لنتشارك للتحضير بهدوء للشهر الفضيل

[ام راضية]

المشاركة الأصلية كتبت بواسطة بريق الامل&

موضوع رائع الله يبارك اكيد رايحين نستفادو منو الكثير جزاكم الله خيرا شكر وتقدير خاص لصاحبة الموضوع ام راضية

الموضوع ازداد بريقا بدخولك اليه حبيبتي بروقة

المشاركة الأصلية كتبت بواسطة faizarbh

البارح انا عملت عصير وفاء الاقتصادي اللي بالبرتقال صنعت ما يعادل 30 لتر ههههههه المهم درت 3 كيلو برتقال و رحيتهم و دراهم في قرع بلاستيك و راهم فالثلاجة لرمضان ان شاء الله

بصحتك حبيبتي فائزة من فضلك حطي رابط موضوع العصير وان امكن التحضيرات بالصور لانني ناوية افعل دلك

[ام راضية]

المشاركة الأصلية كتبت بواسطة ليل و سجون

السلام عليكم
راني قمت ببعض التحضيرات و صراحة نتوما لي درتولي القلب
المهم. كل مرة نخرج نشري حاجة.
شريت 2 كيلو عينة أو ما يسمى البرقوق مانعرف غدا تكفي ولا نزيد
كيلو زبيب
رطل مشماش مجفف و اظن لازمني نزيد رطل
باطة سمن مدينة
2 كيلو كاوكاو
جمدت 10 كيلو جلبانة و درتها بطريقة قرعة الماء
2 كيلو فرنو خرجلي 8 حبات نظن نزيد منو 2 كغ
و كيلو ثوم حمرة تاع هاد العام نقيتها. رحيتها بنص كاس زيت صانقو و مغرف صغيرة ملح و درتها فالبورت مانجي
و الكل للكونجيلاتور
كاشما يخصني؟؟؟
و خبذا لو كل وحدة تتعامل ببرنامج واش اطيب لرمضان تشاركنا خاصة تاع الشرق لان زوجي من الشرق و انا من الوسط و مانعرفش واش يطيبو في رمضان.

تكليهم بالصحة والهناء صراحة كما قلت ارفض المبالغة في الشراء بكميات كبيرة اظن 2كيلو تكفي زيدي معاها شويه فواكه مجففة مثل اناناص وكيوي وبنان للتزيين وفيها براكة
اما من اقصي الشرق وان شاء الله كي نصلو مرحلة الطياب راح نتعاون مع الاخوات لمساعدتك وكدلك ادعوكي لزيارة مواضيعي كلها تقر يبا طياب تبسي ومن تونس الشقيقة

[QUOTE=mereyoucef;1052378224]

المشاركة الأصلية كتبت بواسطة رتاج علي

السلام عليكم، أختي mereyoucef اعتذر عن التأخير لم ادخل النت،اما عن طريقة حفظ المشمش فااكد لك انها طريقة ممتازة، وقد جربتها بنفسي و هي طريقة سهلة جدا، تنزعين النواة (العلفة) وتضعية في الكسكاس افور مدة 5 دقائق الى اكثر بقليل المهم يصبح طري، بيدك تعرفي،تخليه يبرد ثم ترحيه بالمولينكس أو رحاية اليد، انا درتوا بالمولينكس، كل 8 ملاعق ديريهم في صاشي، او علب بلاستيكية، و خبيهم والله ذوقها رائع خاصة في رمضان و منعش، الوصفة تقول 8 ملاعق لكل لترين ولكني درتو لكل لتر، ان شاء الله تكوني استفدتي، انا مزتلوش الليمون اذا تحبي زيديلوا و تصبحين على خير أخية.[/QUOTEشكرا الله يحفضك ]

مشكورة علي المعلومة

المشاركة الأصلية كتبت بواسطة oum rahma

الله الله عليكم يلبنات ، موضوع في القمة يعطيكم الصحة

اختي ام راضية بارك الله فيك وفي مجهودك

متابعة باذن الله وكاش فكرة نتفكرها نحطها، لاني نسيت كلشي

بوجودك حبيبتي ام رحمة زادت هامة الموضوع لكن لازمي تعصري مخط ونحطيلنا فكرة او تجربة

