مشكلتي

[مشكلتي]

السلام عليكم اخوتي انا فتاة 24 سنة عايشة حياة عادية و راضية و الحمد لله لانو اهم شي بالنسبة لي رضا الله تعالى الصحة و الهل و انا جد متعلقة باهلي نحبهم بزاف و هوما نفس الشيء لدرجة اني اجلت التفكير في الزواج رغم الخطاب اللي تقدمولي لكن مؤخرا ظهرت مشاكل دايما الشجار معايا لاتفه الاسباب و انا مش متعودة على هاد المعاملة وليت ليل مع نهار نبكي وليت نقول نتزوج اي واحد المهم نرتاح و انا قبلها جارنا صرحلي باعجابو بيا و نيتو الصافية باش يتزوجني و انا متاكدة ما يكدبش عليا لكن مازال ما وجدش روحو يعني على الاقل نستناه عامين و من جهة اخرى كاين شخص اخر كان رسل الوادة تاعو تفاتح امي باش يتقدمولي رسمي هو انسان متخلق و محترم ما عندي ما نقول فيه برك فرق السن 15 سنة هدا اللي خلاني مش مقتنعة 100/100 لكن قلت نتزوج وخ لاص لما قلت لجارنا هاد الكلام قالي انتي انانية و تفكري في نفسك لكن انا والله نحوس نتهنى من هاد المشاكل باي طريقة علابالي الزواج هو الحل الوحيد قولولي ادا راني غالطة و جزاكم الله كل خير

[mino 13]

لك الحق فى اختيار اي زوج مناسب لك
هدا جاركم هو قال لك عامين ربما اكثر ربما اقل ..هو قال هكدا لانه يريدك ويرى ان الفرصة تطير من يده
15 سنة نعم الفارق كبير نوعا ما يعنى هناك فارق مستوي تفكير ..لكنه الحل مناسب وكيما يقولو تدي واحد --شارب عقلو --- وجاهز للزواج
بصح اختي الجميع لديه مشاكل لا يوجد مواطن جزائري ليس لديه مشاكل رغم انك ترى فى وجهه ضحكة وابتسامة

صلى صلاة استخارة وربي يفرجها ان شاء الله

[abdellah36]

24 راك كبيرة البيبان تاع القطار بداو يتغلقوا .....................غير ارجعي لعقلك قبل ما يشعل الضو لحمر ......................

جارك ما يجوزلكش تهدري معاه ..................اذا حاب يخطبك يجي يهدر مع باباك ..............هذاك راهو يتمسخر بيك برك ...............


لكان اختو ما يقبللهاش تهدر مع جارهم ...................

[أمّ عبد الودود]

المشاركة الأصلية كتبت بواسطة abdellah36

24 راك كبيرة البيبان تاع القطار بداو يتغلقوا ..........................

البيبان بيد الله يفتحها متى يشاء ولمن يشاء
ويغلقها متى يشاء على من يشاء

[snoopie]

15 سنة بزاف

[blanche rose]

تريدين الهروب بالزواج!!!!!

ما بك؟!!!
هل جننت؟؟

الناس كامل عندهم مشاكل في ديارهم
وكاين اللي والديهم ما يخافوش ربي

بصح كي يفكروا في الزواج
يفكروا بلي تكوين اسرة واستقرار
ماشي شكون اللي يجي هو الاول ويخطبهم

علاش تبانلك الزواج ساهل؟؟
مافيهش مشاكل؟؟

ارجعي لعقلك
واختاري اللي ممكن يسعدك وتسعديه
اللي ترتاحي معاه ماشي اللي يجي يخطب هو الاول

اللي رايحة تتزوجيه رايحة تعيشي معاه ما تبقى من حياتك
ما ترميش روحك..

اللي فكرو بلي الزواج هروب كامل رماو رواحهم ومن بعد ندمو واغلبهم تطلقو ..او قبلو الذل..

تقربي لله عز وجل
اذكري وصلي وووو
ورايحة تشوفي كيفاش تتسهل أمورك

[أم سلوى]

لا تهربي من اهلك....وترمي نفسك لاي واحد....اختاري بنية تاسيس س بيت..والا وقعت في مشاكل كثيرة....

