مشكلة عاجلة جداااااا من فضلكم ادخلوا

[مشكلتي]

السلام عليكم و رحمة الله و الله راني في حالة يا جماعة من الحالة لي وصللها اخي راهي 3 تاع الصباح ما رقدتش و انا نخمم و مرعوبة انا متزوجة و جيت لدارنا ضيفة لقيت اخي في حالة و السبب،،،،،،،،،،،

المهم حنا ثلاث بنات و وولد عشنا طفولة مسعفة مع والد ربي يغفرلو عانينا معاه الويل من عنف لفظي و جسدي و نفسي عشنا كي ليتاما رغم انو الوالد و الوالدة في قطاع التعليم لكن للاسف اشتقنا لشبعة في الكرش ولا فسحة ولا ضيف يجي يطل علينا ولا حتى نلعبوا مع اقرانا برا

المهم انا و اختي تخطينا هاد المرحلة و قرينا و زوجنا و خويا متخرج صيدلة و يخدم في شركة وراتب ما شاء الله و حافظ الله يبارك الستين و متدين و مثقف و عاقل اللي يشوفو يقول الله يبارك و كنت نحوسلو على عروسة الى اليوم هدا. عيطلي لغرفتو بدا يبكي و يشرب في المهلوسات يشرب اكثر من ست حبات باه يرقد و ما يرقدش و يحكيلي على طفولتنا ووش عشنا و كيفاه ضربنا يحكي تفاصيل عمري كنت نتصور بلي راهو هاز في قلبو هاد الشي ولانو حياتو كاملة عاقل و كلمة ما نسمعوهاش منوووووو

تخيلو قالي نذبحوا نذبحوا (على الوالد) قالي كون نبطل هادو لي كالمون كابابل نذبح نورمال عينيه حومر و يبكي و يبكي و يرجف و بطل خدمتو و يرقد النهار كامل و سبقلوووو هدد الاب انو يقتلوووو على الشي لي دارو فيه و دمرلو حياتوووو و قالو اني وليت مهبوووول رغم انو اخي و نعم الرجال و متدين و ملتحي و الكل يشهدلو بحسن الخلق لكنو تحول في لحظة


حسب ما فهمت منوووو انو ميش مسامح ابي على العذاب لي عذبنا قتلو ماكش مخمم بلي كاين يوم القيامة و رب العالمين يحاسب كل انسان على وش دار قالي ندخل النار لشتا


وقعتو هدتلو قتلو وكل ربي قتلو حنا نحبوووك قالي ماكمش حاسين بيا قتلو شوف لمك مسكينة. راهي في اي لحظة تطيح بالقلقة. قالي امي خاطية هو

مع العلم الوالد ما يروح لا لامو لا لاخوته. ما نعرفوش جدانا و عمامنا اطلاقا و الجد كان هامل عوام وعوام و من بعد جا يسكن معانا. حاطو في شومبرة و يسيء معاملتوووو


ماعندنا حتى واحد حنا ثلاث بنات. حشمت نقول لراجلي يدخل باه ما يعرفش وش عشت ،،اخي كلامو الكل صحيح بصح راهو حاقد و يتحلف قتلو ارقي. قالي نرقي نفسي يوميا

راني خايفة كشما يدير بتاثير المهدئات لي راهو يشرب و ما قدرتش نهدر معاه لانو ما يسمعش يهدر فقط و يبكي و يشرب في الدوا حتى خفت منووو كشما يديرلي كون كشما نهدر

قالي قالي الطبيب عندي ديبريسيون نارفوز و عطاه الدوا. بصح ميش بالجرعات لي راهو يوكل


ارجوكم ساعدوني وش نقدر نديرررررررلوووو لاني خايفة عليه من نفسو و يقولي. كاش نهار تلقاوني ماكانش

افكارووو سوداء ماكانش امل خلاص في الحياة قتلو وين راهو القران لي في قلبك. قالي عدت مانقدرش نصلي الفجر خلاص قتلووو خير الخطائين التوابون احنا كامل نغلطوا علاه راك تعذب في نفسكك و في امي مسكينة قالي هي خاطية بصح هو نذبحو نذبحو

