وصفات المبدعة ام ايوب

[مرام]

الموضوع متجدد

السلام عليكم
وش راكم؟انا دايما نعقب على موضوع الاخت ام ايوب لي هو طريقة عمل عجينة التزيين ومرة دخلت قريت الطريقة كتبت الوصفة وخرجت... عادي
وعندي يومين برك عاودت دخلت للموضوع باه نتأكدة من حاجة فلقيت الردود لحقت حتان 50 صفحة فقلت نقراها مليح لقيت الاخت ام ايوب تخدم القاطو للناس يعني هي بروفيسيونال في القاطو والاخوات يطلبو الوصفات وهي ترد بكل حب وماتبخلش علينا باسرار نجاح الحلويات
فقلت بلاك راك كاين بزاف عضوات كيما انا ماقلبوش الصفحات ومعلبالهمش بيها
فاليوم حبيت نجمعلكم الوصفات لي كانت ام ايوب وهذا الرابط الاصلي:


https://www.djelfa.info/vb/showthread.php?t=1449929

ونتمنى الاخت ام ايوب وباقي العضوات يكملو طلباتهم هنا
بدا بسم الله:

*عجينة التزيين :

لابات داموند لي تباع في المحلات تقدري تصنعيها ديري عبار سكر قلاسي المرجان +عبار نشا +ملون ابيض+نصف فنجال كليكوز يباع في محل الحلويات +ملعقة ماء الورد + ملعقة قارص عصير
واعجني اذا جراتلك اضيفي السكر او النشا حتي تلتم واذا مالتمتش زيدي الماء ورد او القارص

*الجينواز:

6 حبات بيض
كاس سكر (100غ) سكر عادي
150غ فرينة كاس ونصف
شوية فنيليا
طلعي البيض كي يبدا يتكاثف ابداي اديري السكر بالشوية اقسمي السكر على 2او3 دفعات وكملي طلعي البيض حتى يتضاعف الحجم اي ضربي 15حتى20 دقيقة
او كي تشوفي البيض كي تشكلي حرف 8 مثلا بالخليط وما هبطتش ابداي اديري فالفرينة بالصفاية وتخلطي على اتجاه واحد اقلبي بالشوية حطي الفرينة على3 دفعات والفانيليا معاها
هذا العبر تع ورقة رقيقة اذا حبيتي خبزة كبيرة ديري 18 حبة بيض ودوبلي المقادير الاخرى جيك في سنيوة 40على 50 وتكون عالية

*البتي فور:

لبتي فور عندي 2 غوسات الاولى 250غ زبدة طرية
3 صفار البيض
كاس سكر قلاسي
ملعقة عشا فنيليا تع الميزان
نصف ملعقة قهوة خميرة نوارة
ملعقة عشاء كاكاو
ولمي بالفرينة
اخدمي الزبدة حتى ربع ساعة+الفنيليا واستمري في الخلط +سكرقلاسي وابقاي تضربي+صفار البيض وضربي ثم زيدي الفرينة فيها الخمارة والكاكاو
ولمي برك ما تدلكيش جي العجينة طرية شكليها كيما تحبي او خليها طرية وديريها فالبوش بدوي المتوسط

*كريمة الزبدة

رطل سكر عادي +كاس ما خليه يغلي حتى يولي يتخايط بين صبوعتيك
طلعي 2بياض بيض ناج من قبل واضيفي العسل سخون واستمري في الخلط بالباتور واضيفي 600او700 غ زبدة تع لذيذ تكوني قطعتيها من قبل قطع صغيرة
حطي الزبدة بالشوية وابقاي تضربي باه تذوب الزبدة كامل باه الكريمة جيك رطبة ومافيهاش الحبيبات وفي الاخير +3 ملاعق عشاء فنيليا وبقاي تضربي حتى تبياض يمكن تزيد الملون ابيض او اي ملون واى بنة ........


*نصيحة:
كي طلعي البيض ناج زيدي السكر والفانيليا بالشوية وكملي بالباتور شوية جهد ما بتخلط السكر حبسي الباتور زيدي الزبدة بالشوية وخلطي بالشوية في اتجاه واحد منتحت للفوق
كيما الكيكة الاسفنجية ثم زيدي الفرينة بالصفاية بالشوية وراكي تخلطي بنفس الاتجاه من التحت الى فوق

* الكريمة طلعي الصفار حتى يولي قريب بيض ثم زيدي العسل دفعة وحدة وبقاي تخلطي بالباتور وثمثم ابداي تزيدي فالزبدة باه تذوب فالعسل سخون
ومايبقاوش الحبيبات ماتخافيش في الاول تبانلك جارية بزاف قعدي تضربي كل تضربي تزيد تبياض وكثري الفانيليا باه تروح بنت الزبدة كي تكملي ادا حبيتيها شيكولة زيدي الكاكاو ولا بيضا ناصحة ملون ابيض اواي بنة واي لون

*البقلاوة راني حطيتها من قبل عمرك ماتظغطي على الحشو جي مرشوشة واذا خفتي تنفتحلك رشي العقدة بالمازهر رشيها برك مشي تكثري حتى تولي العقدة عجينة ( رشة1 او 2 برك)

* الكاوكاو اشريه منقي من القشرة واطحنية قبالة بلا ما تحمصيه اطحنيه وسط كيما بع الدزريات وسيريه في سيار الزرع )(الخشين) الكاوكاو الي يهبط استعمليه والي يبقى فالسيار عاودي اطحنيه هاذا تستعمليه لمعضم الحلويلت
*الكاوكاو المحمص يجي فالنوقة

انواع الحشوات:

*والحشوات اللي بالماء الزهر جي فالجراك _عرايش _بقلاوة _.....الخ
و لي بالبيض تع المشكلة دزريات المخبز مقروط اللوز
* الفرق هو العجبنة تع البيض جي تتفتت كي القوفريط والي بالماء الزهر تتقرمش

*والحشو الي بالبيض يجي يبان كيما المشكلة او طبقة تع العجينة رقيقة بزاف يعني معرضة للسخانة اكثر يعني اذا كانت بماء الزهر تنشف وجي يابسة والي بالبيض تقعد طرية ومعسلة

