انقذوني في امتحان البوزلوف

ملك 25 · 2015-10-22, 08:56

السلام عليكم يا لحراير تعيشو اعطيوني طريقة طهي البوزلوف حابة نديرو في الكوشة مع البطاطا رح يجي شيخي يتعشى عندي ويحب البوزلوف مالا قلت ما عليا غير نروح لحراير منتدى الجلفة يعاونوني باحسن و الذ وصفة باه يستعرف بيا شيخي و يرضى عليا زوجي :d

zaho207 · 2015-10-22, 09:03

حبيبتي ربي يرضيهم عليك حنا نديروه يطيب في ماء و الملح و من بعد نقطروه مليح و نحضرو الدرسة لي فيها عقاقير و نشوف الملح اذا مضبوط و هريسة و حشاوش و قارس و شوية زبدة و بدهنوه بيه كامل و بخلوه يتحمر مليح مكاش لي ذاقو عدنا في دار و مسقساش ماما و قالها نتاعك انت مميز
ان شاء الله تفوت العرضة شابة

x ام رحاب x · 2015-10-22, 09:15

اختي ماتخافيش راهو ساهل
تحكمي البزلوف اديريه في الماء والملح وتنقي سنات ثوم واتحطيهم معاه ورقة رند واخليهم ايطيبو كي اطيب نحيلو كامل لعضام واديريلو والطماطم حب والبصل والفلفل حلو واتحلطيهم واديريلهم شوية ملح ماتكثريش راه الشيوخة مايحبوش الملح كمون ابيض وشوية فلفل اكحل واتدهني البزلوف ديالك بلاموتارد باه ايجي بنين واتخلطي كلش وادخليهم يتقلاو في الكوشة كي يتحمرو كامل هاداك الوقت ديري البطاطا تاعك في الكوشة تكوني فورتيها بالملح ومقطعة خشينة شوية وعاودي ديريلها فلفل اكحل وشوية موتارد وديري شوية زيت وحمريها واقدميها مع البزلوف والبزلوف كي يطيب ارمي عليه حشيش مقطفة يعني الكسبر

نور الإسلام26 · 2015-10-22, 09:32

سلام عليكم
اختي دير بوزلف يتغل مع ثوم وملح
كي اطيب نقي معظم وحطه في صني
ارحي بصل وطماطم وثوم ملح انا اندير
رأس الحنوت وقسبر دوزني واخليها حتى لعشي به اجاك بنين
اما بطاطا خوذي حبات صغير وغليها مع ثوم وملح ثم حطيها
مع بزلوف اطيب
صح فطوكم وان شاء الله
يعجبهم بتوفيق اختي اتكلي على الله

زوجته · 2015-10-22, 09:46

طرق رائعة ممكن تاني تفوريه بتوابل وتعمليه بدشيشة يجي هايل

om kamilia · 2015-10-22, 10:17

السلام عليكم ورحمة الله وبركاته

ختي ملك الكل راح ينقذك هههه
نعطي لك طريقتي تجي بنينة بزاف وجربي ردي لي لخبر
ناخذ البوزلوف بعد مانقيه ونشوطو مليح ويتنغسل نحطو في قدرة فيها نص كمية ماء نحط طراف الزليف ونسكرفج ثوم و نحط بصلة صغيرة دوائر و زوج عود قرنفل و رند و فلفل اسود و ل كان الحب خير ونص تروونش قارص و ملعقة صغيرة فرينة و رشة خفيفة خميرة الحلوى وطبعا بلا ما ننى الملح هو الصح خليه يطيب حتى يتنحى اللحم من العظم و قطعيه طراف متوسطة و تكوني طبعا حضرتي بلا مدهون بشوية زبدة و تطيبي بطاطا في الزيت دوائر و لآ خيري بطاطا صغيرة فوريها و لآ غليها حتى تطيب حمسيها شوية في زبدة و ملح
المهم حضري شرمولة و لآ درسة بيضاء فيها
عصير الليمون و ثوم مسكرفج و معدنوس مقطع رقيق وخردل و شوية فقط ماء و فلفل اسود و الملح ذوقي الزليف و لآ خصو ملح زيدي في الشرمولة وحطي قطع الزليف في الشرمولة خلطيها حطيها في بلا تاع الفور ستفي البطاطا حولها و فطر او زيتون اخضر مغلي في مع شوية خميرة خليه يتجمر شوية و تحمار البطاطا
عند التقديم كل واحد كفاش يحب تحبي ترشي قارش وزينيه بالمعدنوس وبصحتكم و شيخك رايح ياكل صباعتيه وزوجك يقولك حمرتي لي وجهي و علامات السعادة
فقط تقدري تفوريه هذيك عندها خصائص نديرهالكم باذن الله

