حريرة رمضان

ام طيري الجنة · 2014-05-12, 12:36

البسملة1

بمناسبة اقتراب شهر رمضان الفضيل اللهم بلغنا رمضان اقترح عليكن اخواتي العزيزات هذا الموضوع و الذي فحواه ان كل واحدة تعطينا طريقتها في الحريرة او الشربة نتاع رمضان هكذا نتعرفو على الكثير من الطرق و نقدرو نجربوهم الان قبل رمضان ويلا عجبتنا طريقة او اضافة نزيدوها ( لان في رمضان لا مجال للخطأ في تحضير الحريرة او الشربة و الا ......ههههه)
ومن جهة اخرى حباباتنا نتاع الشرق يتعرفو على طياب الغرب و الغرب على طياب الشرق و الجنوب و الوسط و نجربو طياب بعضنا البعض
نتمنى يعجبكم الموضوع و تفيدونا يا وجوه الخير
و هذي طريقتي في الحريرة

نقلي البصل المقطع قطع صغير او كبيرة ما يهمش لانو راح ينطحن مع الخضار الاخرى جزر و حبة بطاطا صغيرة و طماطم و حبة كوسة كورجات و الحمص المشمخ و ( ممكن ايضا اضافة القليلل فقط ( يعني حفنة صغيرة)من الارز و العدس و الفول اليابس هذي نديروها في تلمسان و المغرب ايضا يديروها ) و قطع من اللحم و قبضة نتاع قصبر و كرافس ; و قرفة نتاع العود و فصيصات نتاع النجمة نملح ونتبل ثم نمرق و نغلق الكوكوط
كي تطيب الخضار و اللحم نحل الكوكوط بحذر طبعا ثم نحي اللحم و شوي حمص و نطحن الكل بالبرا او الرحى و نكون دايرة التشيشة في الماء ترطاب من بعد نصفيها و نرميها مع البويون اللي نكون رجعتو فوق النار و نرد حبيبات الحمص انا نحب الحمص في اعماق غرفيتي امممههه و نخليها تطيب و ناخذ مقدار من الفرينة و نديرو في الماء و نرج مليح باش تتحلل ثم نزيدها للحريرة باش تتقلها شوي ماشي تردها بيطون هههههه مين تكون تطيب باش نزيد البنة نرمي فيها اعواد نتاع كرافس و جويا ( يعني فلفل حار ) بصح حذار يكون مثقوب) غي باش يطلق البنة نتاعو فقط كي تطيب التشيشة و الفرينة نكون موجدة راس الحانوت و فيه حبة جامبو و قصبر مقطع صغيرا جدا ومغرف كبيرة طماطم مصبرة و نحلهم في شوي ماء و نرميهم في الحريرة يغليو 5 او 10 د و نطفي و كي نحب نقدم الحريرة و نجي نحميها لزيادة الذوق و البنة اممم نوجد درسة عبارة عن2 سنينات ثوم و شوي قصبر و وريقات كرافس و مغرف كبيرةكروية وملعقة صغيرة سكين جبير و شوي ماء و بالبرا نرحيهم و نزيدهم للحريرة غلية وحدة و الا زوج و قدميها بالصحة و الراحة وزينيها بالليمون و القصبر المقطع صغير و اللحم تحبي تفتتيه في الحريرة او تحمريه في الكوشة و تقدميه الى جانب الحريرة هذه طريقتي اللي تعجب ضيافي و الحمد لله

و كانش اسئلة راني هنا
ننتظر تفاعلكن اموووووواح ليكن جميعا
ملاحظة يلا طحنتيها بالبرا او الميكسور راح تكون تقيلة زيديلها شوي ماء مع اللي غادي تزيديلها التشيشة و الفرينة
اما بالرحى اليدوية تجي خفيفة بلا ما تزيديلها الماء

أم ياسين الزهراء · 2014-05-12, 12:56

اممممممممممممممم سخفتيني يعطيك الصحة

om roumaissa · 2014-05-12, 12:57

هايلة
طريقتك ما تختلفش بزاف على طرتقتي في تحضير الحريرة
طريقتي هي : اني نحط كلش على ضرببة وحدة و نغلق لاكوكوط
قطعةمن الدجاج+بصل+القرعة+الزرودية+لفت+بطاطا+الحميصة+الفول المدشش+الكرافس+الحشيش + حبة طوماطيش
+قرفة+زنجبيل+كروية+كمون+زعفران +زيت +ملح +طوماطيش مصبرة
بعد ما طيب نرحي كلش مي نحي الكرافس

ام هاديل وياسين · 2014-05-12, 13:03

السلام عليكم

نعطيك كيفية سهلة للحريرا كما قلتي طبعا ديري فيها البصل مع سنينة توم والخضار يعني كما موالف تحضريها

فقط ديري لحم مطحون ومرقيها كي تغلي القدر او الكوكوط حليها وديري التشيشة ومعها وحدة جامبو
وخليها تطيب كي تعرفي بلي خلاص طابت