[محمد جديدي التبسي]

الزواج ليس هروبا من المشاكل بل هو اختيار عن قناعة ورضا
انا نظن حديثك مع جارك المفروض ما يكونش لأنك تفتحي على نفسك باب التعلق بأوهام في الغالب... لذلك دائما الأولوية لمن جاء من الباب وفق أطر الشرع والعادات الحميدة وهذا الذي تقدم لك اولى ان تفكري به وتشوفيه في الرؤية الشرعية وبعد ذلك يكون لك قرار القبول أو الرفض وفارق السن ليس عائقا عادة والله أعلم ربي يفتح عليك

[toulay]

وعليكم السلام ورحمة الله تعالى وبركاته
24 سنة مزالك صغيرة خلاص ومزال المستقبل قدامك
المشاكل راهم partout ونصيحة من عندي مطيش روحك لاي واحد خمم لبعيد والمستقبل متخممش فاللحظة دير في بالك بلي الزواج راهو ارتباط لمدى الحياة وزيد مسؤولية كبيرة
Bon لكان عجبك جاركم وراهو صح serieux وناوي الخير قولو لازم تمد عليا الكلمة ولا يخطبك وبعد عامين ان شاء الله ديرو العرس مشي عامين كاملين وانت تستنى فيه وهو مشي ماد على الاقل الكلمة attention لازم تكون شويا sèvère في امور كيما هاذو واذا بدا يقولك الله غالب ومنيش خدام ووووو ويبدا يسمعلك هذاك le scénario غير طيش عليك
بالتوفيق يا اختي وصلي الاستخارة وادعي ربي ديما وقول اذا فيه الخير ربي يقربو مني واذا فيه الشر ربي يبعدو عليا بعد المشرق عن المغرب

[بشـرى]

أختي كما قال الأعضاء ، الزواج هو استقرار وليس هروب من الواقع
تخافي تهربي من حاجة طيحي في ما اكثر منها

اختاري اللي ترتاحيلو اكثر ، اذا عاجبك جاركم وصليلو بلي على الأقل يحط الكلمة ويوجد روحو وتسنايه ولو عشر سنين ، واذا عاجبك الخطيب هذا ومقتنعة بيه اقبلي بيه ....

ربي ييسرلك اللي فيه الخير ان شاء الله

[سعاد الجنة]

أختي الكريمة راكي مازال صغيرة 24 سنة ما تقوليش نزوج برك نتهنى من المشاكل في دارنا
شوفي اختي نصيحة من اختك لكبيرة
هاذوك المشاكل في داركم كي تتزوجي يوليولك ذكريات جميلة وتندمي عليهم وكي تقولي نتزوج نتهنى راكي تضحكي على روحك وسقسي المتزوجات هوما يردولك بالخبر
عندكي ترمي روحك برك وتقولي المهم نتزوج ونتهنى الزواج مسؤولية ومشاكل ضعف مشاكل داركم مع والديك
كي تقتنعي بواحد جاك وترتاحيلو ثم اقبلي بكل راحة وحرية ماشي بالسيف نتزوج ونتهنى والسلام
ربي يهنيك ختي

[AMINA.Z]

اغلب اللي تزوجو يتمناو يرجعو للدار و المشاكل مع والديهم و خاوتهم يوليو يبانولهم عسل
و انتي تخمي تهربي منهم للزواج
يا اختي الزواج ماهوش جنة
و جاركم قوليلو زوج كلمات ....يا يجي يمد عليك الكلمة يا ابقى على خير ...عمرك و لا تساعفي واحد و تقولي نصبر عليه و هو ماش راجلك ....كي تفريها مع جاركم يبان كلش من بعد.
ربي يفرج عليك

[زبدة ذايبة]

بالجزايرية العاصمية نقولو : لامن عاش يجي يخطبك جارك !!!!!!!!!!!!!!!!!!!!!!

كي يتفرغلك جاركم هذا يجي يخطبك ؟؟؟؟؟

إذا كان ناويك للحلال واش راه شادو ؟؟؟؟؟؟؟؟؟؟؟؟؟

الراجل كي يكون يحوس على المرأة مايستناش نهائيا

وزيد على هذا

ماهو دليلك على أنه سيتقدم لخطبتك؟؟؟؟؟ عجيب والله

أنت جارته وأقرب وحدة إليه من حيث المسافة ومن حيث العلاقة

بالتالي الموانع لاتوجد !!!!!!!!!!!

