تأنيب الضمير يقتلني بعدما كان هو من يهددني بالقتل

[صرخة ألم]

السلام عليكم جميعا
آسفة جدا لازعاجكم و لكن وحده الله يعلم ان ما بداخلي لا اجيد قوله الا هنا
جديدي هو اني بعدما كنت خائفة منه و خبرت اهلي و بحكم انا جيران تحدثنا مع اهلو و عرفنا انو فعلا مرض بعد خطبتي لانو اهلو كانو قالولو خلاص رايحين نتحدثو مع اهلها لكن كان كذب لانو هو اللي كان يصرف على عرس خوه و خافو ينشغل بنفسو يعني على قولو استغلوه ..
و ايضا وقت اللي حب يرجعلي بعد مدة انا رفضت الحديث ليه و هو اعتبرها رفض و انا فعلا كنت منزعجة لدرجة لا تطاق لاني سمعت بعلاقتو السابقة ببنت الجيران الاخرى و ايضا كل كلمة يقلي تبعدي نقتل روحي و حتى معايا كان كل يوم بحال يقلق دون سبب و يرجع دون سبب ؟
و فعلا ابتعدت لانو الاهم حسيتو جرني الى علاقة بطريقة او باخرى و حافظت على كرامتي و كرامة اهلي و ابتعدت

هو اقام الدنيا و خاصم اهلو و هوما قالولو ماكش راجل على خاطر لوكان جات شارياتك توقف معاك و تصبر و هاذي الكلمة قتلاتو و قتلتني حاليا ....

قولولي كنت قادرة نصبر على واحد يبعث اختو تسال عن رايي بخطبة و من بعد 6 اشهر ما يدير والو ؟؟و حتى بعد ما اقطعت الكلام معاه انا قبلت بالخطيب الآخر بعد عامين انتظار و ما دار والو ؟؟؟؟؟؟

كنت قادرة نصبر على واحد يهددني بقتل نفسو كل لحظة في حال انسحبت ؟؟؟
كنت قادرة نصبر على واحد بعد عمر و هو يجري ورايا نعرف لي كان على علاقة بجارة اخرى و وصل تأثر نفسيا كي خلاتو و تزوجت ؟؟؟؟

هو عرسو بعد اسبوعين .... و هو و اهلو حطو اللوم عليا لي قبلت بغيرو و استشفاو فيا كي بطلت من اللي خطبني

هو لليوم يقول انو لازم يشوفني و قلبو معمر و دمرتلو حياتو و مازال و راح يبقى يحبني و انو الكل اسغلو و و و و

انا غيرت هاتفي و ما بقاش يهدد و الا يبعثلي حتى في كلمة لكن قلبي راح ينفجر

هل فعلا اني جرحتو ؟؟؟؟؟؟؟؟؟
هل انا فعلا تسببت بعذابو ؟؟؟؟؟؟؟؟
لو اخرى بمكاني كانت تصبر ؟؟؟؟؟؟؟

حاسة قلبي و عقلي راح يصيبهم الجنون هل فعلا كنت قاسية
قولولي الصح و ادعولي بالفرج

[soso sirin]

ضروك انتي واش باغية تفهمي راه غايضك هو راح يتزوج خلاص ماراهش طفلة باه نقولو حتمو عليه الزواج برضايتو راح خطب و راح يتزوج.انتي ماغلطيتش السيد بعث اختو من بعد راح اسكت واش راح تستنايه الدهر كون نقولو رجع هدر في هذا المدة معليش مي باه هو يجي يهدر وقت مابغى و يروح وقت مابغى يا اختي ماكيش لعبة بين يديه و ماتقدريش تدخلي لدماغو تعرفي واش راه يخمم.و حاجة وخدخرا انتي تخطبتي هو دار لبنت الجار معنتهى بغا يحرقلك اعصابك و قلبك و لا كيفاش.انتي ممكن عجبك مي هو يا اختي الي غلط هو ماراهش فاهم روحو امالا كيفاش راح تفهميه و راح تصبري عليه.كاين شي ناس هوما يديرو الغلطة و منبعد يقعدو يلومو.انتي ماعندك ماديريلو الحل راه بيديه و اذا صح يبغيك و ماراهش قادر ينساك حرام عليه الطفلة الي راح يتزوج بيها راه رايح يضيعلها حياتها و هي ماعندها حتى ذنب.

