طريقة التعمير من مطبخ ليزابال

[lyzzabel]

البسملة1



حبيباتي نظرا لطلب الأخوات لطريقتي في التعمير حطيت اليوم هاذ الموضوع الذي أتمنى ان ينال إعجابكن
و لتحضير التعمير ماكاينش مقادير مضبوطة خاطرش كلشي على حسب نوعية السميد و حجم البيض لي نستعملوهم
نحتاج الى :
كمية من السميد المتوسط حساب شحال راني باغية ندير
حبة بصل مرحية
فصوص ثوم تاني حسب الحجم نكثر انا درت 4 فصوص كبار
معدنوس مقطع رقيق
قصبر مقطع رقيق
ملح حسب الحاجة
فلفل اسود
شوييية قرفة غبرة
راس الحانوت انا استعملت م ص مملوءة
البيض حسب الحاجة انا استعملت 5 حبات

الطريقة :
في وعاء عميق نحط السميد البصل و الثوم المرحيين القصبر و المعدنوس تاني مرحيين ، ملح فلفل راس الحانوت و القرفة و نخلط ، من بعد نبدأ نضيف البيض بالحبة و نخلط و نشوف لازم يكون الخليط جاري شوية كما في الصورة انا كمية السميد لي درتها تطلبت خمس حبات بيض



من بعد نعمر الخليط في كيس نظيف طبعا و نربط الكيس مليح لمنع التسرب و باستخدام إبرة نثقب هذاك الكيس من كل النواحي و نكون محضرة المرق يطيب لي ندير فيه التعمير ،، نرمي الكيس يطيب مع المرق حتى ينضج كليا و نفتح الكوكوطة او الطاجين و ننزع التعمير و نحطه في صحن يبرد شوية و منبعد ننحيه مالكيس و نقطعه بالسكين الى قطع حسب الرغبة و نصب عليه شوية مرق باش يتشرب و ما يجيش ناشف بيلاما حضرت الأكل







ملاحظة :
نقدر ندير التعمير مع المرق تاع البركوكس و تاع الرقاق و كذلك نعمر بيه دجاجة ما بين الجلد و اللحم بصح ما يكونش الجلد تاعها ممزق و نخيطها و نغلق جهة الفتحات مثلا عند الرقبة بكيس نظيف نكمشه مليح و نستعمله كسد حتى ما يتسربش التعمير اثناء الطهي
انا اليوم درته مع البركوكس ممممممم جا فييييييلم هههههه تفضلو

و للمرق تاع الطعام كاين طريقة اخرى تختلف على هاذي ممممم رهيييييب هههه ،،كاش نهار انشالله نديره و نحطه موضوع

الى اللقاء حبيباتي في موضوع جديد من مطبخ ليزابال و طبعا دعوة خير بزاف عليا
سلاااااااامي لكن جمييييعاااااا