كاب كايك الباونتي لعشاق جوز الهند .... طعم ولا أحلى

[إلهام07]

قررت بحول الله أن نرجع رجوع قووووووي هذو ليامات قبل لا تخلاص العطلة وخاصة انو قربو العشر الأوائل من ذي الحجة كاشما تتفكرونا بدعوة خير

حبيت اول موضوع نحطو بعد الغياب يكون لوصفة مميزة ولذييييييذة وحلوة كيما أنا خخخخخخ

وصفة الكاب كايك للسيدة أرزقي كانت هذا الكاب كايك ديرهولنا ماما كي كنا صغار هذي الوصفة راهي من التسعينات تخيلو واش قديمة وكل مرة نتفكروها أنا وأخواتي كنا نموتو عليها حوست في الأرشيف نتاعي لقيتها مكتوبة بالصح الكتابة قريب تتمحى عاودت كتبتها ليا
والآن راهي عندكم لعشاق كيك الشوكولا كانت ماما بكري ديرهولنا في كيسات القاطو الصغار ودير فوقهم شوكولا أما فكرة الحشو هزيتها من النت كي شفتهم يحشيو الباونتي كاب كايك حبيت نعمل وصفتي للكايك اللي تعجبني مع حشوة جوز الهند وخرجت رووووعة نكهة جوز الهند مع الشوكولا

هذي الوصفة كل من تذوقها تلقاوه فمو مجغبل بالشوكولا وياكل ويقول مممممممممممممم تهبل درتها في البحر الاأسبوع الماضي كي رحنا واش نقولكم الحرب قايمة والخاطوف ... اللي مخبي الصحن نتاعو في الخزانة اللي تحت البيفي ماعندكم ماتشوفو وزادو نوضوني في الليل قالولي قبل ماتروحي زيدي عاوديها عاودتها والفجر يأذن

الوصفة مخصصة لعشاق جوز الهند والشوكولا كيكة الباونتي طعم لاااااااااااااااا يقاوم ... ومن كثرة ماطلبوها مني في الفايس كرهت نعاود كل مرة نكتبها قلت نحطها موضوع ويستفيد الجميع

المهم ماتنساوش كي تاكلوها وتسمانو وتختخو وبطبطو وتطبزوا ماتنساوش تدعيولي دعوة مليحة خخخخخ

نبدى على بركة الله نعملها على شكل كايك في صينية وصفتنا لليوم :

كيكة الباونتي Bounty Cake
للكيك :
3 بيضات، 8 م ك سكر، رشة ملح، فاني، 8 م ك زيت،8 م ك حليب سائل،1 خميرة حلويات، 7 م ك فرينة معمرين مليح، 2 م ك كاكاو بني من النوع الجيد
للحشو : كاس جوز الهند ، أقل شوية من ½ سكر، 1 علبة ياوورت .
للتزيين : 2 علب شوكولا ، القليل من الحليب السائل
الطريقة :
1- نحضر كرات جوز الهند : نخلط جوز الهند مع السكر و نلمو بإضافة الياوورت بالشوية ونشكل كرات نتركهم جانبا .
2- ندهن صينية الفرن بالزبدة أحسن باش ماتلصقش ونرشها فرينة ( ممكن نستعمل صينية فرن عادية مدورة أو كاري أو مول الكايك المدور المثقوب في الوسط كما تحبو) والأحسن تكون ماتلصقش أو زجاجية و تكون شوية كبيرة مالازمش الكيك يكون عالي :
نضرب البيض مع السكر والفاني والملح مليح ثم نضيف الحليب والزيت ونخلط شوية ونضيف الفرينة والخميرة والكاكاو مغربلين
ونخلط جيدا بالباتوغ .
3- نفرغ خليط الكيك في صينية الفرن ونضع كرات جوز الهند فوق الخليط وندخلها لفرن مسخن مسبقا على 180°.
4- تخرجها من الفرن ونخليها تبرد ونصب عليها قاناش الشوكولا وتكون شوية جارية ماشي ثقيلة باش جي على شكل صوص (شوكولا مذوبة مع شوية حليب أو علبة دانيت )
4- نتركها تبرد جيدا ونقطعها وتقدم روووعة في الطعم .

وهذو صور المراحل :







صورة المراحل اللي درتهم كايك في صينية باش نقربلكم الفكرة فقط :




من داخل:




Bounty Cake
نفس الطريقة والمقادير ولكن نوزع الخليط في كيسات ورقية خاصة بالمادلان ( مانعمرش كيما العادة نحسب حساب حجم كرة جوز الهند) ويستحسن استعمال كيسات ورقية نوعية جيدة يكون حجمها أصغر من الكيسات العادية (قد ماتصغر الحبة يجي الكيك أخف )
ونضع وسط كل حبة كرة من جوز الهند وبعد مانخرجها من الفرن وتبرد نزينها بصوص الشوكولا .
ممكن نعمل الكاب كايك بدون حشوة جوز الهند ونزينو إما بالشوكولا أو بكريمة الشوكولا ونتحصل على كاب كايك شوكولا عادي











من الداخل مممممممممممممممممم سوغبغيز تنتظر اللي ياكلها ومايعرفهاش :





هذا عملتو كاب كايك عادي بدون حشوة جوز الهند و زينتو بكريمة الشوكولا (شانتيي طلعتها بدانيت شوكولا + قاناش شوكولا وكملت بالحليب البارد )
زينت بيها جوانب كيكة عيد ميلاد زكرياء طارو بيهم هوما الأولين من التارت لصقتهم على الجوانب بداو بيهم هوما الاولين والتارت في الوسط عملتها بنكهة الليمون :






وهذي نوعية لي كيسات اللي ننصحكم بيهم نوعية مليحة و فيهم كل الألوان وأصغر من الكيسات العاديين :



وهذي نوعية الكاكاو اللي نستعملو هايل ريحتو ريحة شوكولا تهبل :




سلام بطبوطاتي الحلوين .....

