وصفة لمحاجب

[ام محمد امير]

سلام سخف راجلي على لمحاجب والحشو كي نديرو جامي يعجبوا كل وحدة تقولي طريقتها في عمل الحشو شكرا مسبقا

[هبة بسمة]

السلام عليكم انا هذي هي طريقتي وهي تعجب كل لياكلها نجيب بصل حبات كبار نقطعها رقيقة و نرش كمية من الملح عليها نحك بيدي الملح مع البصل شوية ندخل الملح فيها ثم نضع البصل في المقلاة ونخليها حتى يخرج منها كل الماء ثم اضيف الزيت ونقليها مليح ثم اضيف الفلفل الحار المقطع
نقطع الطماطم قطع صغيرة ونغليها حى تنشف من الماء ثم قليها في شويا زيت متكثريش الزيت ثم نخلط البصل والطاطم ونخليها طيب مع بعض شوية وتخليها تبرد .

[RYMOU2011]

قطعي البصل شوية رقيق حطيه في طنجرة مع شوية زيت و خليه يذبال مع التقليب من حين لأخر
في طنجرة أخرى قلي لحم مرحي و قتيه مليح بالفرشيطة باش مايقطعش العجينة
هرسي الثوم مع الدرسة و زيديه للبصل أضيفي فلفل طرشي مقطع رقيق و حار اذا حبيتي مع طماطم مقشرة و مقطعة صغيرة زيدي معاه طماطم معلبة ثم اللحم المرحي اضيفي الملح و التوابل اللي تحبيها انا نزيد فلفل اسود برك لأنو فيه الدرسة
خلي الخلطة تطيب على نار متوسطة مع التقليب من حين لأخر حتى تنشف و أهم شيء ماتزيديش الماء.
خليها تبرد باش ماتثقبش العجينة. و بصحتكم.

[ام الخير 05]

ديري كمية تاع زيت في مقلات وقطعي البصل رقيق خليه يتقلى ثم زيدي الثوم المقطع او المدقوق ثم التوابل خاصة الكسبر والملح ومن بعد زيدي شوية طماطم مصبرة وقليهم مليح ثم اضيفي الطماطم المقطعة وخليها تتقلى حتى ينشف ماء الطماطم ترجع كيما الحميص وطفي النار وزيدي الدبشة المقطعة ثم التون والزيتون المقطع سواء الاسود اوالاخصر وطيبي نصف الاوراق تاع العجين حطي فيها الحشو ومن بعد كل وحدة ديريلها قرصة تاع عجين وغلفيها بيها وطيبيها

[ام محمد امير]

ربي يخليكم شكرااااا