*والي بالماء الزهر تغطيها عجينة غلبضة كيما العرايش قبل ماتنشف تكون طابت العجينة من برا

*الغريبية:

عبر زبدة اخدميه مليح بالباتور او يدك حتى تبياض الزبدة +نصف العبر سكر قلاسي
ولمي بالفرينة جربي طيبي بالحبة اذا نحلت بزاف راهي يخصها الفرينة
وزمان كانو يديروها سكر عادي وعبر زيت ويلمو بالفرينة
واذا حبيتي تحطي فيها لوز مطحون بودرة او جلجلان وشوية خمارة

*المشكلة:

4 عبارات فرينة
شوية فوق نصف العبر زبدة ذائبة
ملعقة قهوة فنيليا
ملون ابيض
1 حبة بيض حليها في شوية ماء دافي ولمي العجينة بماء الزهر ادلكي شوية وديريها في صاشي ترتاح
العقدة
3عبارات لوز
عبر مشي معمر سكر عادي
ملعقة تع عشاء فنيليا اذا كان كاوكاو+سكرفاج القارص اذا كان كاوكاو
رشة ماء الزهر
نلموها بالبيض جي العقدة ناشفة

*القريوش:

المقادير
3 عبارات فرينة +نصف عبر سمن او زبدة+ملعقة تع عشاء خل او قارص+حبة بيض+نصف كاس جلجلان مطحون بودر+ قرصة ملح+ملعقة عشاء خميرة تع الخبز لمي العجينة ب ماء الزهر
خليها تريح
حليها رقيقة وقطعيها بالجرارة شكليها

*مقيرطات الجلجلان

3 حبات بيض
كاس سكر عادي
كاس زيت
فنيليا
1 باكي خميرة نوارة
الفرينة حتى تلتم
ديري العجينة حرابش على طول السنيوة وعلو 1.5سم وطيبيةا عادي كي طيب فور خروجها من الفرن قطعيها مقروطات الومستطيلات او مثلث ثم عسليها ورمديها في نوات كوكوا
ممكن تلوني العجينة بالكاكاو او روز......وممكن تلوني نواتكوكو

القنيدلات

:
500غ فرينة
100غ زبدة طرية
ملعقة قهوة فنيليا
3 ملاعق سكر قلاسي
نلموها بماء الزهر العجينة جي ناشفة بزاف .
الطريقة= فرينة+فنيلا+سكر+زبدة قطع صغار وحكي بيدك شوية+ماء الزهر بالشوية وادلكي وخليها ترتاح ربع ساعة في صاشي
العقدة=
عبر معمر مليح لوز لازم لوز فالقنيدلات
نصف عبر سكر عادي
ملعقة قهوة فنيليا
سكرفاج تع 4حبات قارص (في كيلو لوز 4حبات قارص)
نلموها بالبيض كامل جي ناشفة
من الحسن يباتو باه يطيبو باه يبقاو واقفين (24 ساعة)
كي تطيب ملعقة عسيلة على السخانة ممبعد ديري لجولي من فوق وعقاش رقيق

*الميرانغ:

* في حمام مائي حطي 6بياض البيض ابداي اطلعي فيهم واضيفي السكر بالتدريج واستمري في الخفق راه يبان كي يولي مورانق
الاول نستعملو فوق ليتارتولات

*النوقا:

500غ فرينة+قرصة ملح +باكي خميرة لميها بالبيض جي شوية تتلاسق فاليد خليها ترتاح نصف ساعة فالثلاجة
رشي العجينة بالمايزينة (النشا) وحليها فالمشينة 1_3_5_ وحليها في تع الرشتة ورشيها بالمايزينة واقليها وديريها في كسكاس تقطر

العقدة( 200غ لوز بقشورومحمص شوية +200غ جوز +200غ غ بستاش محمص مطحونين شوية متوسط )+عبر 250غ حلوة الترك +ملعقة قهوة فنيليا +الرشتة الي طيبتيها كسريها بيديك ولمي الكل بالعسيلا الي تنباع

السنيوة 40سم /45 او عينك ميزانك واش تحبي علو

فرشي الالمنيوم فالسنيوة وديري طبقة رقيقة مرشوشة برك بستاش مطحون رقيق وحطي الخليط وحطي ورقة المنيوم من فوق وعبزي وجوزي الحلال
وعبزي وحطيها فالثلاجة 2 ساعات او خارج 24 ساعة وقسميها وقلبيها الوجه الي من تحت يجي فيه البستاش

جي فور لوكان ديري طبقة وطبقة سوريز كونفي مطحونة وتعاودي الطبقات يجي بالالوان فور

اذا حبيتي ديريها بالكاوكاو او نصف لوز ونصف واش تحبي تحبي ديري فيها حتى الجلجلان محمص

بوسو ولاتسمو

في خاطرك يا سومة
بوسو ولا تمسو (مقيرطات سكر قلاسي)
كاس زبدة وزيت ( نصف الاكبر زبدة)
كاس سكر عادي
4حبات بيض
نصف كاس سكرفاج القارص
باكي خميرة
ملعقة قهوة فنيليا معمرة مليح
كاس كاوكاو او جوز او لوز او نواد كوكواو نصف كاوكاو ونصف نواد كوكو
والباقي بالفرينة ما تدلكيش لمي برك وخليها ترتاح كي اطيب تحبي تسكريه او تطليه او فالشيكولا وديريلو لوز ايفيلي

*تارتولات:

كيلوا فرينة
500غ زبدة طرية
500غ سكر قلاسي
4 حتى 5 حبات بيض

دخلي الزبدة في الفرينة ملبح+ السكر وكملي حكي بين يديك ولمي بالبيض اذا ملتمتش زيدي شوية ماء

خليها ترتاح نصف ساعة

حلي العجينة وديريها في الطبيسيات وثقبيها بالفرشيطة وطي ورق الزبدة من فوق ديري فيه فول او حمص
ودخليها اطيب