ولم كل هذا الانتظار ؟؟؟؟؟؟

ماذا ينتظر ؟؟؟؟؟؟

ثانيا

لماذا تستشيريه في أمورك الخاصة ؟؟؟؟؟

أين الأهل ؟؟؟؟ أين الإخوة ؟؟؟؟؟

تحت أي غطاء استشرته ؟؟؟؟؟

حتى صفة الخاطب لايمتلكها !!!!!!!!!!!

منطلقاتك خاطئة خاطئة خاطئة

ثالثا

لاتتوقعي أن الزواج هو حل للمشكلات

لاتتوقعي أن الزواج هو الجنة وهو الراحة

الزواج هو باب لمشكلات من نوع ثان

المشكلات في الزواج هو تحمل المسؤولية

هو القدرة على تحمل الضغوط والقدرة على التنازل والتغاضي عن الأخطاء

إذا كنت لاتتحملين كل هذا في بيت أهلك من باب أولى بيت الزوجية

نهار ماتوقفلك لعجوزة عند الباب وجي تشوف إذا نقيتي دارك ؟؟؟؟ إذا طيبتي الفطور .......إلخ وهذه أبسطها

مانقولكش على حاجات أخرى موجودة في البيوت

التحراش ، الاتهام، المعايرات، في بيوت أخرى الضرب ،،،،إلخ

البيوت إلا مارحم ربي

كل بيت وأساساتها وقوانينها وأسلوبها وأخلاقياتها

إذا كنت في بيت أهلك ماتتحمليش

لا من أختك ولامن أمك ولامن أبوك أو أخوك

ماتتوقعيش إطلاقا تلقاي دار الناس كيما دار باباك

ماكاش فينا اللي تزوجت ولقات أهلها في بيت زوجها.

إذا مافي داعي تفكري أن الزواج هو مسلسل عاطفي تشوفيه في شاشات التلفزيون؟؟؟؟؟

نظن أنك فهمتيني مليح

نزيد نركزلك على هاذا الجار !!!!!!!!!!!!

احتمال كبير مخليك (roue de secour) إذا ماصدقتش مع فلانة انت كاين

وكي يتزوج يقولك ماقدرتش نخالف والديا.

اخطيك من التنازلات اللي تذلك

لاانت بطاعة رب العالمين ولا انت بقيمتك ولا انت بالراجل تزوجتيه

حلي مشاكلك مع أهلك وساعفيهم واصبري عليهم

مانحلوش المشكل بمشكل آخر

الأساس الصحيح في اختيار الزوج

مادلنا عليه نبينا محمد صلى الله عليه وسلم : "إذا جائكم من ترضون دينه وخلقه فزوجوه"

هذه قاعدة الاختيار الصحيحة

ويبقى الزواج مقدر ومكتوب

.

[zalamite]

المشكلة فيك مازال تفكيرك صبياني رويتك للحياة لم تنضج بعد بهدا التفكير لن تدهب بعيدا فانت مازلت غير قادرة على حل مشاكلك بنفسك انت تحاولين الهروب فقط مع اول مشكلة و هدا خطاء . الزواج ليس و سيلة للهروب بل حياة و مسؤلية تتطلب الكثير من التضحية و الصبر ادا ادا كنت غير قادرة على حل مشاكلك مع اهلك كيف ستفعلين مع شخص جديد عليك شخصيته و تربيته و عاداته مختلفة ...الزواج عن قناعة احسن لك فالامر يحتاج الى التريث.

[first first]

كيما قالو الاخوة وشكون لي ماعندوش مشاكل
الزواج لازم تنضريلو بمنضور واحد اخر .ماشي تهربي من الدار لبضع مشاكل...................محسوب كي تزوجي ماكانش مشاكل؟؟؟..............وعادي تزوجي تلقاي مشاكل................تقعدي يقعدو معاك المشاكل...............تكبري يكبرو المشاكل...............وهي رايحة.

مادامك عايش فوق الارض فهناك دوما مشاكل

لكن طبعا مشاكل من مشاكل....................روحي شوفي المشاكل تاع الصح والناس لي تعاني ..................والله ترجعي لحياتك تقولي واينوما مشاكلي؟؟


يعني غدوة تزوجي وتزيدي تلقاي شوية مشاكل واش ديري؟...................تهربي من هناك الى بيت الوالدين وخلاص؟...................وهكا اقعدي اهربي من بلاصة لبلاصة.


شوفي ادا قابلة بجاركم قوليلو يتقدم رسمي................وحاولي تكبري عقلك وتمدي للزواج قيمة ومفهوم اعمق.

وربي يهديك ويهدينا اجمعين