الجزء 140 من واش طيبتي اليوم

scorpionoir · 2015-08-21, 00:55

باسم الله بديت وعلى النبي صليت

وباذن الله جزء جديد من الكوزينة انا حليت

مساء الخير عليكم كااااااااااااااااااااااامل وحشتوني وحشتوني وحشتوني ..............

بعد غيابي من رمضان وجات العطلة ورحت فاكونس راني رجعتلكم ورجعت للمة والشياخة تاعكم في الحقيقة كنت ساعة على ساعة نقرعج عليكم هههه

شفيتوني تقعدوا البرا هيا على بركة الله ندخلوا للكوزينة ويارب تكون فال خير عليا وعليكم وربي يرجع الغايبات صايي كاش عراس خلصوا وكاش بحر راح يقفل هههههههههه بزايدوا من التفنيين وشدوا الهمة ورجعوا النشاط للكوزينة رانا ملناش غيرها ندوروا ندوروا ونرجعولها

وبهاذ البوقالة نبدا

رفدت النعناع مع الحبق وعرق الياسمين لميتهم في الطبق وحطيتهم عند العين .فجأة دقدق من كان غايب كل هاذ السنين

يا رب اشفي كل مريض واعطي كل محتاج وفرج على كل مهموم ورجع كل غايب واسترنا وتولانا برحمتك يا رب .

سميو باسم الله وادخلوا .جوزوا ابداو باللبن والرفيس

والتي مزالت سهرانة معانا تتفضل التاي

حبيت نحيي الوافدات الجدد ونشكرهم كي قاموا بالكوزينة في غيابنا كل وحدة باسمها ونقولهم متعونا باطباقكم وحلوياتكم راكم ما شاء الله وهذي ليكم خص نص .

اليوم كان غدايا مقرونة بالخضر ولعشا بيتزا رولي وبيتزا بالجاج

وهذوا بعض اطباقي

هذي درتها لبنتي الصغيرة الجمعة لي فاتت عيد ميلادها وكلشي كان قافل درتها بزربة

هيا يا حراير باش نرجعوا النشاط للكوزينة كيما بكري

ونتحفوها باطباقنا وحلوياتنا واعطونا نقل مباشر من عين الحدث كيما زمان

على بركة الله سموا باسم الله وادخلوا برجلكم اليمين

سماح 26 · 2015-08-21, 01:46

الله يبارك كل شيء رائع ومبروك إفتتاح كوزينتك

Mizou123 · 2015-08-21, 02:47

السلام عليكم، الله يبارك اختي كلش فوووووور روووووعة... يعطيك الصحة اللي خممتي فيناحبيبتي و لمتينا و فتحتيلنا كوزينتك بااااارك الله فيك و الله يعطيك و يمنيك حبيبتي.
عيد ميلاد سعيد لبنتك العقوبة للعام الجاي. سلاااااااام

holitchi · 2015-08-21, 03:36

مرسي اختى الحبيبة

سوسو المغتربة · 2015-08-21, 04:54

الف مبروك الافتتاح مازلت ما نعرفش نحط المواضيع و الصور معكم نتعلم ان شاء الله ام وابنة اختي العزيزة نعم زدت خميرة الحلوة للكعك التركي راهو رائع وين نلقى الوقت نزيد نحضرو ونزيد ننصح الأخوات يجربوه راه راااااااااااااااااااااااااائع

scorpionoir · 2015-08-21, 06:49

ام سارة18 · 2015-08-21, 07:36

صباح الخير عليكم كامل مبروك افتتاح الكوزينة ونشكرك ماخليتناش برا ونقولك ما شاء الله على طيابك التقليدي والعصري فحلة ونص ما خليتي والو وان شاء الله يرجعو ا الغايبات الكوزينة فارغة غير الجدد تقريبا ان شاء الله نوصل عدد المشاركات ونحطلك الباروك
انا فطوري كسكس
جمعة مباركة لا تنسو سورة الكهف والصلاة على النبي

omjoujou · 2015-08-21, 07:58

صباحكم مبارك حبيباتي
الف مبروك افتتاح الكوزينة بالبركة و الربح عليك و علينا اختي سكوربيون
باروكي مزال موجدش درت شوي بريوش راخ يخمر كي يوجد و يطيب نصورو و نبعثو
غدايا ليوم شخشوخة الظفر طلبها مني زوجي
ام وابنة معامة الجديدة الرجاء الاماني ام سارة سوسو المغتربة ميزو ام اسحاقو ام ساجد ام رحاب ام افنان ام كامليا ام نسرين دائمة الشكر دائمة الحمد ام يس ام تاجو سماح وكل الاخوات نهاركن مبارك
نروح نكمل شغلاتي القش راح في الغسالة قريب نكملو و غدايا راح يطيب و البريوش راح يخمر

omjoujou · 2015-08-21, 08:08

حقا نسيت مقوتلكش اختي سكوربيون اطباقك رووووووووووووعة ماشاء الله ربي يباركلك في هدوك اليدين وربي يخليك لعائلتك و يحفظهالك و عيد ميلاد سعيد لبنوتة تاعك ان شاء الله تكبار و تشوفيها في اعلى المراتب و تفرحي بيها

ام اسحاقو · 2015-08-21, 08:16

[SIZE="5"]صباح الانوار جمعة مباركة مبروك الكوزينة اختي سكوربيونوار و كل عام وبنتك بخير تفضلوا باروكي بسيط جدا المهم المشاركة[SIZE/]

x ام رحاب x · 2015-08-21, 08:22

اهلا سكوربيو هادي غيبة مبروك الكوزينة الجديدة ان شاء الله اتعود مربوحة علينا ونولو كيما زمان هادا باروكي المتواضع
هادي حلوة وفواكه انشاء الله تعقب الكوزينة كي الحلوة وزاهية بالاخبار السارة

وهادي الطورطة تاع عيد ميلاد بنتي دارتها بنتي الي جايبة الباك

x ام رحاب x · 2015-08-21, 08:25

صباح الخير عليكم حبيبات قلبي واش اصبحتو
ام اسحاق الحلوة والسوفلي راهم ايشهو بصحتك حبيبتي

ام افنان48 · 2015-08-21, 08:31

صباح الخير والقشطة والأنوار والعسل مبروك الكوزينة ياختي سكوربيو ما شاء الله اطباقك روعة وانتي الاورع الي لمتينا راني بلا كوزينة كي اليتامى كل وحدة فينا لقات راحته وخرجت الي في قلبها وتعلمت أصول الطبخ منكم خاصة العرائس صباح الخير أختي ميزو ام وابنة ام جوجو رجاء الأماني ساجدة ام ساجد سوسو المغتربة ام سارة ام إسحاق ام محمد وسيم ام رحاب ربي يشفي زوجها ان شاء الله وسلام على كل رانا اخوة في الله انا غاديا اليوم حوت وسلاطة. أرز والعشيرة ان شاء الله ندير لكريب

scorpionoir · 2015-08-21, 08:33

صباحكم معطر بذكر الرحمن
ميزو وسوسو وام جوجوا ليكم وربي يحفظكم لولادكم
ام اسحاق وام رحاب ربي يديم النعمة ويحفظها من الزوال

scorpionoir · 2015-08-21, 08:36

يا هلا بام افنان وصباحك عسل
بصحتك الحوت مالا نجي نتغدى عندك حنا السردينة بالسيف لتلقايقا جديدة ومليحة

غدايا بلاك بربوشة بيضا بالجاج وسلاطة وممكن ندير الكعك التركي راهي شهاتني فيه سوسو