح ادا انت مقتنع بالشئ لي رايح ديره تكمل الدراسة و تكون مستقبلك باليديك يلزمك تصبر و طريق صعيب و صعيب
اما ادا تحاول تستافد من مساعدة لوالد جرب و ما عندك ما تخسر زيادة الخير خيرين كيما يقولو و خوك احسن معاملته مهما اساء اليك و في صلاتك ادعى ربي يهديه و ينوره طريقه

[sarah1424]

عجبتني كلمة قلتها في ريحة الوالدة ربي يرحمها وطد علاقتك بخوك وكون ديما قريب وكمل قرايتك وربي يسهلك
وحتى مرت باباك خلي علاقتك بيها طيبة وشوف مصلحتك

[* الحلم سكر *]

المشاركة الأصلية كتبت بواسطة مشكلتي

السلام عليكم و رحمة الله تعالى و بركاته

مام القراية الحمد لله اخذت هذا العام شهادة ليسونس اعلام الي و حاب باذن الله نكمل ماستر و ممكن دكتوراه و هو ديما يدبر عليا و يقلي بركاك من القراية ماعندك مادير بيها غير حبس و ازرب تصالح مع مرت باباك باه تقل لبابا يفتحلك محل .
والله حيرني مافهمتش لهو يحوس على مصلاحتي لا ماهوش حابني نزيد في المستوى العلمي ديالي خاصة انو هو شهادة متوسط ماعندوش

السلام عليكم
شوف خويا ما علاباليش علاه وقفتني العبارات الاخيرة بكلامك ... ممكن خوك يغير منك و ممكن انت فاهمو بالغالط في بعض الامور
مــثــلا : الجملة اللي فوق نظنك فاهمو غالط نقلك علاه ... خوك يدبر عليك تحبس لقرايا و تفتح محل لأنو هو هاذاك تفكيرو و يشوف فيها خرجت عليه علا بيها حابة تجيب طريقو ماشي غيرة لا علاخاطر هو هاذاك تفكيرو
لوكان جا ما يحبكش ما يقلكش هادا الكلام هو خايف عليك و يخمم على مستقبلك علابيها قلك ازرب تصالح معاها و و و
أنا لي شايفاتو بغض النظر على الامور اللي فيها ممكن شوية غيرة و هادي كاينة المناوشات بين اي اخوة خاصة انتم متقاربين بالعمر لكن اللي بينكم صح انكم مختلفين كثير في طريقة التفكير و طموحاتكم يعني اللي يشوفها هو نصيحة تشوفها انت دمار ليك و ترجمها ترجمة اخرى لكن هي وجهات نظر لا اكثر لا اقل
انا من رايي انت تاني ما تمدش الموضوع اكثر من حجمه و ربي يحفظكم لبعضاكم دايما يا رب

[أنور الزناتي]

السلام عليكم و رحمة الله و بركاته
هاذ الصوالح موجودين كامل بين الخاوة و خاصة في مثل ظروفك.
على هاذي أنا ننصك ما تكبرش الموضوع و تجعل من الحبة قبة...المشكلة
تاعك باينلي ماشي مع خوك. المشكلة تاعك مع مرت باباك. على هاذي أنا
نقولّك لازمك تلقى حل لهاذ المشكلة و ما تخليش علاقتك بيها تزيد تدّهور
أكثر... ربما لو تتحسن علاقتك بيها راح تكون علاقتك مع خوك أفضل.
المهم انا تبانلي خوك الكبير مهما كان لازم تقادرو و ما لازمش تفرّط فيه.
حاول تتقرب منو أكثر و تصاحبو... حاول تهديه مرة على مرة حاجة مليحة
تدخّل الفرحة في قلبو...حاول تشاركو في مشاريع المستقبلية و في تفكيرك.
خلّيه يحس دايما بلّلي راك تحبو وتقادرو و الدليل أنك تشاورو في أمور بزاف.

نتمنالك السعادة في حياتك و أنك تلقى الحل لهاذ المشاكل كامل.
قول آمين

[doba]

ربي يفتحها في وجهك ويحفظك أخي

[سرور]

ربي يكون في عون خوي هو صح خوك حاول توطد علاقتك بيه

[الفاتحة]

يبقى خوك حاول تكون الملاحة من عندك أنت ، غمض عينك على واش يقولك واكسب خوك ، يقولو ناس بكري خوك خوك ولا يغرك صاحبك ، وربي يحنن قلوبكم على بعضاكم، أما زوجة بوك ، فموش حكاية تكون خاتم في اصبعها ، الحكاية كامل هي احترمها وقادرها وإن شاء الله مايكون غير الخير .

المهم في حكايتك هو مستقبلك وانا نوصيك بحاجة وحدة كمل قرايتك الماستر والدكتوراه وربي يوفقك

[نصير24]

السلام عليكم

ماكش غير انت خويا اتعاني من هدا المشكل انا تاني اعني يوميا لكن الفرق بينتنا هو انو امي على قيد الحياة ربي يطول في عمرها.

انصحك ونفسي غير بالصبر وطول بالك فقط .

[amine khaldi]

قابل السيئة ب الحسنة وادعو الله ان يهديه

[FellaD]

يا اخي. ننصحك تقرا كتاب استمتع بحياتك. للشيخ محمد عبد الرحمن العريفي

اكثر من رائع و ستجد الاجابة في ذلك الكتاباو ادعيلي
فيما يخص اخاك. عامله بطريقته اذا غار. زيد اشكره ليزيد في غروره و اجعله يتباهى
فيما يخص اباك. طاعته واجبة عليك لا تقلل من احترامه حتى ولو تزوج بأخرى فهو في الاخير انسان و يشعر مثلك ليس. من الظروري. ان تكون خاتم في اصبع زوجة اباك لكي تحصد المحبة منه بالعكس. حاول ايجاد. ما يحبه اباك اكثر و تقرب منه
اما زوجة اباك. نفس طريقة. اخاك اوهمها انك. معها و تعامل معها. لكن في نفس الوقت. حافظ على كرامتك

بخصوص الدراسة ربي يعاونك او كمل متحبسش. ان شاء الله نشوفوك دكتور

تقبل مروري لا تنسى الكتاب هو متوفر حمله من غووغل

عجبتني هذه الحكمة. اذا ما الذنب وافى باعتذار...فقابله بعفوٍ وابتسام
ولا تحقد وان ملئت غيظاً...فإن العفو من شيم الكرام

[Assouma 93]

استعذ بالله من الشيطان يا اخي و لا تدع له مجالا في ان يوقع بينكما حاول ان تتودد اليه بالكلمة الطيبة و الفعل الحسن من اجل امك رحمها الله و اسكنها فسيح جنانه

[بلسم غرام2018]

اذا عاملك بالسيئة عاملو انتا بالحسنة و اجرك عند ربي
حاول اهدر مع الاب تاعك و افهم منو