*كرام باتيسيار

1ل حليب 250 سكر عادي
10 صفار البيض انا درت 6
100غ مايزينة

الحليب فوق النار كي يسخن اضيفيه للخليط الاول (بيض+ميزينة) وحركي

* المورانق

2 بياض البيض
125غ سكر عادي في حمام مائي

*الكريمة

5 صفار البيض
400غ سكر
500غ زبدة لذيذ
كاس ماء
3 ملاعق كبار فنيليا


السكر+الماء حتى تعقاد وتولي تتلاسق
ضربي البيض ثم اضيفي عليه العسل ومتحبسيش الباتور وابداي تزيدي فالزبدة وفالاخير الفنيليا

*الدزريات

3عبارات فرينة+ملعقة قهوة فنيليا+شوية ملون ابيض+شوية تحت النصف العبر زبدة ذائبة حكي بيدك حتى تدخل كامل الزبدة في الفرينة ولمي بماء الزهر العجينة ترتاح ربع ساعة
العقدة
عبر معمر مليح لوز مصومع (مقبب)
نصف عبر سكر عادي
ملعقة قهوة فنيليا +رشة ماء الزهر
3او4 حبات قارص مكرفجين
نلموها بالبيض كامل جي العقدة ناشفة
تحلي العجينة في المشينة 1 3 6 وقطعي بطابع المدور والمبرج رقم 90 عبري العقدة نتاعك ديريها في باطة صغيرة تع الفنيليا هكذا يجيو كامل قدقد
حطي العقدة في وسط وادهني الاطراف ببياض البيض واقرسي من اربع جهات عينك ميزانك وبين كل طية وطية اقرصي العجينة 2 قرصات راح جيك الكل 12 نقرصة ويجيوك كامل قدقد
واثقبيها مناسفل بالكيردون او الاسياخ 2 ثقبات وكي اطيب عسليها حطيت عبر العسل ممن قبل كيما تع البقلاوة

*الصابلي

250غ زبدة طرية
200غ سكر قلاسي
2 حبات بيض+2 صفار
ملعقة عشاء فنيليا
كاس ونصف مايزينة (نشاء)
باكي خميرة نوارة
نلموها بالفرينة جي العجينة طرية
الطريقة
اخدمي الزبدة 15 حتى 20 دقيقة+ السكر وخلطي+ البيض وخلطي + المايزينة وخلطي +الفرينة والخمارة وخلطي وغطيها وخليها ترتاح نصف ساعة في الثلاجة

*ملاحظة
كي تشكلي ماتاخذيش كمية كبيرة عجينة ما تبقايش تعجني وتعاودي باه ماربيش الخيط خوذي قيس 3او4 حبات
"الشكولا البيضاء احسن نوع (بوجادير ) تذوبيها في حمام مائي وتزيديلها شوية حليب في باطا فنجال حليب وغي تذوب بعديها من النار باه متزيدش تنشف وتنحرق

*البقلاوة

5عبارات فرينة
عبر نشاء
عبر مشي معمر زبدة ذائبة(فلوريال)
ملعقة كبيرة فنيليا
4حبات بيض حليهم في شوية ماء دافي
ماء الزهر
العقدة
3عبارات لوز او كاوكاو(2.5 كلغ)
عبر ليس مملوء سكر عادي
قرصة قرفة
ملعقة كبيرة فنيليا
بنة لوز الحلو في الكاوكاو
2ملاعق سمن ذائب
ماء الزهر
الطريقة=
الفرينة +النشاء+فنيلياخلطي +الزبدة وحكي بيدك ثم+البيض وحكي ثم صيريها في الرفاداو الي يكون متوسط وحكي في السيار بيدك باه يهبط
الكل راح تعييك شوية لكن النتيجة رائعة ثم لمي بماء الزهر وادلكي شوية
اما العقدة رشيها برك جي متفارزة مشي معجونة
الجاراكو مسيسات و عرايش نفس العبر
عبر سمن ذائب (عبري بمشيربة راه يجي زاكي)
عبر زبدة وزيت
فوق النصف العبر ماء الزهر
2 حبات بيض كاملين
2 ملاعق عشا سكر قلاسي
ملعقة عشا فنيليا
نلموها بالفرينة في الاخيروخليها شوية طرية راح تزيد تنشف حطيها في صاشي وزيديها رشة او 2ماء الزهر
الطريقة -ابداي حلي البيض والماء الزهرمع بعض ثم االسكر وخلطي+الفنيلاوالسوائل ثم الفرينة في الاخير
العقدة
3عبارات لوز او كاوكاو
عبر مشي معمر سكر عادي ( اي ناقص اصبع)
ملعقة قهوة فنيليا
2 ملاعق سمن او زبدة ذائبين +2 قطرات لغوم لوزاذا كان كاوكاو
لميها بماء الزهر

ملاحظة -اذا درتي عرايش زيدي سكرفاج القارص في العجينة والعقدة واذا درتي مسيسات نحي سكرفاج القارص وزيدي باكي خميرة نوارة
سر الكاوكاو هو فيه 2 طرق الطريق 1 ولي انا نستعملها لانو اسهل وانا معنديش الوقت بزاف كي نشري الكاوكاو نشريه بلا قشور و نطحنو مباشرة
ونضيفلو 2او3 ملاعق عشاء فنيليا تع الميزان و قطرات بنة لوز الحلو
والطريقة 2 فوري الكاوكاو في كسكاس وحطي في القدرة الي يفور عليها عصير القارص مع الماء وحطي حبة قارص مقطعة ثم
حطيه في سنيوة مفرشا بكاغط تع الطاولات تع الاعراس

boule de néje
كريات الثلج

2 عبارات نوات كوكوا اطحنيه
نصف عبر سكر عادي
ملعقة عشاء فنيليا
نعجنوها ببياض البيض ضربيه شوية
ديريها كويرات ورشي السنيوة بالفرينة وطيبيها
( ممكن تحطيهم في لمول تع السيليكون قلوبة راح يكون الشكل احسن انا منيش مجربتهم في هاذو لمول لكن الفكرة جاتني ذرك )
كي يطيبو خليهم يبردو مليح
والقلاساج كيما حبيتي انا هاذو نديرلهم طلية وانتي اذاحبيتي تغطسيهم في شيكولا او في معجون ثم رمديهم
في سكرفاج الشوكولا نص ابيض ونص بلون اخر

