menu رقم 3 خاص بشهر رمضان الفضيل

ninafret · 2013-07-24, 23:13

مساء الخير وصحا فطوركم
اولا استسمحكن اخواتي على التاخير لان النترنات خلاصت في دار شيخي وحتى جيت لدار بابا باش دخلت للمنتدى
وتاني حبيت نقلكم بلي البرنامج اللي نكتب بيه اسمي على الصور تلفلي وماحبش يتفتح علاهاداك ترددت نحط الصور مالا طلب من اخواتي المشرفات ياريت اللي عندها الوقت تكتبلي اسمي على الصور وتعاود تحطهالي هنا ولا ترسلهالي على الخاص وانا نعاود ندرجها حتى مايتنقلوش لمنتديات اخرى ويتنسبو لاشخاص اخرين لاني نتعب في عملهم وتحميلهم وبارك الله فيكن مسبقا
بسم الله نبداو الموني الثالث اللي نتمنى ينال اعجابكم

المدخل :سلطة الجزر او الزرودية بطريقة ماما
الطبق الاول :شوربة فريك
الطبق الثاني : تارتولات صالي بالجبن واللحم المفروما
التحلية: تحلية بالموز والشانتيي بدوق الانناس

اولا نبداو بتحضير السلطة
نضفي الجزر وقطعيه دوائر متوسطة السمك وحطيه يفور حتى يطيب من غير مايتفتت يبقى شوية حاكم روحو

خليه يبرد وحطيه في طنجرة

وزدي عليه 3 ملاعق زيت عادي وخلي الكل يسخن وزيد سنة ثوم مبروشة ورشة صغيرة كمون ورشة كروية وملح انا عملت كمية صغيرة كي يتخلط الكل ويسخن زيدي 2 ملاعق خل وطفي خليها تبرد وقدميها وممكن تعدلي نسبة الحموضة حسب الرغبة

خليها تبرد وقدميها وحدها ولا مع سلاطة خضرا انا ماكانتش عندي قدمتها هكدا

شوربة الفريك سبق وقدمتهالكم هاو ليكم الرابط تلقاوها في الطبق الاول بعد المدخل

https://www.djelfa.info/vb/showthread.php?t=1360481

الترتولات نفي العجينة البريزي اللي قدمتهالكم من قبل فقط ديري رشة سكر وزيدي في الملح هاو الرابط

https://www.djelfa.info/vb/showthread.php?t=1323163
وكي تدخليها للفرن طيبيها حتى تاخد اللون الدهبي من غير ماتحمار وكي تخرجيها امليها بالحشو هدا

بصل قليه في شوية زيت وكي يدبل زيديلو لحم مفروم قلي الكل

وزيدي جبن مبروش وكي يبرد زيدي بيضات ومعدنوس وجبن طري اختياري وفنجان حليب ماتزيديش الملح وعمري التارتولات ودخليهم فرن متوسط بعد ماترشي شوية قرويار ولا شيدار على نار متوسطة حتى يجمد الخليط ماياخدش بزاف وقت وقدميها

اما التحلية
استعملت كرام باتيسيار بدوق الموز اعملت زوج اكياس في لتر +فنجان حليب ومعاهم 7 ملاعق كبيرة سكر وكي غلا الكل على النار طفيت وزدت 2 حبات موز مقطعة مربعات وصبيت الخليط في اكواب ودخلتو للثلاجة

في هدا الوقت كنت حطيت كاس الا ربع حليب يبرد وزدتلو 3 ملاعق كبيرة مليانة غبرة الشانتيي طلعتهم مليح وبديت نزيد بالتدريج مشروب بدوق الانناس نا استعملت شريعة انناس وممكن تستعملي رامي ولا اي مشروب حتى تخفاف الكريمة تقريبا ربع كاس مشروب مع الخلط

ثم صبيتها فوق هديك الكرام باتيسيار اللي بردت وزينتها بكرمال ولا ممكن تزيني حسب الرغبة وقدميها باردة والبنة واش نقلكم عجبتهم كا مل جات خفيفة جربوها ساهلة وماتاخدش وقت وروعة

نتمنى يكون عجبكم الموني وراني نكتب في الموني الرابع ادا كفاني القت نحطو الليلة بحول الله
وماتنساونيش بردودكم ودعواتكم ليا بالدرية الصالحة في هدا الشهر المبارك

