موضوع مميز تطبيق لأحلى تشاراك بالتفصيل الممل لعيونك أم ماجد - منتديات الجلفة لكل الجزائريين و العرب

العودة   منتديات الجلفة لكل الجزائريين و العرب > منتدى شقائق الرجال > قسم الطبخ و المأكولات > قسم الأطباق المجربة و الحصرية (تطبيقات العضوات)


في حال وجود أي مواضيع أو ردود مُخالفة من قبل الأعضاء، يُرجى الإبلاغ عنها فورًا باستخدام أيقونة تقرير عن مشاركة سيئة ( تقرير عن مشاركة سيئة )، و الموجودة أسفل كل مشاركة .

آخر المواضيع

تطبيق لأحلى تشاراك بالتفصيل الممل لعيونك أم ماجد

إضافة رد
 
أدوات الموضوع انواع عرض الموضوع
قديم 2013-09-07, 16:13   رقم المشاركة : 1
معلومات العضو
إلهام07
متألقة ركن المعجنات
 
الصورة الرمزية إلهام07
 

 

 
الأوسمة
الموضوع المميز لسنة 2013 وسام نجمة التطبيقات 
إحصائية العضو










Mh47 تطبيق لأحلى تشاراك بالتفصيل الممل لعيونك أم ماجد



وأخيرا لعنت الشيطان ورايحة نكتب موضوع ياخاه الوصفات مطبقين ومصورين والصور مصغرين واسمي مكتوب فيهم وتكاسلت نكتب موضوع ونحط التطبيقات نتاعي .

المهم شفت باللي هذا التطبيق يستاهل يتحط وحدو باش الأخوات يستفادو ، بصراحة من كثرة ماجاوني عليه أسئلة وهبلتني الشلة المشاغبة قلت نحطو موضوع باش ماتبقاوش تهبلو فيا عليه .

هذا التشاراك راهو كيما يقولو الطبابخة " باناشي " هههههههههههههههههه ضرك تفهمو علاه :

1- العجينة : استعملت العجينة السحرية نتاع ام أماني77 والله العظيم اللي يجربها استحالة يفكر يبدل الوصفة الأكثر من رائعة يذوب في الفم ومهما يطول يبقى على حالو طري وبصراحة هذي 3 مرة نعاودو.
كيلت بالفنجان اللي نشربو بيه القهوة درت الكيلة =5 فناجين دراتلي 95حبة ، يعني الكيلة = 1فنجان جيكم تقريبا 20 حبة.
العجينة عجنتها مليح حتى رجعت ملساء وماتخافوش تبقى طرية ومبسسة وماتيبسش خلاص خلاص ( كيفاش عجنتها : نبقى ندي ونجيب ونضغط على العجين كأنني رايحة نشكل حربوش وكي يطوال الحربوش نعاود نطبقو زنكمل حتى ترجع ملساء ومتجانسة باش الحبات من بعد كي يطيبو يحافو على الشكل وماجيش العجين مشققة )

أنا وزنت العجين كويرات 20غ للحبة بصراحة نحب الحبة تكون صغيرة مانحبهاش كبيرة
وباش الحبات كامل يجيو كيف كيف زدت وزنت الحشو تقريبا 10غ للحبة يعني كثرت الحشو باش يجي معمر من داخل باللوز ونصيحة رطبو اللوز كي ترحيوه يجي ساهل في الخدمة ومايقعرش العجين .
وزنت الكريات نتاع العجين كامل وخليتهم ريحو 30د ومن بعد كل ما نجي نخدم حبة نوزن الحشو ( اللي ماعندهاش ميزان تقدر تحكم الكيل بملعقة أو غطاء نتاع قارورة ماء أو déodorant بعد ماتغسلها مليح المهم يكون الكيل مضبوط ماشي عينك ميزانك كأنك توزني في الذهب ).
ماتوزنوش الحشو كامل مرة وحدة كيما درنا للعجين ينشف ومن يعد يجي يابس بعد ما يطيب .

