معاناتي مع عجينة لمحاجب

[ام ايمان16]

السلام عليكم

سؤالي بخصوص عجينة لمحاجب دايما ماتجينيش مليحة كيما نحوس
كل مانسخف عليهم ونديرهم لعجينة تسمطهالي وتجيني تتقطع وماتعطيليش الطوع نحلها كيما نحب

مع اني جربت كل الطرق
جربت عجنتها بالدقيق العادي وخليتها ترتاح لاكثر من 3ساعات واحيانا يوم كامل
جربت عجنتها بالدقيق الرطب وخليتها ترتاح ايضا
جربت عجنتها بالدقيق الرطب والفرينة وخليتها ترتاح ايضا
جربت عجنتها ودرتها في الكيس المبلول وخليتها ترتاح
جربت عجنتها ودرتها في الكوكوطة ترتاح ايضا

وكل الطرق تؤدي الى روما ههههههههه اقصد لفشل صنع محاجب كيما يلزم

فمنيش فاهمة هاذي لعجينة لاه ماحبتش تصلح معايا
واخر محاولة ليا فيها كانت لبارح حتى طيبت 3 برك وكي ماعجبونيش خبيت لعجينة في الثلاجة كاشما ندير بيها حاجة اخرى
دايما تبهدلني عجينة لمحاجب مانعرف لاه ((سورتو قدام زوجي))
حتى قلت بالاك كاش واحد دعى عليا انهم مايصلحوليش خلاص مهما درتها ههههههه

راني حكيتلكم معاناتي مع عجينة لمحاجب وانتضر كاشما حلول لهاذاالمشكلة

[x ام رحاب x]

انا كون تاخدي رايي العجينة راكي ماكيش فاهمتها مليح لازم وحدة تكون تعرف ولازم اتكون قدامك باه اتوريلك مليح الطريقة واتخدميهم قدامها باه اتروحلك هاد الخلعة تاع المحاجب لازم اتشوفي وحدة تتقنهم مليح واتعلمك امبعد راهي رايحة اتروحلك الهيبة تاعهم

[lilii7179]

سلام
ممكن ان نوعية الدقيق هي اللي مفسدة عليك, خيري دقيق يكون ممتاز ( ما عمباليش وين راكي ساكنة بصح حنا في باتنة كاين دقيق ماركة بوصبيع او كنزة هاذو 2 يتحلو وحدهم حتى لوكان كنتي مبتدئة)
كاين عفسة ديرها الوالدة كي تشك بلي الدقيق ما فيهش العلك(يعني العجينة تتقطع) و هي ملعقة خل. الخل رايح يخلي العجينة تمد العلك. الدقيق الرطب مع شوية فرينة يجي مليح عموما
الملح ما تحطيهش في الاول, بلي العجينة خليها ترتاح لساعة على الاقل, ثم ذوبي كمية الملح نتاعك في شوية ماء, و اضيفيه بشوية مع العجن,خليها ترتاح مرة ثانية, لوزيها, ادهنيها بالزيت و غطيها ببلاستيك و خليها ترتاح 15د قبل ما تبداي طيبي. بهاذ الطريقة باذن الله ما تتقطعلكش العجينة.
ان شاء الله الاخوات اللي عندهم اكثر خبرة يفيدوك

[ام ايمان16]

المشاركة الأصلية كتبت بواسطة x ام رحاب x

انا كون تاخدي رايي العجينة راكي ماكيش فاهمتها مليح لازم وحدة تكون تعرف ولازم اتكون قدامك باه اتوريلك مليح الطريقة واتخدميهم قدامها باه اتروحلك هاد الخلعة تاع المحاجب لازم اتشوفي وحدة تتقنهم مليح واتعلمك امبعد راهي رايحة اتروحلك الهيبة تاعهم

منخافش اختي شكون قالك نخاف

لي يخاف كي ماتصلحلوش الحاجة مايزيدش يعلودها
لكن راني نضل نعاود فيها وماحبتش تصلح مهمها بدلت الطريقة ولعجينة ماطاوعنيش ههههههههه تكرهني خخخخخخخخخ

ماحبتش تحبني وتجي معاياهههههههههههه

وانا نطيب اي حاجة ومانهابش حتى اشياء غريبة ونطيبهم حتى يقولولي كيفاش قدرتي طيبيهم

