2 الخيانة هل لها حل ؟ 2

[مشكلتي]

السلام عليكم
شكرا لكل من رد علي في الموضوع السابق

https://www.djelfa.info/vb/showthread.php?t=1566666

وبالنسبة للاخت نيفرتيتي و للاخ جالب الخيرات هوليك ردي ليكم :
اولا نقدر نقول عليه ما صرفش عليا اييييه ونتوما ما عشتوش معايا باش تقدرو تفهمو ..
وراني فالموضوع الي فات قلت بلي كاين امور ما نقدرش نقولهم لانو ابي يعني مازلت دايرتلو اعتبار الأبوة على الاقل ...
وايضا ما تعرفوش اني ندافع عليه قدام لا فامي .. لافامي الي رخسنا قدامهم
وايضا نتوما ماتعرفوش ماما كيفاش كانت وكيفاش ولات بسبابو ..
والله مانحب نهدر عليه ولا نقول واش يديرلنا بصح انتوما راكم استفزيتوني بكلامكم الجارح ...
بخصوص عقوبة بابا كيما سماتها الاخت ما يحقلوش يحرم مرتو من يماها و هو ماكانش يحب يديها ليها على خاطر يسمع هدرة يماه و اخواتاتو و هادوك وحدهم راهم سوجي كبير وخطير 'السحر والعياذ بالله ' و هادي نقطة نبهتني ليها وحد الاخت فالرد تاعها مشكوورة اختي ..
والي قاتلي باباك كيفاش تقولي ما صرفش عليك .. يا اختي تحبي ننسى بلي هو بابا و نقولك بلي فالعيد ما يعطينيش الدراهم ؟؟ الناس يمدولي حوايج باش نلبسهم ؟؟ فالعراس البنات كامل يلبسو وانا لا .. تحبي نقولك بلي راني فالجامعة و يعطيني الفين برك حق الكار .. نروح من الصباح للعشية بلا ما ناكل حاجة ؟؟؟ تحبي نقولك بلي كي نكون فالجامعة مانحبش نخرج مع البنات كي يروحو يشرو على خاطر ماعنديش باش نشري ومانحبش نقعد نشوف فيهم كي يكونو ياكلو ؟؟؟ وما نحبش كي يمدولي ناكل وعلاش انا يتيمة ؟؟؟
صدقوني غير نحس روحي يتيمة تاع الصح
خاوتي كيف كيف كي كانو يقراو يعطيهم الفين برررررررك و كي يسحقو باش يديرو فوطوكوبي و كي لحقو للماستر ما صرفش عليهم دورو واحد .. والحمد لله كبرو وقراو و خرجو ما شاء الله
شكون كان يشريلنا حاجة كي نتشهاوها ؟؟ ماما
شكون كان يعطينا دراهم البحوث تاع المدرسة و دراهم اللبسة و دراهم لي بولي كوب ؟؟ ماما
ماما قاعدة فالدار ما تخرجش الا ادا داها هو , بصح ماما فحلة والحمد لله رباتنا وقراتنا وجامي لا دارت حاجة بالتخبية عليه جامي لا خرجت من وراه ولا عصاتو .. بالعكس
ماما تخيط و تمرمدت بزااااف من كل النواحي منو لعايلتو بصح صبرت على جالنا ولانها بنت اصل
تخيط فالدار و تصرف علينا وانا دوكا كبرت وليت نفهم الناس واش يقولو على ماما وليا وعلاش ما تلبسيش هكا و علاش ماتشريش الصباط الفلاني .. ؟ وانا في قلبي منييييييييييين ماما بزاااف عليها
هادا كامل وجامي قلتلو اعطيني نشري حاجة ... وديجا عندي عقدة من هاد الكلمة حتى لماما مانقدرش نقولها حبيت نشر ي هاديك العفسة ولا حاجة هك ... تقعد في قلبي وما نقولش عليها ..
هادا واش تسموه ؟؟؟؟
جامي لا بابا قالي بنتي ولا كاشما تحبي جاااااااااامي
ماشي حنين معليش ما يعبرش معليش ماا يصرفش معليش مي يهدر مع وحدة وعلى علاقة وماما الي كانت وردة مفتحة ذبلها باهمالو و الضرب تاعو وخلينا من السب والشتم قدام الناس ..
مرة زعمة دانا انا وماما باش تشري صباط تاعها تقطع ايماجينيو راحت تقيس قاست واحد ممبعد وريتلها واحدوخر عجبها حبت تشوفو قدام مول الحانوت و قدام الناس الي فيه سبها وسبني و عيط علينا و دارلنا حالا هي بالعجار ما بانش عليها بصح انا من الي خرجنا من الحانوت وانا نبكي حتى لليل رقدت بالدموع وبعدها لما يمرض ولا كاش واحد من بنات اخواتاتو يقولو عليه كاش حاجة ماشي مليحة نديفوندي عليه و مانحبش عليه ... على خاطر اانا واش عاقة ؟؟؟؟ ظالمة لابي؟؟؟؟
فالاخير ما يحس بالجمرة غير الي عافس عليها
وكاين بزااف حاجات كي نتفكرهم قلبي يوجعني ونحب نبكي وما نقدرش على خاطر تشوفني ماما وتسقسيني نزيد على ما بيها !!!
انسان ما يصليش ما يعرفش ربي امو وخواتاتو سحارات و خلاطات بصح ربي حبو و زوجو بإمرأة صالحة بنت ناس و جميلة و متخلقة كيفاش هادا يدير فيها قع هاد الشي لوكان جات وحدوخرا لوكان كي شافت اخواتاتو برك ويماه لوكان راهي ليكيداتو بصح هي لالا ماتتكبرش وما تحقرش الناس وفالاخير ولاو يتمسخرو بيها ويضحكو علينا فالحق والله غير قسمتولي قلبي على ما راهو و كملتو عليا
اسمحولي ادا طولت و اسمحولي لاني ضيعتلكم وقتكم
الشكوى لربي وفقط
اسمحولي

