في دوامة

[مشكلتي]

السلام عليكم
انا فتاة ماكثة بالبيت مشكلتي اني عايشة في دوامة لااخرج منها لا اتقدم الى الامام ابدا ، المشكلة هي انو من سنوات تقدم شاب لخطبتي و لانو كان على قد حالو( شهرية قليلة و غرفة مع العايلة) اقترحو علينا ان تكون خطبة طويلة شويا و طبعا ابي مرضاش الا بعد عدة محاولات و اشخاص رايحين و جاينين عام و هوما يحللو فيه باه وافق على هاد الخطبة ، بعدها بسنتين الشاب دخل يعمل في مكان جديد مكانش يحلم بيه و راتب مكانش يتمناه حتا و شويا هكا بدا يتغير لا مكالمات لا تقدم في اجراءات الزواج غير اني خدام منيش قاعد منين نخلص اني نعاودلك و من بعد لا خبر يدخل لمواقع التواصل و يخرج لا سلام لا كلام وانا حسيت بهاد التغير مي ما لقيت ماندير و كلشي بان لما جا العيد و ماعيدولناش و لما اتصلت انا بيه لقيت رد غريب "مساء الخير ابقاي على خير " و بقينا هك حتا ابي راح لباباه و سقساه و تفاجا بالاجابة تاعو قالو ابني مش مجهز حالو و من الاحسن البنت تشوف مستقبلها . وانا كي سمعت هاذ الهدرة تشوكيت كي كان والو جا يتقدم و من بعد كي عاد خدام و شهرية مليحة و بالعربية طلعت بيه ظهر ماش مجهز حالو
من هداك اليوم و انا في دوامة عدت نحتقر روحي فهمت بلي منيش في المستوى الجديد تاعو غاضتني بزاف اني قبلت بيه و بظروفو و قلت المهم وليد فاميليا ودرك ظهرت منليقش ليه و ساعات نلوم روحي بلاك انا الغالطة معرفتش نتعامل معاه علاه غيري متخلاوش عليهم صح كنا مخطوبين مي مكانش كثرة الحديث و منيش قريبة منو خلاص كانت تبانلي قيمة و قدر ليا كي نخلي مسافة الاحترام و ساعات نحاسب روحي انا من قداه من عام مدرت والو في حياتي عندو الحق مانبانش خلاص قدام زميلاتو الجديدات ، حساباتهم فالانترنيت يمدو الخبر .
و الان راني في دوامة كل يوم في الانترنيت نشوف فالجديد تاعو شكون الي دار جام وشكون الي دارت تعليق وهوا ممخليش تحواس كل يوم لبسة كل يوم في بلاصة و التفلسيف من الفوق '' انا مانديش بصل انا نديها غزالة مام تجريني الحمد لله سبورتيف و نقدر نجري ...''و عبارات كيما هك .
و زادو عليا الاقارب و الجيران ( حومتي قريبة لحومتو ) ديما يسقسيو و يجيبو فالاخبار هاو راح هاو جا هاو باع هاو شرا اختو شافتلو فلانة امو ناوية تخطبلو بنت فلان هاو كتب هكا او قصدو عليك ... و كل يوم الجديد حتى عدت منخرجش من الدار و منحضرش فالاعراس ولا مناسبات منروح للمسجد لا للسوق غير باه منتلقاه لاهوا لا اهلو و تاني نتجنب التعليقات الجارحة و التلميحات المؤلمة من عند الي الناس يعرفوني .حتى اقرب الناس ليا خالتي كل متشوفني تقولي هكا خير هوا وين و نتي وين كل واحد يشوف مستواه .و زيد حتى العرسان الي جاوني من بعد واحد ماولى .و درك راني في حالة غايضتني روحي بزاف وكرهت حياتي .

[مصطفى_س]

السلام عليكم و رحمة الله

لم تذكري السن لكي نحاول مساعدتك اكثر
اكيد انت في العشرينات والله أعلم

هذا الانسان تغير قبل زواجه منك و هذه نعمة كبيرة أحمدي الله كثيرا
لانه لو تزوجت و ظهر معدنه بعد الزواج تكون الصدمة قوية

اليك الحل و هو بدأ صفحة جديدة مع الله و مع نفسك و تأكدي أنه هو الرزاق
يرزق من يشاء بغير حساب و ليكن الصبر مخرجك من هذا
هو يعيش حياته كما يحب فلم تفكرين فيه ؟قلت انك احتقرتي نفسك
صدقيني لو تواصلين تتبع خطواته و أخباره هنا تفتحين على نفسك
الاكتئاب و الهم و الغم و كل هذا من الشيطان

توكلي على الله الحي القيوم في كل حوائجك
و ليست الدنيا مبنية على هذا الرجل
فالرجال كثيرون الذين يخافون الله