[ام راضية]

المشاركة الأصلية كتبت بواسطة اريج المسك

السلام عليكم و رحمة الله تعالى و بركاته
اختي ام راضية نقلك انا الزبيب مايخطيش داري على طول العام لأنهم بناتي يحبوه
و بالنسبة لطاجين الحلو فهو طبعا عادة جزائرية و نديروه باش يجي رمضان كامل حلو لكن انا كي نطيبو النهار الأول يقعدلي لأخر يوم و هو عندي يعني ماناكلوهش بزاف و العام الماضي قلت ما نشري مانطيبو لكن قعد قلبي ياكل فيا كيفاش ما نطيبوش ايا طبطبت عليا جارتي تطلب في القرفة فاستغليت الفرصة و عطيتها شوية زبيب و طرف لحم و القرفة اعواد و مرحية و قلتلها ابعثيلي طبسي برك صدقيني هاداك الطبسي قعدلي سمانتين و انا كل يوم نحط منه شوية
لكن هاد العام قررت ندير لحم حلو بالتفاح و الأناناس راني كي درتهولهم عجبهم يعني جربتو فيهم قبل هيهيهيهيهيه

بالنسبة للفول فبكل صراحة والدتي ديرو روعة لكني مانعرفش الطريقة مليح فراح نعطيلك على الوهي برك حتان نسأل والدتي او يدخلو خواتاتي و يقولولك
المهم الطريقة الأولى يكون مرحي "و هاد يجي بالفول الأخضر او الفول اليابس مرنخ" المهم طيبي الفول مليح حتى يصير طايب زبدة كيما نقولو وقشريه و ترحيه اما تهرسيه بالفرشيطة او بمغرفة هرس البطاطا "يعني ما يكونش ارطب يكون فيه تحثريبة" و ديريلو لاصوص بصح بزاف قدر كاس تكون بالليمون و الخل و زيت الزيتون و ثوم و ملح و فلفل اسود و شوية كروية تخلطيهم و تصبيهم عله هو يجي جاري شوية مع لاصوص على هك قتلك زوديلو
كي تحطيه في الطبسي زينيه بالدبشة و صبي عليه زيت الزيتون

الطريقة الثانية الي نحبها أكثر تغلي الفول الأخضر و تقسميه على 2 "اذا كان حبتو صغيرة خليه هداك" و قصي الطماطم مكعبات صغيرة بحجم الفول و الفلفل الحار ثاني قصيه مربعات و الدبشة قصيها رقيقة خلاص و خلطيلو نفس لاصوص و صبيها عليه "بصح مش بزاف" و يتكل بارد

ان شاء الله تكوني فهمتيني راني دايخة اليوم شوية من الgريب

و بالنسبة للسلاطة انا في رمضان نكثر من امي حورية لأني نقدر نزود منها و نخبيها و كل مرة نجبد منها
و ثاني اذا تذكرتي سلاطة فلة فود الطبقات ندير منها و نجبد كل مرة شوية لأنها كل ماتقعد تزيد بنتها

اسمحولي اذا كثرت الهدرة سلام

مشكورة جدا حبيبتي علي مروركالدي كان مثل لريج المسك علي نفسي خاصة وعلي متتبعات صفحتي ان شاء الله عامة

[mitrochka]

موضوع جميل
في المتابعة دائما

[dalila setif]

اللهم بلغنا رمضان
شكرا لك اختنا ام راضية على الموضوع الجميل ربي يجعلوا في ميزان حسناتك

[بريق الامل&]

صحيح شهر رمضان المبارك..هو شهر الله..شهر خيرا من الف شهر..تتنزل الخير والبركه بهاذا الشهر العظيم ولابد من نستعد اليه بالعباده والصلوات..الله يعطينا القوه على صيام نهاره واقامه ليله..ولكن هذا ما يمنعش والكل يعرف انه شهر الله شهر الخير والكرم..ونوجدو فيه مالذ وطاب الي يستهاهل انو نبدا من الان التحضيرات له

وباش نقدرو على العبادة لازم ناكلو مليح وهذا مش حرام

[بريق الامل&]