[agro44]

السلام عليكم

اختي في الحقيقة لم اقرا موضوعك الاول ولكن هذا قطع قلبي

انا راني حاس بيك 100*100

ربي معاك

ونزيد نقولك مصائب اقوام فوائد عند اقوام

هو صح مقلشكش لا انتي ولا خاوتك

بصح شوفي للجانب الجيد

كبرتي وراكي مرأة بمعنى الكلمة

والدليل خاوتك كي ماكانش يصرف عليهم راكي قلتيها اتخرجوا و راهم مشاء الله عليهم

وانت راهي عندك شخصية قوية

راكي تصبري بزاف وتفهمي الواقع والادهى راكي مبهدلتيهش بكاش علاقات نتاع حرام و لا ذليتي روحك

والاحسن من هذا كلوا حاولتي تعطيه صورة مليحا عند الاقارب
اختي الله يبارك انت مرا انتع الصح

ونزيدك انا صراحلي كنت في الجامعة ومعنديش باش نفرح عمري بصح كان سلاحي هو الامل و البشاشة

والله تتخيلي مرة كنت جيعان ودخلت الحانوت نشري كي عصرت روحي وجيت نخلص لقيت روحي يخصني 10 دج والناس في الحانوت كانوا كامل ايشوفو فيا و انا لعبتها انحوس في جيابي - قلت لملول الحانوت انسيت الصرف فوق الطاولة في الغرفة - وجا واحد من هذوك الناس الي كانوا قاعدين وخلص هذيك 10 دج

اتخيلي كيفاش الموقف النتاعي

والحمد لله اتخرجت و راني الان معنديش بصح كيما اتقلي الوالدة انتاعي

ماشي الزمان - الجوع - الي يقتل يقتلوك تبهدايلك مع الناس

مع انوا عرضوا علي اعمال لكنها بالنسبة اهانة اكثر منها عمل مقبلتك وراسي مرفوع

اختي راكي في الطريق الصحيح كملي وربي يفتح عليك

وربي يرزقك بولد الحلال الي اينسيك الماضي و يبنيلك مستقبل افضل

اجمل تحية مني اليك ايتها الاخت الفاضلة - والله ايلاقينا بوحدة كيما انت عقلها كبير و قلبها اكبر -

[بنت لبحر]

اختي تقطع قلبي في الموضوع الاول و زدتيني دركا

ربي يخليلك امكم تاج فوق روسكم و باباك ربي يهيده هدا واش نقدر نقولك

[thawizat]