و الله راني حايرة ساعدوني وش ندير ربي يحفظكم


ارجو من الادارة نشر الموضوع في اقرب اجل

[dark star]

كان الله في عونك .....الدعاء ثم الدعاء ..فالله كاشف الكربات .....ربما يحتاج لاخصائي نفسي يساعده في تجاوز محنته ....انصحيه بالذهاب اليه
وادعوا الله ان يفرج عليكم عاجلا غير اجل ...اميين

[rose de sable s]

ادا كان خوك خدام خليه يخرج من دار و يكري وحدو باه يبعد علي ابيه ول اديه يعيش معاك ادا قدرتي و يزيد يعرض علي طبيب نفساني كي يحكيلو واش سرالو اكيد يريح وحاولو تجد له زوجة توقف معاه باه تعوض حنان وحب لي حرم منو والدو ربي يهديه بما انو متدين جيبيلو امام او واعظ يقنعه بتغير رايه مهم حاولي تبعدي اخوك من بيت ربي يهديه

[ام رضوان]

ربي يكون في عونو الشيء اللي عقبو في صغرو اثر عليه بزاف
يا اختي لكان عاد اخوك يسمع لكلام زوجك وزوجك يقدر ياثر فيه احكيلو اختي عادي مصلحة اخوك فوق كل شيء.
خذى اخوك لطبيب نفسي وخليه يبرد قلبو
وانت وامك عليكم بالدعاء الدعاء الدعاء ربي حنين كريم
وكذلك الصدقة بنية الشفاء
ويارب كل من يقرا مشكلتك لا ينسى اخاك من الدعاء
ربي يشفي اخاك ويرجعه الى جادة الصواب ويعفو عليه امين يا رب العالمين

[الرميصاءْ]

السلام عليكم ان شاء الله تكون فترة وتفوت وربي يهدي ابيك
عليكم بالصبر وخوك راه راجل وخدام قوليلوا يروح يسكن وحدوا ويزوج وينسى المشاكل كيما انت نظنك نسيتي لانكي بعيدة على المشاكل
واي بيت لا يخلوا من المشاكل واحمدوا ربي انكم قريتوا
وممكن تكون عين ارقيلوا في الماء واعطيلوا يشرب رايح ينفعوا
وربي يكون معاكم ان شاء الله ويشفي خوك و يهدي ابيك ويبعد عليكم المشاكل اميييييييييييييييييييين

[baalache]

هكداهم الاباء اختي لا حنان لا حسن معاملة وفي الاخير يطالبك بالطاعة الله يخفف عليه اخيك راني حاس بيه

[خالد عنابي2]

اخوك و ما يحدث له فهي تفجر لرواسب الماضي

ولابد لابيك ان يدفع ثمن افعاله ويعاني واخوك غير مخطىء في هذا لكن ليس قتله بل جعله يعيش عيشة الكلاب

[oum imane83]

ربي يعينكم اختي ..... والله ماعرفت واش نقولك ...

خلي واقفة مع خوط ماتخليهش روحي كل ماقدرتس واهدري معاه .. بلاك ي يهدر معاك ويفرغ قلبه يرتاح .... ارقيلو قرعة ماء واديهالو يشربها .. اذا ماقدرتيش تقنعيه شوفي واحد في العايلة ثقة ويقدر ياثر فيه راجلك ولا خالكم .. وكما قالك احد الاخوة من الافضل يخرج من هاديك الدار لفترة حتى يريح وشوفو كيفاش تقدرو تمنعو عليه تلك الحبوب المهدئة الي تقدر تقضي عليه لقدر الله .. ربي يفرج كربتكم.. ...

