لماذا هذا السلوك من بعض المخطوبات !!!

abdou27300 · 2012-09-12, 20:01

السلام عليكم

تجد بعض النساء خلال فترة خطبتهن يتصرفن بسلوك منظم وخالي من الأخطاء – سلوك منافق -،

فيظهرن بوجه الطائعات الصالحات، يقوللها ما تخرجيش بلا ما تقوليلي، تقولو حاضر،

لكن بمجرد أن يكتبو لكتاب ويفتحوا، سرعان ما تعود إلى طبيعتها, وما تحيرش فيه قاع

لماذا !!!!

هل لأنها دير في بالها خلاص ضمنت راجل في يديها،

لأن أغلب الرجال لا يستطيعون التراجع في هذه المرحلة،

لكن البعض من الرجال قد يتراجع ويفسخ الزواج (طلاق قبل البناء –الدخول-)

فهل يعتبر هذا السلوك سلوكا عاديا ؟؟

شكرا

YARMORACEN · 2012-09-12, 20:31

نعم هو سلوك عادي ، و لا يقتصر على الأنثى فقط بل الدكر أيضا ، هدا الأمر يقع خاصة للأشخاص الدين لم يسبق لهم التعارف الجيد قبل الخطبة أو الزواج .

AMINA.Z · 2012-09-12, 20:43

و علاه عليهم هاذ التمثيل من الاول
امنية كل واحد انو يتزوج و يعيش مهني من بعد ماش باه يندم و لا تندم و يعيشو في صراع
يقولك الحب هو ان تتقبل الشخص بعيوبه و حسناته
انا نفضل نبين عيوبي قبل باه اذا تقبلهم اللهم بارك ما تقبلهمش كل واحد يروح في حالو
لازم كلشي يتبنى على الصح ماش على الهف
ربي يهدينا

soumias · 2012-09-12, 21:17

انا في رايي التمثيل راهو يفرض روحو بالسيف قد تعارضونني لكني هدا الواقع ما نخبوش الشمس بالغربال النساء راهم يمثلو لان الرجال راهم يتشرطو بزاف وتقول في نفسها لازم نحكم راجل الله غالب هده هي حالت المجتمع وكاين تان رجال يمثلو ويبينو رواحم ومور الزواج تحصل الكارثة لانو كل شي يولي عالمكشوف علابيها رانا نسمعو بحلات الطلاق كل يوم ...........انا دايما نقول اخرج لربي عريان يكسيك علاش عليكم هاد الشي كامل؟؟؟ ليقبلك يقبلك بعيوبك ........شكرا على الطرح

like a bird · 2012-09-12, 22:09

الزواج مسرحية لمن ارادها كذلك فمن كان يبحث عن الثقة و الهناء الدائم صارح الطرف الاخر من البداية لانه بكل بساطة ينظر للزاج بعمق ليست تلك النظرة السطحية التي يرائ بها الناس و الشخص الذي معه
هي ظاهرة جد متفشية ثبتنا الله و اياكم .

أم محمد و آيه · 2012-09-12, 22:52

هههههههههههه. صح كاينة منها خويا ....

سارة البوسعادية · 2012-09-13, 00:06

ولبنات يقولو العكس يقلك الراجل يكون مسالم وين يعقد يتحول
ههههههههههههههههههههههههههههههههههه

اخي الكريم اعتقد مكانش مشكل اذا مالاقتش بيك الطفلة تقدر تفسخ العقد

لانه يسمى نفاق ان تبدي غير ماترضى

faty05 · 2012-09-13, 08:46

زعما الرجال صريحين
حتى هم يبينو الصورة الجميلة و الرومانسية
بصح بعد الزواج يعود يتكلم و العصا في اليد ههههههه

همسة مشاعر · 2012-09-13, 08:55

والله كل واحد والنية تاعو وطريق الكذب قصير
حتى احنا البنات البنت كي يعقد عليها الراجل يكرها في حياتها يبدى يزير ويحكم اكثر من الازم
الزواج تفاهم اخوتي ولازم كل زوج يتنازلو شويا على امور والزواج دخول الى دنيا جديدة الصبر فقط والثقة المتبادلة لازم ديما تكون

abdou27300 · 2012-09-13, 20:09

مشكورين على المناقشة وتفاعلكم مع الموضوع

محبة زوجي · 2012-09-13, 21:52

الحمد لله انا كيما بكري كيما ضرك نقولو ديما مام نولي بعشر ولاد هدا واجب عليا و حق ليه ربي يثبتنا و بهدينا

نورالدين*الغاسول* · 2012-09-14, 17:43

الخطاب رطاب

Amouna.DZ · 2012-09-14, 17:57

الانسان لازم يكون دكي باش يعرف حقيقة الطرف الثاني

يحطو في مواقف ويشوف ردت فعلو بالتعارف الجيد أثناء الخطبة كدلك

مستحيل 7-8- أو حتى سنة خطبة مايقدرش يتعرف على الاخر

الا اداكان أحدهم يجيد التمثيل جيدا فهدا امر اخر