أختي والله حكايتك تقطع القلب
وما شاء الله باين عليك انسانة خلوقة و عندك يماك الله يبارك لبئة
اصبري أختي فالصبر مفتاح الفرج وربي يهدي باباك والحمد لله على كل حال تصوري معندكش يماك يتيمة وباباك هكاك
و الله أنت ما شاء الله قمة في الصبر وربي يعطيك قد نيتك ويجازيك و أمك على صبركن كل خير و يعوض يماك في ابنائها

[khadija la brune]

سلام عليكم اختى والله الا غظتيني بزاف انا نقولك الله يعينكم و يعينك واتمنى تكملي قرايتك و تلقي خدمة و تردي جميل يماك لي ربي يخليهالك ان شاء الله وخلي كلشي على ربي يمهل ولا يهمل

[حضنية28]

ربي يفرج عليكم ان شاء الله
يا اختي ادعي في صلاتك
ادعيلو بالهداية والرجوع الى طريق الصواب

[nihale89]

ربييهديه ويفرج عليكم
ويرزقك برجل صالح يعوضك كل اي فات

[{زهراء}]

السلام عليكم
ربي يكون معاك ويفرحها عليك وعلى يماك
انتي قلتي بلي عندك خاوتك كبار ربعة ربي يبارك ورجالة معناتها قادرين يزيروا على باباك شوي
كون جيتي تتفاهمي معاهم يقولوا للباباكي مقاش يخرج يماكي هو يعودو خاوتك لي يديوها للسوق ولعند جداتك
يعودوا يديوها تحوس تنحي على بالها المراة كي تسوفري مع راجلها وتجيب لولاد وتلقاهم متربيين قاريين يدافعوا عليها قدام باباهم
تحس بلي الشيء اللي فات من عمرها ما راحش هباءا منثورا
وانتي ديري ماداروا خاوتك اقراي وتخرجي واخدمي واصرفي على يماك
صلي وادعيلوا بالهداية
ربي معاك

[نورسين.داية]

السلام عليكم

أختي لما لا بتحثين عن وظيفة مع الدراسة الجامعية

مثال : عون إدارة تتطلب مستوى ثالثة ثانوي
عون مكتب تتطلب مستوى أولى ثانوي
أو عون إدارة رئيسي تتطلب الحصول على شهادة الباكالوريا
أو ملحق إدارة تتطلب مستوى ثانية جامعي في تخصصات معينة طبعا
أو مساعدي الممرضين ثالثة ثانوي فقط
حتى تغلقي باب الإحتياج المادي ..على الأقل و ترفعين الحمل عن والدتك ......

مسألة الوالد ....في مسألة الصلاة .....لو كان طفل صغير أعطيك الحق في محاسبته ....لكن في مرتبة الوالد ....لا نستطيع أن نحاسبه على هذه المسألة إلا عن طريق شخص يقاربه في السن أو أكبر منه

وفقكي الله أختي

[اسعى لرضى الله]

سلام عليكم

اختي حاجة باينة مايحس بالجمرة غير اللي كواتو

شوفي بالاك هدا ابتلاء لازم تصبري وصدقيني ربي راح يفرج عليك وعلى امك لانو ربي ميرضاش بالظلم مهما يكون

وكوني اكيدة ثاني انو ربي راح يعوضك على واش عانيتي من باباك ربي يهديه

معندك مديريلو يا ختي اطلبي ربي يهديه وكثري من الاستغفار وقومي الليل وادعي ربي لانو ربي في لحظةيغير من حال لحال واحمدي ربي انك بصحتك وباذن الله يرزقك ربي بزوج صالح ومتياسيش من رحمة ربي مشي معناها كي باباك مشي مليح الرجال كامل كيفو لالا كاينين ولاد الفاميليا وكاين بزاااف من حالتك يا اختي اللي عاناو من اباؤهم وربي فرج عليهم ورزقهم ربي بازواح صالحين راهم عايشين لاباس بيهم وثاني ربي يوفقك انك تكملي قرايتك ويماك راهي ماشاء الله ربي يعوضها ويفرج عليها يارب والله امك راهي عملة نادرة جدا ربي يحفظهالك وربي يطولها في عمرها وتشوفكم لاباس بيكم لانو الام اكبر فرحة ليها كي تشوف ولادها هانيين

[first first]

