ساعدوني ياناس

[مشكلتي]

السلام عليكم انا فتاة مازال شهرين على عرسي اذا حاب ربي بصح راني كارهة الزواج باتم معنى الكلمة والسبب الرئيسي هو خطيبي ثم من بعده يماه مشكلتي هي اني مانيش حاساتو راجل معايا
نهار جا خطبني جاوني بعقلية المهم الراجل والمرا يتفاهمو خصوصا انو فاميلتنا ويعرفو عقليتنا وحنا كانو يبانولنا ناس يحتارمو الخصوصيات بين الراجل والمرا يماه كانت تبانلي ناس ملاح بزاف كنت نحسد روحي عليها الحمدلله تفاهمنا على كلش وقاتلي واش تتفاهمي نتي ووليدي راني واجدة انا وخطيبي كنت متافقين تماما مع العلم كنت مخطوبة من قبل جامي تفاهمت انا وهو حسيت روحي ربي فرج عليا وقلت في نفسي السبب هو المستوى الدراسي خاطر اللول ماشي قاري والثاني كمل دراساتو وانا طبيبة خديت درس بلي باش زوج يتفاهمو لازم نفس المستوى الثقافي بصح غير بدينا ندخلو فالتفاصيل ودرنا الفاتحة تبدلت العقلية كل حاجة تدخل روحها فيها انا قلت معليش انا المهم نكون راضية مع وليدها من بعد قالي نهارنا اللول نروحو الفندق ونروحو سمانة تحواس بصح يماه قالت لازم تجوزو نهار اللول فالدار مع العلم شرطت داري وحدي بلا مانزيد نحكي قس على هاد المنوال بزااااااف امور وحدوخرا ويماه كي تحب حاجة ماتقولهاش لوليدها تعيطلي وتقولي قنعيه وانا نحشم منها وتهدر معايا بطريقة غريبة كنت نقول انا موسوسة ام وحابة تفرح بوليدها المهم انا وهو كنا نديرو واش نحبو قررنا العرس يكون فالشتا اللي فات يماه ماقبلتش مع اني شرطت فالزواج خطوبة ماتفوتش عام وهوما قبلو بفرح وسرور مالقاش واش يقول انا زعفت ودارنا رفضو بصح في خاطرو قنعتهم حتى للصيف كل عطلة فيها خير حنا عندنا الضيق فالدار باش ندير فقاعة حفلات حكمت صالة ندير فيها عرسي وهو يديرو فالدار عندهم الوسع ملي سمعت يماه وهي تعيط وماشي عاجبها الحال حنا مافهمنا والو واش دخلها ومن هداك النهار وهي تدير فالمشاكل ولسوء حظي الصالة الشهر اللي فات غلقت وبدينا نحوسو على وحدوخرا قاتلي انا مستحيل نبدل تاريخ الزواج قلتلها ياخي نتي تديري فالدار وحنا التاريخ لي لقيناه نتي ديري على حسابو من بعد بيومين ولا اسبوع كيما حبيتي المهم جوزت شهر فلي كوشمار مالقيت حتى صالة وهي كل يوم تندب عند راسي وهو خطيبي لقالي صالة بعد التاريخ الاول بشهر وانا وهو قبلنا يماه ماقبلتش وزدت دراهمي وحوست على صالة وحدوخرا غير باش تخطي راسي وانا بالقهرة تاع خطيبي اللي ماعندو حتى كلمة بلسيف باش لقيت وحدة هي كي لقيت ماعجبهاش الحال قلتلها راني لقيت فنفس الشهر دوكا نتي قرري التاريخ اللي تدوني فيه وعيطو لابي قولولو قاتلي انا لازم نشوف مع الطباخ المهم اخرتها اعطاتلي التاريخ ديالها قولتلها يعطيك الصحة يساعدني خاطر لاغوب بلونش كي نبدل تكون كاينة هداك النهار ورحت بدلت عندي لي تكري لاغوب بلونش التواريخ وفرحت كي سلكت على خير موراها بيومين