[anfale 86]

السلام عليكم و رحمة الله و بركاته و الله هذه مشكلة جد عويصة عندما يتعلق الامر بأغلى ما نملك في الوجود فلا ندرى ماذا نفعل و نحس أن كل الابواب قد أُغلقت في وجوهنا ،أختي أنتم عشتم طفولة كما سميتها أنت مسعفة سببها أب لايعرف معنى الأبوية ويحسبها هي طغيان و تجبر و فرض آراء و فقط لا غير، أخوك ما دام يعيش في هذا الوسط الممتلئ بالمشاكل فلن يرتاح أبدا حاولي كما ذكر الاخوان قبلي أن تبعديه قدر المستطاع عن هذا الوسط و حاولي أن تكلميه و لكن ليس في بيتكم العائلي إنما اجلبيه لمكان غير البيت فمثلا أعدي له غذاءا أو عشاءا في بيتك الزوجي و تحدثي لأخيك أو اتركي لأحد آخر يثق به هذه المهمة ،و لا تنسي أختي ادعي الله كثيرا خاصة في الثلث الاخير من الليل فالله ينزل حينها للسماء الدنيا و يقول سبحانه "هل من داع استجب له "و أكثري من الصدقات على أخوك فالرسول صلى الله عليه و سلم يقول "داووا مرضاكم بالصدقة" و إن شاء الله لن يردك الله خائبة .
لكي مني كل الدعوات لكي يزيح الله عنك هذا الهم الذي من الواضح أنه أثقل كاهلك و يهدي الله أباك و أخاك لما فيه من الرشاد و السداد.

[الظاهر موح]

رب يكون العون..........
في رأيي الحل أن يخرج من المنزل لينسى كل ذكرياته في المنزل ومع أبيه.

[AMINA.Z]

الراي الصواب هو الخروج من المنزل
ربي يفرج عليه و يهديه

[متمنية]

المشاركة الأصلية كتبت بواسطة خالد عنابي2

اخوك و ما يحدث له فهي تفجر لرواسب الماضي

ولابد لابيك ان يدفع ثمن افعاله ويعاني واخوك غير مخطىء في هذا لكن ليس قتله بل جعله يعيش عيشة الكلاب

من فضلك بدون الفاظ مهما كان هدا ابوها
اخت عليكم بدعاء وانتى هدرى خوك غى بلعقل عمرك تزيديه لانو فى هاد الحالة راينتظر لهداه مشى يزيد عليه

[yacino dz]

سلام الله عليكم

أولا الايمان هو الحل

و الذي لا يتأت الا بالعتصام بالله عز و جل فهو السبيل الوحيد لنجاة أي انسان في حياة الدنيا و الآخرة

عليه المحافظة على الصلاة و أذكار الصباح و المساء

و ان يكثر من الاستغفار

هناك آية دقيقة جداً هي إجابة عن سؤالكم القيم، قال تعالى:

﴿وَمَا كَانَ اللَّهُ لِيُعَذِّبَهُمْ وَأَنْتَ فِيهِمْ وَمَا كَانَ اللَّهُ مُعَذِّبَهُمْ وَهُمْ يَسْتَغْفِرُونَ (33)﴾


ثانيا خففي عليه و هوني عليه الامور و ذكريه ان هناك مستقبل ينتظره و انه من الخطأ ان نضيع وقت عمرنا على شيء مضى لا نملك ان نصححه

و قولي له انك انت كذلك عشت ما عاش لكنك تجاوزت الماضي المؤلم و سامحتي ابيك و انك الآن مرتاحة و سعيدة بقرارك

ثالثا اختي اقول لكم ان كل منا عاش اضطربات عائلية فلا يوجد اسرة مثالية كا منا عاش طفولة صعبة

لكن بفضل الله تجاوزنا ذلك بمجرد تفكيرنا بالذي ينتظرنا

رابعا
اشتري له كتاب للدكتور ابراهيم الفقي عنوانه " الحب و التسامح "

فيه نصائح قيمة

أخيرا اسأل الله الله تعالى ان يغير حالنا من حال الى احسن حال و أن يهدينا الى السبيل القويم

السلام عليكم

[عاشقة مجنونة]

الله يكون فى عونك اختى انا نتمنى برقي يمكن يتحسن

[Zahra 30]

اختي كل الاعضاء نصحوك ما بقالي ما نقول غي ننصحك بالاستغفار و الصلاة على النبي صل الله عليه وسلم ففيهما الفرج بإذن الله الله يفرج عليكم