دراسة جدوى مشروع تسمين الأغنام .

[المشتاق لجنة النعيم]

الرجاء من المشرفين حذف الموضوع .

[بوقرة البارصا]

بارك الله فيك على طرح مشروع ونحب ناس لي تخدم تستفيد وتفيد
لي اكون معك صريح فكرة تسمين من بين اهدافي من زمان لكن للاسف يبقى دائما راس مال العائق
ولتوضيح و اثراء للموضوع عدي استقسار ممكن تجيب عليهم كون اني ليست لدي خبرة مجرد راي فقط ويستفيد كل من يدخل للموضوع و يقراء
ليرتاح و يتشجع للفكرة ورما تلقى اكثر من شريك و تتضاعف الفائدة ان شاء الله


اولا : 2.5 مليون للخروف الواحد هل تعتقد ان سعره غالي لأن بعد تسمين وتبيع خروف بـ 4 ملايين تجد اقبال عليهم ضعيف
كون ان اسعار العام الفارط تراوحت بين 3.2حتى 4 ملايين وكان ناس يقصدون من 3 الى 3.5 مليون

ثاني : ممكن تعريف بنفسك ومنطقتك لان هذا شيء يشجع ويطمئن من تعجبه الفكرة

ثالثا : هل فكرة ودرسة لو كان شركاء اكثر لتقل نسبة راس مال لكل واحد لان قليل من تجد عنده مبلغ كامل ويتحمس للفكرة

رابعا : هل جربت من قبل مشروع غير خرفان مثلا الماعز او الدواجن او ارنب وايهم افضل بترتيب بالنسبة لك

خامسا : حبذا لو تقم بتفصيل مشروع بجزئياته و تدعهم بالصور لمكان مشروع لأني مررت بنفس طرحك لمشروع مغاير و كان ينقصني راسمال
لكن طلب مني ممولين تفاصيل و اثبتات لكي اقنعهم لكن للاسف صعب تقنع واحد ما تعرفوش ويعطيك مال الا اذا قدمت له توضيحات و تفاصيل و ضمنات


وشكرا
اسمحلي على رد وكثرة تسؤلات لاني طموح بهذا مشروع لاكن تنقصني خبرة ومال وسوف اسعى ان شاء الله لايجاد سيولة و يكون لنا لقاء باذن الله
وربي يوفقك بإذن الله

[المشتاق لجنة النعيم]

و فيك بركة أخي أهلا و سهلا .

بالنسبة لسؤالك الأول أخي أرى أن سعر 2.5 سعر مقبول ( قادر يكون أقل مثلا 2 أو أكثر مثلا 2.7 أو 2.8 مليون ) طبعا السعر حسب عمر و حجم الخروف و أنا عندما قلت لك 2,5 فهذا في المتوسط . و عند شراء الخرفان أخي يجب التنويع فمثلا نشتري مجموعة جملة بسعر 1,8 إلى 2 مليون و نبيعها ب 3,3 أو 3,5 و مجموعة أخرى ب 2,7 حتى 3 ملايين و تبيعها من 4 إلى غاية 5 ملاين ، و لا تقلق أخي فالناس كلهم ليسو بنفس القدرة الشرائية كاين ناس يشريو ب 8 أو 10 ملاين .

ثانيا : أنا من أم البواقي أخي توقفت في الدراسة سنة ثانية جامعي و توجهت للحياة العملية ( بالنسبة لي أفضل من المتابعة ) كوني ابن فلاح أحببت هذا المجال كنت أساعد والدي في التربية لذا عندي قليل من الخبرة .

ثالثا : صحيح أخي كثرة الشركاء تقلل من رأس المال لكنها في نفس الوقت تقل نسبة الفائدة و لا أظن أن هناك من يرضى في استثمار مبلغ و انتظار حوالي نصف عام من أجل فائدة قليلة ( رأيي الشخصي ) .

