الفطاير أو السفنج أو لخفاف من مطبخ أم عبد الله السلفية

أم عبد الله السلفية · 2015-11-06, 11:24

السلام عليكم

صباح الخير أخياتي في الله

اليوم درت الفطاير أو كيما يسموها أخرين السفنج أو لخفاف درتها فطور لزوجي يموت عليه

أما أنا نحب نوكلو أما طيابو مع أنو ساااااهل ما نحبش نطيبو

أنا برك راجلي يحبو ياسر خفت يروح يوكلو لبرا * مضطر أخاك لا بطل*

نبدأ بالوصفة : الفرينة + الخميرة و الملح عينك ميزانك كيما المطلوع و الكمية الي تحبيها و تلمي بالماء حتى تصبح عجينة طرية جدا تلصق في اليد و المهم جدا في الوصفة أنك تمسحي يديك بالماء و تخبطي العجينة باه تتعجن و يخرج لهوا الي فيها

أخبطيها و كي تحسيها رجعت تلصق في يدك أمسحي يدك بالماء

حتى تتحصلي على هذا القوام حتى يصبح سطح العجينة يلمع

هنا غطيها بالسيلوفان

تخليها ترتاح من 20د الى 30 د حتى يتضاعف الحجم

أما أنا لأني نديرها فطور و ما نحبش نوض طول من النوم نبدا نعجن لهذا ندبر عليك أعجنيها ف الليل و حطيها ف الثلاجة في الأسفل خلاص يعني فوق صندوق الخضروات. و هنا شوفو بيتها و الصباح لقيتها تخمرت على راحتها و نتهنا من عجين الصباح

من باعد تنحي السيلوفان و ديري بحذاك طاس ماء تمسحي يديك بالماء و تهزي كمية من العجين و تحليها بصباعك كما هو في الصورة. و اسمحولي على شكل الصورة راني حاولت نغطي ما ظهر من يدي.

ملاحظة : كي تعودي تهزي لعجين هزي من الأطراف العجين تخلي يدك و هزي من الأسفل الى الأعلى و أقطعي بيدك لخرا و لازم تكون مبللة طبعا باه ما تلصقش

تحطيها ف المقلاة في زيت ساخن جدا و مباشرة تصبي عليها الزيت بالملعقة باه تتشلفط كما في الصورة

و هنا كي تحمار من الجهة الأولى نقلبوها و نحمروها من الجهة الثانية و إذا بقولنا حفر نعمروهم بالزيت باه ما تبقاش الحفرة بيضاء

تقطريه و تقدميه لأسرتك أو ضيوفك بالصحة و الهناء

شوفو من داخل كيفاه مفشفش

يا رب نكون أفدتكم و انتظروني في مواضيع أخرى

و سامحوني راه الوقت الي ما عنديش و ان شاء الله نحوال نصورلكم الوصفات كل ما سمحت الفرصة

ادعولي بالذرية الصالحة في ظهر الغيب

أحبكن في الله أخياتي

نسيت حاجة : الي راهي مبتدئة و ما قدرتش تحل لعجينة بيدها تخبزها فوق سطح مبلول و تهزها و تحطها في المقلاة

فقط حاولي تبعدي على المقلاة لأنك خبزتيها على سطح مبلول تبقا هازا الماء معاها

راني قتليكم باه الي كون وحدة تحصل فيها ما تقولش أم عبد الله غرت بيا

هاني قتليكم

ام ايمان16 · 2015-11-06, 11:26

يعطيك الصحة

سخفتيني وانا نتوحم
دبرك راسك كيفاش تبعثيهلي ههههههههه

manal mimicha · 2015-11-06, 11:28

بارك الله فيكي اختي و الله غير شهيتيني

أم عبد الله السلفية · 2015-11-06, 11:31

اقتباس:

المشاركة الأصلية كتبت بواسطة ام ايمان16

يعطيك الصحة

سخفتيني وانا نتوحم
دبرك راسك كيفاش تبعثيهلي ههههههههه

يسلمك حنونة

اسمحيلي خيتي و الله غير غضتيني الله غالب ما نعرفكش تالي نبعث لخيتي وين المشكل

ربي يسلك وحلك و يهون عليك الوحم و يا رب يسخرلك وحدة تحضرلك السفنج في بلاصتي

أم عبد الله السلفية · 2015-11-06, 11:33

اقتباس:

المشاركة الأصلية كتبت بواسطة manal mimicha

بارك الله فيكي اختي و الله غير شهيتيني

و فيك بارك الله

ان شاء الله تجربيه و تنجحي فيه

غربة أهل السنّة · 2015-11-06, 11:35

وعليكم السّلام ورحمة الله وبركاته
كيف حالك أختي؟؟؟
ما شاء الله خرجلك روعة
بصحتكم
في انتظار المزيد من وصفاتكِ الرّآئعة بإذن الله
اللهمّ صلّ وسلّم وبارك على محمّد وعلى آله وصحبه أجمعين

ام ايمان16 · 2015-11-06, 11:43

اقتباس:

المشاركة الأصلية كتبت بواسطة أم عبد الله السلفية

يسلمك حنونة

اسمحيلي خيتي و الله غير غضتيني الله غالب ما نعرفكش تالي نبعث لخيتي وين المشكل

ربي يسلك وحلك و يهون عليك الوحم و يا رب يسخرلك وحدة تحضرلك السفنج في بلاصتي

ربي يحفظك اختي
للاسف معنديش لي يطيبولي
راح نحاول لعشية نطيبو باذن الله

أم عبد الله السلفية · 2015-11-06, 11:47

اقتباس:

المشاركة الأصلية كتبت بواسطة غربة أهل السّنة

وعليكم السّلام ورحمة الله وبركاته
كيف حالك أختي؟؟؟
ما شاء الله خرجلك روعة
بصحتكم
في انتظار المزيد من وصفاتكِ الرّآئعة بإذن الله
اللهمّ صلّ وسلّم وبارك على محمّد وعلى آله وصحبه أجمعين

مرحبا بك في صفحتي

أنا بخير و أنت؟

يسلمك حنونتي ان شاء الله تجربيه و تقوليلي

صلى الله عليه وسلم

أم عبد الله السلفية · 2015-11-06, 11:50

اقتباس:

المشاركة الأصلية كتبت بواسطة ام ايمان16

ربي يحفظك اختي
للاسف معنديش لي يطيبولي
راح نحاول لعشية نطيبو باذن الله

راكي كي حالتي أنا متزوجة في غير ولايتي و راني بعييييدة على أهلي و أحبابي و كي نمرض ما عندي الي يعاوني بصح الحمد لله كاين ربي و ثاني زوجي ماهوش مقصر يعاون بالي يقدر عليه ربي يحفظو

أنا ماجربتش الوحم بصح قالولي صعيب ربي يسلك وحلك يا لعزيزة