قلبي رح يخرج - الصفحة 2

تراتيـل صبــح · 2014-08-30, 17:47

طمنينا على أختك كاميلا
ان شاء الله تكون بخير.

كاميلا · 2014-08-30, 21:35

هدرت معانا في الهتتف قالت منزيدش نسحقكم وعجوزتها قالتنا اخطيوها ومتجيوش وهي راهي مع صف عجوزتها امي من شدة واش صرا طلعتلها الضغط وطلعناها للمستشفى والحمد لله راه لم يتفاقم الوضع وهي في هاديك الحالة هدرت معاها وبهدلتها بهدلت امي
والله العظيم لم يحدث شيء بينا وبينهم مسبيناهم مضربناهم ماوالو قامة القيامة كي مجبنالهمش الشمع اللي حناولها بيهم قالتنا وعلاش مجبتوليش الشمع
والله لا ادري ما العمل انا من البارح لليوم نحس باعصابي اتحرقت كلها وخاصة امي المسكينة

كاميلا · 2014-08-30, 21:40

دايما تغلط فيا ودارتلي حوايج بزاف عيانين بصح توصل انها تغلط في امي هي وعجوزتها لا

ام مهدي2010 · 2014-08-30, 21:46

ان شاء الله ربي يهدي الانفس

bellaluna · 2014-08-30, 22:14

دعيها يا كاميلا فرحة بما آتاها و يوم تدور الدّوائر لن تجد من تستنجد به و ستندم على ما اقترفته معكم.

الجواهر · 2014-08-30, 22:18

اختك ادرى بحالها و مادام قالت لكم لا تاتوا يعني ماتروحوش خلي النفوس تهدأ

" أبو عبود" · 2014-08-30, 22:26

الموضع يا اختي لا يستحق كل هذا لااضطراب. اتركوها تشبع بالزواج. لا ترفعوا عليها عندما تتصل. لا تذهبوا إليها. تحسسوا منها عن بعيد حتى لا تتعرض للاذى لكن خلوها بعد اسبوع او اسبوعين على الاكثر تجي لعندكم تبكي وتعتذر. راهي تحسب روحها حكمت في ط عروة سدي ربي" على قول العجائز وزيدي راهي ذرية مزال ما تعرفش صوالحها. يطلع عليها النهار وتعرف إذا تحتها فرس أم حمار.

كاميلا · 2014-08-30, 22:36

ياه يا اخي وشمن درية زصغيرة راهي استادة جامعية انا عن نفسي الله يسهل عليها خفت برك يكونوا ضربوها لكن اتضح راهي دايرة معاهم صحبة غاضتني امي فقط

life is life · 2014-08-30, 23:22

اختي ربي يشفي امك

نصيحتي ليك قابلي امك هي الصح
و ما تعمريش راسك

و اسمحيلي نقوللكم شي

المشكل فيكم انتم الحنانة المفرطة

صراحة هي طبيعة في الانسان يخاف على اقرب الناس ليه و لكن بالزواج يصير زوجها الاقرب ليها للاسف

يعني تخيلي اختي لو كان كبر الموضوع و عادت اختك للدار بعد العرس .. واش راح يقولو الناس واش راح يصير لاختك و هيا عاد عروسة

و خصوصا اذا كانت كبيرة في السن فهي تخاف على زواجها
و نحن نعرف هذا المجتمع المتخلف جيدا ....

مي و الله ما خدمة تقلق امها و تقف بصف ناس عرفتهم البارح على لي ربوها و علموها ملي زادت حتى كبرت و مدوها عروسة

انا ندعيلكم يا اختي ربي يريح نفوسكم و يهدي بالكم و يثبتكم

ربي يشفي امك و يخلي اختك تتسقم برك هيا يامات برك راها في حياة جديدة عليها و ما عارفة راسها من رجليها

يفوت اسبوع او اثنين و تفيق لعمرها

ما تتقلقيش

و اعتذر على المداخلة اذا ازعجتكم

سلام

" أبو عبود" · 2014-08-31, 00:33

المشكلة راهي ذرية لانها استاذة جامعية لانها تظن ان شهادتها ومركز عملها يخلوها تحسب الامور بشكل جيد وهذه مشكلة الكثير من الناس يظن في نسفه انه قادر على حل وتحمل اي مشكلة. اختي اصبري عليها ورايحت تشوفي كفاش تنقلب اليكم 180 درجة لان هذه هي البداية فقط.

mouloudfan · 2014-08-31, 10:11

ربي يهديهم حسبونا الله ونعم الوكيل

*تسنيم* · 2014-08-31, 11:38

اضن ان اختك ضعيفة الشخصية تريد ارضاء اهل زوجها على حسابكم لكن حطوها في الثقيل وخلييوها للزمن.

ندى العالم · 2014-08-31, 12:31

احتي كاميليا ربي يصلح الامور
طمنينا اذا هدات الاحوال
يعني المشاكل بدات عندما تكلم خالك مع صديق زوجك
يعني الم يتدخل احد افراد العائلة لفك الشجار و تصفية القلوب من المرة الاولى مثلا زوجة خالك
في انتظار ردك

تراتيـل صبــح · 2014-08-31, 18:35

اختي كاميلا كثير من المشاكل تبدأ صغيرة بسبب قصر تفكير النساء
اختك أظنها شعرت بالاحراج بسبب الشموع التي لم تحضر وشعرت انكم أهملتم الأمر
وكثير ما ينسى اهل العروس أشياء رغم كل التجهيزات والوقت والجهد المبذول لذلك
أختي من الواضح ان اختك من النوع المتطلب اي تحب حاجتها تكون على اتم ما يكون وتحب المظاهر كذلك
واكيد انها سمعت كلام في بيت زوجها فزاد الطين بلة ولا تنسوا أنها عروس نفسيتها غير مستقرة
اي كلام يديها ويجيبها لكن انا ضد اساءتها لأمها لكن من الواضح متعودين كلامها يمشي عليها تعودت
العمل الآن هو أنكم تتركوها في بيت زوجها اليوم راهي جديدة ومبعد تبدأ الحياة العملية وسترى
ستشتاق لنظرة منكم وكلمة منكم
برأيي ه تزوجت واتهنيتوا عليها وحرقتو أعصابكم باطل
اتهلاي في أمك وركزوا تفكيركم في أنفسكم حاليا
وأختك تحتاج لدرس ستتعلمه من الحياة
وملاحظة اختي كاميلا ماتخليش هاذ الموقف يكون سبب لمدخل الشيطان
أختك هي أختك ومهما أساءت لك أنت سامحتيها قبل
لا تتركي الشيطان يعيد اليك هذه المشاكل ليفرق بينكما
بعد الوالدين _ ربي يحفظهم لكم_ يبقى لنا الاخوة
ومهما حصل تبقى اختك
طيبي خاطر الوالدة بكلامك وحاولي التخفيف عنها وأنا أعرفك صاحبة عقل رزين ما شاء الله
بعض الوقت فقط وستعود المياه لمجاريها،دعوها للوقت كاميلا.

اغادير · 2014-09-01, 17:34

نقلك العروس في الاول ديما هكدا لاهي طايقة روحها ولاهي طيقة عيلتها ولاعيلة راجلها.......... استنوا عليها فترة دورك ترجع الامور لطبيعتها