[مريم الصابرة]

السلام عليكم أختي
إنت ضرك واش حابة هو من البداية ممكن الإنسان هذا حبك حب عير طبيعي وإنت ضغطت عليه إنت وهلو من جهة الراجل رجع عندو حالة نفسية من كثرة زعافو منك رجع يهدد وخلاص وكان قادر يديرها ما تستهنيش بواحد خلاص مرض من راسو المشكل الآن إنت هو راح يتزوج ربي يوفقو وإن شاء الله يلقى العوض عند زوجتو
إنت الآن كان صح تحسي روحك غلطت معاه إدعيلو ربي يهنيه في حياتو وكاني حقيقة انا راني شفتها في موضوعك اللي فات وفهذا إنت تحبيه وزعافك منو لما عرفت بعلاقتو ببنت الجيران وخطبتو وضرك زواجو نانا وقلك كانك تحبيه من الاحسن تنسايه لأنو راح يتزوج ومن الأفضل بعدي التفكير إنك ظلمتيه من بالك راحا تتعلقي بيه وهو يتزوج ويدير دارو وشكرا

[بلسم غرام2018]

وش راح نقلك الاخوات جاوبوا
الله يهدي وخلاص

[* الحلم سكر *]

اختي انا اللي فهمتو انك بين عقلك و قلبك ! نهار بطلتي حكمتي عقلك و كان عندك الحق حسب اللي حكيتي .. درك قلبك لي راه يحكي
نقلك حاجة واحده شدي في ربي سبحانه عمرك ما راح تخيبي و راح تفرج ان شاء الله

[amina2688]

السلام عليكم ورحمة الله وبركاته
اختي الفاضلة الزواج او الارتباط هو استقرار وهدوء ومدة ورحمة {والخطوبة هي تمهيد لذلك} فاذا كنتي في فترة خطوبتك تعانين الامرين ..بلا سبب يبعد ويرجع بلا سبب؟؟ فاين هو هذا الاستقرار ...انت لم تجرحيه بل هو من جرحك عن ققصد او عن غير قصد...اختي الفاضلة
رجل زوااجه بعد اسبوعين من امراة ويكلمك ويقول انه لا يستطيع ان يستغنى عنك؟؟؟اختي الكريمة لا يوجد شي تصبرين عليه ولا يوجد شيء يعذبك ضميرك من اجله{ما اخطانا ما كان ليصيبنا واصابنا ما كان ليخطانا}
اطوي هذه الصفحة من حياتك,{ولا تعيري اهتمام لمن يشمت بفسخ خطبتك من خطيبك السابق ..فهم مرضى النفوس}
انسي كل شيء ولا تفكري بشيء اشغلي نفسك بامور تهمك وتستهويك واتركي كل شيء وراء ظهرك
وتذكري دائما ان الطيبون للطيبات والخبيثون للخبيثات
انا نقلك مثل خليه بيناتنا {قعدان اكاك ولا صاحب اعور}

[رحمة من المولى]

ري يفرج عليك ان شاااااااااا الله

[صرخة ألم]

المشاركة الأصلية كتبت بواسطة soso sirin

ضروك انتي واش باغية تفهمي راه غايضك هو راح يتزوج خلاص ماراهش طفلة باه نقولو حتمو عليه الزواج برضايتو راح خطب و راح يتزوج.انتي ماغلطيتش السيد بعث اختو من بعد راح اسكت واش راح تستنايه الدهر كون نقولو رجع هدر في هذا المدة معليش مي باه هو يجي يهدر وقت مابغى و يروح وقت مابغى يا اختي ماكيش لعبة بين يديه و ماتقدريش تدخلي لدماغو تعرفي واش راه يخمم.و حاجة وخدخرا انتي تخطبتي هو دار لبنت الجار معنتهى بغا يحرقلك اعصابك و قلبك و لا كيفاش.انتي ممكن عجبك مي هو يا اختي الي غلط هو ماراهش فاهم روحو امالا كيفاش راح تفهميه و راح تصبري عليه.كاين شي ناس هوما يديرو الغلطة و منبعد يقعدو يلومو.انتي ماعندك ماديريلو الحل راه بيديه و اذا صح يبغيك و ماراهش قادر ينساك حرام عليه الطفلة الي راح يتزوج بيها راه رايح يضيعلها حياتها و هي ماعندها حتى ذنب.

