الى ام اسيد1 وكل وحدة حاصلة واش الطيب - الصفحة 3

ام حمزة22 · 2014-09-15, 11:17

هنا نغسل مليح الخرشف
نحطو في قدرة يطيب
في نفسااوقت نحضر الباطاطا نقطعها بشك دوائر نضيفلها درسة متكونة من فلفل دريس وثوم وملح ونزيدلها شوية عكري وزيت ونخليها تتقلة شوية بعد ما تتقلة يكون الخرشف طاب نرميه فوق الباطاطا ونمرق الطنجرة

في الاخير نضيف نص ملعقة طماطم مصبرر نحللها في ماء دافي ونمرق بيه الجواز ونخليه يشرب شوية ونطفيه

ام حمزة22 · 2014-09-15, 11:35

هادا اامونو نتاع اليوم سامحوني على الشهوات شهيتكم في الجنة

من بعد نحطلكم طريقة تحضير السردين وقرسة نتاع الفرينة ودرست السردين لي رتكم تشوفو فيها

ام حمزة22 · 2014-09-15, 12:54

بعد ما نقي ونغسل السردين مليح نحطو يقطر فالكسكاس
هنا نضيفلو الدرسة وهاد الاخيرة متكونة من فلفل دريس وثوم وكمون ندرسهم بالمهراز او نضيفلهم شوية ماء ونخلطهم بالخااط الكهربائي نخليه يتشرب مليه الدرسة وبنتها من بعد نرمد في الفرينة
والفرينة لي تقعدلنا بعد ما رمدنا فيها السردين ما نرميهاش نضيفها في الدرسة لي قعدتنا في الاناء نزيدلها شوية زيت و ملح ونطمها بالماء نشكلها قرسات ونقليها ولادي يموتو عليها

kati83 · 2014-09-15, 14:44

الله الله يعطيك 10000 صحة على هديك الماكلة سيرتو القرسة جامى شفتها
ان شاء الله نجربها

أم أمين2007 · 2014-09-15, 15:18

والله فكرتك رائعة
ومشكورة على مشاركتنا طاولتك يوميا
وشهيتيني فالخرشف نحبو مرقة بيضاء بالحميصة لا يعلى عليه
وقرصة الفرينة امي مازالت تعملها

ام حمزة22 · 2014-09-15, 16:10

اقتباس:

المشاركة الأصلية كتبت بواسطة kati83

الله الله يعطيك 10000 صحة على هديك الماكلة سيرتو القرسة جامى شفتها
ان شاء الله نجربها

الله يسلمك
جربي القرسة زشوفي تولي ما تقدريش تستغناي عليها
شكرا على المرور الطيب

اقتباس:

المشاركة الأصلية كتبت بواسطة غفرانك اللهم

والله فكرتك رائعة
ومشكورة على مشاركتنا طاولتك يوميا
وشهيتيني فالخرشف نحبو مرقة بيضاء بالحميصة لا يعلى عليه
وقرصة الفرينة امي مازالت تعملها

عفوا حبيبتي وشكرا على مرورك الطيب
انا تان نديرو بيض باللحم والحميصة يجي ما ينشبع كيكا قلتي لا يعلى عليه
ربي يحغضلك الوالدة

fatihmd · 2014-09-15, 16:47

ماشاء الله جزائرية حرة انا الخرشف انطيبوا مرقة بيضاء بالحمص و الدجاج او اللحم او طعام مرقة بيضاء ابالدجاج او حتى ضعام مرقة حمراء بدون لحم نعملها جمبوا اي نوع و ادا كان ما عنديش ما نعملش و نحب نعمللها 2حبات طماطم مرحية باه يخثر المرقة وتبننها على فكرة احنا في ورقلة الخرشف ماتكونش فيه هديك لمرارة الي مولفة اتشوفها في خرشف العاصمة احنا هنا نقدروا ما نرموش الماء اللي اطيب فيه الخرشف اسر ما اعرفتوش اعلاه انتاع العاصمة مر وانتاع الصحراء حلو والاالخرشف اتبدل

ام حمزة22 · 2014-09-15, 17:59

اشكرك على المرور الطيب
صح عندك الحق الخرشف مر لازم نرمي الماء لي يغلي فيه ونديرو في الجواز بدون الماء ديالو خاصتا خرشف للصيف لان غرشف الشتاء يجي طري ويتيب بلخف وهاد الغرشف نتاع اليوم ما جا يطيب بسف تقولي رانينطيب في البقري هههه بصح كي طاب جا روعة