عيطت قاتلي مايساعدنيش التاريخ الطباخ مايجينيش قلتلها بصح نتي قلتي الطباخ هدرت معاه وخلاص "بين قوسين والله ربي شاهد عليا حضرت كامل عراسهم ولا واحد فيهم جابو طباخ العكس خياتها هوما اللي طيبولنا في عراس ختي وخويا " ودوكا جابت تاريخ بعيد على ديالي بزاف ووليت في خسارة تاع لاغوب بلونش اللي خلصها وليدها وهي عارفة مليح بلي هداك التاريخ مايساعدنيش الحاجة اللي على طول الخط في فمها ماتديريش نتي العرس ديري العشا برك كل يوم تعيط لاتفه الاسباب وانا مانحبش نهدر معاها نحشم منها بزاف تقنطني وتكوبي وكي عيطت اخر مرة قاتلي انا مايساعدنيش التاريخ يا اما تبطلي نتي الصالة يا اما مانديرلكش عرس كي نجيبوك قلتلها اللي تساعدك ديريها اللي تخرج عليك ديريها قاتلي ماشي العرس اما تبطلي الصالة اما نديك بالسكات بلا اعلان بلا كورتاج تهديد صريح هنا رحت حكيت لماما اللي ماسكتتش على هاد الهدرة وعيطت لوليدها اللي مادخلش كامل روحو فالموضوع خلاني وحدي نعاني معاها وكلما يصرى مشكل يهرب ماشي غير مع يماه المهم درنالها واش حبت والتاريخ اللي حباتو و حتى الكبش اللي يجيبوه للعروسة قالت لوكان مانديرلكش الحنة مانجيبلكش الكبش ابي كي سمع بدا يضحك قالي هاد الامور كلها بالسماح قالي ماتديري والو في راسك الصالة والعرس والكبش والحنة وهاد التفاصيل كامل زيادة الصح فالهنا نتي وراجلك بصح انا مع راجلي معلابالوش مارانيش مهنية مانيش حاساتو عندو راي ماشي غير مع يماه هو مليح معايا بصح غير يصرا مشكل انا اللولة يضحي بيا نهار هو قالي قنعي داركم نديرو العرس فالشتا انا وقفت معاه وهو جا بكل روح رياضية قالي خلاص ماتديريش العرس نتي وخلي االامثلة اللي قهرتني يعاملنني اميرة اول مشكل يرميني فالواد مثال خطرة شافني ابي معاه كنت فطونوبيلتي مالغري راجلي وحلالي بصح متت بالحشمة وقتلو لبابا جا يدي الطونوبيل خاطر طونوبيلتو خاسرة وموالف يجي يديها كي تحبس ديالو عادي دارنا مايدخلوش كامل روحهم قتلو كي بابا شافني نروحو نجيبو ماما من العرس واديها باش مايقوليش بابا راكي تكذبي غير قدر برك قالي مستحيل بعد هاداك المشكل نتلاقا بيماك نحشم منها قتلو استحمل في خاطري مع العلم ماما مليحة فوق القانون معاه وجامي ثقلاتو قتلو سينو نخرج كذابة قدام ابي هرب وخلاني وخرجت كذابة قدام ابي وهو طاح من عيني بزااااف نحسو مايقدرش يواجه وهذاك الحب اللي يظل يحكي عليه في اول موقف صعيب يبان بلي خرطي شوفو بلاك راني غالطة اذا غالطة ورولي اسمحولي طولت عليكم ماعنديش لمن نحكي وواش راني نعيش كليوم مايبانش قدام هاد الشي انا راني خايفة يماه ولاتلي كوشمار وليت خايفة حتى نروح ليهم سورتو علابالي بيه مايحل حتى مشكل ومايفرضش رايو راني نساعف برك بصح كي خلاني حاصلة مع ابي هاديك القطرة فيضت الكاس فهموني اذا مارانيش فاهمة والله عييت وليت حاسة روحي مزوجة بلا راجل