لا أخي لم أجرب فقط قمت بتربية بعض الدجاج البلدي كترويح للنفس و ليس كمشروع للربح ومع ذلك أحيانا أبيع البيض الفائض و أشتري به علف لهم يعني لم أخسر في تربيتهم و كمشروع ( الدجاج البلدي ) أظنه مربح خاصة إذا عندك مكان واسع ، أما دجاج " التريسيتي " فأعتبره قمار إما تربح و إما تخسر لأنك لست المتحكم في أسعار السوق و تربيته تحتاج لعناية كبيرة . أما تربية الأرانب هي كذلك تشبة دجاج التريسيتي لأنها جد حساسة و المشكل الكبير في هذا المشروع هو التسويق أنا شخصيا أتهرب من تربيتها .الماعز إذا كان عدد الرؤوس كبيرا يمكنك الإستفادة من بيع حليبه للملبنات و المقاهي فيكون لك مدخول إضافة إلى الجديان هذا في حالة تربيتها على المدى الطويل طبعا .

بالنسبة لي الترتيب يكون تسمين الخرفان ثم تربية الماعز ثم تربية الدجاج البلدي ( دجاج عرب ) فتربية الارانب .

أما خامسا : إذا وجدت ممول أخي فمن حقه أن تأخذه لزيارة ميدانية لمكان إقامة المشروع و تريه مكان التربية و مكان الرعي إن وجد و توفر جميع الظروف المناسبة لنجاح المشروع خاصة اليد العاملة . أما بالنسبة لصور و لمكان المشروع كما قلت أنا بصدد بنائه و سأترك لك مقطعين الأول لبناء المستودع ( راح نديرو يهز 100 راس و قابل للتوسعة باش يلحق ل 200 ) و الثاني للأرض الفلاحية قمنا بحرثها منذ أيام فقط

الأول

الثاني

[بوقرة البارصا]

شكراا على رد اخي
خيار ناس ام بواقي و عجبتني مدونة تاعك راني نتصفح من موضوع لموضوع ونحمل في كتب ربي يجعلها في ميزانك حسنات و يجعلها صدقة جارية و علما ينتفع به
والله فرحتلك باين ناس خدام و حلايلي تمنيت يكون عدي راس مال وندخل معاك و ان شاء الله تلقى لي يشاركك و الله فرصة للناس
مخليا دراهمها ماتكل ما تشرب شغلوهم وربي يطرح بركة نتمنالك كل خير وربي يوفقك ويعطيك ما تتمنى ان شاء الله

سؤال اخير ارجو رد عليه من فضلك
شفت فيديو محوط قطعة تاعك و انا عدي تقريبا نفس قطعة 25/40 ارض فلاحية مافيها والو حاب نحوطها بسور ندير دجاج عرب كيما قتلي نبدا بشوية
لاكن مش عارف شحال يسقام سور حبذا وتقلي شحال سقاملك وشحال متراج باش ندير حسابي و ندبر دراهم و نتكل على ربي

[المشتاق لجنة النعيم]

المشاركة الأصلية كتبت بواسطة بوقرة البارصا

شكراا على رد اخي
خيار ناس ام بواقي و عجبتني مدونة تاعك راني نتصفح من موضوع لموضوع ونحمل في كتب ربي يجعلها في ميزانك حسنات و يجعلها صدقة جارية و علما ينتفع به
والله فرحتلك باين ناس خدام و حلايلي تمنيت يكون عدي راس مال وندخل معاك و ان شاء الله تلقى لي يشاركك و الله فرصة للناس
مخليا دراهمها ماتكل ما تشرب شغلوهم وربي يطرح بركة نتمنالك كل خير وربي يوفقك ويعطيك ما تتمنى ان شاء الله

سؤال اخير ارجو رد عليه من فضلك
شفت فيديو محوط قطعة تاعك و انا عدي تقريبا نفس قطعة 25/40 ارض فلاحية مافيها والو حاب نحوطها بسور ندير دجاج عرب كيما قتلي نبدا بشوية
لاكن مش عارف شحال يسقام سور حبذا وتقلي شحال سقاملك وشحال متراج باش ندير حسابي و ندبر دراهم و نتكل على ربي

أهلا أخي و الله يسلمك ، نعطيك الحساب لي جبت بيه السلعة باش درت حوش 25 متر × 15 متر و انت قيس على لي باغي ديرو انت .

