مشكل عجينة المسمن واعجانة كنوود

ام رجاء 09 · 2015-03-25, 13:44

السلام عليكم
من فضلكم شكون جربت عجينة المسمن او كما البعض يسموه المعارك او الرقاق والخ في عجانة الكنوود لاني جربت عدة مرات وماتنجحليش ممكن نكون كثرت الماء او عدم توازن المقادير .مع العلم بيدي تخرجلي وانا حبيت نريح نفسي
لي جربتها وراهي تعتمد على العجانة تعطيني مقادير مظبوطة بلييييييييز وهل كي تعجنها تخليها ترتاح وتعاود تعجنها او تعجن مرة وحدة وخلاص التوضيح ان امكن والفائدة للجميع مشكورين معليش كي تظربو طلة برك فيها بركة

minina2601 · 2015-03-25, 14:15

السلام عليكم ورحمة الله وبركاته
اختي ننصحك تضيفي الماء بشوية وماشي على مرة يعني كي تكون تعجن مرة على مرة ضيفي كمية قليلة من الماء حتى تتحصلي على عجينة طرية لي توالمك وفقك الله وبارك الله فيك

أم ياسين الزهراء · 2015-03-25, 14:32

منبعد نوليلك ونفهمك

نانو 2013 · 2015-03-25, 14:43

السلام عليكم ورحمةالله وبركاته
فيما يخص العجينة في بيترا كنوود انا البارح برك خدمت بيها درت الفطير
شوفي بعد ما وجدت العجينة في القصعة عادي استعملت طريقة الكيس المبلول و خليت فيه العجينة ترتاح لمدة ومن بعد قستها لاجزاء صغيرة ونحط في العجانة بالجزء ونضيف الماء تدريجيا حتى تتعجن ونحيها ونلمها بيدي

حياتي نبع امل · 2015-03-25, 19:17

انا نستعمل اما الكيس المبلل او الكوكوت وفي زوج طريقة مريحة والنتيجة هايلة
المهم والاهم في عجينة المسمن هى الراحة ،يعنى العجينة يلزمها تريح ،وتان كى تديريها كويرات ادهنيهم بالزيت وحطيهم في سنيوة ولا بلا تان مدهون بالزيت وخليهم يرتاحو على الاقل ساعة او ساعة غير ربع

أم ياسين الزهراء · 2015-03-25, 19:29

اختي انا عندي كانوود والحمد لله هدي تجربة كثر من 4 سنين شوفي بلي العجينة انتاعك عادي وديريها في ساشي كيما قالت الوهرانية وخليها تريح وكل ماريحت كل ماخففتي على البيترا ومنبعد ادا عندك كمية كبيرة اقسمي العجين انتاعك ماتثقليش عليه وابداي تعجني بالسرعة القليلة وزيدي غير بالشوي الماء وكل 5 د حبسي البيترا ومسي العجين ونزيدلك معلومة الماء مايديش بزاف كيما عجين اليد وكيتشوفي عجينك تعجن ياخي تعرفي كيفاش زيدي في السرعة رقم 1 ومن بعد 2 وماتفوتيش واعجنيها مليح ونحيها وزيدي الطرف اللي بقالك بعد ماتريحي البيترا شوي انا نخاف عليه ومنبعد لمي عجينك بالزيت وخليه في ساشي يرح ولوزي وربي يعينك

ان شاء الله فدتك وكشما ستحقيتي قولي اختي

ام رجاء 09 · 2015-03-26, 13:05

كلكم مشكورين وياطيكم الصحة
وام ياسين بارك الله فيك نولي ندير كما نتي عجينة تريح وكنوود يريح ونا نريح هكا فائدة تعم الجميع هههههههه
شكرا جميعا