شوفو هنا الحبات قبل الطياب في الصواني خاصة انو يد وحدة اللي خدماتو :




وهنا كي طاب الشكل تنفخ شوية بصح الشكل نتاعو مافسدش ( حذاري راهو كي يكون سخون راهو مبسس وسهل أنو يتكسر تعاملو معه بحذر خليوه حتان يبرد تماما )


* كاينة ملاحظة مهمة : دائما نخليو القاطو يريح قبل الطياب أنا حتى خلصتو كامل باش بديت نطيب بالترتيب هكذا القاطو يريح كي دخليه للفرن يحافظ على الشكل نتاعو
وثاني حاجة اخرى من الأحسن طيبو القاطو في الصواني نتاع البقلاوة او أي صينية تكون ثقيلة هكذا القاطو يطيب مليح من داخل بلا ما يتحرق.
أنا طيبت على 180 درجة وكي سخن الفرن الصواني 2 و 3 طيبتهم على 160 درجة خليتو طاب على مهلو ماتتقلقوش وتزيدو للنار باش تزربو تخلصو ماشي كي تعبتو هذا التعب كامل كي توصلو للأخير تفسدو واش خدمتو .

2- الحشو : هنا جربت لأول مرة الحشو نتاع الأخت كاكينوفا راهو هايل ويبقى طري كأنه مادخلش للفرن إطلاقا مهما يطول رائع ومستحيل نغير في الوصفة والأروع أنني كثرت فيه زاست الليمون جات ريحة الليمون تضرب من الحبة نتاع التشاراك مع أن الحشو راهو من داخل
ماعلاباليش قداش استهلكت لوز في هذي الكمية لانني ماكنتش وازنة اللوز وكنت نخلط بالشوية وكي نتخص نزيد باش مايبقاليش الحشو جاني قدقد مع العجين نحب الاقتصاد خخخخخخخخخخخخ هاهي وصفة الحشو الرائع :

أربع كيلات مكسرات كيلة سكر عادي مغرف كبيرة زبدة طرية وزاست القارص وشوي ماء الزهر وتلمي بالبيض وتحطيه يبات باه يشرب السكر تاعو

3- القلاصاج : جربت أيضا ولأول مرة قلاصاج الاخت أم محمد تاج ثاني طري ورائع مهما يطول المهم خبيوه في علبة مغلقة يبقى طري ويذوب في الفم وما ييبسش وريحتو تهبل أنا استعملت ملون أبيض نتاع الميزان واستهلكت حوالي 2 أكياس نتاع سكر ناعم ماركة المرجان الكيس نتاع 700غ ( طبعا غربلتو قبل الاستعمال ) :

حطي في بول بياض بيضة وفنجال تاع قهوة حليب وفنجال زيت مخلط مع الزبدة يعني نص بنص وفنجال ماء الزهر ومغرف كبيرو اكستخي تاع اللوز ومغرف صغيرة فاني وملون ابيض لازم باه كي تضيفي اللون لي تحبيه يخرجلك ناصع ومايخرجش باهت ضرك نعتلك التشاراك لي قلاصيتو خرجلي ازرق خيرمن تاع البارح رووووعة ومبعد ضيفي السكر قلاصي مغربل حتان توصلي للقوام المطلوب وضيفي في الأخير الملون راه على ضمانتي روووعة

هنا كي درتلو القلاصاج كنت موجدة من قبل شوية عجينة التزيين عجنتها مع ملون وردي وشوية نشاء وطبعت وردات في طابع السيليكون ومن بعد كل ما ندير القلاصاج للحبة وينزل الزائد نتاع القلاصاج نزرب نحط الوردة ونلصقها مليح لأنو لو ماتسرعيش رايح يبدى القلاصاج يكون في قشرة من فوق باش ينشف وهنا كي تلصقي الوردة يتشقق القلاصاج
مباشرة بعد مانلصق الوردة نهز الحبة من فوق الشباك ونحطها في الصينية تنشف كيما هنا :


ثم خليتو بات وكي نشف نظفتو مليح بالسكين من تحت ونحيت الزائد باش جي خدمة نظيفة ومتقونة :