الان نبداو التحضيرات الاولى والصعبة والي تاخذ الوقت
نبداو نحضرو الدشيشة تاع الشربة تاع الفريك و الشعير
تحضير المخللات الي تفتح الشهية وتزين المائدة
نخبو في الكونجلاتور الجلبانة و عصير القارص وزبدة البقرة نحب نديرها للكسكس والحلو والبغرير
ونفتلو الكسكس للسحور
وطبعا الميناج والي يصبغ
ومن بعد التوابل كي يقرب رمضان نحب الجديد حتى العشاب يجبد غير الي ريجتو تعبق
نرحوهم ونغربلوهم ولا نشروهم واجدين حسب الجودة والنوعية والرند الاخضر و النعناع نحيلو الاوراق ونيبسوه محافظ على لونو الاخضر للشربة والشاي
الاواني نفولو بحاجة ولو بسيطة عادة توارثناها
نوجدو البرقوق الزبيب المشمش القهوة نحمصوها ونرحوها لازم ارابيكا
اللوز القطايف الديول حتى غطاء الطابلة الجوتال والسرابيت تاع الورق وورق الالمينيوم وبابي فيلم وبورت مونجي علب للحفاظ على الاطعمة في الثلاجة
ربي يدخلو علينا بالصحة والعافية وربي يبلغنا رمضان ويقبل منا الصيام والقيام والله مشتاقة لاجواؤو
قرب الاذان وريحة الشربة والبوراك وصلاة التراويح والزلابية وقلب اللوز والسهرات عندو اجواء خاصة توحشناها وتحضيرات العيد فيما بعد
هههههههههههههههههه خرجت على الموضوع المعذرة

[بريق الامل&]

ههههه لكنه شهر مايحلاش الا بالمشتريات ههههههههههه لازم

[موجو جوجو]

chokran lik okhti om radia
walah madabiya net3alam wach ytaybou tbassa puisque manich 3aycha tema
mochkalti ano net mahich metwafra fi dari hata netla3 ldarna
hadak 3lah haba tfidouni w yestfado lakhawat m3aya men programme ta3 tyab
rani khrejt elmawdou3
salam

[pubvision]

بارك الله فيك

[zoura401]

شكرا علئ الافكار الرائعة للتحضير و نتمنئ ان تساعدنا الاخوات الكريمات علئ كيفية تحضير المائدة اي اقصد menue لان العام الماضي حرت ماذا اطهي في رمضان كل ما احضره يبقى كما هو .
يا اخواتي حاولن وضع وصفات اكل رمضان تتناسب مع موسم الصيف.
وشكرا على اهتمامكن

[أم أدم يحي]

الله يبارك شهيتونا والله وصحاب الغربة غير يتفرجو

[miri_27]

التي تعرف كيف يحفظ الثوم تجيبني لانه معي كمية كبيرة وشكرا لكن جميعا

[مرام 1987]

اللهم بلغنا رمضان
شوفي اختي الثوم احنا كي بقات بكميات كبيرة من عرس اختي حكمتها اختي قشرتها كامل وحطتها في الروبو ورحاتها وحطتها في porte mangé وحطتها في الكونجيلاتور صدقيني والله غير ما زلنا لليوم نطيبو بيها تقول مرحية جديدة بصح بدون اي اضافة اخرى .
ياربي ونشفى من المرض ونصوم كي الناس ادعيولي puisque لعام لي فات ماصمتش من المرض

[مرام 1987]

المشاركة الأصلية كتبت بواسطة zoura401

شكرا علئ الافكار الرائعة للتحضير و نتمنئ ان تساعدنا الاخوات الكريمات علئ كيفية تحضير المائدة اي اقصد menue لان العام الماضي حرت ماذا اطهي في رمضان كل ما احضره يبقى كما هو .
يا اخواتي حاولن وضع وصفات اكل رمضان تتناسب مع موسم الصيف.
وشكرا على اهتمامكن

اختي شوفي موضوع الهام 07 راهو مثبت فيه menu خاص بشهر رمضان الكريم والله غير هايل ينحي الغلبة على كل وحدة حايرة واش تطيب في الشهر الفضيل
اللهم بلغنا رمضان
دعواتكم بالشفاء العاجل