و الله يا اختي حطيتي يدك على الجلرح هو واثق و مستعرف بغلطتو لكن هو كان مضطرب فعلا نفسيا يدير المنكر و يعذبني و يتوقع نصبر
يعني هو مستعرف و يقول انا غلطت بزاف معاها و هي تحملت مي علاه تخطبت ... عمرو ما توقع مني نقبل بخلافو مع اني عملتها بعد عامين والو يسمع الا لجرحو و مصر يبقى من ورايا مهما يصرا
شكرا لمرورك ربي يخليك

[صرخة ألم]

المشاركة الأصلية كتبت بواسطة مريم الصابرة

السلام عليكم أختي
إنت ضرك واش حابة هو من البداية ممكن الإنسان هذا حبك حب عير طبيعي وإنت ضغطت عليه إنت وهلو من جهة الراجل رجع عندو حالة نفسية من كثرة زعافو منك رجع يهدد وخلاص وكان قادر يديرها ما تستهنيش بواحد خلاص مرض من راسو المشكل الآن إنت هو راح يتزوج ربي يوفقو وإن شاء الله يلقى العوض عند زوجتو
إنت الآن كان صح تحسي روحك غلطت معاه إدعيلو ربي يهنيه في حياتو وكاني حقيقة انا راني شفتها في موضوعك اللي فات وفهذا إنت تحبيه وزعافك منو لما عرفت بعلاقتو ببنت الجيران وخطبتو وضرك زواجو نانا وقلك كانك تحبيه من الاحسن تنسايه لأنو راح يتزوج ومن الأفضل بعدي التفكير إنك ظلمتيه من بالك راحا تتعلقي بيه وهو يتزوج ويدير دارو وشكرا

شكرا اختي لكن حبيت نوضحلك مارانيش انا لي وراه هو لليوم يقسم انو عمرو ماراح يخليني مهما يصرا و يقول ماهامو والو غيري يا لوكان يخسر حياتو راح يبقى ورايا
انا احساسي ماشي غالطة فيه ممكن العاطفة اقوى مني لكن ربي لي يعلم شحال صبرت
اولا احنا العلاقات في دارنا عيب و حرام و عمري ما غلطت و هو جا بنية خطبة و من بعد صار يتماطل
اسلوبو معايا كان مثل المجنون و حتى هو معترف لكن يقول يا ليتك تحملتي و غيرتيـني ؟؟ يعني مثلا مرة تظاهر انو قتل روحه و عيشني رعب عمري ما شفتو لانو فعلا خاطيني هدا التمسخير
هو فعلا راح يتزوج لكن ماهامو والو حسب كلامو حتى انو يقول لوكان يخسر زوجتو عادي المهم يبقى من ورايا يعني انا تفاجأت لما خبرني بامور عليا ما فهمت والو كيفاه عرفها و هو بعيد و صرات بالفترة اللي هو خاطب يعني فعلا مازال ورايا و مع هدا حتى رقم هاتفي غيرتو لكن ؟
و فعلا احسنتي التحليل حكايتو مع جارتنا هي اللي فجرت اللي داخلي كامل
شكرا لردك و ربي يرزقكم كامل ما تتمناو

[صرخة ألم]

شكرا لردودكم كلا باسمه .... لا املك الا ان افوض امري لربي سبحانه .... و آسفة شغلتم بمشكلتي .. و جزاكم ربي كل خير و الله لا يحطكم في ضيق ان شاء الله

[مريم الصابرة]

