محتارة عاونوني نصارحوا ولا لا

[مشكلتي]

السلام عليكم ..
حبيت نلقى حل لمشكلتي .. ..
انا متزوجة من اربع سنين..عندي 2 صغار ..و ساكنة مع عائلة زوجي ...طبعا اهتمامي بزوجي قليل لانو معنديش الوقت ديما يا في شغل الدار ( عايلة كبيرة ) يا مع الذراري..راجلي نتلقاه في الليل ككنكون عييت من كلش بحكم خدمته ..بصح مع ذلك قايمة بحالي و مش مقصرة معاه في حاجة ..و لا ممكن مقصرة و منيش حاسة بصح حتي واذا قصرت معاه مجاتش بين عينيه راني نخدم في والديه و موانستهم و عايشة في ضغط حابة نحس بإهتمام زوجي ..المهم من شهرين حسيت براجلي تبدل عليا ياسر ماشي شوي حتي الليل يجي روطار و معادش قاعد مع ولادو و معايا تبدل بزاااف بزاف ..لا يتغدى ولا يتعشى في الدار ..اليوم الكل غايب يجي غير مع 2:00 و 3:00 تاع الليل ..سقسيته وشبيك مبدل واش كاين ..غيرت من نفسي ..و حاولت معاه ..يقولي ضغط شغل برك ..طبعا انا مدخلتش في بالي قعدت وراه حتي لقيته داير برطابل بتخبية فيه بيس فيه فايس بوك يقعد في الشارع و يهدر و يقصر معاهم ...مزلت مصارحتوش و خايفة يكون يتلاقى معاهم تاني ..عاونوني واش ندير

[زبدة ذايبة]

وش مازال تصارحي وما تصارحي !!!!!!!!!!!

راجلك يدخل مع الفجر للدار وش بقى.

ماراه قيام ليل

ماراه عين تبيت تحرس في سبيل الله.

وش راكي تستناي؟؟؟؟؟؟؟

والغلطة تاعك من الاول.

الكرسي الفارغ دائما تطمع فيه الناس تقعد فيه.

وانت خليتي بلاصتك فارغة.

وكأنه متزوج مع أخته.

كل همك الشيخ ولعجوزة كيفاش تخدميهم.

وفي المقابل نسبتي روحك.

على أمل أن زوجك يقدرةهذا الجهد.

لكن

أنت في واد وهو في واد آخر.

الشيء اللي راكي تجتهدي على جالو هو مايعنيلو والو.

يعني جهد على الفاضي.

تعبك رتح خسارة.

ولو كان برك جات في التعب.

ضربتي النح عليه وخليتيه.

لا رقيب ولا حسيب

يدخل ويخرج كيما يحب.

وانت لاتية بالكوزينة.

ماتخرجيش منها.

وهو لقاك غافلة

ورب العالمين ماشي دايرو في لحساب.

مايهموش.

وبالنسبة ليه مافيها والو شوية تاع زهو مع ..............


الدنيا خالية عندك وتسقسي إذا تصارحيه.

ماراهوش يخبي عليك اللي راكي تحوسي على المصارحة.

هذا يجاهر بالمعصية

راه قدامك وقدام أهلو يدخل متأخر.

وين راه يروح.


وش راه يدير

ومع من



؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

تظني انه لما يرجع للدار كاف بالنسبة إليك.

مايهمش على شحال يدخل

حاجة ماتهم.

خليتي الأمور سايبة حتى ولا مايهموش وقت مادخل للدار هذاك هو.

لا احترام ولا تقدير.

عاودي اضبطي أمورك.

واجهيه وطالبيه بحقوقك.

وقوليلو مايساعدنيش الحال تاع ترجع للفجر للدار.

ومن الممكن يرجع في حالة سكر.

لا حول ولا قوة إلا بالله.

هذا بيتك والعش اللي يتربى فيه أولادك.

ماتخليش من هب ودب يخربلك فيه.

[محارب الحمق]

غياب الوازع الديني لدى الانسان يعتبر مشكلة المشاكل. تارك الصلاة من أسوء هذه الأنواع ونتمنى أن لا يكون زوجك من هذا الصنف لأنه عندها ستكون كارثة كبرى. عليك أن تفتحي معه حوارا بذكاء وعندما تلاحظين أنه بمزاج جيد. حاولي لفت انتباهه الى تغير حاله واسأليه ان كنت مقصرة معه في شيء. حاولي أن تلمحي الى موضوع حكاياته في الفيسبوك عن طريق المزاح. عليك بالدعاء واصلاح نفسك. اصلحي نفسك يصلح الله حالك. والصلاح لا يعلم كيفية الا الله (قد يكون الطلاق صلاحا لك وأنا لا أتمناه لك بل فقط أريد أن أشير أنه عند اصلاح حالك مع الله سيصلح الله حالك بالتأكيد)

[هـــدوء]

أولا أنت في دار العائلة مطالبة بالمساعدة في أعمال البيت كفرد من الأسرة و ليس كخادمة أما شيخك و عجوزتك مسؤولية ولادهم مش مسؤوليتك و إذاحبيتي تخدميهم اخدميهم من باب الإنسانية مش من باب الواجب و إلا صار حق مكتسب .

عزيزتي الراجل كي يخون هذا لسوء أخلاقو و قلة تربيتو لأنو الرجل السوي حتى لو تقصر فيه مرتو يحاورها و يحاول يوصل معاها لحل أولا مشي يروح مباشرة لغيرها.
يعني حبسي ما تبرري غيابو بتقصيرك لأنو راح تلقاي روحك أنتي لي تعتذري منو في الأخير مع أنو هو الخائن.

الحل تهتمي بروحك أولا بدرجة أولى ثم أولادك و زوجك بدرجة ثانية و جامي تخدمي أي أحد على حساب خدمتك لروحك.
اهتمي بروحك مش نظافة و زينة و فقط لا اهتمي بروحك يعني خلي وقت لنفسك ديري فيه أنشطة تاعك وحدك ....

[noursm]

هادا لي عندو تيليفون بالدرقة عليك يخوف ما لازمش خلاص تسكتي عليه
و كون تسكتي يحطك راقدة و معلابالك بوالو
انتي برك اهدريهالو بطريقة مناسبة و في وقت مناسب
و ربي يكون معاك