[الصديق قروف]

واش تحبي نقولولك انتي راكي مزوجة مزلولك غير لولاد

[.kiki]

السلام عليكم ورحمة الله و بركاته
قرأت ما كتبت كلمة كلمة و أقول لك كان الله في عونك أختي، لا بأس عليك، تفاءلي خيرا.. لا تقنطي.
شوفي ختي نفهمك في حاجة، باش يكونو زوج متفاهمين راهي قضية فكر وفهامة، ميش مستوى دراسي ولّا فرق فالعمر ولّا اي حاجة خرا، عندي صحبتي لقات كلّش كانت تحوّس عليه في خطيبها.. القراية، الالتزام، قوة الشخصية.. بصح tellement طريقة تفكيره و تفكيرها ميش كيف كيف، هو من عالم وهي من عالم، لقاو صعوبة باه يتفاهمو، malgré قاري بصح تحسو ميفهمش.. و عندي صحبتي وحدة خرا حتى هي طبيبة نهار لي جا خطبها واحد ماهوش مكمل قرايتو ماكانتش رافضة الفكرة قاتلي يا اكرام انا نحوّس واحد "فاهم" الفهامة و النضج هوما لي يهموني.. و لقيت بلي عندها الحق بالبزاف.
لاعلينا.. صحبتي الاولى عرسها مور رمضان.. والثانية مقبلش باباها
العبرة؟ كلّش بالمكتوب.
نرجعو لموضوعك (متقلقيش مني كي راني نكثر فالهدرة و الله كون ميش حاسة بيك مكنتش كثّرت خلاص)
بالنسبة لخطيبك منقدروش نحكمو عليه لاننا منعرفوهش... مسحيل نقلّك راهو فيه و فيه ولّا نيتو راهي هك و هك... انتي أدرى وحدة بيه. هادي حاجة.
الحاجة التانية لازم كااامل علينا نعرفو -و نتقبلو_ بلّي بين أي زوج لازم يكون كاين اختلاف... لازم. مستحيل تلقاي زوج يخمو كيف كيف في كلش ولّا عندهم نفس المبادئ في كلّش. هادي حاجة في الفيلمات و ماكانش.
و باه نتجاوزو المشكل هادا لازم يكون تقبّل للاختلاف. قريت في وحد الكتاب منذ فترة وحد العبارة حبست عندها مطوّلا: الزواج مسؤولية، الزواج تضحية، الزواج تقبّل للاختلاف.
صدقيني أيام وانا نخمم في هاد العبارة و حابة ندخّلها مليح في راسي باه مانتفاجئش ساعة خرا.
ضرك نصيحتي ليك نتي أنّك تصارحيه بالشي لي غايضك منو، قال يا فلان أنا راني غايضتني حاجة شحال من مرة وانا نلاحظ فيها و مانيش حابتها تتعاود في المستقبل باه نبنيو حياتنا على الصح ان شاء الله. ميش تقوليلو راك متحبنيش، لا، قادر الطريقة لي يعبر بيها على مشاعرو معندهاش علاقة مع المشاكل في تخمامو هو.. على هادي لازم تحكيو و تفهمو بعضاكم.
و نزيدلك حاجة ختي العزيزة، البيت لي مبني على الاحترام في رأيي أقوى من لي مبني على الحب.
أما بالنسبة لأمو، فاظن أنك محظوظة كي عدتي بدارك وحدك. يعني رايحين تكونو بعادد عليها و تعيشو حياتكم كيما حبيتو.
هادا ماعندي باش نقول لأختي، و راكي قارية و كبيرة و زيدي خمي. ماكانش واحد يعرف الوضع كيما تعرفيه نتي، حنا منعرفوكش و منعرفوش خطيبك، بصح كامل نعرفو بلي المشاكل هادي راهي paaaaaaaaaartout
ربي يهنيك ختي العزيزة و يسهّلك ان شاء الله و يبعد عليكم الشيطان و شرّو.
بالتوفيق ان شاء الله.

[غير هام]

السلام عليكم

الله يفرج

[hodayena]

راح نعطيهالك نصيحة من مجربة انتهى بي المطاف الي الطلاق يا ختي سلكي روحك منو هدا الي يماه تدخل في عرسك ومش من حقها تدخل انتم ناس ملاح بزاف وكي شافوكم سهلتو راهي غير تاكل روحها والراجل الي موقفش معاك دوكا مراحش يوقف معاك من بعد اختي خمي مليح ادا تنازلتي وانتي على البر صافي كي تتزوجي ينجمو يجو كامل العرش ديالو يعيشو معاك الخطبة كي تبدى بالمشاكل تخلاص بالمشاكل وزواجها مر حتى ويلا كان يحبك راح تكرهيه في الزواج صافي سلكي روحك منو حتى لو كنتي عاقدة في البلدية المهم تريحي نفسك خير من غدوة تمرضي وتكوني معاه بالاولاد دخلت روحها بزاف وهو يهرب انا نصحت وانتي ادرى بضروفك وطاقة تحملك

[ayaamira666]

ار ى من كل هذا ان اهلك لا علاقة لهم بالموضوع
لازم الاهل نتاعك يكون عندهم موقف حازم و مايسمحوش لهذي التجاوزات تصرا
ولكن انت لعبتي دور كبير في هذي المشاكل كون من الاول خليتي اتاريخ العرس و الاشياء الاخرى بين الرجال مايصراش هاذي التناوشات
ربي يسهلك يا اختي و يسرلك امورك
نقولك حاجة هذا اسمو ضغط العرس راهو يدير هكا بصح مورا العرس كلشي يتبدل و تكون عندك طريقة اخرى في التعامل مع الامور
يعني تكوني صارمة

[samira-25]