طوب تاع 15 سم جبت 2500 طوبة ب 4.5 مليون

فيراي 12 جبت 9 قناطر ب 7.5 مليون

فيراي 6 جبت 2 قناطر ب 1,5 مليون

السيمة كل مرة نجيب كوتة و الله ماني شافي قداش ساكة جبت بصح حوالي 100 ساكة ب 6 ملاين

خدمت باب كبير ب 4 ملاين و واحد صغير ب 1 مليون .

الرمل 3 ملاين و غرافي 2 ملاين

مع الترونسبور و الماء ( صهريج ) و السلعة تاع البنية ( برويطة - طالوشة - مغرف - بالة - فاس - ميزان للبنية تاع الحيط - كلابة - سيلان - سيزاية - قفازات - مارطو ) يعني شريت كل مستلزمات البناء حوالي 4 ملاين مصاريف .

شريت شوي لوح ( بلونش ) مافاتوش مليون

المجموع حوالي : 34,5 قول تلحقلك حتى 35 ولا 40 مليون سلعة ..

بالنسبة للبناء أخي أنا لي بنيت و حفرت و كوديت الفيراي وجدت كلش مع أني و الله العظيم جامي كوديت ولا بنيت طوبة من قبل درت النية فالهبال و زدمت و الحمد لله سهل ربي ، درت مابين البوطوات حوالي 5 متر و لأني مانعرفش ندير البوطوات وحدهم كنت نبني زوج حيوط حدا بعضاهم و مبعد نكوليهم ( بالاك شفتهم فالفيديو ) ، ما جبت لا ماصو لا و الو راك علابالك اذا جبت السلعة ب 40 مليون الماصو يدي كيفها ولا كثر ، المهم نبني ببالشوية و براحتي مهما كانت ماهيش بنية تاع باطيمة و لا سكنة لي لازم يبنيها واحد بروفيسيونال .

نتمنى نكون افدتك و شكرا على التشجيع و ان شاء الله ربي يرزقك و يرزقنا و يرزق كل واحد حاب يخدم بالحلال .

[بوقرة البارصا]

امين اجمعين
ههههه والله راجل وسيد رجال عجبتني كي قتلي بنيت وحدك اول مرة
راك سلكتها الله يبارك
عدي 4 سنين و انا نخمم كيفاه نبني سور ولكن فشلت لظروف مادية ونقص خبرة
راك شجعتني وعطتني دافع قوي جدا ونتكل على ربي وندير كيفك
واسمحلي لي كثرت عليك وخرجت على موضوعك
الله يحفضك ويعطيك كل ما تتمناه و جزاك الله كل خير

[المشتاق لجنة النعيم]

المشاركة الأصلية كتبت بواسطة بوقرة البارصا

امين اجمعين
ههههه والله راجل وسيد رجال عجبتني كي قتلي بنيت وحدك اول مرة
راك سلكتها الله يبارك
عدي 4 سنين و انا نخمم كيفاه نبني سور ولكن فشلت لظروف مادية ونقص خبرة
راك شجعتني وعطتني دافع قوي جدا ونتكل على ربي وندير كيفك
واسمحلي لي كثرت عليك وخرجت على موضوعك
الله يحفضك ويعطيك كل ما تتمناه و جزاك الله كل خير

شكرا جزيلا أخي و لا توجد مشكلة مادابيا نفيدو بعضانا .

[kamili1]

بارك الله فيك وجعلها في ميزان حسناتك ووفقك في مشروعك ان شاء الله

[wassim hilmi]

شكرا جزيلا

[mostafa ismaeil]

مشكور الأخ الكريم ورزقك الله الرزق الطيب الحلال