* درت ملمع نتاع القلاصاج ناكخي ، استعملت فرشاة الخدود ( وحدة جديدة ونظيفة )
* بقالي شوية نتاع قلاصاج خبيتو في المجمد وكي جيت نستعملو خرجتو قبل بمدة وحطيتو في كورني ورسمت به على القلاصاج وكي نشف عاودت مسحة خفييييييفة نتاع ملمع وحطيتو في الكيسات وخبيتو وخلااااااااااص







أففففففففففف هكذا المفروض جاوبت على كل الأسئلة اللي ممكن تطرحوها على ما أظن

كيما راكو تشوفو ماهوش صاروخ تشاراك برك هههههههههههههههههههههههه

أتمنى تكونو استفدتو وفهمتو وإن شاء الله طبقو الوصفات هذو باش تتحصلو على أحلى تشاراك يحمر الوجه ، أنا درتو في عرس أختي وانتوما واش هي المناسبة اللي عندكم تقرعيجة على السريع ههههههه


* ملاحظة مايهمنيش عدد الردود وشكون حط رد وشكون ماحطش المهم تستفادو فقط .

قبلاتي الحارة للجميع







 

رد مع اقتباس
مساحة إعلانية

قديم 2013-09-07, 16:21   رقم المشاركة : 2
معلومات العضو
ام الهضاب
عضو محترف
 
إحصائية العضو










افتراضي

ايهبل و متحوف يعطيك الصحة







رد مع اقتباس
قديم 2013-09-07, 16:26   رقم المشاركة : 3
معلومات العضو
fazouza
عضو مجتهـد
 
الصورة الرمزية fazouza
 

 

 
إحصائية العضو










افتراضي

يعطيك الف صحة اختي الله ايبارك خرجلك ولا اروع
والف شكر لك على الوصفات







رد مع اقتباس
قديم 2013-09-07, 16:30   رقم المشاركة : 4
معلومات العضو
&عسل&
عضو مميّز
 
الصورة الرمزية &عسل&
 

 

 
إحصائية العضو










افتراضي

يعطيك الصحة اختي الهام ربي يرزقك الزوج الصالح اللي يستاهلك
والدرية الصالحة ان شاء الله وانا نحبك بزاااااف
جعله الله في ميزان حسناتك







رد مع اقتباس
قديم 2013-09-07, 16:33   رقم المشاركة : 5
معلومات العضو
staifia
عضو متألق
 
الصورة الرمزية staifia
 

 

 
الأوسمة
فعالية المطابخ المركز الاول 
إحصائية العضو










افتراضي

يعطيك الصحة الهام جاك يهبل
صح يهمك نستفادوا
بصح والله تموتي ع الردود ههههههههههههههههههههههه







رد مع اقتباس
قديم 2013-09-07, 16:33   رقم المشاركة : 6
معلومات العضو
hanane220
عضو مميّز
 
إحصائية العضو










افتراضي

يعطيك الصحة شكرااا على الوصفة ان شاء الله نجربه نديره للعيد الاضحى القادم بركة الله فيك







رد مع اقتباس
قديم 2013-09-07, 16:38   رقم المشاركة : 7
معلومات العضو
ام خديجة1
عضو محترف
 
إحصائية العضو










افتراضي

بارك الله فيك وفي صاحبة الوصفة







رد مع اقتباس
قديم 2013-09-07, 16:40   رقم المشاركة : 8
معلومات العضو
oum ibrahim
عضو محترف
 
إحصائية العضو










افتراضي

الف الف شكر الهام ربي يخليك انا عن نفسي جاوبتيني على كل الاسئلة الي كنت موجدتهالك







رد مع اقتباس
قديم 2013-09-07, 16:47   رقم المشاركة : 9
معلومات العضو
أم ماجد
عضو ماسي
 
الصورة الرمزية أم ماجد
 

 