استغفري الله كثيرا و الجئي اليه فهو الوحيد الذي يخرجك من كل هذا
و انسي هذا الشخص تماما لأانه أصلا نساك

[مراد سابقا10]

يا اختي مصيبتك مقارنة بمصيبة الاخرين هينة هناك من عنده سرطان وعايش عادي هناك من هو معوق وعايش عادي هناك من لا يملك قوت يومه عايش عادي .
انت التي تكبرين في الأمور صح هي تغيض الموقف لي صرالك رغم انه لا ذنب لك فيما حدث ولكن الحياة تستمر وحتى انبياء الله وهم الصفوة وتم خداعهم واذائهم وتم احتقارهم فما بالك بنحن الضعفاء .
افتحي صفحة جديدة وانسي الماضي ولتعتبري نفسك محظوظة انه كشف نفسه بنفسه فلو تزوجك
ثم طلقك كيف يكون الحال يومئذ لا تعيشي في الماضي وافتحي صفحة جديدة ولي باعك بالفول بيعي بقشروا كيما يقول المثل الشعبي .

[toulay]

وعليكم السلام ورحمة الله وبركاته
ببساطة هذا انسان ناكر للجميل ومخلوع وشبعة جديدة
كيما يقول المثل متخافش من الشبعان اذا جاع خاف من الجيعان اذا شبع
هذا كان مشتاق لكل شيء مشي كيما واحد شبعان شايف وعايف حتى حاجة ماتخلعوا
whaaaaaaaaaaaaat تحتقر روحك mais انت مهبولة ولا قاعدة تتبهلل ياو تهنيا منو بالعكس افرح وزيد تهنيتي من شخص كيفو
واش دير بيه قولي الله يعيشك
لا لا مشي غالطة هو ميستاهلش وحدة مثلك هو معرفش القيمة تاعك بصح الدنيا دالات وراها دور صدقني نهار يضربوا ريح الصحراء تبانلوا وقتها انت لمراحش تقيموا
درك خلاص ماتحوس عليه ماتبع فيه في مواقع التواصل ماوالو انسى الهم ينساك طيش عليك
وابدا صفحة جديدة وعيش حياتك كيما يلزم الحال وكاين اسياد اسياده فالسوق وخيرو في غيرو ومين يحبوا يحكولك عليه قولهم stop مكلاه تحكولي عليه وربي يسهل على كل واحد
واشبيك هذا غالقة على روحك واش يكون هو باش تحزن عليه لبحر والشكارة
بالعكس لازم تخرج وتحوس وتضحك باش تبينلوا بلي ماكش سامعة بيه اطلاقا
يا اختي صدقني ربي سبحانه مشافلكش فيها خير هي صح علابالي تغيض وتبقالك حرقة في قلبك بصح مين تشوف التصرف تاعو تقول الحمد الله هكذا ولا اكثر
كثر من الدعاء وان شاء الله ربي يعوضك
بالتوفيق

[أم رقية نسرين]

السلام عليكم
ختي هاد الدوامة نتي لمدايرتها لعمرك حبسيها درك تحبس مفهمتش علاه باقية تعمري راسك بيه
و مشي تقولي فالخطبة انا مكنتش نهدر معاه و انا الغالطة وووووو بلا منهدرو على الحكم الشرعي
راح الله لا يردو بان على حقيقتو هادا بهذا الطبع عمرو لايقدر يأسس عائلة
قلبي الصفحة و عيشي حياتك و مشي لي تلقايه من عائلتك او صديقاتك تبيني روحك مقهورة و حزينة قوي شخصيتك و اكثري الدعاء باه يعوضك ربي أحسن منو و اللي يمشي في طريق الحق ربي معاه

[زبدة ذايبة]

ما ديريش من الحبة قبة

هو يتقدم للأمام وانت حتى الشارع حرمتيه على نفسك

وكأن الجزائر مافيها غير هذ العبد

حساسيتك الزايدة خلاتك تتبعي أخباره

أرفدي روحك شوية

اللي باعك بالفول بيعيه بقشوره

عيشي حياتك

الحياة نحياها مرة واحدة

ونحي على روحك الكآبة

ربما الخطاب اللي جاو يشكو في أنك مازالكي متعلقة بهذا اللي راح

أطوي صفحة الماضي أو مزقيها

إذا عندك مستوى تعليمي حاولي تخدمي وش يناسب مستواك

وإذا كانت عندك نشاطات اجتماعية ديريها وزيدي عليها

ماتكونيش سلبية تجيبي المرض لروحك ولوالديك

أنفضي على نفسك لغبار

وجددي من حياتك

وما تخليهش يشعر ولو لثانية أن قراره بتركك كان موفقا

الدنيا للجميع كل واحد كيفاش يعيشها

ماتخليش روحك في المؤخرة

وماتعيشيش بروح الانهزام

بالعكس حتى وإن تلاقيتي بيه يوما ما ديري وكأنه نكرة وماكانش في حياتك

حاولي تكوني شجاعة ، وقوي نفسك واجعلي من المشاكل نقطة للانطلاق وليس نقطة للاختباء

وماتزيديش تسمعي أخباره

اللي تجيبلك لخبر وقفيها عند حدها

ماعندك حتى علاقة بيه

إنتهى

راح لحال سبيله علاه تعمري راسك بيه

أتمنى أن تكون كلماتي بالنسبة إليك واضحة

ربي يصلح حالك

[ايمان4]

