اريد فسخ الخطوبة - الصفحة 2

vivaldi · 2012-07-08, 22:58

لا حول و لا قوة إل بالله
لا أظن أن هناك من يقول مثلك قولك ، لأنه إن وجد فقل للدنيا وداعــــــــــــــــــــــــــــــــــــــــــــــ ـــــــا
ضع ثقتك بالله عز و جل ، فقد تدحل عليك هذه المرأة بالرزق الحلال الطيب
لفوله عز و جل : "ومن يتق الله يجعل له مخرجا ويرزقه من حيث لا يحتسب"

اميرة باحتشامي · 2012-07-08, 23:04

خاف ربي يا مخلوق والله ما يصلح هذا الشئ راك راجل يعني كلمتك كي الرصاص كي تخرج ما ترجعش

تستشير الناس قبل اتخاذ القرار هاذي معقولة لكن انك تاخذ براي الناس ولا تخلي واحد يقرر في بلاصتك هذه كارثة غدوة تولي مولا بيت واب للولاد كيفاه تعلمهم وكيفاه تخليهم يكتسبو شخصية قوية ويعتمدو علةى رواحهم واذا انت باباهم ما تعرفش الصحيح من الغالط صاحبك ربي يهديك رايح يخربلك حياتك كاملة ويديك لجهنم كنت تقولو نخليهال تخدم ذركا ادير تواليها مادام عند باباها وكي تجي لداري انا نصرف عليها نبيع روحي ونعيشها ولو باليسير نامل ان تعدل عن قرارك وتشد في كلمتك الراجل يتحكم من فمه يا خويا

وربي يصلح امورك وامورنا

hamsa1987 · 2012-07-08, 23:42

السلام عليكم

مانيش مامنة واش قريت؟؟؟؟ راني رايحة نكون شوية قاسية معاك لكن ممن ردي و ردود الاخوة رايحة تفطنك

يا رزاق يا فتاح ارزق هذه البنت باحسن منصب و بزوج صالح

يعني اخي ما وجعتكش هذه الكلمة وانت تقول فيها ، الفقر عمرو ما كان عيب و الارزاق بيد الله عز و جل
قصتك ممكن يضربو بها الامثال و نبينو للناس صحة القول " و عسى ان تكرهو شيئا و هو خير لكم"
لان هذه الفتاة بالاك رايحة تغيضها روحها و تتالم كي تفسخ الخطبة لكن في النهاية ربي حبها لان تفكيرك او بالاحرى استماعك الاعمى لصديقك اللي هو نعم الصديق ما شاء الله لا ينبأ بالخير

يا اخي العزيز افطن و نحي عليك هاذا التخمام الجاهلي اذا الطفلة ما ناقصها والو و متربية و عاقلة احمد ربي لان كاين ناس يحوسو على بنات كيما هك ماش طماعات حتى ياو لوكان ماكثة في البيت
كولو كسيرة و اشربو ماء و عيشو هانيين لان المال عمرو ما شراء السعادة يساهم صح فيها لكن ماهوش هو الاساس

~~أم البشائر~~ · 2012-07-08, 23:56

شوفي يا اخي

كلامك يستنبط منه الكثير

اول شيء تبدو شخصيتك هشة ومن النوع اللي يتاثر بكلام الناس وقراراتو غير ثابتة

ثم تبدو ماديا جدا

ثم تبدو غير محب لذات الفتاة واخلاقها

اولا من تزوج امراة من اجل مالها زاده الله فقرا

ربي دارك رجل تصرف عليها

وما يهمكش خدمتها لانها امر خاص بها

تبقى هناك نقطة اذا ماعندكش اشكال في عمل المراة

ثم راها عقود قادر ربي يفتح عليها

وقادر تديها خدامة وتحبس

خمم مليح ماذا يعجبك فيمن خطبت؟
فان كنت مقتنعا بها بعيدا عن النظره لمادية فتوكل على الله

وان لن تكن مقتنعا فاترك البنت بسلام يفتح عليها ربي مع غيرك

وحاول تكون اكثر نضجا ولتعلم ان الحياة تنتظرك بتحديات اكبر من المال

حمدا لله كثير · 2012-07-09, 00:02

لاحول ولا قوة الا بالله الله يهدينا ويبعد علينا ولاد لحرام

توكل علي الله و استعذ بالله من الشيطان و ربي يهنيك اخي معها في بالك ساهلة تبطل والله دنوب الطفلة هادي يخليك ربي ماتتهناش كامل بحياتك ولا في بالك ربي ينسا لولاية

والخدامة لمرسمة تاني اي عندها شروطهاااااااااااااااااااااااااااااااا الي نتا متقدرش توفرهملها وهي الي تبطل عليك
وذوقك كاس المر الي تحوس تذوقوا لخطيبتك هادي

