مرت خويا تغير منا2

[مشكلتي]

السلام عليكم انا صاحبة الموضوع السابق شكرا لردودكم رغم انكم كامل اتفقتم اني غالطة انا واختي ومتجاوزين حدودنا مع اخينا ومرته
نسيت ماقلتلكمش بلي مشي دايمن نوصلوه للباب احيانا فقط
والاخ لي قالي اذا يخدم خوكم بعيد ويطول باش يجي نورمال .ايه اخي يطول باش يجي يبات ديما فلخدمة ويجي زوج مرات فالاسبوع ومن غدوة ذاك يروح مثلا يجي بالسبت ويروح بالاحد ومبعد يزيد يجي بلخميس ويروح بلجمعة والله نتوحشوه ونحبوه
ضفت هذالموضوع مش باه توقفو معاي علبالي كامل راكم ضدي ضفتو باه نحكيلكم بلي البارح صرا مشكل فلبيت ومرت خويا دارت حالة والسبب ان اخي حفف شعرو وكي جا لدار (قتلو بصحتك وليت زين)
انا تبانلي عادي مفهمتش علاه انتوما راكم معقدين وش فيها نقول لخويا (بصحتك راك زين؟؟؟)

[أثر]

مدام هاذ الامور تعمل لكم مشاكل مع الزوجة فمكالاه ديروها خليوا خوكم يعيش مرتاح مع زوجته وخلوها هي تقوم بدورها
اخوكم تزوج يعني مابقاش نفس خوكم العازب هذا لازم تفهميه مليح نت واختك وتتعاملوا على هذا الاساس مستقبلا
ربي يصلح الاحوال ...

[ing.Youcef]

وعليكم السلام ورحمة الله
يبدو أن زوجة الأخ لديها حساسية زائدة
وبما أنها وصلت للمشاكل فما عليكم إلا مراعاتها وتجنب مشاكلها
الدار داركم والأخ أخوكم فاسمحوا انتوما من أجل مصلحة الجميع
كلش يفوت وما يبقى غير العيب
بالتوفيق

[Simsim.rd]

مادام عبالكم بلي مرة خوكم تغير من هاذ التصرفات و راكي تقولي بلي أحبوه و تتوحشوه خلي هاذ الشي بينكم و بين خوكم مش شرط كي تكون مرتو حاضرة تبداو تهلى في روحك و توصلونه عند الباب.. الخ هنا يبان فيها شوي مبالغة و تعمد خاصة انو هاذ الشي ولا مشكل حقيقي مش مجرد أحاسيس و هدرة برك. نزيدلك حاجة عن تجربة مش رايحة تحسي واش تحس مرة خوك غير نهار لي تتزوجي لتم لي تتبدل نظرتك و تفهمي بزاف أمور و تقولي ممكن انا تاني كنت غالطة. ربي يهدي النفوس و احذرو تكون سبب فتنة في الدار سوا بين خوك و مرتو ولا بينكم و بين خوكم

[منى6019]

السلام
لا أرى أن هذه غيرة ..زوجة اخيك تريد أن توصله هي للباب و تقول ما تقولون و اكثر .. و هذا شيء عادي ...هي لا تجد نفسها بينكم ...تريد أن تتميز بشيء لدى اخيك لكنكم لا تتكون لها الفرصة ....أرى أن انسحبوا قليلا و تتركون لها دورا ..... من المحبة بينها و بين اخيك أن توصله للباب و هذا شيء جميل ......افرحوا للحب بينهما ...

[منى6019]

اه نسيت ..بالنسبة الحلق ...هذا ايضا شيء خاص ...و ليس كما فهمته انت .....انت لا تفهمين هذا الشيء كيف يراه اخوك و زوجته ......الم تري vidéo جزائرية تقول نحبو طويل و اسمر و عندو لحية
دعوها و زوجها و لا تعلقوا بشيء أمامها ...ليس لانكم ضعفاء ...لكن هذه الكلمات تولد الحقد في القلوب

بعد 20 عاما تجدين زوجة اخيك تحكي هذا لبناتها و تقول فيكم العجب

[amoulette]

هذي مرت خوك طفلة
و تصرفاتكم طبيعية و هي اللي لازم تفهم انكم اخواته و لستن منافسات لها يعني كل واحد في بلاصتو
كيها يقول المثل ساعف المريض حتى يبرا
ما تعاندهاش و حاولو تتجنبوها الله يهدي الجميع