حماتي دمرتني

[عاشقة سكون الليل]

السلام عليكم اخوتي انا راح نحكيلكم قصتي و ارجو منكم ان ترشدوني لطريق الصح

انا عندي سنتين زواج اعيش مع عائلة زوجي ........زوجي و من في البيت كلهم يحبونني الا حماتي ...... دائما طيشلي و

لمعاني حتان توصلت في احد المرات انها تضربني و انا بالحمل و زوجي مادار والو على جالي...قلت خلي نصبر بلاك

تتعدل معايا .......مرضت بعينها و لات ماتشوفش خلاص و رغم ما درتلي هزيتها احسن من بناتها .......بصح كي رتاحت

دورك زادت ولات ديرلي فالمشاكل من جديد.......واحد النهار روحت طيشت لكوش تاع ولدي في لابوبال راحت هزاتوا و

طيشاتوا في غرفة النوم تاعي ....قاتلي علاه طيشي فيه و الناس تشوفو ...شوفي بلاصة اخرى طيشيه فيه....قتلها مالا

نخبيه في القردروب .....و دخلت لغرفة نومي و خبطت الباب جات هي حلت الباب و دفلت عليا و حكمتني من شعري و

قاتلي نمسح بيك الارض.......وليت تغششت هزيت ولدي ورحت لدارنا و زوجي كان ماكانش فالدار ........دورك زوجي

مايكلمنيش و مايسقسيش على ولدوا مع ان علابالو بلي ام هي لقاعدة دير فالمشاكل كان ديما يقولي اصبري برك

على جالي........بصح دورك كي ضربتني ام و رحت لدار بابا قالي مادامك خرجتي من الدار يعني انت لي درتي


المشكلة.......فوق هدا قاتلهم حماتي بلي انا ليضربتاه و بسقت عليها......حسبي الله و نعم الوكيل

[nawel zed]

اختي ربي يكون في عونك و يصلح الاحوال ان شاء الله غلطتي كي خرجتي بدون اذنوا هنا من كنتي مظلومة وليتي ظالمة ربي يهدي النفوس راجلك ما يقدر يغضب اموو ما يقدر يجي في صفك بين نارين و حنا النساء مشاكلنا ما تحبسش كون كي شفتيها تسبب راكي تسايريها مش عيب والا ضعف لا قدر و تربية و تمديلها ديما الوجه الطيب حتى كي تهدر اسكتي كيما تعاملك رديلها العكس بالخير مع الوقت تشوفها في روحها تمل و تتبدل الحياة الزوجية صعيبة لازملها صبر

[هيام الريحان]

ربي يصبرك يقولك التمس لاخيك77 عذرا بالاكش راجلك راه يبنيلك ولا راه يحوس على الكراء انتي اصبري وخليها على ربي وصلي وادعي وقومي الليل وهذا راجلك يجي النهار ويجي يديك من دار باباك ماتخميش بزاف تلقايه متوحشك ومتوحش وليدو بصح خايف من امو ومتمني يشوف وليدو يكبر ان شاء الله يكبر في عزكم ويولي راجل وتزوجوه وتشوفوا ولاد ولادو قولى اميييييييييييييييييييييين

[الألماسة]

اختي الكريمة
انتي غلطتي كي رديتي عليها و زدتي غلطتي كي خرجتي وحدك من دارك
لو ستنيتي زوجك و حكيتو و تفاهمتو و اذا ماكانش تفاهم هو يديك لداركم
معليش اختي اصبري شوي و ربي يفرج عليك و علينا
لا حول و لا قوة الا بالله

[hodayena]

اختي ربي يفرج عليك لكن خطاك كي خرجتي من الدار وحد هذا واش راهم العجايز تع دوكا يحوسو كون استنيتي حتى الزوج يجي وهو يقرر يا يديك يا يحل المشكل مع امو

[عاشقة سكون الليل]

المشاركة الأصلية كتبت بواسطة nawel zed

اختي ربي يكون في عونك و يصلح الاحوال ان شاء الله غلطتي كي خرجتي بدون اذنوا هنا من كنتي مظلومة وليتي ظالمة ربي يهدي النفوس راجلك ما يقدر يغضب اموو ما يقدر يجي في صفك بين نارين و حنا النساء مشاكلنا ما تحبسش كون كي شفتيها تسبب راكي تسايريها مش عيب والا ضعف لا قدر و تربية و تمديلها ديما الوجه الطيب حتى كي تهدر اسكتي كيما تعاملك رديلها العكس بالخير مع الوقت تشوفها في روحها تمل و تتبدل الحياة الزوجية صعيبة لازملها صبر

و الله اختي عاملتها بكل انواع الطيبة و كي طيشلي الهدرة و لله نخبي في قلبي و نسكت ....حماتي انسانة ظالمة

يقدر عليها غير ربي شكرا اختي

[" أبو عبود"]

قد تكوني اخطات كي خرجت بدون إذن زوجك لكن الانسان لديه قدرة تحمل. نقلك راكي مزال لاباس عليك وماكنش شيء يستاهل انك تقلقي روحك. حتى عبارة " حماتي دمرتني" مش مقبولة منك. هي راهي في ارذل العمر ورايحة للقبر وانت ما شاء الله عليك مزال في اول حياتك. توكلي على ربي صلي وادعي. خلي باباك يهدر مع زوجك ويطلب سكن انفرادي لان هذا حقك خصوصا في ظل الظروف مثل هذي. واذا حب يرجعك تشرطي عليه امه ما تكون عندك معاها اي علاقة.