يا اختي لعزيزة .........................ينقصك بعض المال لاهمال من الوالد .............والحمد لله لا تنقصك العقل والارادة والصبر
باباك ربي يهديه........................بخيل معليهش.......................................مثل ابوك الكثير
والخيانة ..................ربي يهديه.................................والله اختي ليس لك حل غير الدعاء له.........................حتى كرهك له لن يفيدك ولن يفيده...........................ولااعتقد انك تستطيعن كرهه.............بل انت غاضبة منه............................وباباك جامي لتقدري تكرهيه.......وحتى هو عمرو لا يقدر يكهك................لنه ابوك وفطر على عاطفة الابوة...........حتى لو جامي شتيها هاديك العاطفة.

انا نقولك راهو بابك...................حتى لو يحرق الصباح جامع ولعشية جامع.......................................ادعيلو بالصلاح والهداية.
بالمقابل اخت ........لك ام............بارك الله فيها..........واخوة ماشاء الله......................والميزيرة لي راكي تبكي منها ...........راهي جعلت منك انسانة غير سطحية..........................وانسانة تنظر للحياة بنظرة فيها الكثير من الحكمة.............................لاتحزني اختي.........فالله يرى....................واحمدي الله انك لست يتيمة............................فاليتيم فقط يعرف معنى اليتم ......لانه يتمنى اما وابا ولو اجتمعت عيوب الدنيا بهما.
اختي ..................استري عللى باباك....................وانسي موضوع خيانته...............فالستر واجب في شريعتنا..........والناس راهي تستر على الغرباء..............ابوك اولى بالستر.........مادا يفيدك اعلام امك........................لن يزيدها الا هما وغما.
وايضا اختي....بارك الله فيك انك تتكلمين عن الاب بكل خير امام الناس...............لان الناس ليس اقرب لك من الاب..............واي اهانة له تعتبر اهانة لكم جميعا.
ادا لم تغلى دموعك على الاب فهي غالية عند الله.........................اشكي همك لله واكثري من دكره فبدكره تطمئن القلوب

عليك بالدعاء..........................والحمد لله ان لنا ربا يرانا ويرحمنا .

[sarl02]

واش انقولك اختي..الي احكيتيه يكفي..بصح تاكدي من امر واحد فقط ..والله هذا الشخص وامثاله راح اخلصوها فالدنيا قبل الاخرة وعينك اتشوف وحسابه عند الله عسير لانه ظالم وغير مسؤول وامثاله كثر في كجتمعنا وانا لم استغرب قصتك ..لكن ما اوصيك به ان لا تصلي الى درجة العقوق وبالتالي تصبحين انت واياه في نفس الكفة عند رب العالمين ... اعلم انك لا تحبينه وقد تصلي الى درجة في حالتك الكره وهذا منطقي لا تكوني عاقة له ...وان شاء الله ربي افرجعليك وعلى امك فالقريب العاجل ويزيح عنكم الهم والغم.

[افنان الجنان]

اختي المحتسبة يقول الله تعالى في حديث قدسي (قل يا عبادي اني حرمت الظلم على نفسي وجعلته بينكم محرما فلا تظالموا)
اقول للام المثالية اصبري فانه لا بد لليل ان ينجلي سيفرج الله في يوم من الايام ويرجع هذا الاب الى صوابه لانه( لايفلح الساحر حيث اتى )
كما ان ابناء المراة هم سندها فكوني دوما قوية واياك والانزلاق وراء الشيطان لان هذا امتحان من الله (فمن رضي فله الرضا ومن سخط فله السخط)
وصية اختك * ان تقومي في ثلث الليل وادعي الله تعالى ان يفك ضيقك *وستجدين الحل عاجلا باذنه تعالى.

[نيفرتيتي.]

يا اختي كان بالاجدر ان لا اجيب على موضوعك
بصح ماتستنيش مني اني نقلك عايبي باباك
ومهما قلتي يبقى باباك كاين اباء كيما هكا بصح انا مانقدرش ننصحك بالعقوق
صلي صلاة ننصحك تشوفي امام على هذا الشيء بالاك يقولك عليك بالعقوق
لاحولة ولا قوة الا بالله

[جمعي البشاري]

ربي يفرج عليكم ان شاء الله
يا اختي ادعي في صلاتك
ادعيلو بالهداية والرجوع الى طريق الصواب