وجات عند عجينة لمحاجب وحبست حتى مخي حبس وفيه علامة استفهام على ماصلحتليش

وحاليا ماعنديش لي تعرف طيبهم ونقدر نشوفها قدامي طيبهم

[ام ايمان16]

المشاركة الأصلية كتبت بواسطة lilii7179

سلام
ممكن ان نوعية الدقيق هي اللي مفسدة عليك, خيري دقيق يكون ممتاز ( ما عمباليش وين راكي ساكنة بصح حنا في باتنة كاين دقيق ماركة بوصبيع او كنزة هاذو 2 يتحلو وحدهم حتى لوكان كنتي مبتدئة)
كاين عفسة ديرها الوالدة كي تشك بلي الدقيق ما فيهش العلك(يعني العجينة تتقطع) و هي ملعقة خل. الخل رايح يخلي العجينة تمد العلك. الدقيق الرطب مع شوية فرينة يجي مليح عموما
الملح ما تحطيهش في الاول, بلي العجينة خليها ترتاح لساعة على الاقل, ثم ذوبي كمية الملح نتاعك في شوية ماء, و اضيفيه بشوية مع العجن,خليها ترتاح مرة ثانية, لوزيها, ادهنيها بالزيت و غطيها ببلاستيك و خليها ترتاح 15د قبل ما تبداي طيبي. بهاذ الطريقة باذن الله ما تتقطعلكش العجينة.
ان شاء الله الاخوات اللي عندهم اكثر خبرة يفيدوك

نورمالمو من كثرة محاولاتي في لعجينة راني استعملت عدة انواع من الدقيق سواء كي كنت في دارنا في برج بوعريريج
او ضرك في داري في دزاير

وكل مرة نفس النتيجة لعجينة تتقطع

وان شاء الله المرة الجاية نجرب طريقتك نتاع الخل والملح منديروش مع الاول

شكرا

[ibtihal18]

ام ايمان انا نقلك الدقيق اللي راكي تطيحي فيه مافيهش العلك يعني ما يتعجنش
شوفي اولا اذا الدقيق مليح و فيه العلك والله كيما تمسي فيهم يتعجنو و يجيو هايلين و اذا مافيهش العلك لو تقعدي النهار كامل تعجني ...................و ثاتي لازم تعجنيهم مليح و كي تعجني ما تقطعيش بالاك راكي تقطعي .................و ثالثا لازم كي تكوريهم يرتاحو مليح يطولو كي تلقايهم طلقو و بداو يلصقو في بعضاهم اخدمي و تاني كي تخليهم يرتاحو ما تحطيهمش مقابلين فالشمس لانتو العجين تاعك رح يروح فالفيد
والله يا اختي نقلك نهار بديت نتعلم فيهم كان الدقيق كي المطاط ماشاء الله ما عدبنيش كامل و درك راني مع وحد الدقيق يا لطيف المرة هذي كل ما نخدمهم يجيو يتقطعو مالقري نعجنهم حتى يتملخو يديا و نقول درك نروح نحطلهم البلاثر ههههه و يعذبوني
ربي يعينك اختي جربي الدقيق حتى تلقاي المليح و زيد هذي العفسة تع الخل رح نجربها ان شاء الله ماكنتش علابالي بيها

وزيد نسيت نقلك حتى تعجنيها مليح باش تبداي تطلقي فيها ديري الما فالكف تع يدك و كملي العجين و مبعد زيدي الما فالكف تع يدك و كملي عجني حتى تشوفيها ولات طرية و تقدري تكوريها و حبسي

[قطوفها دانية]

السلام عليكم


الاكيد ماكيش تعطيلها حقها تع الدليك

شمري على يديك وادلكي وماتكثريش الماء بللي يديك برك ويالله

حتى تولي رطبة بزاف كي تكسليها ماتتقطعش

[zola70]

انا عمري ماصلحولي لمحاجب حتى بطلت نخدمهم دايما نرمي في العجين مانعرفش وش نخدم بيه
انشاءالله نجرب الخل ونشوف

[lilii7179]

المشاركة الأصلية كتبت بواسطة zola70

انا عمري ماصلحولي لمحاجب حتى بطلت نخدمهم دايما نرمي في العجين مانعرفش وش نخدم بيه
انشاءالله نجرب الخل ونشوف

علاه ترمي العجين؟؟ زيديلو الخميرة و سينوج خليه يطلع مليح و ديريه مطلوع يجي هايل خاطر ديجا راهو معجون مليح.خير ما ترميه

