هل أنا مخطئة؟؟

[صفاء نور اليقين]

السلام عليكم


أردت فقط ان أستشيركم لأنه انا الان يعذبني ضميري كثيرا
منذ مدة رأيت خطيب صديقتي كان مع فتاة اخرى رأيتهم اكثر من مرة وفي كل مرة كانوا يظهرولي على أنهم بينهم شيء وانا لم أرد أن أخبر صديقتي ولكن آخر مرة شفتهم يعني في وضعية غير لائقة وكنا في bus وكان قاعد ورايا هو وهي وكي درت أنا باش نهدر مع الطفلة شفتهم بلي حاكمين يدين بعضاهم وهك منظر مش مليح والله ثم خفت بزاف وقلبي ولا يدق وفكرت غير في صحبتي مسكينة ولما تلاقيتها يوم الاحد اللي فات تشجعت وقلتلها المهم كانت صدمة ليها بصح مبينتليش ولما عاودت تلاقيتها قلتلها وش صرا قاتلي راهو انكر كل شيء وقاتلي في الاول محبش يحلف قاتلي بصح كي قتلو خلاص لي بيناتنا خلاص قاتلي حلفلي من بعد جاو لبنات لي كانوا معايا وقالولها ايه شفناه لانو انا خفت تشك ولا تكذبني لانو الانسان في هذك اللحظة يقدر يشك في أي حاجة وقالولها لبنات ايه فلان شفناه مع فلانة وسماو اسمها ووين تقرا وكل شيء الغدوا هذيك قالتلي اعطالي نحكي معاها وقاتلي انا منعرفوش نعرفو بالوجه برك وانكرت كل شيء وقاتلي في اخر المكالمة قاتلها اذا خانك فوتيه وهي حست انو صح صح خانها انا كي قاتلي وبدات تبكي غاضتني وقاتلي اذا تروحوا معايا وتشهدوا قدامو بلي شفتوه انا في الاول ترددت ولكن كي سقسيت لبنات لي كانوا معايا قالوا ايه نروحوا ورحنا وكانت الصدمة قالها انت روحي متوقفيش معايا حتى نسقسيهم وقالنا شفتوني ووين تعرفوني وقال كلام مش مليح وكان يعيط ومعصب ومن بعد احنا قلنا ايه شفناك وحكينا وش شفنا بالتفصيل وهي كانت واقفة بعيد علينا شوي كي مالقا مايقول اعترف وقالنا اسمحولي اذا غلط معاكم قالنا ايه درت غلطة عمري وعمبالي مش راح تسمحلي عليها انكرت وانا في هذيك اللحظة مكنتش حاب نقولها باه منخسرهاش عليها كذبت وقالنا نتمنا تقولولها تسامحني ....الخ


كي قلنا لصحبتي هي رفضت تماما وقالت خلاص لي خان وكذب يقدر يدير كل شيء وضرك راهي خايفة وملقاتش كيفاه تقول لدارهم






من فضلكم لي يدخل يعطيني رأيو انا غلطت كي قلتلها أو لا وهي تقدر تسامحوا ولا لالا؟؟؟؟




تقديري

[مريم الصابرة]

السلام عليكم أختي
هي من باب لو غلطت ما غلطتيش لأنو لو إنت في مكان صحبتك راح تزعفي لو تعرفي أعز صحبة ليك شافت خطيبك وما قاتلكش إنتوما قلتولها وهي تصرفت وهو نكر وزاد بالغ فالكذب وحتى الفتاة لخرى ما نعرف ما عندهاش قيمة او واش خلاها تكذب وتقولها ما نعرفوش
في كل هذا اولا إنت ما غلطتيش اما إنو تسامحو والله يا اختي عندها الحق للي غلط مرة يغلط ألف وهذا يا ريتو غلط وإستعرف تمادى فالكذب وكمل عايش فيه و فالاخير إستعرف معناها هذا ما فيهش امان اللي خاطب ويخرج مع وحدة ماسك يديها قدام كامل الناس إسمحيلي انا لو مكانها لو يبقى آخر راجل ما نخزش فيه كل شي إلا كرامتها
اهلها واش دخلهم نهار تتزوجو ويخونها راحين يقوللها الله يسهل دبري راسك إنت حبيتيه معناها لو حابة تخليه تقولهم بكل صراحة إنها شافتو مع وحدة وإستعرف
إما تمدلو فرصة ممكن يتوب او صح غلط وما نشكش هذا النوع يندم معناها تسامحو ليوم بعد شهر او فترة يعاودها ويعاودها وهي مرتو كوني هانية
من رأي تخليه ويربي يعوضها بآخر وإنت ما غلطتيش هذي صحبتك وشفت بعينيك خيانة خطيبها لو انا نقولها لو اعز صحبة لي ونصفي ضميري هنا ما خيرتيش دار هنا إنت نيهتيها وربي حب يكشفو قدامها إنت سبب وبرك شكرا

