السلام عليكم عيد مبارك على الجميع.
اليوم حبيت نطرح عليكم مشكلتي والي هيا قطع صلة الرحم و الحقد بين الاقارب .
فهاذ اليومين تاع العيد واحد ماعيط ولا سأل علينا حتى فالحجر الصحي و من قبلها بابا مريض متوقف عن العمل ولا شخص جا قال واش تحتاجو واش خصكم يا سيدي واش حوالكم برك .
ابي عندو مشكلة مع زوجة ابيه متخليش ولادها يتعاملو معاه و فهمتهم بلي راه لاباس بيه و مامدلهمش رغم انو جدي ربي يرحمو حياتو كامل مصرفش عليه و بابا الي كان يعاونو في ولادو و حتى كي مات جامي بابا طالبهم حتى بحصتو تاع الورث .
اهل والدتي هادو حكايتهم طويلة
المشكلة مع خالتي قطعتنا مع الاقارب بتحريضاتها و اكاذيبها و تغلبنا بجدتي الي راهي لعبة في يدها .السبب انو خالتي تحوس على الي يخدمها هيا و راجلها و ولادها ودايرة بيت جدي سبب فقط على اساس هيا قلبها على والديها وخاوتها .
احنا كنا نعاونوهم فالعطل و الاعياد والمناسبات و... معجبهاش الحال بانتلها قليل تحوس تروح تخدم برا و حنا نقومولها بدار باباها وين قاعدة هيا وولادها السمانة كامل و فالويكاند نقومولها بدارها و فوق من هك تتحكم فينا مالزمش يطلع علينا النهار و نديرو اي حاجة لمستقبلنا ، و تزيد تنشعنا بالهدرة رغم الخير الي نديروه فيها تقولنا مكمش من مستوايا و جامي عاملتنا كبنات اخت حاطتنا عبيد و دارت المستحيل باش نبطلو قرايتنا صحاصحا كي مقدرتش قلبتها عداوة حرضت علينا خوالنا هاذو سنين ميهدروش معانا على جال ختهم حبيبتهم الي شراتلهم سيارة و تمدلهم الصرف ، ولات لجدي حاطنا فالتقيل . من بعد ولات للاقارب ،حرضت جداتي تمنع امي من الاتصال بيهم او زيارتهم قالتلها منحبكش تدوري بيهم .كي نديرو اي حاجة في دارنا تقولنا راكم تحوسو نجو نديرولكم وجه والله غير تقعدو وحدكم كي الكلاب والعكس كي هما الي يديرو حاجة في دارهم جداتي تتصل بماما نروحو نجرو نعاونوهم و هكاك يسمعونا مالا يرضينا .
النتيجة اننا قررنا نقاطعهم حنا تاني لانو مافيهمش خير . وايضا باش منصولوش لحاجات اكبر لاننا عدنا منتحملوش اهانهم لينا .
درك بقات جدتي فالنص ،انا امي انسانة تخاف ربي و تصل الرحم و محال تقطع امها و ابوها حتى لو امها تشتمها و الاخرى لقات غرضها .
جدتي ربي يغفرلها مالقيت واش نقول عليها ظلمتنا بزاف شهدت علينا زور ، قذفتنا في شرفنا سبتنا قدام العباد حاولنا سنوات ارضاءها لكن دون نتيجة حاجة وحدة ترضيها نكون خدايم لبنتها غير هكا مكانش . نمدلكم امثلة و مواقف بسيطة .
نديرو اي حاجة في دارنا مرة تجي و مرة لالا كيما تقولها بنتها و لكان جات نلقاوها مش لابسة مليح و التشناف والتفتيش و تدير سبايب باش تضارب.منحضروهاش تغضب و تدير حالة . بابا يسمع و هيا في دارو تهدر عليه و تسبو . شيعت على اختي بلي مطلقة و هيا في دارها .تألف علينا الحكايات و القصص نتشوكاو كي نسمعوهم .
سمعت باقارب حبو يخطبوني لابنهم فسدت عليا وقالت عليا كلام منسامحهاش عليه و بنتها قالتلي فلان هذاك ماش تاع وجهك. معليش ، جاني عريس خلاف جات حضرتلي الرؤية الشرعية مشنفة وهازة روحها و بقات قدامنا ترمي لكلام لام العريس روحو مولاوش . من وراها شيعت عليا بلي نحكي مع واحد فاميلتنا و هو متزوج و عندو ثلاث بنات و قالت لمرتو بلي امو حابة تزوجو على جال الذكور و دخلت لافامي في بعضاهم و قاطعونا ارضاءا لكنتهم .جات عندنا تطلب دراهم ( اربع ملايين ) لخالي الي لا خدمة لا زدمة قالتلها لماما بنتك خدامة وبايرة معندهاش علاش تصرف و كي محبيتش نمدلها لانو زوجتو ايضا عاملة و تسلك ثلاث مرات خير مني و تاني منمدش دراهم لعبد ميهدرش معايا المهم سبتني وروحت . وغيرها ......
والله مالقينا كيفاش نديرو معاها .خاصة امي راهي بين وبين كون عاندتها شعرة راها قاطعتها من سنوات .انا نوكل عليهم ربي هذا ما نقول .