كل وحدة تقولنا طريقتها في تحضير راس الحانوت

[ام رحوقة]

لبنات نقوللكم الصح بديت نعيف راس الحانوت الي يتباع واجد مانعرفش واش يرحو ويخلطو معاه قلت نبدا نوجدو وحدي خاصة رمضان قريب وانا مانعرفش اصلا نخدم راس الحانوت
هيا كل وحدة تقولنا طريقتها من الاوووووول

[زهرة الربيييع]

موضوعك عجبني ام رحوقة انا نشريه جاهز
انشاء الله يفيدونا الاخوات
كذلك حب تتبيلة الشوارما يقولو فيها 7 بهارات ؟

[x ام رحاب x]

السلام عليكم ورحمة الله وبلاكاته
موضوع مهم جزاك الله خير حبيبتي انا راص الحانوت كنت نشريه بصح ملي لقيت فيه فضلات الفئران وليت عمري مانشري من الراص الحانوت مخدوم المهم انا نشري كمية كبيرة راص الحانوت ونقيها من الحجر وكل شيء تراب اقصب وانسيرها ايطيح كلش يقعد غير راص الحانوت انقي امبعد هاذي اختياري انا شوية موسوسة نغسلو بشوية ازيس وانشلو وانخليه ينشف مليح امبعد انحطو في السنوة وانخليه ينشف فوق البوال تاع القاز وانرحيه صافي مانديرلو والو يعني راص الحانوت يكون صافي
وكاين الي يضيفولو اديرو راص الحانوت ومعاه شوية حبة البسباس وكروية ووريقات رند يعودو يابسين ويرحوهم وشوية قرفة ماتكثريش ويرحوهم كاملين ويعود راص الحانوت امخلط ايجي في الطعام وبركوكس انشاء الله انكون فدتكم

[sofiane2075]

اختي شوفي هاد الرابط

https://www.djelfa.info/vb/showthread.php?t=1026786

[هبة الرحمان انشراح]

ااحنا راس الحانوت نشروه واجد لكن مرة راح راجلي يشريه العطار نصحو يخدمو في الدار واعطاه الخلطة اللي هي راس حانوت يكون هو اكبر كمية طبعا وفيه ملعقة صغيرة من كلش يعني فلفل اكحل كمون كروية بسباس حبة حلة قرفة عرق اصفر عكري حلو وكانت النتيجة هايلة وممكن اتجربيه قبل رمضان وتبقى كل منطقة وتميزها

[imene mimicha 05]

اختي حنا عمرنا ما نشرويه جاهز تخدمو ماما ربي يحفظها في الدار و يجي هايل خير من تاع برا

[arbicho]

موضوع جميل لتعرف تخدموا تنعتنا

[yacef hayet]

المشاركة الأصلية كتبت بواسطة ام رحوقة

لبنات نقوللكم الصح بديت نعيف راس الحانوت الي يتباع واجد مانعرفش واش يرحو ويخلطو معاه قلت نبدا نوجدو وحدي خاصة رمضان قريب وانا مانعرفش اصلا نخدم راس الحانوت
هيا كل وحدة تقولنا طريقتها من الاوووووول

مشكورة على الموضوع ارجوا يفيدونا الاخوات

[بريق الدجى]

المشاركة الأصلية كتبت بواسطة imene mimicha 05

اختي حنا عمرنا ما نشرويه جاهز تخدمو ماما ربي يحفظها في الدار و يجي هايل خير من تاع برا

سقسي ماماك كفاه تخدمو و قولينا و ربي يجازيكم بكل الخير

[أمير الهوى]

موضوع جميل انا نشري كيلو كسبر ونزيدلو اربعة اعواد غنطس وملعقتين حبة حلاوة وملعقتين زريعة البسباس طبعا كلش يكون منقي ونضيف ونزيدلو اعواد العود الاصفر يعني الكركم ونرحي كلش ونستعملو في المرقة الحمراء فقط

[raoufnina]

انا نشريه جاهز
انشاء الله يفيدونا الاخوات

[hayette82]

نفركت على الوصفة ونحطها

[هدى غرباوي]

يا اخوات راني هذا وين شفت موضوعكم وانا راني منستعملش راس الحانوت ليتباع راه كامل مش مليح ومن الاحسن تبعدو عليه وذرك نعطيكم الطريقة توجدو بيه راس الحانوت لرمضان انشاء الله وانا متاكدة بلي رايحيين تدعيولي لانه رائع مذاقا ونظافة
1- كلغ كسبر 2- رطل ونصف بسباس 3-رطل كروية 4-نصف رطل بسباس 5-حوالي 10 حبات جوزة الطيب 6- قيمة 50دج فلفل اسود
7- قيمة 50دج كبابة
ننضف الكل من الاحجار والتراب ونرحيهم عند العطار وهذه الكمية تجيك حوالي 2 كيلو تكملك 6 اشهر لسنة

[lilii7179]

حنا نشريو الكسبر و نظفوه و نقيوه من الأحجار و نزيدولو الكروية : لكل كيلوكسبر 250 غ كروية تكون منقية ئ نرحيوهم مع بعض , هذا يصلح للمرقة البيضة او الحمرا, لكن للشخشوخة و الكسكس و المرق الأحمر لي يبغي التوابل بكثرة نخلطو كيلو كسبر, 250 غ كروية, 150غ حبة حلاوة, 150 غ زنجبيل صدقوني المذاق يجي رائع , و بالطبع كل التوابل تشريها و تنقيها بنفسك

[سرور2]

السلام عليكم اذا كنتى تقصدي الفاح انا نديرلو

قيمة 25 دج كسبر حب و10 بسباس و5 كمون و5 الورد و5 الكبابة و5 كروية و5 هيل و5 نجمة الارض بصح تقدري اديري غير 5 او 6 نجمات و5 حبة حلاوة

وتنقيهم مليح من الاوساخ والحجر ودقيه في المهراس قبل ثم في رحاية القهوة حتان يكونو كيما الطحين ومن بعد دريهم في غربال الشعرة وتغربلي والي

تبقى تزيدي تعاودي ترحي وتغربلي حتان تكملي الكمية الي عندك كتكملي الكمية الي عندك زيدها 3 بكيات صغار انتاع زنجبيل السلسة هذا اسمو راه

يطلقلها واحد البنة ولون روعة و راها تجيك كمية كبيرة بزاف وتشدلك وقت ووالي عندها الرحاية انتاع الكوكاو

كهربائية كيما انا تخلط جميع المكونات الي ضكرتهم بعد متنقيهم مع بعض وتمررهم دورة او2 في رحاية الكوكاو ومن بعد الة رحاية القهوة

و الي مفهمتش كشما حاجة تقلي نفهمها

وحبيت نسقسي على طاجين اللحم لحلو وشكون الي تعرف اطيبو بصح يكون لونو اصفر مش احمر