om kamilia · 2015-10-22, 10:21

زيدي شربة فريك بمطلوع الله الله و سلطة خفيفة بيتراف و تحلية تارت الليمون تتناسب مع لاتاي مدوزنة كما يحب الخاطر مع مكسرات وحاجة خفيفة قريوش

nihal159 · 2015-10-22, 10:29

اقتباس:

المشاركة الأصلية كتبت بواسطة om kamilia

زيدي شربة فريك بمطلوع الله الله و سلطة خفيفة بيتراف و تحلية تارت الليمون تتناسب مع لاتاي مدوزنة كما يحب الخاطر مع مكسرات وحاجة خفيفة قريوش

ماشي غير مدوزنة راكي دوختيني

om kamilia · 2015-10-22, 10:48

اقتباس:

المشاركة الأصلية كتبت بواسطة nihal159

ماشي غير مدوزنة راكي دوختيني

شكرا ختي انا مديت راي يمكن واحد يعجبو و واحد آخر لا وكل واحد وذوقو

نوال المتفائلة · 2015-10-22, 11:43

اختي كاين واحدة من المنتدى حطت الوصفة و الله ما نتذكر الرابط بصح بنينة بزاف البوزلوف مع البطاطا في الفرن إن شاء الله يفيدوك الأخوات

ملك 25 · 2015-10-22, 11:43

حبيباتي ربي يرضى عليكم و يعطيكم كل خير ان شاء الله راكم فرحتوني بزاف و حسيتكم خواتاتي تاع الصح ربي يسعد ايامكم

اسماء47 · 2015-10-22, 11:47

سلام راهم البنات كفاو ووفاو
و الا حبيتي تمودارنيزيه البوزلوف ههههه ماعليك غير ديري طيريقة ام سهام بالزيتون يجي ممممممممممم
هاهووو
قلي حبة بصل كبيرةمرابية مع راس ثوم مليح امبعد زيدي حوالي 4 حبات طماطم مربية + التوابل ملحوفلفل عكري وقصبرغبرةوكمون وراس الحانوت ورقة رند وزيدي قلي و
ضفي فنجان صغيرماء وزيد ي بوزلوف مغلي ومنزوع العظام و مقطع قطع وخاليه يشرب المرقة ثم الزيتون (تكوني درتيه في الماء و مغيرتلو عدة مرات )
في بلا تع الفرن ستفي بطاطا دوائر اما مغلية او مقلية وزيدي البوزلوف مع القارس ودريه في الفرن مدة 15 دقيقة

ملك 25 · 2015-10-22, 11:48

ام كميلية حبيبتي تعيشي نزيج نتعبك شوية معايا لوكان تحطيلي الوصفة تاع تارت الليمون الخاصة بالتحلية

om kamilia · 2015-10-22, 11:51

ما يكون الا خاطرك

نور الإسلام26 · 2015-10-22, 11:52

اقتباس:

المشاركة الأصلية كتبت بواسطة ملك 25

حبيباتي ربي يرضى عليكم و يعطيكم كل خير ان شاء الله راكم فرحتوني بزاف و حسيتكم خواتاتي تاع الصح ربي يسعد ايامكم

اختي ران كي اخوت عند ربي
اتمن ان سعدنك ولا بقليل
صح فطورك اختي