ارواحو نحكيلكم واش سمعت

[ام محمد امير]

سلام الله عليكم، والله هذي القصة راهي اثرت فيا بزاف حبيت نحكيهالكم ،مرات نصدقها ومرات نكذبها ومرات نقول سبحان الله الله قادر على كل شئ
خرجت البارح نقضي وتلاقيت مع صديقة كانت تقرا معايا عندي وقت ماشفتهاش بدينا نهدرو فالحاضر والماضي سقسيتها على الاهل تاعها وعلى ختها اذا زوجت ،قاتلي عندها 8 سنوات زواج وربي مارزقهاش بالاولاد ،قتلها ماعليش ربي يفرج عليها قاتلي صح ربي يفرج وجامي يخلي عبدو قاتلي علبالي نحكيلك ماتصدقيش قتلها غير الخير، ايا بدات تحكيلي قاتلي بعد 8 سنوات زواج معندهاش اولاد،دوات ورقات، مخلات حتى بلاصة قالولها مابيك والو هذي حاجة ربي اصبري وخلاص، قاتلي واحد نهار صرا مشكل بينها وبين زوجها غضبت في دارهم بعد ايام جا زوجها يرضيها خرجو يحوسو كي عادو مروحين سمعو فالطريق صوت طفل يبكي قاتلو الزوجة احبس نشوفو الصوت منين راه يجي راجلها مابغاش وهي بقات مصرة علية باش يحبس ،بعد ماحبسو بداو يحوسو على الصوت حتى لقاو بيبي ماعندوش بزاف مالي زاد دايرينو في زورة وحاطينو على الطريق هزاتو وركبت فالسيارة راجلها مابغاش قلها نديوه للشرطة هي قاتلو لا هذا وليدي صبتو انا كون يسحقوه مايطيشوهش قاتلي طول الطريق وهي تبيكي وهذاك البيبي يبكي قاتلي جابتو وغسلتلو وهي غير تبكي خرج راجلها شراولو لحليب باش يرضع مسكين قاتلي والله بعد ساعتين حست بالم في صدرها قاتلي وبدا لحليب يسيح عندها سبحان الله قاتلي خدمتلو اوراق وسجلوه باسمهم قاتلي تنحيلها عينها ومتمسيش هذا الطفل قاتلي ماتقبل حتى واحد يغلط معاه ،قاتلي والفرحة لزادت قاتلي بعد شهرين دارت تحليل حمل لقات روحها حامل، سبحان الله ،قاتلي اختي طيبة بزاف قاتلي قالها الامام كماسترتي ملائكة ربي مايخليكش ،والله انا مالقيت واش نهدر بقات في فمي غير سبحان الله سبحان الله سبحان الله .

[ملك 25]

نظن أنها غلطت لما ما خبرتش الشرطة لوكان خبرت و من بعد قامت بالاجراءات الاخرى اللي عملتها نظن بلي من الفرحة و الشوق ما قدرتش تفارقو و لوكان دقيقة على كل الحمد لله ربي حنين كريم و ما ينسى حتى واحد

[محمد جديدي التبسي]

كيفاه يسجلوه باسمهم ؟؟!!!
التبني حرام في الإسلام يا أختاه كان عليك أن تذكريها بذلك
ربي يهديهم

[Adnou Eclypse]

المشاركة الأصلية كتبت بواسطة محمد جديدي التبسي

كيفاه يسجلوه باسمهم ؟؟!!!
التبني حرام في الإسلام يا أختاه كان عليك أن تذكريها بذلك
ربي يهديهم

ما قالتش تبناوه ، قالت سجلوه باسمهم و هذي البارح برك الامام في الخطبة هدر عليها ، الاطفال هكا مسموح يسميوهم لانه شئ لازم ، و في وقتنا هذا ، اي انسان لازم يكون عندو لقب ـ ...تصور كون ما يعطيولوش لقب هذا الطفل ، كيفاه راح يعيش ؟ كيفاه يخدم بطاقة تعريف ؟ كيفاه راح يقرى ؟ كيفاه راح يدير جواز سفر ؟؟

الامام استدل بقصص لي جرات وقت الغزوات الاسلامية و الحروب ، كانو المسلمين وراء الخرب يلقاو اطفال صغار ، كانو يربيوهم و يعطوهم اسماء

و الله اعلم

[ام محمد امير]

المشاركة الأصلية كتبت بواسطة محمد جديدي التبسي

كيفاه يسجلوه باسمهم ؟؟!!!
التبني حرام في الإسلام يا أختاه كان عليك أن تذكريها بذلك
ربي يهديهم

يا اخي ماقلتش تبناوه قالت سجلوه على اسمهم باش مايبقاش الطفل الضايع والله اعلم

[ام محمد امير]

المشاركة الأصلية كتبت بواسطة ملك 25

نظن أنها غلطت لما ما خبرتش الشرطة لوكان خبرت و من بعد قامت بالاجراءات الاخرى اللي عملتها نظن بلي من الفرحة و الشوق ما قدرتش تفارقو و لوكان دقيقة على كل الحمد لله ربي حنين كريم و ما ينسى حتى واحد

لا يا اختى في هذيك اللحظة مابلغوش الشرطة بالصح الغدوا مين ذاك خبروهم القصة طويلة مابغيتش ندخل فالتفاصيل

[محمد جديدي التبسي]

تسجيل الطفل باسم العائلة هو التبني في حد ذاته لا فرق وهو حرام شرعا
تربيته وكفالته فيها أجر نعم وتدخل ضمن كفالة اليتيم لكن تسجيله باسم العائلة ونسبته إليها غير جائز شرعا
هناك ركن في البلدية لمجهولي النسب كان بإمكانهم أن يسجلوه هناك أو ياخذوه لدار رعاية ومن ثمة يطلبوا كفالته ويبقى بلقب آخر وعندما يكبر يخبرونه بأصله وفصله...والله اعلم
المشكلة انو قليل اللي يبحث في مسائل الحلال والحرام للأسف

[أم أماني أريج]

الحمد لله ربي عوضهم ..............
و الله في أحيان كثيرة نتمنى لو نقوم في الصباح و نلقى سلة فيها بيبي قدام باب داري كيما في الحكايات .
لكن يبقى حلم فقط و حتى إجراءات التكفل راهي صعيبة بزاف
عجبتني مقالة قريتها في الشروق إذا ماخانتنيش الذاكرة عنوانها ..........الحصول على سلاح ناري في الجزائر أسهل من التكفل بطفل .
هو القانون الجزائري يمنع التبني و مايتسجلش الطفل في الدفتر العائلي لكن كاين إجراءات أخرى تمكنه من أخذ لقب الأب .

[.ام زكرياء.]

الله يبارك علابالك دوكا هو وليدها خاطرش رضعاتو

[mounyabiskra]

سبحان الله

[oumhana]

سبحان الله سبحان الله سبحان الله ربي يرزق ل محروم آمين و الله غير الدمعة طاحتلي

[kikimnarim2]

سبحان الله ربي قادر على كلش

[لمسة L]

سبحان الله .

[أم شروفة]

سبحان الله.ابكتني القصة.ربي ارزق كل محروم من الذرية ذرية صالح

[بنت لبحر]

حتى بكيتيني
سبحان الله ربي رحمتو واسعة .ربي يثبثلها حملها على خير و يفرحها يا رب