[كاميلا]

ريما يا اختي لوكان مقلتيش انتي كانت وحدة اخرى رح تقولها وزيد ربما هذا في صالحها انصحيها دير استخارة خاصة اذا مادارتهاش من قبل مع انه رأيي تبطل عليه هذا من قبل الاوان يدير الفيلمات ربما يا اختي راهو متمادي ووصل الى امور اخرى كالزنى والعياذ بالله راهو باين عندو تجارب ويعرف كيفاش يدير الطرافيك
انت قولي لصديقتك وانصحيها بالاستخارة

[naamane3]

باش تعرفي اذا غلطتي ام لا
حطي صديقتك في نفس موقفك وشوفي ردة فعلها

[yousra14]

السلام عليكم

أنت لست مخطئة ولكن ما يؤلم قلبي هو درجة الانحلال التي وصل إليها شبابنا

" ربنا لا تؤآخذنا بما فعل السفهاء منّا "

[chero]

لالا انتي ما غلطتيش و ما عندك علاه تندمي ... صح تحسي بتأنيب الضمير.... بصح تحسي بيه درك خير ملي تحسي بيه لو كان ماقلتيلهاش

خبرتيها في البداية خير ملي تتزوج مسكينة و تبقى الخيانة و تكبر المشكلة .

و انتي كانت نيتك صافية و خايفة على صحبتك .

[قفص النسيان]

هادي صحبتك وعلاش تندمي كي خبرتيها
درتي عين صواب

[فارس وجواد]

نعم أخطأت أختي لأنه أصعب شيء هو التدخل بين زوجين و التفريق بينهما " ويتعلمان منهما ما يفرقان به بين المرء و زوجه ".
ثانيا هو انسان و صاحبتك انسانة يعني كيما غلط هو قادرة تغلط هي اذا كي تغلط زيدي قولي له راهي غلطت .
أتمنى أن لا يؤثر كلامك على علاقتهما و تكوني انت السبب في افتراقهما .
الله أمرنا بالستر يا أختي و قد شدد خصوصا في هذه المسائل المتعلقة بالزنا و اشترط أربع شهود أي لو كانوا ثلاثة لا تقبل شهادتهم.( هذا مجرد مثال ذكرته للتوضيح)
لو دمنا هكذا بهذه العقلية و خاصة في عصرنا الحالي فلا أظن أن أحدا سيتزوج.

[ام ملاك.]

لالا حنونة ماغلطتيش لانو هي صاحبتك ويهمك امرها

[bellaluna]

فرضا لو أنّ هذا الشّاب أراد الإنتقام منك و آنتظرك في محطّة الحافلات و طعنك بسيكين، ماذا سيكون ردّ فعلك تُجاه صديقتك بعد الحادثة ؟

[zahozo]

هي انت ما غلتيش وهي لازم تخبر دارهم بالحقيقة وما تخافش
مي نتي لازمك تكوني حريصة على نفسك

[bibimoto6]

المشاركة الأصلية كتبت بواسطة yousra14

السلام عليكم

أنت لست مخطئة ولكن ما يؤلم قلبي هو درجة الانحلال التي وصل إليها شبابنا

" ربنا لا تؤآخذنا بما فعل السفهاء منّا "

الطيبون للطيبات و الخبيثون للخبيثات

[knives66]

بنسب ليا ما غلطتيش لنه موش راجل كيفاه راجل خطب يدور مع طفلة اخري هذي خيانة

ومدام خنها في خطبة ممكن يخونها في زواج وهكذا خير

انت درتي صح وشهدتي شهادة حق وهذا يبين بلي خيانة ما دوم وكذب ما يدوم

[مناد بوفلجة]

السلام عليكم

نعم لقد أخطأتي ،

[كاميلا]

دركا ماداموا راجل رح كامل يقولولك غلطتي الرجال هههههههه ايه يا الدنيا بالوجوه والاخرة بالفايل الحمد لله العقاب بصح مليحة هاذي هوما متكافلين مع بعض