[RIMA.87]

و عليكم السلام و رحمة الله و بركاته ،
عودة ميمونة أختي الفاضلة إلهام ،جزاك الله خيرا و بارك فيك و في والديك و جعلك ذخرا لهما في الدنيا و الآخرة و أسأل الله عز و جل ان يرزقك من خيري الدنيا و الآخرة ،

مشكوووووووووورة على الوصفة باينة بنينة و خفيفة، شهيتينا،
جاري التطبيق بإذن الله ،

ربي يحفظك و يسترك و يجعل كل مجهوداتك في ميزان حسناتك .

درت الوصفة على شكل صورة حتى يسهل على الاخوات الاحتفاظ بها



تقبلي مروري اختي الهام الطيبة
اختك في الله RIMA.87

[فاتي 05]

عودة ميمونة اختي الهام ليك وحشة كبيرة يعطيك الصحة على الوصفة انا جربتها من قبل و عجبتني بصح بحرا الوصفة و ضرك هنيتيني يا مبدعة مع مزيد من النجاح

[إلهام07]

المشاركة الأصلية كتبت بواسطة RIMA.87

و عليكم السلام و رحمة الله و بركاته ،
عودة ميمونة أختي الفاضلة إلهام ،جزاك الله خيرا و بارك فيك و في والديك و جعلك ذخرا لهما في الدنيا و الآخرة و أسأل الله عز و جل ان يرزقك من خيري الدنيا و الآخرة ،

مشكوووووووووورة على الوصفة باينة بنينة و خفيفة، شهيتينا،
جاري التطبيق بإذن الله ،

ربي يحفظك و يسترك و يجعل كل مجهوداتك في ميزان حسناتك .

درت الوصفة على شكل صورة حتى يسهل على الاخوات الاحتفاظ بها



تقبلي مروري اختي الهام الطيبة
اختك في الله RIMA.87

بارك الله فيك اختي ماعنديش لابليكاسيون كنت حابة نخدم وصفاتي مشكورة

المشاركة الأصلية كتبت بواسطة فاتي 05

عودة ميمونة اختي الهام ليك وحشة كبيرة يعطيك الصحة على الوصفة انا جربتها من قبل و عجبتني بصح بحرا الوصفة و ضرك هنيتيني يا مبدعة مع مزيد من النجاح

أهلين فاتي بلاك تقصدي هذي اللي راحتلك الوصفة جربتها ايضا ومليحة :

[عصفور الجنة]

عودة ميمونة اختي دائما متالقة ومبدعة جربت البعض من وصفاتك جاو يهبلو خاصة مادلان جوز الهند وكعك النقاش امممممممم ربي يهنيك حنونة
اذا ممكن تعطيني وصفة تاع لي بيني تكون مليحة وخفيفة كيما انت
تحياتي في انتظار جديدك

[*توبــــة*]

لهلوووووووووووووبة يعجبوني مواضيعك شرح مفصل
هك نتخيلك تشرحي الدرس لتلاميذك ماشاء الله
نيالنا بهيك عودة... ودعوات الخير عندك ماديتي يا الحبيبة
ربي يعلي شانك ويعز مقدارك ويسهل امورك ويفرحك يااارب

[الصمت لغتي]

السلام عليكـــم ختي عودة ميمونـــة بإذن الله





الصرآحة الصرآحة جعت و انآ نقرى ف موضوعـــك ههههه وعد مني ليك رح نجرب الوصفـــة لانهآ رآئعـــة على مآ يبــــدو مشكورة من القلب و من أعمآق القلب على مشآركة الوصفة حبيبتي

[البدرية]

جزاك الله خيرا اختي الهاام على الوصفة حفظك الله من كل سوء

[ملاك ملاكي]

ااااااه يا مصييييبة اااااخ منك علاااه تعملي فيا هك طحتي على الجرح اممممم كوكو لا استطيع المقاومة ياجدك.... نخرج برك نشريه وباذن الله تشوفي تطبيقي اصبري عليا.... على مادرتي فيا روحي ربي يعطيك ويمنيك ويحقق لك ماتتمنايه أن شاء الله خاصة مع هذاك الشرح الكافي الوافي طبقي وغينيك مغمضين
مشكوووورة حبيبتي ودمتي متالقة لنا هاهاهاهاها

[شمس الملوك]

بارك الله فيك

[FATIHA131]

يعطيك الصحة اختي الهام بارك الله فيك و جزاك كل خير لما تقدميه لنا

[*فرح*]

راني جربتها يعطيك الصحة 💖
الفوق خدمت شوكولاطة للطلي نتاع أم وليد
مي حسيتها موسكوتشو عادي برك
و هاذوك الكرات كي صبحو نشفو .
شكراااا على الفكرة 💜

[jojo dj]

الهام الله يحفضك اخدميلنا تارت بالشوكولا على ذوقك*

[~ ...منــــــآل ... ~]

السلام عليكم و رحمة الله و بركاته
شكررراااااا جزيلا على الوصفة الرائعة
صراحة وصفاتك كامل رائعين - إبتسامة -
وصفة البريوش جربتها حتى حفظتها و معتمدة بإذن الله لعيد الأضحى
و راح نعتمد حتى هاذي على ما يبدو ههه
تحياتي

[samsouma70]

امممممم رائعة روحي ربي يفرحك