يايما ..
من غيرك انتيا شكون يحبلي صلاحي ولا يحس بيا لماّ تجيني ضربة
شكون في هاذ الدنيا ال من روحو ينّحي ويمدلي ليا بلا حتى محاسبة
شكون يفكر فيا في ليلي وصباحي ويوقف معايا فالضروف الصعبة
شكون الي بيا كي يتكسروا جناحي من غيرك انتيا ... يا يما لحبيبة
انتيا يا يما الي عمرك ما تريحي منهار نزيد وانتيا متعذبة
تسع شهور وانتيا اتنوضي وتطيحي وتباتي على جالي ليل كامل معذبة
رافدتني او صابرة حتى نهار تروحي باش توضعيني خايفة او حابة
ولما تسمعيني نبكي تفرحي وتنساي لولادة الي كانت صعيبة
تحطيني في صدرك او تبداي اتدوحي ومصدرك تشربيلي اول وجبة
حليبك يا يما نونس بيه روحي ونسكت ونريح او دمعتي تتخبى
نسكت غير شويا باش نتيا تريحي وتزيدي تفرحي لما يدخل بابا
يشدني يرفدني ويقول يا فرحي نحمد الله على هاذ الهيبة
يأذنلي في ودني باه يغرس في روحي دين الاسلام ودين لمحبة
الدين الي علملي على جالكم نضحي وتكوني يا يما الاولى فالصحبة
انتيا يا يما الي تحسي بجراحي لما نكون بعيد وتصرالي مصيبة
ما نعرف كيفاه ومنين تستوحي كيفاش حسيتي وما كنتيش قريبة
علاش يا يما بروحك اتضحي وتتحرمي على جالي مكل حاجة شابة
قوليلي وعلاش تنوضي وتطيحي ومعايا توقفي في كل مناسبة
علاش لما نفرح نتيا تفرحي وتحزني كي نحزن قولي واش من سبة
قوليلي وعلاش تحلمي بنجاحي وتحبي تشوفيني في اعلى مرتبة
وعلاش انتيا الي دايما تتصارحي في امور الحب والزواج والخطبة
وعلاش انتيا الي بيناتنا تصلحي فالدار باش نكونوا دايما في رحبة
وعلاش يا يما تخبيلي صوالحي وسراري كامل عندك تتخبى
قوليلي وعلاش تنقّي وتمسحي ومانسمع من عندك غير الكلمة الشابة
وعلاش ساعات انا ننسى روحي نغلط معاك وتكوني غاضبة
تم تم يا يما من حقك تسمحي وغير نولي ليك تقوليلي مرحبة
ما فهمتش علاش تنقي وتصلحي وانا نلقى دايما كل حاجة طايبة
ولما نجي نرقد نلقى مطراحي مفرش وخزانتي كامل مرتبة
ولوكان نهار واحد تروحي غير نهار واحد تكوني غايبة
نتوحشك بزاف ونولي نحس روحي داخل الدار عايش في غربة
الدار مقلبة مانلقاش صوالحي الماكلة باردة والخزانة مخربة
لتما بالذات الي نجاوب روحي وعلاش الام اولى بالصحبة
ادعيلي يا يما دعوتك مصباحي كي نمشي فالليل في وسط الغابة
ادعيلي يا يما دعوتك سلاحي كي نلقى روحي في وسط الذيابا
ادعيلي يا يما وبدعوتك افتحي ابواب السموات ودعوتك مستجابة
ومادامك حية نخفضلك جناحي ونديرلك يا يما واش راكي حابة
ويلا كان متتي وبقيت انايا حي ندعيلك بالرحمة ... ليك ولبابا
تأليف الكاتب
فيصل كرشوش
( تقرير عن مشاركة سيئة )، و الموجودة أسفل كل مشاركة .
2010-04-26, 20:36
يا يماااااا
العرض العادي