السلام عليكم اختي
انا على حساب واش راكي تحكي راني نشوف باللي هو مريض نفسي وتعلق بيك لدرجة رجعتيلو هوس يعني نقولك ردي بالك برك هذا قربو منك خطر وممكن صح حتى لو يتزوج لكن راح يدمرك انا ننصحك تبعدي قد ما تقدري وما تخرجيش برا وحدك وكي راكي فالدار وسط اهلك ما عندو ما يدير هو لو إنت كنت تحبيه الصراحة لو انا نحكي على روحي مهما كان راحا نتحملو ونصبر عليه لأنو الراجل اللي يدير عليك كل هذا معناها يحبك صح لكن الله غالب راه تزوج وربي يهنيه ويبعدو عليك
إنت الآن لندمة فات عليها الوقت لو كاني فرصة ترجعو البعض لو رجعتو وتحملت عليه لكن وصلو المشاكل لداركم ودارهم خرجت على يديكم إنت الآن بعدي ودعي ربي يهديه هو مسكين نشوف فيه مريض ربي يهدي نفسو موفقة

[جمعي البشاري]

الله يهدي ماخلق كل هدا بسبب المسلسلات والاعلام والاهمل من طرف الوالدين
" الْحَلالُ بَيِّنٌ وَالْحَرَامُ بَيِّنٌ ، وَبَيْنَهُمَا أُمُورٌ مُتَشَابِهَاتٌ لا يَعْلَمُهَا كَثِيرٌ مِنَ النَّاسِ ، فَمَنِ اتَّقَى الشُّبُهَاتِ اسْتَبْرَأَ لِدِينِهِ وَعِرْضِهِ ، وَمَنْ وَقَعَ فِي الشُّبُهَاتِ وَقَعَ فِي الْحَرَامِ ، كَالرَّاعِي يَرْعَى حَوْلَ الْحِمَى يُوشِكُ أَنْ يَرْتَعَ فِيهِ ، أَلا لِكُلِّ مَلِكٍ حِمًى ، وَإِنَّ حِمَى اللَّهِ مَحَارِمُهُ ، أَلا وَإِنَّ فِي الْجَسَدِ مُضْغَةً ، إِذَا صَلَحَتْ صَلَحَ الْجَسَدُ كُلُّهُ ، وَإِذَا فَسَدَتْ فَسَدَ الْجَسَدُ كُلُّهُ ، أَلا وَهِيَ الْقَلْبُ " .
نصيحتي هو الاكثار من الاستغفار والدعاء لما فيه من خير
والله المستعان

[صرخة ألم]

المشاركة الأصلية كتبت بواسطة مريم الصابرة

السلام عليكم اختي
انا على حساب واش راكي تحكي راني نشوف باللي هو مريض نفسي وتعلق بيك لدرجة رجعتيلو هوس يعني نقولك ردي بالك برك هذا قربو منك خطر وممكن صح حتى لو يتزوج لكن راح يدمرك انا ننصحك تبعدي قد ما تقدري وما تخرجيش برا وحدك وكي راكي فالدار وسط اهلك ما عندو ما يدير هو لو إنت كنت تحبيه الصراحة لو انا نحكي على روحي مهما كان راحا نتحملو ونصبر عليه لأنو الراجل اللي يدير عليك كل هذا معناها يحبك صح لكن الله غالب راه تزوج وربي يهنيه ويبعدو عليك
إنت الآن لندمة فات عليها الوقت لو كاني فرصة ترجعو البعض لو رجعتو وتحملت عليه لكن وصلو المشاكل لداركم ودارهم خرجت على يديكم إنت الآن بعدي ودعي ربي يهديه هو مسكين نشوف فيه مريض ربي يهدي نفسو موفقة

مريم اختي من فضلك اذا ممكن اعطيني طريقة نتواصل بيها معاك ...

[أسومة المتفائلة]

ربي يصبرك
اول شي متخليش هيك شخص ياثر عليك بكلامو

ماكش راجل على خاطر لوكان جات شارياتك توقف معاك و تصبر و هاذي الكلمة قتلاتو و قتلتني حاليا ....

وعلاه تصبرى عليه هو شكون حتى تصبري عليه تبقى تسناى فيه ولا كيفاه
وانت اصلا واش درتيلو ؟؟؟؟؟؟؟؟
مدرتيلو والو
هو منو لروحو يخلط خاطب وعرسو قريب


نصيحة منى انساي هاد الشخص ومتفكريش فيه هو دار كلش بيديه وانت تخلصي وتلومى فى روحك