*زهرة اللوتس* · 2013-07-24, 23:16

شكرا هاذا وين كنت نتصفح مواضيعك ما شاء الله ربي يعطيك ما تتمناي

حياتي نبع امل · 2013-07-24, 23:19

ربي يحفظك يالغالية ويجعلها في ميزان. حسناتك
ربي يرزقك من اوسع ابوابه

أنآحلُم · 2013-07-24, 23:22

ربي يفرحك ويعطيك ماتتمناي
ويرزقك الدرية عاجلاغير اجل

flora06 · 2013-07-24, 23:29

ربي يخليك لينا يا نينا الحنينة و يطعمك اللي فبالك و يرزقك الدرية الصالحة يا رب شكرا على اطباقك الرائعة ربي يقدرك و تزيديلنا ما اكثر

ninafret · 2013-07-24, 23:32

ربي يخليكم اخواتي الغاليات والله فرحتوني بدعواتكم ليا
راني نحمل في الموني الرابع ونكتب في الوصفات وراح نحطهولكم الليلة بحول الله
والموني الخامس تاني راهو واجد حتى هو يحتاج تحميل وكتابة الوصفات ممكن نحطو غدا بحول الله

*عاشقة الجنة* · 2013-07-24, 23:36

حبيبتي أمينة نموت عليك وعلى وصفاتك

ربي يخليك ويعطيك ما تتمناي ان شاء الله

اكتبي اسمك على الصور ببرنامج paint

silindz · 2013-07-24, 23:43

يعطيك الصحا اختي الموني نتاعك هايل ونشاء الله ربي يرزقك بدريا الصالحا

fati oran · 2013-07-24, 23:46

تبارك الله عليك موفية و مكفية

hanane220 · 2013-07-24, 23:46

يعطيك الصحة

ninafret · 2013-07-24, 23:50

اقتباس:

المشاركة الأصلية كتبت بواسطة *عاشقة الجنة*

حبيبتي أمينة نموت عليك وعلى وصفاتك

ربي يخليك ويعطيك ما تتمناي ان شاء الله

اكتبي اسمك على الصور ببرنامج paint

حبيبتي انا تاني نحبكم وربي يعلم ربي يحفظك ويعطيم ماتتمناي والبرنامج ماحبش يتفتحلي كي نجي ندخلو يبلوكي كلش حتى نعاود نروبوتي الميكرو
نتمنى وحدة من المشرفات يكتبوهولي على الصور
وحبيبتى راني نحمل في الموني الرابع اللي راح يكون ياندويتشات ماك العربي بالرغيف وسفيرية البطاطا واللحم المفروم وتحلية بدوق الفراز ماتقولي حتى لواحد راني نحط فيهم ههههههههههههههههه

وصحا صحورك حبيبتي

ninafret · 2013-07-24, 23:52

الف شكر لكن حبيباتي سيلين وفاتي وحنونة ربي يحفظكم وماتنساونيش بدعواتكم ليا
صحا صحوركم

*عاشقة الجنة* · 2013-07-24, 23:53

اقتباس:

المشاركة الأصلية كتبت بواسطة ninafret

حبيبتي انا تاني نحبكم وربي يعلم ربي يحفظك ويعطيم ماتتمناي والبرنامج ماحبش يتفتحلي كي نجي ندخلو يبلوكي كلش حتى نعاود نروبوتي الميكرو
نتمنى وحدة من المشرفات يكتبوهولي على الصور
وحبيبتى راني نحمل في الموني الرابع اللي راح يكون ياندويتشات ماك العربي بالرغيف وسفيرية البطاطا واللحم المفروم وتحلية بدوق الفراز ماتقولي حتى لواحد راني نحط فيهم ههههههههههههههههه

وصحا صحورك حبيبتي

ههههههههه اوك منقولهمش يا الحبيبة

انا راني حطيت موضوع تاع بوراك اذا حابة تشوفيه

وحابة نزيد مواضيع تاع طجين اللحم الحلو و معجون المشمش و بقلاوة

حملت الصور للميكرو مي ذرحت وتفنينت نكتب اسمي

ninafret · 2013-07-24, 23:57

اقتباس:

المشاركة الأصلية كتبت بواسطة *عاشقة الجنة*

ههههههههه اوك منقولهمش يا الحبيبة

انا راني حطيت موضوع تاع بوراك اذا حابة تشوفيه

وحابة نزيد مواضيع تاع طجين اللحم الحلو و معجون المشمش و بقلاوة

حملت الصور للميكرو مي ذرحت وتفنينت نكتب اسمي

امممممممممممممم علابالي فيك فحلة وشطورة خلي نكمل نحط الموني ونروح ندير طلة على البوراك راني بديت نجوع ولا البقلاوة غير حطيها سخفتيني اممممممممممممممممممممم

نورسين سوف · 2013-07-25, 00:03