نصيحتي ليك اختي ما قريت واش كتبتي كامل -وبعد المعاناتي لحد الان مع عائلة زوجي الدي لحد الان بعد 18 سنة زواج اي حاجة يشاور ااخواتو البنات رغم انهم في ديارهم مزوجين وبعد كل تضحياتي معه ماديا ومعنويا - فكي عليك ماعندوما خاصك ختى تتحملي ضغط امو وهروبو من المواقف لي تواجهك وتواجهو صدقيني نفضل نكون عزباء بلا زواج ولا راجل ماعندوش شخصية لانك رايحة تعاني منو بزااااااااف انا لي مصبرني راهم ولادي لا اكثر وانتي حرة

[عين الصقر]

المشكل انكم فاميليا وانتي قدمتي تنازلات كثيرة على حساب هذا العلاقة وعلى حساب ماذكرتي في الموضوع
شخصيا مانحبش دخلو الرجال في هدرة النساء هذا في ما يخص خطيبك.
وهذو المشاكل كاينين في العراس
عرس ليلة تدبارو عام كيما يقولو

مابقاش بزاف شهرين . مادام دارك وحدك وأنتي متفاهمة معاه فيما بيناتكم ماتخميش بزاف
منا ورايح زيري روحك
الله يوفقكم

[rose de sable s]

سلام
الكثير يقولو لازم مند تنازولات باه زوج يتفاهمو
لكن الكثير يفهم هذه التنازلات ضعف شخصية او انو شخص لاصق فقط
انت صارحيه بكل شئ و قوليلو رايك و انو موقفش معاك
انت كنت معاه مراءة و نص انت تساهلت علي جالو لكن والدته استغلت هذا الشئ الناس تحب لي يدلل و يشرط عليها
مت لول كات ملاح معاك و كي حككنوك بداو يتشرط عليك حتي وان كانت سكنتك وحدها اكيد امهو رايح تجي عندك و ديرلك مشاكل
شوفي ناي كبار يحكو مع امو هوما متمسكين بيك لكن حبين يمشوك كيم يحبو هوما
خمي مليح و حق معاك و استخيري الله

[jissi]

مليح البر بالوالدين بصح اسمحيلي هذا راجل ماعندوش شخصية. كاين حوايج بين العائلتين وكاين حوايج خاصين بالشريكين فقط.

[oumhana]

إقراي مليح واش كتبت الأخت hodeyena والأخت samira -25 و الحديث قياس .

[الصديق قروف]

المشاركة الأصلية كتبت بواسطة .kiki

السلام عليكم ورحمة الله و بركاته
قرأت ما كتبت كلمة كلمة و أقول لك كان الله في عونك أختي، لا بأس عليك، تفاءلي خيرا.. لا تقنطي.
شوفي ختي نفهمك في حاجة، باش يكونو زوج متفاهمين راهي قضية فكر وفهامة، ميش مستوى دراسي ولّا فرق فالعمر ولّا اي حاجة خرا، عندي صحبتي لقات كلّش كانت تحوّس عليه في خطيبها.. القراية، الالتزام، قوة الشخصية.. بصح tellement طريقة تفكيره و تفكيرها ميش كيف كيف، هو من عالم وهي من عالم، لقاو صعوبة باه يتفاهمو، malgré قاري بصح تحسو ميفهمش.. و عندي صحبتي وحدة خرا حتى هي طبيبة نهار لي جا خطبها واحد ماهوش مكمل قرايتو ماكانتش رافضة الفكرة قاتلي يا اكرام انا نحوّس واحد "فاهم" الفهامة و النضج هوما لي يهموني.. و لقيت بلي عندها الحق بالبزاف.
لاعلينا.. صحبتي الاولى عرسها مور رمضان.. والثانية مقبلش باباها
العبرة؟ كلّش بالمكتوب.
نرجعو لموضوعك (متقلقيش مني كي راني نكثر فالهدرة و الله كون ميش حاسة بيك مكنتش كثّرت خلاص)
بالنسبة لخطيبك منقدروش نحكمو عليه لاننا منعرفوهش... مسحيل نقلّك راهو فيه و فيه ولّا نيتو راهي هك و هك... انتي أدرى وحدة بيه. هادي حاجة.
الحاجة التانية لازم كااامل علينا نعرفو -و نتقبلو_ بلّي بين أي زوج لازم يكون كاين اختلاف... لازم. مستحيل تلقاي زوج يخمو كيف كيف في كلش ولّا عندهم نفس المبادئ في كلّش. هادي حاجة في الفيلمات و ماكانش.
و باه نتجاوزو المشكل هادا لازم يكون تقبّل للاختلاف. قريت في وحد الكتاب منذ فترة وحد العبارة حبست عندها مطوّلا: الزواج مسؤولية، الزواج تضحية، الزواج تقبّل للاختلاف.
صدقيني أيام وانا نخمم في هاد العبارة و حابة ندخّلها مليح في راسي باه مانتفاجئش ساعة خرا.
ضرك نصيحتي ليك نتي أنّك تصارحيه بالشي لي غايضك منو، قال يا فلان أنا راني غايضتني حاجة شحال من مرة وانا نلاحظ فيها و مانيش حابتها تتعاود في المستقبل باه نبنيو حياتنا على الصح ان شاء الله. ميش تقوليلو راك متحبنيش، لا، قادر الطريقة لي يعبر بيها على مشاعرو معندهاش علاقة مع المشاكل في تخمامو هو.. على هادي لازم تحكيو و تفهمو بعضاكم.
و نزيدلك حاجة ختي العزيزة، البيت لي مبني على الاحترام في رأيي أقوى من لي مبني على الحب.
أما بالنسبة لأمو، فاظن أنك محظوظة كي عدتي بدارك وحدك. يعني رايحين تكونو بعادد عليها و تعيشو حياتكم كيما حبيتو.
هادا ماعندي باش نقول لأختي، و راكي قارية و كبيرة و زيدي خمي. ماكانش واحد يعرف الوضع كيما تعرفيه نتي، حنا منعرفوكش و منعرفوش خطيبك، بصح كامل نعرفو بلي المشاكل هادي راهي paaaaaaaaaartout
ربي يهنيك ختي العزيزة و يسهّلك ان شاء الله و يبعد عليكم الشيطان و شرّو.
بالتوفيق ان شاء الله.