 
الأوسمة
وسام الوفاء وسام نجمة التطبيقات المرتبة الثانية 
إحصائية العضو










افتراضي

انت والله رايحة تهبليني كيفاه تقوليلهم مايهمكش الردود اذا انت ماهموكش انا يهموني ويهموني
هاذ التعب كامل والشرح الوافي والكافي تستاهلي عليه وسام الشرح المفصل هههههههههههه
اذا مااعطاتولش الادارة نخدملك واحد ونبعثوا ههههههههه
يعطيك الصحة يا الحبيبة هكذا رايحين نرجعوا لتطبيقك مباشرة باه مانتوهوش وتعرفيني اذا تهت ممكن يخطفوني وماتلقاونيش دبري راسك
444444444444444444444444
تحياتي لكاكي ام اماني ام محمد تاج ولك طبعا وحتى لاختك ربي يزين سعدها ويرزقها بالذرية الصالحة اللي تعود تظل عندك في الدارويهبلوك هههههههههه اشح فيك كون تزوجت وقبلت الخطاب يا جميلة الجميلات ما يقتلكش الجراد
الى اللقاء هيا خليني مانيش قاعدة الناس متكلين عليا ياو
حقا الهام اذا كثروا عليك المواضيع والصور ماتخميش امسحي الاسم وابعثيهم عند حبيبتك ام ماجد مستعدة حتى نشريهم ههههههههههههههههه







رد مع اقتباس
قديم 2013-09-07, 16:50   رقم المشاركة : 10
معلومات العضو
hayat-48
عضو مبـدع
 
إحصائية العضو










افتراضي

يعطيك الصحة تطبيق رائع بصحتك







رد مع اقتباس
قديم 2013-09-07, 16:55   رقم المشاركة : 11
معلومات العضو
mira_sirine
عضو مجتهـد
 
الصورة الرمزية mira_sirine
 

 

 
إحصائية العضو










افتراضي

foooooooooooort bezzaf, bsahetekoum







رد مع اقتباس
قديم 2013-09-07, 17:12   رقم المشاركة : 12
معلومات العضو
*أم كوثر*
مراقبة منتدى الأسرة
 
الصورة الرمزية *أم كوثر*
 

 

 
الأوسمة
المشرف المميز المشرف المميز 2014 المشرف المميز لسنة 2013 المرتبة الثالثة وسام التميز في قسم الطبخ المرتبة الاولى 
إحصائية العضو










افتراضي

يعطيك الصحة وبارك الله فيك
وفي ام اماني وكاكينوفا وام محمد تاج
بردتيلي قلبي ههههههههه
علبالنا ماتهمكش الردود مي حنا نفهموا
موضوع جد جد مميز على تعبك







رد مع اقتباس
قديم 2013-09-07, 17:15   رقم المشاركة : 13
معلومات العضو
7anine 87
عضو فعّال
 
الصورة الرمزية 7anine 87
 

 

 
إحصائية العضو










افتراضي

بارك الله فيك اختى والله فديتى صح وتطبيقك رائع ومتقون







رد مع اقتباس
قديم 2013-09-07, 17:23   رقم المشاركة : 14
معلومات العضو
lamia zina
عضو مميّز
 
الصورة الرمزية lamia zina
 

 

 
إحصائية العضو










افتراضي

ما شاء الله تطبيق في منتهى الروعة







رد مع اقتباس
قديم 2013-09-07, 17:23   رقم المشاركة : 15
معلومات العضو
ميمنة الجزائر
عضو متألق
 
الصورة الرمزية ميمنة الجزائر
 

 

 
إحصائية العضو










افتراضي

رووووووووووووووووووووووووعة عن جد وجاك متحوف الله يبارك حبة قد ختها لعقوبة ليك ان شاء الله

ونديروه في عرسك







رد مع اقتباس
إضافة رد

الكلمات الدلالية (Tags)
لأحلى, مادي, لعيونك, الأمل, بالتفصيل, تشاراك, تطبيق

أدوات الموضوع
انواع عرض الموضوع

تعليمات المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code is متاحة
كود [IMG] متاحة
كود HTML معطلة

الانتقال السريع

الساعة الآن 22:30

المشاركات المنشورة تعبر عن وجهة نظر صاحبها فقط، ولا تُعبّر بأي شكل من الأشكال عن وجهة نظر إدارة المنتدى
المنتدى غير مسؤول عن أي إتفاق تجاري بين الأعضاء... فعلى الجميع تحمّل المسؤولية


2006-2019 © www.djelfa.info جميع الحقوق محفوظة - الجلفة إنفو (خ. ب. س)

Powered by vBulletin .Copyright © 2018 vBulletin Solutions, Inc