قلوب بالشيكولا

500غ زبدة طرية اخدميها 10 دقائق +200غ سكر عادي واخدمي+ملعقة عشاء فنيليا +250غ حلوة الترك
واخدمي+250غ لوز او جوز او كاوكاو مطحون رقيق واخدمي +2حبات بيض و2 صفار واخدمي +الفرينة فيها 2 باكيات خمارة نوارة
حتى تنشف ولمي برك ماتعجنيش جي كيما لتاخت طرية وخليها ترتاح
حلي العجينة واطبعيها قلوب او دوائر او اى شكل كي تطيب ضعي الحبة فوق حبة ولسقيهم بكريمة الزبدة
(كنت حطيتها من قبل) اغطسي الحب في الشيكولا بيضاء او كيما تحبي وارسميها من فوق بالبوش

المسكوتشو

5حبات بيض+كاس سكر طلعيهم تبعي طريقة الباتيسري+نصف فنجال كبير زيت وخلطي بالشوية في اتجاه واحد+فنجال صغير حليب وخلطي في نفس الاتجاه +فنيليا + مشيربة وكاس الفرينة اقسميها على 3 دفعات فيها 2.5او3 باكيات خمارة نوارة
حطيها في مول مدهون بالزيت ورشيه بالفرينة
وهذا تطبيقي للوصفة:

لي روشي

2عبارات كاوكاو او لوز+2عبارات فرينة+عبر مشي معمر سكر عادي+عبر ناقص اصبع زبدة ذائبة+ملعقة عشاء فنيليا وخلطي وكملي لمي بالبيض جي ناشفة تتكور عبري بباطا تع الفنيليا باه يجيو الكويرات قدقد حطيهم في بياض البيض ثم في الكاوكاو مطحون خشين رشي السنيوة بالفرينة وحطيهم يطيبو 20 دقيقة كي يبردو اغطسيهم في الشيكولا
وبصحتك
ذا حبيتي نقصي الكاوكاو وعوضيه جلجلان

لي كورني

هاذو فور بزاف يجي زاكي ويتسربا في لعراس مع القازوز او لتاي هذا العبر يقطع 70 حبة انا شخصيا نخدم بيه بزاف يجي خفيف وبنين ....


250غ زبدة ذائبة +
كاس سكر قلاسي +
كاس حليب ناقص اصبع +

2حبات بيض +


ملعقة قهوة فنيليا ونلموها بالفرينة ماتعجنيش لمي برك (ما تندلكش)

العقدة باكي بيمو+رطل كاوكاو او لوز+500غ حلوة الترك+4 مغارف تع عشاء عسيلا نونورس+ملعقة عشاء كاكاو +2 ملاعق سكر قلاسي +زبدة طرية حتى تلتم

شيكولا تع القلاساج
قوفريط كريمة الزبدة

العجينة تبعي حسب الترتيب جي ناشفة وخليها ترتاح نصف ساعة
حلي العجينة فالمشينة رقم 1_3_5 رشي بالفرينة وقطعي بالطابع مدور رقم 100
اغطسي لكورني تع الحديد فالفرينة ولي عليه العجينة ولسقيها مليح كي يطيبو نحيلهم الكورنيات وخليهم يبردو
ذوبي الشيكولة اغطسي لكورني فالشيكولة ومباشرة قبل ماينشف رمديه فالقوفريط مطحون وخليه شنشف دركا البرد الشيكولا تنشف بسرعة
عمريهم بالعقدة وديري الكريمة من فوق بالبوش

تقدري ديريهم فالمول تع ليتويل والكريمة من الجهتين

وممكن تستغناي عل العقدة عمريهم كريمة او نيسلي او نوتيلا او كرام شانتيي
ملاحظة حطيهم واقفين وفالتسربية قوليلهم يبداو ياخذو من الوسط باه مايطيحوش

ممكن الكريمة بالالوان اذا كانت صفرا ديري بنة القارص او البانان وفالكورني رشي من فوق الكريمة حبيبات الشيكولا
او جوز مطحون
واذا كانت بيضاء ديري خطوط بالشيكولا او سوغيز كونفي او خضرا ذري البستاش كي يتسربا بالوان مختلفة يعطي نظرة فوووووور

فوندون الشوكولا:

المكونات:
-125 غرام من الشوكولاتة السائلة -125 غراما من الزبدة بدرجة حرارة الغرفة -3 بيضات - 112 غرام من سكر -112 غراما من الفرينة -ملعقة صغيرة من الفانيليا -ملعقة صغيرة من الخميرة -كوب مثلجات بنكهة الفانيليا
التحضير:
1 -...تخلط الزبدة مع الشوكولاتة على حدة، حتى يمتزجا جيدا .

2 -ثم، يخلط البيض مع السكر والفانيليا على حدة، حتى يصبح لون المزيج أبيض.
3 - بعدها، يضاف مزيج الزبدة والشوكولاتة إلى البيض والسكر والفانيليا، مع التقليب بواسطة الملعقة، وتُضاف الفرينة والخميرة، ويخلط هذا المزيج جيداً بواسطة اليد، ثم يصبّ في قوالب «الكيك» الصغيرة.
4 -يطهى في الفرن على حرارة 210 درجات مئوية لمدة 7 دقائق فقط،
لا يجب عدم إطالة مدة الطهي لأن «الفوندان» سيجفّ من داخله ا.