اطحنيها بالميكسور صدقيني انا كنت ندير فيها لحم الخروف ومرات نطيبها بلحم الدجاج

وكي جربت هذه الطريقة لقيتها هايلة البنة تهبل وكل من ذاقها عندي عجباتو نتمنى تجربوها وتعجبكم

natacabell · 2014-05-12, 13:15

يعطيك الصحة باينا عليها بنينة بارك الله فيك

ام سامي15 · 2014-05-12, 13:27

مممممممممممممم
تسلم ايديكي

يعطيك الصحة

هند11 · 2014-05-12, 14:17

اممممممم يعطيك الصحة

شكون فيكم تعطيني شربة تاع مرمز خاصة التوابل

marwa255 · 2014-05-12, 15:04

ya3tiik el sahaa

ام طيري الجنة · 2014-05-12, 16:42

بارك الله فيكن حبيباتي على المشاركات المفيدة و شكرا على الوصفات الشهية امممممممممممم

ام ايمان 11 · 2014-05-12, 16:54

تسلم الايادي اختي موضوعك هايل الحريرة بزاف بنينة وانا ديما نديرها في رمضان سيرتو كي عاد السخانة تجي خفيفة تهبل و حريرتك راهي تبان روووووووعة يعطيك الصحة

مريم الاميرة · 2014-05-12, 17:02

امممممممممممم و الله كي نشوفها تشهيني و خايفة نجربها خاطر ماعنديش وصفة محددة و كي شفت نتاعك عجبتني كثر و بربي ان شاء الله نجربها بصح حاجة برك وشنهي التشيشة هي لفريك و لا لمرمز و ثاني القرفة نقدر نستغنى علها هي و جومبو و لا لازم خاطر زوجي ح ما يحبهمش في الماكلة
شكرا حبيبتي و اسمحيلي كثرت عليك بالاسئلة

ام طيري الجنة · 2014-05-12, 17:09

اقتباس:

المشاركة الأصلية كتبت بواسطة مريم الاميرة

امممممممممممم و الله كي نشوفها تشهيني و خايفة نجربها خاطر ماعنديش وصفة محددة و كي شفت نتاعك عجبتني كثر و بربي ان شاء الله نجربها بصح حاجة برك وشنهي التشيشة هي لفريك و لا لمرمز و ثاني القرفة نقدر نستغنى علها هي و جومبو و لا لازم خاطر زوجي ح ما يحبهمش في الماكلة
شكرا حبيبتي و اسمحيلي كثرت عليك بالاسئلة

جربيها اختي و دير كمية قليلة و نظن راح تعجبك بزاف
القرفة و الجامبو تقدري تستغناي عليهم و التشيشة هي هذي

و سألي كيما تحبي و الله ما تقلقيني بالعكس صا في بليزير ههههههه

هدى ام ريماس · 2014-05-12, 17:09

شكرا كنت نحوس اعليها باه نديرها اختصرة معاك الوقت

ام فضيلة · 2014-05-12, 17:17

اممممممم تسخف ربي يبارك في اخيتي ان شاء الله نجربها عجبتني

lyzzabel · 2014-05-12, 17:34

مممممم كنت نقول ام طيري الجنة دخلت و ما زال ما قالتليش على طريقتها فالحريرة هههههه
الله يعطيك الصحة حبيبتي راها تبان بنييييييين يعطيك الصحة ،،انا طريقتي تختلف شوية
ندير اللحم و بصلة مقطعة و فصوص ثوم يتقلو في شوية زيت و من بعد حبة طماطم مقطعة و ندير ربطة قصبر و ربطة كرافس ،ملح حرور كروية ،زعفران،راس الحانوت ،عود قرفة ، شويييية كبابة مطحونة و مراااات ندير شوية كركب و نقلي على نار هادية مع التقليب و نمرق شوية و نضيف ملعقة ك طماطم مصبرة و زوج حبات زرودية مانكثرش فيها الخضرة ، نخليها تغلي شوية و نزيد نمرق و نغلق و نخليها تطيب
مين يطيب اللحم نصفيها فالكسكاس مرات نطحن الخضار و مرات لا ،، نرد المرقة فوق النار و نزيد كمية الماء و الطماطم المصبرة لي ناقصين و نزيد زوج ملاعق ص كروية و نذوق الملح ،،نزيد ربطة قصبر و مين تغلي نرمي فيها التشيشة و نخليها تطيب ربع ساعة و نوجد الفرينة مخلطة مع الماء مليييييح و نضيفهم للحريرة و نخليها تغلي ربع ساعة وحدخرا ،،مين نطفي نعصر عليها نص ليمونة صغيرة و نديرلها شوية قصبر مقطع رقييييييق و نقدمها مع اللحم نكون قطعته قطع صغيرة فالغرافي،،،، مممممم ههه

و فالأخير نقولك اللللف شكر حبيبتي على الموضوع الشيق و بارك الله فيك