هل تصرف امها مبرر ؟

[مشكلتي]

حبيت نسقسيكم
انا حبيت طفلة ونويت معاها الحلال وهي ايضا حبتني تقدمت وهدرت مع بابها وهو وافق ورحب بيا انا واجهت معارضة من امي بسبب البعد لانه هاتي الفتاة من غير ولايتنا ولكن فرضت رايي وحطيتها في الامر الواقع تقاهمنا على نهار الخطبة رحت امي مع خالتي الكبيرة امي راحت مجبرة ولكنها انسانة عااقلة وجامي تجرح بالهدرة او تاذي .راحت وباينة على وحهها بلي ماشي موافقة وخالتي العكس راحت فارحة .نهار لي دخلو ليهم امي طبعها ساكتة ومع ملامح عدم القبول .ام الطفلة فاقت بلي امي ماشي راضية 100% قالتلها مادام هما متفاهمين انتي ماعندك حتى دور وما عندك حتى راي امي تخلعت وسكتت ومن بعد قالت امها انت ما تهدروش معاك وما معاك حتى مفاهمة نهدروا مع اختك ( يعني خالتي) .المهم كي ولينا للدار امي طاحت تبكي قالت علواش امها تهين فيا كيما هاك .حبيت نسقسيكم حتى ان كانت امي تبان عليها ماشي موافقة هل هاذا مبرر ان يقال لها هاذا الكلام ؟ مع العلم اني ما ذكرتش بعض التفاصيل وهدرات اخرى كي واجهت الطفلة بما واش قالت امها لامي لم تنكر اي شئ مما وقع ..وحبت تكوفري على يماها وقالت بلي امها نوعا ما سليطة اللسان ولكن قلبها حنين بزاااف وصارحتني بلي يماها لم تحب امي وانها جاها احساس سلبي اتجاه يما .. في رايكم وبكل امانة هل تصرف يماها مبرر ؟ بمعنى لو كنتم في بلاصة امها وتجيكم وحدة تخطب وباينة عليها بلي جاية مجبرة وماهيش راضية ، هل هاذا مبرر تقولولها انت ماعندك حتى دور ما عندك راي مانهدروش معاك .مامعاك مفاهمة ، ...الخ ؟

[nadir_telecom]

أنا نقولك نصيحة أخي مادام أمك ماراهيش راضية على هذا الزواج أرجوك ننصحك نصيحة أخوية بدون الخوض في المزيد من الكلام رضي أمك و أستخير و إذا إقتضى الأمر أفسخ الخطبة بيها بانتلي من هدرتك و الله ماراك رايح تهنى تبدى من الأول بالتشناف و الهذرة البشعة و البلابلا و الفتاة حاجة باينة بررلها بالمواقف لي صرات و قولها كي عادت أمي ماعجبتش يماك وصايي مابقاتش الهدرة و السلاة كونك راجل ماتدخلش في تفاتف النسوان

[ing.Youcef]

لم تحترم أمك نقطة وانتهى الأمر
خيرها بغيرها.

[مراد سابقا10]

مادام امها واعرة انا ننصحك اخطيك من الزواج هذا .

[amoulette]

هذي من النهار الاول بداتها هكذا و من بعد كيفاش رايحين تسلكو منها
نصيحة انفذ بجلدك

[الملآذ]

السلام عليكم ...
من البداية وهذي هدرتهم ومزالك تسقسي ؟؟ ...
حتى كلمة اعتذار مجاتش من عند الطفلة او من امها ..معناتها راهم عارفين بلي راك معاهم مية بالمية ...
انت واجب عليك طاعة امك وكل من سيكون تحت غطائك موجب بذلك ..
لا تنسى أمك ثم أمك ثم أمك ....
لو كانت تحبك فعلا لما فعل الفعل بل انها تسعى لاسعادك باي وسيلة ...
هناك طريقة اخرى اما ان تعتذر والدتها اعتذارا طويلااا لامك مع هدية للتودد اليها واخبرها بالحرف ان والدتك هي الصح في اي تعامل ...

[ايمان4]

هي الصراحة تلاقاو كيف كيف كي امك كي امها .. امك ماشية تاع فوق القلب و بينتها يعني واش هذا خطبة او ماتم ؟ جنازة ؟؟ و امها مش من الونع لي يسكتوا يعني حتى هي من النوع لي تهدر و لي ليها ليها يعني تلاقاو كيف كيف ...دركا انت تحب الفتاة ؟ و الفتاة تحبك شفت من الفتاة شخصيا شي نفرك و ازعجك و كرهتها بسبته باش وصلت خطبتها اعتقد لا و باينة بعد علاقة

مطولة كاغلب شباب الجيل ....و الله امر سيء هكذا الوالدين يفسدوا العلاقة في عوض ما هوما يبنيوها غلطوا في زوج امك و امها ...

[ابنة الاسلام]

الجواب : غير مبرر البتة
انسحب مادامكم في الخطوات الاولى
على الله العوض

[Elwawy]

الخطأ كان في شيء واحد هو التسرع في عدم تهيئة و تحضير الأم قبل الذهاب للخطبة, رغم أنه تصرف طائش و صبياني مع حجة ضعيفة و غير منطقية في عدم قبول الفتاة -أتحدث عن أمك- على الرغم أنه غير ضروري قبول الأم, فقط هي الأم و لابد أن لا تٌعفس.

الحل يكمن في إعادة تهيئة الأم (أمك) و إقناعها بالفكرة مع إظهار الإحترام و خاصة يجب أن تحترم مشاعرها -هي تظن أنها ستفقدك أو ما شابه- (في نفس الوقت دير رايك) قولبها

الشطر الثاني من الحل أن تتكلم مع والدة الفتاة و تقولبها هي أيضا لكي تتودد لأمك و تشاطرها الرأي و المشاعر بخصوص زواجك و أنك إبنها و لابد للأم أن تحس بفوضى مشاعر و و و.

تصرف والدة الفتاة مبرر, تخيل شخص يأتي عندك "هاز خنافرو" هل ستنبطح و تترجاه ما به؟ أو تسأله لماذا "تتنعزز" كالأطفال و أنت إنسان بالغ؟ فالخطأ في التسرع و تصعير الخد, إذن لابد من تهيئة للأم و شرح للطرف الأخر أنه كان هناك تسرع سوء فهم و لابد من تصفية القلوب بلقاء أخر و حتى لنسميها خطبة أخرى يفرح فيها الجميع.

على الهامش :

كل إنسان و شخصيته, كل أم و شخصيتها, كل أم و علاقتها مع إبنها / إبنتها, هناك من الأمهات من تصنع فيلم و مشاعر غير منطقية و غير مبررة لا أسألك أن تتبع هذا الهراء و إنما "قولبهم جميعا و دير رايك" التقوليب فقط لإظهار الإحترام, و هناك من الأمهات واقعيات و لا تصنع أي فيلم علما أنها تصارع المشاعر في الخفاء تتصرف بشكل لائق.

أظن أن فرصة التواصل مع والدة الفتاة ستسمح لك أن تعرف هل ستتزوج بالفتاة أم بوالدتها, و أتمنى أن تفهم قصدي.