[نارينا]

انت امانة عندهم ومالاترضاه لابنتها يجب ان لاتفعله بك ربي يهديها وللصبر حدود ,,,,يعني ان تكون هناك ملاسنات بين الكنة والحماة هذا شيء وارد لكن ان تصل لحد الضرب والاهانة الجسدية هنا يجب ان تتوقف

[halouma tita]

كيفاه تضربك يعني مكان حتى واحد في الدار ل سلك مكان لا خو زوجك ولا باباه ولا حتى سلفتك يعني حماتك لازملها واحد يهدر معاها ويردها لعقلها
لازم واحد يدخل من أهلك ( باباك ) وزوجك تاني لازم يجي مع الصح
وربي يهديها حماتك

[أم شروفة]

اااااااااااااااه الكوش راه داير مشاكل أنا كذلك يقولولي ما ترميهش.لكن اختك ذكيه ولن أترك مجرد عجوز تدمرلي حياتي .فنرميه داخل لابوبال من تحت كامل حتى ما يبانش .وكي يتكلمو نبتسم وهكذا تستمر الحياة.إذا رجعتي تعلمي ماااااتروديش .شكروك ابتسمي ذموك ابتسمي .و عقبي حياتك ابتسامات كاذبةولا انسى كلمي زوجك في الهاتف ووضحيلو وش صرا.أكيد لو يسمع باللي أنتي ضربتي أمه مستحيل ترجعي للدار

[أم عبد الكريم]

ربي يفرج عليك و يهدي هذه الحماة المتسلطة و بغيت نقولك انك غلطتي كي خرجتي من دارك في غياب زوجك و بدون اذنه حاولي تصلحي الموقف و الحماة هذي اتبعي معاها سياسة التجاهل هكا رح ترتاحي من تكسار الراس مع راجلك

[hodayena]

اه اختي تفكرت انا في الحقيقة عندي بوبال في شمبرتي يعني نلم صاشي ونخرج كل يوم قبل النوم نفرغ لابوبال ومعنديش الريحة كامل في الشمبرة ونعقد مليح علابالي بلي تقلب يعني اشري بوبال وتتهناي اتصلي بزوجك وحلي المشكل وقبل ما تولي اشري بوبال صغيرة تع شنابر يديرو 150 دج وفرات وقولي لراجل يخرج الصاشي قبل النوم وفرات وربي يهدي سرك

[ام محمد معاد]

الله يفرج همك .انا نانيش ساكنة هعاها وما سلكتش من خبثها
الله يقدرك يجو يخطبونا بوجه ومين يوصلونا يورولنا الوجه الاصلي.
يا اختي ما تخربيش دارك بيدك وتخليها تفرح كي وصلت لمرادها باه تخرجك من الدار لعفسي على قلبك ورفدي ولدك وولي لدارك وديري بوبال في الشومبرا ومين يخرج راجلك عطيه يرميها.
بعد ي على الشر و غني له

[geologie]

ربي يصبرك تأكدي ربي لا ينسا أحد ربي يجيبلك التفريج

[سلواان]

المشاركة الأصلية كتبت بواسطة nawel zed

راجلك ما يقدر يغضب اموو ما يقدر يجي في صفك

لي تعليق على هاذ العبارة ..لست اريد للزوجة تصعيد الموقف لا أبدا..
وماذا لو غضبت الأم ؟ طاح السما على الأرض ؟
يعني برأيك يقبل الظلم من أجل ارضاء أمه ؟
والله عجيب أمر مجتمعنا ...ماذا لو كلم أمه واوضح لها ان الظلم ظلمات يوم القيامة ..لماذا يسكت عليها ؟
أليس ذلك يزيد في طغيانها وجبروتها ..ليس عيبا ان يواجه الإبن أو البنت الأم بالحق طبعا مع التزام الأدب في مخاطبتها ..
ألهذه الدرجة يكون الخشية من الله ..؟
ثم أين في شرعنا ما يمنعنا من قول الحق للوالدين ؟ لا أبدا ..الله سبحانه وتعالى أمرنا الإحسان للوالدين .وطاعاتهما في المعروف وليس في المنكر ..
هذه الأم ترتكب المنكر ولما لم تجد من يتصدى لها تمادت ..قال يا فرعون واش فرعنك قالهم واحد ما ردني ..
ليس بعيدا أن تذهب هذه الأم وقد سبقنها كثيرات الى تطليق تلك الزوجة المسكينة ..اذا لم يقف ذلك الإبن ليثبت لأمه أمه أنه لايمكنه أن يكون نصيرا للظلم ..والله يا إخوة لأمرنا يدعو للإستغراب فلاتعاليم ديننا السمحة التزمنا بها ولا الضوابط التي تحكم العلاقات في المجتمعات الأوروبية ..المتحضرة عملنا بها ..
إنها حالة من التدري لاسابق لها ...الظلم مستشر في مجتمعنا الذي يدعي الإسلام والمحافظة ..وحالة من الصمت سائدة لدى كثير من العائلات حيث تتجرع فيها الضحايا مرارة القهر والإذلال من طرف من يُفترض أنهم حماة لهم . ..فقط لأجل تجنب الفضيحة والعيب .صاحبة المشكلة ..عليها أن تعيد حساباتها من جديد وتبحث عن طرق وسبل تستطيع من خلالها تحسيس زوجها لتحول دوره من دور المتفرج الى دور الشاعر بمعاناتها فتوقظ فيه داعي نصرتها ومؤازرتها ..اضافة الى محاولة تقويم سلوك أم زوجها بالعقل والمداراة ..حفاظا على استقرارها في دار زوجه فإنه والله لهناك من الرجال من لايكلف نفسه أمر الحفاظ على زوجته فيكفي أن تكون امه متذمرة من زوجته ليكون له مبررا البحث عن امرأة اخرى مطيعة ذليلة لأمه ..