*المخبز:

المخبز الكيلو يخدم من 45 حتى50 حبة اذا كانت الحبة كبيرة
/3 عبارات كاوكاو+عبر مشي معمر سكر عادي ملعقة ونصف تع عشاء فنيليا +ملعقة ونصف تع عشاء عسيلا+4 حبات قارص مكرفجين وحكي باه تدخل العسيلا
نلموهم 2 بيض والباقي بالصفار
الطلية عبر بياض البيض+ عبر ماء الزهر+ عبر قارص مصفي+ ملعقة عشاء زيت وملون ابيض+ سكر المرجان (عبري بكاس لتاي يجي فيه 2 باكيات سكر )
وكي تنشف الناكخي

مقيرطات الجوز بالطلية

للعجينة= 100غ زبدة اخدميهابيدك مليح+حبة بيضواخدمي بيدك+ 300 غ الفرينة فيها 3ملاعق عشاء سكر+1باكي خميرة+ملعقة قهوة فنيليا+سكرفاج2 حبات قارص وخلطي مليح ولمي بالحليب جي العجينة طرية تتلاسق وخليها ترتاح نصف ساعة
ادهني السنيوة بالزبدة ذائبة
رشي الطاولة بالفرينة وحلي العجينة رقيقة ورشي من فوق باه ماتلسقش في الحلال
حطيها في السنسوة وخلي الجوانب طالعين وثقبيها بالفرشيطة كامل وني وجدي العقدة منقبل
العقدة 2كيسان جوز او لوز او كاوكاو
كاس سكر
3صفار البيض
عصير 2 حبات قارص
3بياض البيض مطلع ناج (مثل الثلج)
خلطي كل المقادير الا بياض البيض في الاخير ضيفيه وخلطي بالشوية في نفس الاتجاة
وكبي الخليط فوق العجينة كبي في الوسط وطيبيها حتى تحمار وخليها تبرد مليح

وجدي الطلية ديري باكي سكر قلاسي+عصير 2حبات قارس+ملعقة او2 ماء بارد جدا اي قلاسي واذا حبيتي تلوني الطلية لكي الاختيار وفرغيها فوق القاطوا وكي تبدا تنشف قطعيها مقروطات وحطي حبة جوز في الوسط وخليها تكمل تنشف

*مقروط اللوز

3عبارات لوز مطحون متوسط
عبر مشي معمر سكر عادي
ملعقة قهوة فنيليا
2ملاعق عشاء عسيلا نونورس(هنا السر باه يجي معسل)
سكرفاج تع 4 حبات قارص اذا كان كيلو لوز
ملعقة تع قهوة زبدة طرية (اذا كان كيلو لوز)
نلموها ب3 بيض والباقي اذا خص بالصفار (من الاحسن بيض العرب)
وخليها ترتاح في صاشي 20 دقيقة
رشي بالفرينة و ديري حربوش وقطعيه مقروطات وحطيه في سنيوة تكوني دهنتيها بالزيت ورشيها بالفرينة وكي تحطيه يطيب اقعدي قداموا كي تشوفيه بياض نحيه وكي يبرد كامل اغطسيه في الشاربات وسكريه

*الشاربات

كاس ماء +نصف كاس سكر يغلي 2 دقائق
حطيه في صاشي تع السكر وقلبيه بالشوية وخليه 5 او10 دقايق نحي السكر الزائد ممبعد حطي السكر في الصفاية ورشيه من فوق

مقروط المقلا

3عبارات سميد متوسط+2ملاعق فرينة+ملعقة قهوة فنيليا+عبرسمن+3ملاعق زيت تكملة للعبر مايفيضش خليه يرتاح 2ساعات ماء الزهر هنا السر كي تعجني خوذي بالشوية واعجني حق 4او5 حبات لاخاطر ينشف بسرعة وراح ينحل في المقلة ....العقدة 3عبارات لوز او كاوكاو او تمر +نصف عبر يكر عادي +ملعقة عشاء فنيليا اذا كان كاوكاو+2ملاعق زبدة او سمن نلموه بماء الزهر حتى تولي عجينة خوذي شوية عجينة حليها في يدك وحطي العقدة في الوسط ولمي العجينة وديريها في مول تع الدزريات الي يكون وردة محلولة شوية ونقشي من فوق كيما تحبي انا نحط طابع تع وريقة في كل برج وحبة لوز في الوسط .طيبيهم بالمول نتعهم.__سخني الزيت مليح وحطي بالحبة اذا نحلت شوية اغطيسي الاخرين في الماء وبسرعة قطريهم واقليهم وعسليهم

*العسيلا

3كيلو سكر واذا كان تع الحجرة احسن
4كيسان ونصف ماء (عبرت بكاس تع اينوكس الطويل)
شلخة شب (قد نصف حبة سكر)
نصف حبة قارص
حطي الكل بارد في بارد في طنجرة ثقيلة وحركي حطيهم فوق النار مرة على مرة حركيه كي يبدا يغلي احسبي 4 دقائق وطفيلو" حطي الساعة قدامك "
نحي النصف تع القارص بعد ما تعصريه في العسل بملعقة لخاطر سخون واظيفيلو باطا عسيلا نونورس تع كيلوا وخليها تبرد راح تزيد تعقاد (هاذا العبر يشرب سنيوة بقلاوة ويشيط ونعسلو بيه معظم الحلويات)

سيليلات الجلجلان

1عبار جلجلان ابيض مشي محمص +1عبار فرينة +ماعقة قهوة فنيليا وخلطي +ربع عبر سمن ذايب وخلطي ولمي بماء الزهر ماتدلكيش خليها ترتاح ربع ساعة في صاشي
رشي بالفرينة حلي العجينة اطبعيها دوائر برقم 80



واقرصيها فالوسط لسقي بالبيض وخليهل واقفة كي السلة كيما السورة معنديش الصور جبتلك مثال برك كيفاه تقرصي العجينة مشي رقيقة 4مم او3 مم راهي تزيد تطلع فالقليان
واقليها وعسليها
حطيلها العقدة كويرات صغار من الجهتين
وزينيهم بورود
العفدة
عبار كاوكاو او لوز +عبر جلجلان يمكن الاستغناء عنه +عبر حلوة الترك ولميها بعسيلا
ممكن ديري جنواز واعجنيها بكريمة او قوفريط +صابلي فتيه واعجنيهم بنيسلي

الكعك بحلة جديدة:

2حبات بيض
2كاس حليب
كاس سكر
قرصة ملح
وخلطي +1كاس زيت وخلطي + الخميرة تكوني حضرتيها من قبل (ملعقة تع عشاء +قرصة سكر +نصف كاس ماء وغطيها وخليها تطلع )

زازت البرتقال والقارص +حبة الحلاوة وسانوج
لميها بالفرينة فيها باكي خميرة نوارة خليها طرية غطيها وخليها تخمر في مكان دافي
كي تخمر شكليها انف الدب زيديلو شوية فرينة باه يشد الفورم ادهنيهم بالبيض غطيها بقصعة فوق السنيوة الي شكلتي فيها وخليها تزيد تخمر في مكان دافي

صينية الفلون

3حبات بيض+3ملاعق سكر عادي كبار+3ملاعق زيت+ملعقة صغيرة فنيليا+3ملاعق فرينة+باكي خمارة الطريقة حطي المقادير بالتسلسل وضربي في البدايةالبيض مع السكر
يجي الخليط جاري شوية فرغيه في صينية مدهونة بالزيت خليه يطيب كي يطيب فرغي فوقو الشاربات كاملة وخليه بجنب _في كسروله ديري 1لتر حليب +3ملاعق عشاء سكر+3.5 نشاء+ملعقة تع عشاء فنيليا الكل فوق النار
حتى تعقاد ثم كبيها فوق القاطو الى وجدتيه من قبل ودخليه الثلاجة يجمد_في كسرونة ثانية حطي نفس المقادير +ملعقة كاكاو او اذا حبيتيها روز مثلا بدل الكاكاو حطي ملون روز و بنة الفراز
وحطيه فوق النار حتى يعقاد وكبيه فوق الكريمة الاولى الي جمدت وخليه يجمد جي طبقات ثم قطعيه كيما تحبي وزينيه من فوق حسب الامكانيات


الصينية تكون 40سم/40 واذا حبيتو الطبقة الاولى جي عالية ضاعفو مقادير العجينة

انواع الطليات:

الطلية العادية الي تستعمل في المخبز كريات الثلج مسيسات جاراك المطلي الفطيرات العرايش
عبر بياض بيض
عبر قارص
عبر ماء الزهر
ملعقة زيت
ملون ابيض
شوية فنيليا سكر قلاسي دايما المرجان........يتبع


2_ الطلية تع المخبز تع الجوز
كاس سيرو (كاس ماء+ نصف كاس سكر يغلي حتى يعقاد شوية)وخليه يبرد
1 بياض البيض
2او3 قطرات لغوم تع الجوز
صاشي ناسكافي حليها في شوية ماء سخون
2او3 قطرات لغوم كرمال
سكر قلاسي المرجان

تزيين الكيك

اي صورة تقدري ديريها تبعيني جيبي اي صورة حطي فوقها نيلو خشين تع البحوث تع الذراري وتبعي الرسمة بالشسكولة ديريها في بوش تع الطلية وكي تذوبيها ماتزيديلها والو وخليها تجمد ديري فوقها الكريمة
على حسب الوان الرسمة ودخليها للكونجيلاتور تجمد ثم حطيها فوق الكيكة ونحي النيلو من فوق وفي الاخير كبي عليها لجولي

ملاحظة:

عجينة مقروط اللوز هي نفسها للمخبز يبدلو الشكل
كل انواع المشكلة والدزريات نفس العجينة
عجينة العرايش هي نفسها المسيسات او الجراك فيهم تغيير خفيف مثلا العرايش فيهم القارص والجراك مافيهش
عجينة المورقة هي نفسها عجينة الكوكة وعجينة الميل فاي الاولى فيها ملح وميل فاي فيه مغيرفة سكر وفاني
عجينة بريزي جي للكيش واذا زديلها فاني تولي ليتارتولات او تارت
عجينة الصابلي لكل انواع الصابلي السر تلمي ماتدلكيش
كاين الي يزيدلها اللوز وكاين الي كاكاو يعني تغييرات طفيفة
ومعظم حلويات الاعراس نفس العبر يغيرو الشكل برك

القريوشة

رطل فرينةاي 4عبارات+نصف عبر زبدة او سمن ذائبة وباردة +2(او3 ملاعق جلجلان مطحون +3ملاعق سكر التسكارواطحني ) عبري الكمية تع السكر والجلجلان
ونقصيها فرينة +ملعقة تع عشاء خميرة +(حبة بيض حليها في شوية حليب وملعقة ماء الزهر+قرصة ملح +ملعقة قارص ضربيهم مع بعض وروني بيهم وكملي اعجني بماء الزهر
وخليها تخمر نصف ساعة وحلي بالماشينة في رقم 5

الفوندون تاع الميل فاي

الفوندو تع الميل فاي ساهل ديري سكر التسكار وجريه بالحليب وخليه شوية ثقيل لي الطلية هاذا ساهل
والثاني 300غ سكر+1دل ماء+ملعقة كبيرة عصير القارص الكل على النار هادئة حتى يصبحح عاقد في الاول يبانلك ترونسبارو كي ينشف يبياض

الاول احسن جي البنة كيما الي يتباع

الطورنية

المقادير
عبر بيض+عبر سكر وخلطي+عبر زيت ناقص حق اصبع+فنيليا+فنجال كبير حليب وخلطي ولمي بالفينة وحطي فيها خمارة نوارة
(الخمارة 1.5 في 3حبات بيض)ولمي برك ما تدلكيش وكي تطبعي خوذي العجينة بالشوية حق 4حبات والديشي تع العجينة لميه ما تبقايش تعجني وادهنيها بالبيض

قلب الوز

5كيسان سميد متوسط نحيلو الرقيق + قرصة ملح+ 2كيسان سكر+ ملعقة عشا فنيليا +6 حتى 8 ملاعق تع اللوح زبدة ذائبة وخلطي + كاس نصف ماء ونصف ماء الزهر وخلطي وخليه يريح من الاحسن يبات واذا معندش الوقت خليه 3ساعات