[zola70]

ربي يحفظك lilii179 ان شاءالله نعمل بنصيحتك لم افكر بذلك

[فايزة1207]

الدقيق كي يكون ماشي مليح يمرض خاصة المحاجب والشخشوخة
لازمك تملحيه دقيق عكس الالنوعية لمليحة وياربي يصلحلك

[ام ايمان16]

شكرا اخوات
انا كنت نقول ايضا من نوعية الدقيق لكن كل مرة نستعمل دقيق مغاير نلقى نفس النتيجة حتى دخلني الشك في روحي ان لعجينة ماتصلحليش مهما حاولت فيها او بدلت الدقيق
رغم اني نعجنها وندلكها ونخليها ترتاح ونعاود نرجع ليها ندلها شوية ونخليها ترتاح وهكذاك ماتخرجليش كيما نحوس

[ام هدول]

شفت العنوان دخلت نشوف معانتك مع اعجينة لمحاجب والنصائح لي مدوها الاخوات كلها صحيحة نوعية الدقيق تلعب دور كدلك العجن الجيد قبل ما تبداي تبلي بالما بالشوية حتت تلين العجينة وخليها دائما ترتاح راح تكون في طوعك ان شا الله تاخدي بالنصائح تاع الاخوات وتجربيها وتصلحلك وتردينا الخبر

[raboha]

خسارة الموضوع اللي حطيتو
ياك حطيت طريقتي فالمسمن و قتلكم بالفرينة برك
و الله ديري فرينة برك و رايحة تشوفي محاجبك كيفاه يخرجو
ديري فالبيترا الفرينة و الماء لازم متيبسيها متجريها و مديريش الملح و خليها نص ساعة دور
بصح متزيديش الماء
من بعد نحيها و ديري الملح و بلي بشوية ماء و كي يدخل الملح فالعجين ابداي تخبطي فالعجين
مدة عشر دقايق و خليها ترتاح ربع ساعة و شوفيها إذا ولات طرية ابداي تقرصي و إذا مزالت قاسية زيدي بلي بالماء و خبطي و خليها ترتاح و شوفيها
كي تقرصيهم زيدي خليهم يرتاحو باش يتحلو مليح
ختي ديري كيما قتلك و الله يخرجولك روعة و عجينتهم مطاطية و يجو خفاف و مورقين
جربي و رديلي الخبر

[ام ايمان16]

المشاركة الأصلية كتبت بواسطة ام هدول

شفت العنوان دخلت نشوف معانتك مع اعجينة لمحاجب والنصائح لي مدوها الاخوات كلها صحيحة نوعية الدقيق تلعب دور كدلك العجن الجيد قبل ما تبداي تبلي بالما بالشوية حتت تلين العجينة وخليها دائما ترتاح راح تكون في طوعك ان شا الله تاخدي بالنصائح تاع الاخوات وتجربيها وتصلحلك وتردينا الخبر

شكرا على النصيحة اختي
لكن انا نعجن باليبوسة قبل مانديرلو الماء وهكذاك مايصلحليش

المشاركة الأصلية كتبت بواسطة raboha

خسارة الموضوع اللي حطيتو
ياك حطيت طريقتي فالمسمن و قتلكم بالفرينة برك
و الله ديري فرينة برك و رايحة تشوفي محاجبك كيفاه يخرجو
ديري فالبيترا الفرينة و الماء لازم متيبسيها متجريها و مديريش الملح و خليها نص ساعة دور
بصح متزيديش الماء
من بعد نحيها و ديري الملح و بلي بشوية ماء و كي يدخل الملح فالعجين ابداي تخبطي فالعجين
مدة عشر دقايق و خليها ترتاح ربع ساعة و شوفيها إذا ولات طرية ابداي تقرصي و إذا مزالت قاسية زيدي بلي بالماء و خبطي و خليها ترتاح و شوفيها
كي تقرصيهم زيدي خليهم يرتاحو باش يتحلو مليح
ختي ديري كيما قتلك و الله يخرجولك روعة و عجينتهم مطاطية و يجو خفاف و مورقين
جربي و رديلي الخبر

وعلاش تقولي خسارة لي حطيتي موضوعك؟

ماشفتش موضوعك نتاع الفرينة ممكن تحطيلي الرابط
مع العلم ماعنديش البيترا يعني نعجن بيديا برك