بسسم الله الرحمان الرحيم
اول حاجة نشكر منتى الجلفة على هاذ الفرصو لي عطاهالنا باه نفرغو قلوبنا ب طريقة سرية جدا و نتوصل لحلول لمشاكلنا
انا مشكلتي راهي ككبيرة و صعيبة و ماشكيتش نسلك منها هاذ المرة
المهم منطولش عليكم
انا اطفلة في عمري 16 سنة نقرا اللولة ثانوي (علبالي تقولولي صغيرة على هاذ لمشاكل بصح والله راني متيقنة من غلطتي)
لموهيم انا كبرت بعيدة على ماما و بابا تع الصح و لي جابوني على خاطر ماما متني لبنت اختها متجيبش لولاد باه تربيني لمهم انا رحت على دارنا كي كان في عمري عام و بنت خالتي لي رباتني هاذي متشددة بزاف مام راجالها معقد بزاف و مانعين عليا قداه من حاجة تافهة و لبنات كاملين متوفرتلهم
من تزيار بزاف انا كنت نخاف من ماما (بنت خالتي) و منحكيلها والو ملي دخلت للمتوسطة بديت نتبع في لبنات العاطلات و نحكي مع ذراري بزاف نكمل قرايتي منروحش نروح و نقعد ندور في الزنق مع الذكورة حتى يوصل الوقت الي نروح فيه كل يوم باه نرجع
سلعة على ساعة كان يحكمني بابا و يقتلني ب الضرب و نوعادهوم منزيدش ندير عفايس خاسرين مي مع نرجع نخالط لبنات نعاود نفس القصة
كبرت و وصلت للرابعة متوسط و انا من طفل لواحد اوخر .. حتى لواحد النهار طحت في واحد وليد حرام و حبيتو بزاف ل درجة كان يقولي جيبيلي دراهم و انا كي العمية نروح نمد يدي على دراهم بابا و نديلو عند بالي هوا يحبني
و وحد نهار طلب مني يدي تسليمة (ربي يسمحلي) و بلاما خممت خليتو يبوسنب..و طلب مني فوطو نتاعي و مديتهالو و انا لابسة روب دو سواري..كي دا مني وش حب اكل ولا طيشني و رجع ظل يرخص فيا و انا غير نبكي حتى وحد نهار فتحت فايسبوك نتاعي لقيت ناسكامل يسقسيو فيا على تصويرتي قالولي علاه حطيتيها انا داراتلي شوك
الله يحفظكم متقولوليش نتي ماكيش بنت فاميليا على خاطر فاميلياتي لزوج مشهورين بزاف من كثر ماهم ناس ملاح و مربيين
بصح انا ملقيتش لي ينعتلي صلاحي و هاذا كامل من الكتم نتاعي وين وصلني
المهم نحى هاذيك تصويرة و فاتو اشهر و ولا يقلي نرجعلك و نحبك بصح انا كرهتو و كون نصيب منشوفوش بصح تصويرتي شاعت و لي يجي يقولي راهي عندي تصويرتك
انا نحلف ديما و تغيظني روحي كي طيحت بالسمعة نتاعي و نتاع بابا و نقول منزيدش ندير حاجا غالطة بصح كي نعاود نخرج و نخاللط لبنات و الذراري نعاود ندير وش كنت و نرجع لعوايدي
ملاحظة برك .. انا دارنا تاع الصح و دارنا الي متربية فيها ماشي ف نفس المدينة و بعاد وحد 50 كيلو.دوكا راني في دارنا تاع الصح و حكيت لخواتاتي و حالفين يقولو لماما لي مربيتني و انا ملقيت حتى حل على خاطر كون يقولولها تخليني هنا و انا منقدرش نعيش هنا و كون تديني معاها تحبسني من قرايتي و انا كلش هوا قرايتي و نقرا مليييييح ملييح..انا علابالي كون نقعد نعيش مع خوتاتي هوما يسقموني و ميخلونيش نضيع فوق هكذا و ندير حوايج كبار