العقدة
عبر طبسي لوز او كاوكاو +ربع عبر سكر+ 2 ملاعق زبدة +شوية ماء الزهر جي مرشوشة برك

الشاربات
4 كيسان ماء (3ماء وواحد ماء الزهر) +2 كيسان سكر+ يغليو 4 دقايق برك ابداي تحسبس ملي حطيتيه على النار مشي حتى يبدا يغلي باه تبداي تحسبي يجي جاري يبان ماء ما يخلعكش كي يهفت ديريلو قطرة او 2 بنة الماء الزهر وخليه يبرد



ادهني السنيوة واقسمي الخليط على 2 حطي النصف الاول وماتبلطيش حطيه مرشوش ديري العقدة وخليها مرشوشة مشي مشمخة ثم ديري الخليط الي قعد وماتبلطيش سويه بالمغيرة اغطسيها فالزبدة او الزيت ممبعد اطراس برك ماتقسميش وحطي في كل كارو حبة كاوكاو او لوز

ودخليه يطيب على نار متوسطة من تحت يقعد نصف ساعة و10 دقايق حتي تطلع الحمورة للفوق واشعلي من فوق وخليها تحمار وكي يطيب خرجيه واسقيه طفي الكوشة ورديه للكوشة وهي طافية وخليها تبرد عليه هنا السر خليه 2 او 3 ساعات ثم خرجيه واقسمي

les tuiles

مثل التس تباع بالضبط
5بياض البيض
250غ سكر قلاسي
100غ زبدة ذائبة
150غ فرينة
ملعقة قهوة فنيليا
الطريقة= ضربي بياض البيض ناج ثم اضيفي سكر قلاسي واستمري في الخلط+فنيليا+زيدي الزبدة بالشوية وخلطي بالشوية باه ما يتكسرش البيض +الفرينة مسيرة بالشوية بالصفاية اذا حبيتيها بني نقصي مغيرفة فرينة وعوضيها كاكاو
ادهني السنيوة بالزيت ديري دوائر من الخليط بالمغيرفة
وخليها اطيب حتى تطلع الحمورة من الجوانب وروليهم على السخانة ونحي التيوا يليق تكون يدك خفيفة اذا بردة يتكسرو وما يترولاوش
والحشو كيما تحبي نوتيلا او كرام باتيسيار او كريمة الزبدة او نيسلي
وفي الاخير اغطسيها في الشيكولا من الجوانب

حلويات النواد كوكو

عبر نواتكوكوا مطحون+عبر مشماش المجفف اطحنيه +عبر ناقص سكر قلاسي +زبدة غ ولمي ب كرام فراش وشكلي كيما حبيتي ممكن تحطي حشو نوتيلا او سوغيز كونفي

الفراشات

2حبات بيض
100غ زبدة ذائبة
1باكي خمارة نوارة
200غ فرينة
30غ كاكاو (ملعقة ونصف )
2 ملاعق عشاء ماء الزهر

ضربي البيض+السكر وخلطي +زبدة ذايبة +الفرينة معاها كاكاو والخميرة وخلطي +ماء الزهر وخلطي جي العجينة ناشفة على المول
ادهني لمول تع القنيدلات بالزيت وحطي العجينة وبلاطيها ومتعمريش لخاطر يطلع
كي يطيب ويولي دوغي من تحت ومن فوق نحيه من القوالب كي يبرد نحي الشابو الفوقاني واقسميه على 2 وحطي كريمة في الوسط بالبوش وحطي انصاف الشابو كي الفراشة من فوق من الجهة العريضة ورشي بسكر القلاسي

الكريمة لكي الاختيار تحبي تع الزبدة او شانتيي

اصابع الاميرة:

3عبارات فرينة
عبر سمن
2 ملاعق سكر قلاسي
ملعقة تع قهوة فنيليا
قرصة ملح
لمي بماء الزهر لمي برك ماتعجنيش وخليها ترتاح 1 ساعة او 2 ممكن تبات برا مشي فالثلاجة تجمد

العقدة
2 عبارات لوز او كاوكاو
ملعقة فنيليا اذا كان كاوكاو ملعقة تع عشاء
فوق نصف العبر سكر عادي
2 ملاعق سمن او زبدة ذائبة
نلموها بماء الزهر

الطلية
نصف كاس ماء
3 بياض البيض
3ملاعق تع عشاء عصير القارص (ليمون)
ملعقة لتاي فرينة
سكر قلاسي

السقوقيات

مشيربة فرينة (طبسي شربة)
كاس حليب
125غ زبدة طرية
ملعقة قهوة معمرة مليح فنيليا
اقل شوية من نصف كاس سكر عادي
العقدة
الحلقومة _ شوية زبدة ادهني بيها يدك باه ما تلسقش في يدك ادلكي كل لون لوحدو وشكلي حرابش رقاق بزاف ديريهم قد مترق الكبريت فالرق الا قدرتي والطول 25 حتى 30 سم

الطريقة =فرينة +زبدة قطع صغيرة+فنيليا + سكر وخلطي حكي بين يديك حتى تدخل الزبدة + الحليب وخلطي وادلكي وخليها ترتاح جي العجينة ناشفة ترتاح نصف ساعة

حلي العجينة فالمشينة رقم 1_3_5 وقطعي مستطيل طويل وديري على طول المستطيل في الطرف الحربوش تع الحلقومة ولوي 2 لويات وبلطي وقطعي بالميال ولوي
كي اطيب عسليها
يمكن تلوين الحلقومة باه الالوان تبان اكثر

وريدات منقوشين

250غ زبدة طرية
100غ سكر قلاسي
2 حبات بيض
نصف باكي خمارة
ملعقة عشاء فنيليا
250غ مايزينة ( نشاء )
الباقي بالفرينة حتى تنشف العجينة جي ناشفة

اخدمي الزبدة 10 دقايق او اكثر +السكر وخلطي فنيليا +البيض وخلطي +الميزينة معاها الخميرة وخلطي + الفرينة الفرينة اكثر من نصف باكي تلتم ما تندلكش ديريها في صاشي ترتاح شوية برك 5 او 10 دقايق

