المقادير :
* 3 بيضات
* 1.5 ياوورت ممزوج لازم ممزوج أنا مالقيتش صومام جبت دانون ومن الاحسن طعم فراز او مشماش
* 1.5 سكر عادي علبة ممسوحة قد قد ( نكيل بعلبة الياوورت )
* 1.5 زيت علبة مانعمرهاش مليح ( نكيل بعلبة الياوورت )
* فاني
* 1.5 خميرة كيميائية
* 4 فرينة علبة ممسوحة قدقد ( نكيل بالعلبة نتاع الياوورت )
انا هنا عملت ضعف الكمية لانو عندي ثقة في خالتي ووصفاتها
إضغط هنا لرؤية الصورة بحجمها الطبيعي.
الطريقة :
* نحط في إناء ماء ساخن جدا ونخرج البيض من الثلاجة ونحطو في الماء الساخن حوالي دقيقتين ومن بعد نبدل الماء اللي راح يرجع دافي بماء ساخن آخر وننتظر دقيقتين ونستعمل البيض ,
* نشعل الفرن على 180° ونخليه يسخن
* نوجد الأواني اللي رايحين نطيبو فيهم المادلان ونحط فيهم لي كيسات ,
* نفصل الصفار عن البياض ( كي تفقسو البيض تحسوه دافي ) ونضرب الصفار مع ثلاث ملاعق سكر حتى يذوب السكر تماما ونتحصل على كريمة فاتحة اللون ونضرب البياض مع باقي كمية السكر ، طبعا نضرب البياض حتان يطلع مليح باش نبدى نضيف في السكر على دفعات ( انا حطيت البياض يتضرب في البيتران وضربت الصفار في صحن بالباتور باش نربح الوقت ) ,
صورة هذي المرحلة حذفتها عن طريق الخطأ ,
* نضيف للصفار الياوورت ونضرب شوية برك حتى تتجانس المكونات
إضغط هنا لرؤية الصورة بحجمها الطبيعي.
* نضيف الزيت ونضرب شوية برك حتى تتجانش المكونات
* نضيف الصفار لخليط البياض وليس العكس وهذي نصيحتي ليكم باش الكيك او أي تحلية فيها بياض وصفار جيكم خفيفة والبياض مايهبطش : انو تفرغو خليط الصفار كامل فوق البياض وتخلطو جربوها رايحين تلاحظو الفرق ,
انا تعمدت خفقت فقط ثلاث ملاعق سكر مع الصفار لانو دسم مايحبش يذوب فيه السكر وفي نفس الوقت البياض كي يكون فيه كمية سكر مليحة مايهبطش كي تخلطوه مع الصفار .
ايضا قلتلكم تسخنو البيض ( كي تفقسوه تلقاوه دافي ) باش كي تضربوه يطلع بسرعة والسكر فيه يذوب بسرعة وهذا سر نجاح ليس فقط الجينواز وأيضا الميرانق والكاستال لانو فيهم بزاف سكر لازم يكون البيض دافي باش يذوب مليح فيه السكر ويطلع مليح ثاني ,
إضغط هنا لرؤية الصورة بحجمها الطبيعي.
* نبدا نضيف الفرينة والخميرة على زوج دفعات ( الفرينة والخميرة نكونو غربلناهم مسبقا ) ونخلط بسباتولا أو ملعقة خشبية برفق من الأسفل للأعلى ( إذا عملنا ضعف المقادير نضيف الفرينة على ثلاث دفعات )
إضغط هنا لرؤية الصورة بحجمها الطبيعي.
وهذا هو القوام المتحصل عليه رغوي وثقيل ماشي سائل كيما اللي متعودين عليه
* اللي تحب ممكن هنا تزيد شوية حبيبات شكلاطة وتخلطهم في العجينة وماتخافوش مايهبطوش لتحت وإذا خفتو رمدوهم في شوية فرينة قبل لا تضيفوهم للعجين . وومكن تحشيوهم شكلاطة تحطو نص حبة شكلاطة نوعية مليحة فوق عجينة المادلان من بعد كي يطيب تهبط تدخل لداخل في قلب الحبة ,
* نفرغ الخليط في لي كيسات نتاع المادلان وندخلهم للفرن ونخليهم حتى يطيبو ويحمارو مليح ( انا يحمارولي من تحت وفوق بدون مانزيد نشعل من فوق )
إضغط هنا لرؤية الصورة بحجمها الطبيعي.
* كي نخرجهم نخليهم يبردو مليح قبل ما نخبيهم في علبة مغلقة باش ماينشفوش واللي ماتحبش المادلان ناشف تقدر إذا دارتهم في الليل كي يبردو مليح تثقبهم شوية من فوق بعود الاسنان وتسقي كل حبة بملعقة شاربات وتخبيهم في علبة الصباح تلقايهم ناشفين من الشاربات بصح تحسيهم منديين ماشي شايحين ,
* التزيين كل وحدة كيما تحب : شكلاطة ، كرام شانتيي ، نيستلي ، سكر ناعم ، معجون او تخليهم فرطاسين
شوفو من داخل خفيف يهبل وكي تعضو على الحبة باسنانكم يغوصو فيها كأنها اسفنجة والله روعة
إضغط هنا لرؤية الصورة بحجمها الطبيعي.
إضغط هنا لرؤية الصورة بحجمها الطبيعي.
نسيت نقوللكم ملاحظة مهمة : كي تضاعفو الكمية ماتضاعفوش الخميرة ديرو غير 2.5
جزاك الله خيرا
( تقرير عن مشاركة سيئة )، و الموجودة أسفل كل مشاركة .
2015-10-16, 18:37
العرض العادي
