ديوان الشاعر عبد الله بن سعد العضيدان العازمي

[رابطة هوازن]

ديوان الشاعر . عبدالله بن سعد العضيدان العازمي


عبد الله بن سعد العضيدان العازمي من فخذ الصوابر من قبيلة العوازم الكريمة وهو من أدباء وشعراء قبيلة العوازم "أولاد عطا" في الوقت الحالي :



((قصيدة من دفتر الذكريات))

يازيد لا تعلم أبا أبوح لك سر

............. أمانتك يازيد حفظ الأمانه



أشكي عليك اللي أخذ قلبي وفر

.............. حرمت من شوفه ونغمة حنانه



أبيك تفزع لي وتكتم لي السر

............. وتأرخ الساعه وتثبت زمانه



ومابين نجم سهيل والجدي والغر

.............. أو يمة الفرقد تحدد مكانه



ماأبيه يعرف وين سكناه يالحر

.............. أبيه مجهوله علومه وشانه



اسمه ورد في زهرة الشيح بالبر

............. أو غرد القمري بغصن أشبهانه



له نظرةٍ شبهتها نظرة الحر

............ إن شافها تدرج بريضان غانه



أمانتك يازيد ترى أخوك مضطر

............. برهان حاله جاري الدمع خانه





(((قصيدة شعيب العضادين)))

يازيد أنا صحتي تنهد

........ وأرجوك بالك داويني



أدواي أبرحل نهار الغد

.......... وأقفي مع اللي مقفيني



من صد عني تراي أصد

........... حتى ولو كان يغليني



وإن دق طارق مانيب أرد

........... صوت البشر صار يشقيني



لي كلمة واضحه لابد

............ أبحث عن اللي يسليني



أسلي إليا شفت غار الجد

............ بمليح بين البساتيني



أجلس بظله حد السد

........... وإن سفسف الموج يلهيني



يبهجني الطير وإن غرد

............. تداعب الطير بالغيني



عسى الحيا وإن برق وارعد

.......... وسمي وشتوي وصيفيني



يهل وبل بذيك الخد

......... يسقي شعيب العضاديني





((هذه القصيده قالها عبدالله بن سعد العضيدان العازمي عند بناء سد في وادي عضيدان وهو بعيد في الدمام))

عند البحر امشي على السيف سدران
............ جسمي هناك ومنيتي ودي اطير


قالوا لي عضيدان مليان غدران
................ سد رفيع بين ذيك الشناظير


ودي اشوف السد واشوف جدران
............. سلاسل صفت بنوها المناعير


لو وصفتلي قلت من غير حقران
.............صارت رسوم بعد ذيك الطوابير


يا زيد ماتفزع لمن صار حيران
............همي ثقيل شطر القلب تشطير


ﻻحس في برد ولاحس حران
............. ليلي نهار وسهمتي قطعت السير


قالو هبيل او قالو الرجل سكران
...............يمشي بﻻ يمه حدته العواثير

سمعت صوتٍ للحمامه تنوحي

سمعت صوتٍ للحمامة تنوحي
.................قلت أسكتي ولّي وخليني أنوح


إلفك قريبٍ في غصون الطلوحي
.............وإلفي بعيدٍ بأخر طويق بالصوح


صوتك ينهض كاميات الجروحي
.............غصبٍ علي ينهض القول وأبوح


أبوح باللي مستكنٍ بروحي
..............كتب علي وسجل الأمر باللوح


عساك يالورقا لحرٍ يلوحي
...............قلبك ومنه يفجر الدم ويفوح


أنتي بليتيني ودمعي يفوحي
...........كني فطيمٍ راحت أمه مع سروح


قعد وحيدٍ لا قريبٍ نصوحي
............ولا بقى إلا رجا طلعة الروح



((قصيدة قالها الشاعر عبدالله بن سعد العضيدان العازمي في أخيه حسن بن سعد العضيدان العازمي رحمه الله وأسكنه فسيح جنّاته))

صليت بالمسجد صلاة الصباحي

..................ومن مسجدي نصيت مجلس بليهان


كريم سبلا من رجال الفلاحي

...................أصله تسلسل من سلالة عضيدان


حسن بحزات الرهق والصياحي

................من الظفر يوصف على مارد الجان


إبن سعد حمّاي من كان طاحي

....................يشهد له اللي عارفينه بالأوطان


له سفرة كنه بيوم الأضاحي

...................ميدّمٍ عيشه بحيلٍ وخرفان


له مجلسٍ مفتوح عصر وصباحي

.................بمليحنا اللي يعرفونه عضيدان


وأنا ربيت بظل ذيك اللياحي

....................مليحنا ومليح الأخر مليحان


على البحر كني كسير الجناحي

....................لا حيلةٍ إلا ترانيم الألحان


أمازج الأهات هي والصياحي

..............ولا حسبت النقد من كان من كان


عديت رجمٍ من على قمّة طويق

..............يشرف على الوادي وكامل فروعه



ومن قمّة الشاهوق بالوادي أويق

.............شفت النخيل وشفت عامر صنوعه



وحدتني الآهات من شدة الضيق

...............وأقنب ومن يسمع قنيبي يروعه



عديت به مصبح على فكة الريق

...............وندمت ليته ماحصلي طلوعه



ندمت من مرقاي عالي الشواهيق

..............حسيت قلبي صابه اللي يلوعه



في عالي المرقاب ماعاد أنا أطيق

.............ذكرني اللي طافياتٍ شموعه



_________________________

المصدر: موقع قبيلة العوازم الرسمي