خوذي العجينة كويرات عبري بباطا فنيليا باه يجيو قدقد ديريلها في الوسط حبة سوريز كونفي او شلخة شيكولا او حلقومة ولمي عليها ديريها كوايرة ونقشيها على شكل وردة او كيما تحبي

كي اطيب ذري شوية سكر قلاسي

coo*kies



****ز بالروب واللوز
100غ زبدة طرية
50غ سكر من الاحسن السكر البني
2ماعق كبا الروب واذا معندكش ديري معجون
حبة بيض
ملعقة صغيرة فنيلا
140غ لوز
180غ فرينة
رشة ملح
ملعقة صغيرة خميرة نوارة
ضربي الزبدة والسكر حتى يولي كريمة +الروب +حبة البيض وكملي ضربي +اللوز والفنيلا وضربي +الفرينة والخميرة والملح بالشوية وخلطي حتى تكملي
ادهني السنيوة او ورق الزبدة ديري كويرات وبسطيهم شوية ودخليهم يطبوا وتكوني سخنتي الكوشة من قبل مدة 10 او 12دقيقة بطيب في حرارة عالية
ومتنحيهاش من السنيوة حتى تبرد

حلوة الصاندو

250غ زبدة
2 كيسان زيت
6 حبات بيض
كاكاو
1 باكي سكر قلاسي
1 خمارة
فرينة حتى تلتم

اخدمي الزبدة مليح بالباتور واضيفي السكر بالتدريج +البيض بالحبة ومرة على مرة الزيت والكاكاو حتى تولي كريمة ولمي بالفرينة وفيها خمارة وخليها طرية كيما الصابلي ديريها في صينية مدهونة خليها علو1.5سم وطيبيها الاطلعت في الوسط بزاف اثقبيها كي اطيب من تحت طيبيها من فوق شوية كي تبرد كبي فوقها الشيكولا وكي تنشف قطعيها كيما تحبي مربعات او مثلثات او مستطيلات
ملاحظة تقدري ديري العجينة بلا كاكاو والشيكولا بيضاء او روز او اي لون لكي الاختيار في التزيين ممكن تقسمي الحبة وتحطي في الوسط كريمة الزبدة
هدا العبر يقطع 120 حبة

حلوة البيستاشية

كلغ كاوكاو مرحي
125غ سكرعادي
ملعقة عشاء فنيليا
نصف كاس لتاي زبدة ذايبة
4 بياض بيض مخفوق
امزجي المواد مع بعض +البيض بالشوية حتى تتماسك شكلي حرابش وقطعيهم مثلثلت او مربعات .....
اغمسيها في بياض البيض ثم فالبستاش ثم طيبيها مدة 10 حتى 12 دقيقة كي اطيب عسليها والديكور حسب الرغبة

ملاحظة تقدري مكان البستاش ديري لوز افيلي او جلجلان هنا يتغير الاسم

عجينة التوريق

كيلو فرينة
نصف ملعقة عشاء ملح
كاس لتاي زيت
خلطي كل شيء حكي بين يديك واعجني بالماء --نصف لتر---
جي جارية شوية ---طرية----
وخليها ترتاح في صاشي ربع ساعة

خودي باكي زبدة لديد او 700 غ قطعيها كاريات على عرض الباكي وحطيهم في نيلو ولسقيهم مع بعض وحليهم بالحلال حتى يوليو كاري 35/35سم ابيبري
رشي الطاولة بالفرينة و حلي العجينة طويلة وحطي بلاكت الزبدة واطوي العجينة عل 2 والطوية دايما جهت ليدك اليمنى واغلقي مليح باه ماتخرجش الزبدة
وحليها طويلة مستطيل واطويها على3 الطية دايما ليدك اليمنى كيما فالصورة وحليها وعاودي اطوي 4 مرات

ا\ا حبيتيها حلوة اضيفي ملعقة سكر +ملعقة فنيليا --بالملعقة تع العشاء
4مرات للكورني وليفولوفو
5 مرات للكوكة
7 مرات للملفاي

[aboayoub]

الله يعطيك الف صحة ربي يحفظك حبيبتي ويجعلها في ميزان حسناتك ويفرحك يا رب قولي امييييييييييييييييييييييييين

[melissat]

مشكووووووورة اختي

[مرام]

امييييييييييين يارب ربي يحفظك ويخليك وان شاء الله تزيدي تتحفينا بوصفاتك الرائعة ونتمنى العضوات يكملو هنا باه الموضوع يكون منظم

[cuisineshowdalatifa]

lمبروك منزلنا الجديد مع أم أيوب, و مرام يعطيك الصحة بهذ الطريقة الموضوع راح يأخذحقه
سؤالي لأم ايوب , عند الحافظ (بائع لوازم الحلويات ) كاين بودرة la mousse بذوق الشكولا , في علب كبيرة 3كغ
يهل ترى ناجحة هذه la mousse ,
شكرا

[أم إناس]

شكرا اختي وَبَارِكْ الله فيك

[ام ملاك و عبدو]

بارك الله فيك اختي و في انتظار المزيد

[tahiya]

mérci beaucoup

[ام محمد 05]

ربي يفتح عليك شكراااااااااااااااااااااااااااااااا

[عفاف حمامة]

4444444444444444444444

[Strong Giirl]

Le secret d'El Mkhabez aussi est de laisser la pâte se reposer au moins 2 heures avant de la cuir

[مرام]

السلام عليكم
مشكورين اخواتي على المرور وبما ان الاخت ام ايوب قررت انا نكملو في الرابط الاصلي ف لي عندها اي سؤال اي اي استفسار عن اي نوع حلوة تطرحو في الرابط الاصلي الي هو

https://www.djelfa.info/vb/showthread.php?t=1449929
وانا راح نكمل تجميع الوصفات هنا ولا وش رايك يا أم ايوب؟

[مرام]

الموضوع متجدد

[fayza81]

merciiiiiiiiiiiiiiiiiiiiiiiiiiiiiiiiiiiiiiiiiiiiii iii
aide 444444444444444444

[sidali 2007]

يعطيك الصحة