عميروش الحر · 2012-07-09, 00:04

أنا هذا ردي وانا المسؤول عنه وهذا رأيي ... الراجل الحق هو الذي يصرف على مرتو وما جاتش في راسو فكرة الزواج حتى عرف باللي يقدر يتحمل مسؤولية العايلة وحدو لأنو هو الراجل أما انك تتزوج مرأة على جال خدمتها ولا على جال المال هادا زواج مبني على اساس راشي ... نورمالمون نتا تقوللها حبسي مالخدمة و اقعدي فالدار وما يخصك والو ... واذا شفت روحك ما عندكش الامكانيات باش تتزوج وما قادرش تصرف على عائلة و تتحمل مسؤوليتها يا أخي واش خذاك راح تتمحن نتا وتمحن معاك انسان وحداخر وربما اولاد.
هذا ردي وشكرا

tarek1987 · 2012-07-09, 00:22

بنات الناس ماشي لعبة والرازق ماشي لتخدم عليك اعادة ترتيب كيفية الاختيار ولي دبر عليك الدباير هذو يحكمهم ليه

اسعى لرضى الله · 2012-07-09, 00:25

والله كون كنت منك اقسم بالله نحشم نحط موضوع كما هدا

واش هدا؟

علابالك كون دير الجاست هدا علابالك واش يقولو عليك مكش راجل كيعاد وصلت بيك لدرجة انو عدت تحوس على وحدة مرسمة باش تعاونك انعل الشيطان راك راجل ولازم تكون راجل باتم معنى الكلمة مش غير راجل هكاك بالفم

رجال بكري يخدمو كلش وتقلتو ميخليش مرتو تخدم كيعاد يغير ويبغا يحصنها من الفتن وعلابالهم بلي المرا ضعيفة ويقدر اي واحد يتمسخر بيها تالمون في وقتهم مكانش يصرا واش صاري دك

والسيد قالك بغيت نفسخ الخطوبة كيعاد مش مرسمة والله غير عيب

نورمالمون تقول لصاحبك انا مرتي تريح في الدار ولا بغات تخدم حاجة في دارها معليش كما الخياطة مي تخرج برا جامي تصرا كيعاد يا اخي الكريم راك تشوف واش صاري ترضى لمرتك تخرج الصباح تحشر الرجالة في ليبيس ؟ وترضى يطيشلها كاش واحد كلمة ؟
وترضى تعود تحكي مع اللي يخدم معاها وتريح معاه كثر ما تريح معاك ؟ وترضى ولادك منن بعد يترباو في لاكراش ويتعلمو كاش كلام فاسق كامل ؟

صُبح الأندلس · 2012-07-09, 09:08

معذرة و لكنك لاتبحث عن امرأة للزواج بل عن صك بريدي
ثم تلومون المرأة إذا رفضت الزواج ببطال !!

Khokha01 · 2012-07-09, 09:14

السلام عليكم

فالزواج ربي هو الرزاق ماشي الترسيم
قادرة تكون غير شبكة وانت تربح عليها بعد الزواج وتترقى بمناصب اعلى
وقادر تجيبها خدامة وتخلص مليار وبخطأ بسيط فعملها يطردوها وترجعبطالة وبالتالي تخسر الاول والتالي ايلا نيتك هاكا
ارضى بنصيبك بللي كان وماتكبرش كرشك .. الرزاق ربي وكيما يمد ينحي امالا كمل مع خطيبتك ماعندها حتى ذنب المخلوقة .. مع اني اتمناها لغيرك بما ان نيتك فيها هكا بعدما خطبتها جا ابليس من النوع البشري ووسوسلك ودرت بكلامو ..

fyfy_top216 · 2012-07-09, 09:24

كيما يقولوا مش غير لي لبس سروال راجل

الطمع وين يوصل اليوم هدي وغدوة واش راني سير بلي لوكان تتزوجها وتجي في طريقك وحدة مرفهة والله تسمح فيها كي صبح الخير ..
المراة تصرف عليا جامي انعل بليس

تالا تسنيم · 2012-07-09, 09:52

أخي ........... وقيلة راك تقصر برك ياك.............. ولا منك بصح شا راك تقول.......... نقول لك الرزاق هو ربي سبحانه

بنت الحجاج · 2012-07-09, 09:58

ديرلكْ طلبْ زواجْ في جريدة النهار !!!

شاب جزائري

يبحث عن امرأة عاملة

و مستعدة تعطيني سْلاكها ( راتبها )

!!!!

نقطعْ راسي

إذا قبلتْ بيكْ وحدة وكانت علابالها بنيتكْ !!

sunny8 · 2012-07-09, 10:06

نعم من الأحسن فسخ الخطبة لأن هذه الفتاة تستاهل واحد خير منك
من العيب التفكير بهذه الطريقة
الله يهدي ما خلق

عُضو مُحترم · 2012-07-09, 10:10

اقتباس:

المشاركة الأصلية كتبت بواسطة بنت الحجاج

ديرلكْ طلبْ زواجْ في جريدة النهار !!!

شاب جزائري

يبحث عن امرأة عاملة

و مستعدة تعطيني سْلاكها ( راتبها )

!!!!

نقطعْ راسي

إذا قبلتْ بيكْ وحدة وكانت علابالها بنيتكْ !!

مرسّمة.....فقط