ادعم قوله
شاوريه و تفاهمو وضحو الامور الي بينكم يقعد بينكم ‏
ولذي بين العائلات لكم راي فيه ‏‎
‎

[محبّة الخير]

بالرغم من كل هاد الشي ايلا كتب ربي في كتابو انك تكوني ليه راكي رايحة تكوني ليه وايلا العكس العكس خليها بيد ربي وبالنسبةلعجوزتك كامل راهم يتقلشو اصبري عليها زعما هيا رايحة تعيش كثر من لي عاشت

[.kiki]

مستحيل نقدر نقول لوحدة فكي عليك مهما صرا!! صار الشيوخ و يحبو يسمعو من الطرفين قبل ما يقولو لواحد فيهم أي حاجة و حنا نروحو نقولولها خطيك و فكي؟؟
الواحد كي يكثر يحكي التجربة تاعو و مايزيدشت خاطر ميش الرجال كامل كيف كيف و الظروف ميش نفسها
مانيش منحازة لجهة معينة بصح الواحد يدير في بالو بلّي هادي راهي حياة ناس لي رانا نحكيو فيها

[maya bella]

اول الشيء السلام عليكم و رحمة الله تعالى و بركاته
اختي ربي ان شاء الله يفرج عليك و ربي يسهلك و يهنيك
ثانيا رغم انني لست متزوجة و لا مخطوبة لكن ربما تجاربي البسيطة في الحياة تخول لي ان ابدي رأي و أقدم لك نصائحي
اول مالفتني في كتاباتك انك تطرقت لفشل الخطبة الاولى بسبب انو الخاطب ليس متعلم هذا على حسب قولك لكن هذا ليس معيارا ابدا السبب الحقيقي هو اختلاف الفكر كل واحد كيفاه عاش و كيفاه تربى و كل واحد و مبادئوا ايضا في هذه الحياة اختي انا ايضا ادرس الطب و الله العظيم يقراو معايا اشخاص ذكور ليسوا رجال وقت الصح تلقاينا حنا لبنات صحيح مانجمعش لكنها عينة فقط للتوضيح
وكاين صح ماتلقايهش قاري بصح راجل وسيد الرجال كون نعطيك امثلة من عائلتي فقط مانكملش
كلنا نحبوا الراجل القاري لكن هذا لا يعني انو يكون متعلم يعني لا يوجد هناك اختلاف و مشاكل
اما بالنسبة لمشكلنك اختي عليك ان تواجهيه و ان تضعي النقاط على الحروف وأكد لك مادام انه يحبك ستعيشين معه اجمل حياة و أسعدها بإذن الله لكن دائما تأتي مواقف ستجعلك تحزنين و تجعلك تفقدين الثقة لذلك عليك مصارحته افضل لاني عشت هذا الموقف وانت ايضا لك دور عليك ان تعرفي كيف تتعاملي معه لانو في اشياء على حساب ما حكيتي كان مالازمش تسكتي عليهم
سامحييني على الاطاله و ادعوا الله ان يوفقك و يرزقك السعادة و ان يرزق جميع بنات المسلمين الرجل الصالح