شوف ذالجيل اللي يتمحلى//// فارح بأيامو الكحلة
ما يمرحب ما يقول سهلا//// حاط قفلات في وذنيه
تعيا تهدر لو ما يفهم//// حابس فالحدرة ويخمم
يكسل في لسانو و يفمم//// و ديمة امكسر من يديه
يحوس على كولش واجد//// ما يبكرشي يصبح راقد
لنص انهار و هوا خامد//// ويلا ناض تحصل فيه
في امو يتخنزر ويربرب ////يحقر فخواتاتو ويسب
في ذالجيل تبقى متعجب//// يا ربي و الطف بيه
حتى من لبسو مكشوف//// امخدر عقلو مخطوف
معجب في شعرومصفوف//// في راسو خط امواتيه
ما شافش سروالو طايح ////وحط ذاك الجال الفايح
يا عيبي ذالجيل الجايح//// حشومة هاذ العار عليه
شوف ذالجيل اللي يتمحلى//// فارح بأيامو الكحلة
ما يمرحب ما يقول سهلا//// داير كوتور في وذنيه
نص انهار يضحي ساهي//// يعرض للناس و لاهي
وفي العشية يعشي زاهي//// و لا عندو شغل املهيه
كل واحد يعيش ايامو//// انهاراللي يفطن من احلامو
يتفكر في باباه و كلامو//// يبقى يفسر في معانيه
راهم يروحو ذوك لخدود//// و يجو لك ايام لجلود
ما يبقى لك زينك مقدود//// ما تلقى باه اداويه
خمم لا تبقاش كسلان//// لا تفوتشي حياتك ندمان
نوض اسقعد يا فنيان//// شمر على ذراعك لهيه
ما نعمش اولاد الناس//// افهامة و علم في الراس
افهمني لحديث اقياس//// المتربي لا خوف عليه
نطلب ربي لهاذ الجيل ////ما يطولش عليه الليل
يسهل عنو المستحيل//// و يطلع قمرو يضويه
حنن عنهم سيد سيادي//// تجعلهم أركايز لبلادي
نبني و انعمر بالأيادي//// وبيهم وطني نحميه
تمت بقلمي medcherif03
( تقرير عن مشاركة سيئة )، و الموجودة أسفل كل مشاركة .
2016-02-17, 18:44
شوف ذالجيل اللي يتمحلى /// (بقلمي)
العرض العادي