احمدي ربي مئة مرة انه تغير قبل الزواج هادي اول نقطة

ثاني نقطة هاهو بان المعدن نتاعه يعني انسان شبعة جديدة و مشي تبدل الاصح انو هو هاك داير و غير مكاش صايب الامكانيات

انت واصلي نشاطاتك لي موالفة ديريهم عادي و انسايه مش حاجة لي تغمي روحك ف الدار على جالها و تكشفي والديك

اذا حاسة روحك ناقصة طوري من نفسك في اي حاجة فوماسيون تعليم جامعي تكوين مهني اي حاجة و عولي على روحك و في تلك الاثناء اذا جاك ولد لحلال اتزوجي المهم متبقايش مكتوفة الايدي تسمعي لاخباره الجديدة

[Om inesanis]

والله يا ختي غير ربي هناك منو وبأن على حقيقتو*
واحمدي ربي انو كانت علاقتك معاه سطحية لأنه لو كانت العكس الله يستر...
وخلي عليك هدرت الناس هوما يهدرو يهدرو الحل متعمريش راسك وشدي في ربي هو اللي يعوضك احسن منو أن شاء الله

[عثمان الجزائري.]

السلام عليكم و رحمة الله و بركاته، حقيقة لدي مجموعة من التعليقات على الحقائق التي ذكرتيها أعلاه، أولا سأحاول أن أضع نفسي مكان الخطيب الذي كان أول المتضررين بتقدمه لخطبتك و ذلك لرفضكم إياه لمجرد أنه لا يملك عمل بشهرية مليحة، و بعد أن أصبح " يحلل" كما ذكرت قبلتموه، و هنا أعتبرها إهانة لشخصه سواء شعر بها قبل أو بعد الخطبة، و رد فعله لم يأتي بسبب العمل و إنما جاء في ثوب الإنتقام لكبريائه، قد يكون طرحي بعيد لكن أعلمك أنك لم تخطئي شخصيا معه خصوصا في فترة الخطوبة لأنك قمت بالواجب و إبقاء العلاقة سطحية كان أفضل خصوصا من الجانب الشرعي، و أعتقد أنك إستخرت الله قبل الإقدام على هذه الخطوبة و هذا يعني أن الله إختار لك الأفضل فإطمئني، لا أدري لماذا تواصلين البحث عن جديده و تمرضي في روحك، فالحياة لا تتوقف على أحد و ما يخبئه لك القدر قد يكون أجمل، و بما أن قناعتك تقول أنه تغير بسبب منصبه أي بسبب المال فحجتك تكون أقوى حتى أمام المجتمع التافه....لذا أعيدي الثقة في نفسك و جددي حياتك مع الله أولا ثم برضا الوالدين ثانيا...رزقك الله زوجا طيبا تقر به عينك

[عسجدة]

هو عايش حياتوا يالطول والعرض وانتي قاعدة تكسري في راسك .
غدوى نوضي بكري وانعلي ابليس وصلي وادعي وقولي :
ياربي نسيني فيه وبعدني عليه.
متعرفيش ع¨ع الخير وين راه .
قيسي كل شيىء مور ظهرك .
وابدئي حياة جديدة .
هو يبني في حياتوا وانتي محبسة حياتك ....راه غير هو في البلاد .
تعيشي اختي اقفزي شوية على روحك واخطيك من هذي الجياحة تع
غضتني عمري و.....و......
خلاص درك خمي في المستقبل .
خمي كيفاش تبني حياتك وطوري
روحك خير منو بألف مرة .
قالك اللي بدلك بالفول بدلو بالقشوروا .
انا صحبتي تزوجت ومرضت بعد زواجها وطلقها وسمح فيها .
ودرك نساتوا وبنات حياتها وانتي
مزلتي موراه .
خلاص هذا خط احمر .
كي يرجع ليك انتي لا كانت عندك
ذرة عز مترجعيش ليه .
اخطيك منوا بلاك ربي يجيبلك ماخير منوا بألف مرة .
المهم راه جاي الصيف وراهم جايين لعراس اخرجي وزهاي وشوفي الناس بلاك تشوفك كاش عجوزة تديك لابنها ......هههه
المهم ادعوا الله ان يرزقك زوجا صالحا .