ام ظافر · 2014-09-15, 20:10

الله يحفظلك ذوك اليدين يافحلة
الخرشف خرجلك روعة بصح حنا مازال ما خرجش عندنا
وقرصات الفرينة والله حاجة جديدة عليا وزيد اقتصادية حاجة ماترميها
الله يقويك اختي ............في المتابعة

ام حمزة22 · 2014-09-15, 20:55

الله يسلمك ربي يحفضك
يعطيك الصحة على ردودك هادا يزيدني تشجيعاو تقدما
مشكووووووووووووورة

ام حمزة22 · 2014-09-16, 09:50

سلام صباحكم اسعد
طبق اليوم هو ضولمة
كاين بزاف النساء المحطين بي يقولولي الضولمة تشد اليد
بالعكس انا اسهل شيء عندي الضولمة الدليل انعا زجدت على9 صباحا
البهارات المستعملة في الحشو فلفل اسود و ملح فقط اما في المرقة قرفة فلفل اسود وملح
نخليكم مع الصور والشرح
قبل مانحطلكم الصور نقللكم اللح المفروم لي ستعملتو كان في المجمد ادا سالتوني عن اللحم ما ينحطش في المجمد لازم تستعمليه يوم لي شريتيه ان نقلك اللحم المفروم نشريه ونحطو في المجمد لاكن كي نشريه وهو في ساشيتو نقسمو على 2 ما نمسوش بيدي هاكدا ما يخسرش ويفعد على حالو والدليل راكم تشوفوه في الصورة بشرط كي تجبديه من المجمد و هو جامد خودي سكين وكسريه طراف طراف هو يجيك شوية صعيب بصح باه تضمني ما يفسدلكش

هدا الحشو كيما رتكم تشوفو انا زدتلو اضافة مع المكونات لي مالفين بها هي قلب القرعة او للكوسة لي خويناها او فرغناها زدناه مع الحشو هاد يزيدلو بنة و يزكة
هنا نشوف حتى البطاطا ما نرموش قلبها نقليه مع البصل ونحط فوقو الخضر لي عمرناها بالحشو وهي الباطاطا والقرعة و الطرشي كيما راكم التشوفو في الصورة التالية

هنا نشوف الحشو لي قعدلي درتو بولات كي تغلي المرقة نضيفو مع الضولمة

بعد ما تقلى البصل والباطاطا نضيف الخضر المحشية ونمرق الطنجرة كي تبدة تغلي نضيفلها للبولات نتاع اللحم والحميصة كنت طيبتها من قبل نص طياب ودرتها في المجمد وطبعا الفلفلة الحارة ما نقدرش نستغنى عليها في الضولمة
وهااااااااااادا هو طبق اليوم

ام ظافر · 2014-09-16, 11:35

بصحتك الدولمة تاكلوها بالصحة والهنا
انا اليوم هو السوق الاسبوعي عندنا نقيت الثلاجة وننتاظر في الخضرة
درت درت لقيت عندي شوي عدس طيبتو مع كسر رخسيس و سلاطة خضرة والحمد لله
وعندي ولدي لكبير ما يحبش البقوليات كامل حيرني راني فيضتلو البيض على جالو ولكن والله تمنيت نحيلو هذي العادة وياكل كل شيء مثلنا

ام حمزة22 · 2014-09-16, 11:45

صباح الخير ام ضافر راكي غير انت تابعي فيا وعلى جالك نكمل المشوار
بصحتك العدس شهيتيني
انا ولادي يكلو البقوليات بصح غير في فصل الشتاءهههههههههه
ربي يحفضك ويحفضلك ابنائك

sidali 2007 · 2014-09-16, 12:11

اقتباس:

المشاركة الأصلية كتبت بواسطة ام حمزة22

صباح الخير ام ضافر راكي غير انت تابعي فيا وعلى جالك نكمل المشوار
بصحتك العدس شهيتيني
انا ولادي يكلو البقوليات بصح غير في فصل الشتاءهههههههههه
ربي يحفضك ويحفضلك ابنائك

صباح لخير ام حمزة يعطيك الصحة انا راني نتبع فيك من وراء كوليس هههههه غير كملي
كل ليوم نضرب طلة وان شاء الله ريحة نتبع طريقتك بارك الله فيك

صدفات · 2014-09-16, 14:45

يعطيك الصحة أختي ام حمزة على المجهود انا من محبي الخرشف خصوصا لما قريت على فوائده الغذائية فهو يساعد الكبد على تطهيرالجسم من السموم على هذا انا لما نقيه نحتفظ بالاجزاء الخارجية نقيهم و نديرهم في مرق الطعام(الكسكس) نهار الجمعة يعطوا بنة مليحة و فائدة. .