يأكلني الندم

[مشكلتي]

السلام عليكم
أنا شاب في بداية الثلاثينيات، متزوج منذ حوالي سنة تقريبا زواج تقليدي، الوالدة هي لي اختارتهالي وللصراحة الفتاة ذات اخلاق ودين.
المشكلة تاعي بدات منذ حولي أسبوعين، كنت خارج من حانوت، حتى شفت واحدة كانت تقرى معايا في مرحلة الثانوية، ومعها سيدة كبيرة في السن قالت لها "ربي يجيبلك برنوس الستر والراجل الصالح لي يستاهلك"
أنا في ذيك الدقيقة حسيت الضو ضربني، ما كانش علابالي بلي مازال ما تزوجتش
أنا كنت معجب بيها من مرحلة الثانوية، وبعد البكالوريا ما زدتش سمعت عليها خبر، وهي بنت ما شاء الله ملتزمة وماكانش عندها حتى هدرة مع زملاءنا الذراري، حتى انا عمري لا تكلمت معاها ولا بينتلها إعجابي، وكنت متمنيها تكون حلالي
ولكن بسبب الظروف ما قدرتش نتزوج حتى وصلت لبداية الثلاثينات، وكي قررت نتزوج قلت باينة تكون تزوجت وبولادها، فطلبت من الوالدة تخطبلي.
وحاليا الندم راه ياكل فيا، علاش ما سقسيتش عليها قبل ما نخطب، علاش ما صليتش صلاة استخارة ولا دعيت ربي يرزقني بيها زوجة صالحة، حتى ولو ما كتابتليش على الاقل نكون حاولت، بص حاليا راني نحس روحي أنا السبب لي ضيعتها من يدي.
من داك النهار مازدتش شفتها ولكن مازالها في عقلي.
هل من حلول أو نصائح باش نخرجها من عقلي؟
خطرات يجي في بالي نتزوجها زوجة ثانية، ولكن ظروفي المالية ما تسمحليش.
هل يمكن مع الوقت ننساها ونكمل حياتي عادي؟

[فتيـحة]

السلام عليكم
أولا نتمنى انو لي صرالك ما يكونش أثر على طريقة تعاملك مع زوجتك، يعني تعاملها بجفاف ولا تتسبب عليها، لأنو هي ما عندها حتى ذنب وخصوصا كي قلت بلي زوجتك ذات اخلاق ودين، وماتنساش بلي نتا لي مشيت حتى لدارهم وخطبتها بكامل إرادتك وحتى واحد ما فرضها عليك.
ثانيا الموضوع موضوع وقت، وعلى حسب قولك ما شفتهاش بعد هذاك الموقف، وما كانش احتمالية كبيرة تزيد تتلاقاها
لذلك الأفضل تشغل وقتك، كل ما تحس روحك تخمم فيها نوض اخدم حاجة تلاهي بيها روحك، أو أخرج تلاقا صحابك ولا تفرج فالتلفاز، المهم ما تخليش خيالك يسرح معاها
وجرب التقرب من زوجتك وامضاء المزيد من الوقت معاها، ذكر نفسك بالايجابيات لي كاينة فالزوجة تاعك واحمد ربي أنو طحت في بنت ذات خلق ودين
مع الوقت راح تولي مجرد ذكرى وممكن حتى تنساها تماما، خصوصا كي ربي يرزقكم بالأولاد ان شاء الله

[اسماعيل 03]

المشاركة الأصلية كتبت بواسطة مشكلتي

هل يمكن مع الوقت ننساها ونكمل حياتي عادي؟

أكيد أخي الكريم
وقد لاتنساها ولكن لايبقى لها ذلك التأثير الذي تشعر به الآن
ما تشعر به هو غريزة ومطلب مجبول عليه الرجل بأن تحركه نفسه نحو طلب الزواج من كل امراة تعجبه
فأنت لو حصَّلت هذه الفتاة فنفسك ستتوق لغيرها لأنك على الأغلب ستراها بعد الزواج بغير العين التي تراها بها الآن.

[Rofrof]

بصح راك غير انت في الحكاية وين راهي هاد الطفلة ، ممكن الطفلة هادي اصلا مارحش تقبل بيك وحتى لو كان ماشي متزوج بالاك ماتعجبهاش ولا ماتقبلش بيك هكا برك كونها مازال متزوجتش ماشي معنتها راهي تسنا فيك انت بالضرورة.
ممكن لو كان تعرفها ماتتوالموش فالعقلية يعني احتمال انو علاقتكم تنجح يبقى احتمال ماشي ضمان هادا اصلا لو كان جيت عَزْبْ وينك وانت متزوج !
وانت ماحبيتهاش مجرد فكرة جاتك في راسك لو كان حبيتها تع الصح* تهدر معاها ولا تتقدم لها وتقولها نحط اليد وسنايني حتى نوجد روحي .. ولا ع الاقل نهار تخمم تخطب تروح تسقسي عليها وتحوس عليها ايدا تزوجت ولا لالا ، ماشي تقول في راسك بالاك تزوجت وتروح تقول ليماك تخطبلك ..
يعني هادا غير الشيطان ولا الفراغ راهو يديرلك هكا*
ولانك مازال ماحبيتش مرتك علابيها قلبك شغل فارغ حابب تعمرو بقصة حب* هادي للاسف من بعض سلبيات الزواج التقليدي ) خلاف الزواج التقليدي ممكن تكون قصة حب عفيف بدون علاقة غير شرعية طبعا ) المهم انعل الشيطان وحاول تنجح زواجك راك عندك عام برك والعام الاول عادة يكون احسن عام للحياة الزوجية ممبعد الناس عندها ماتشوف. ولا تتسرعا في الانجاب*
الدنيا هادي طويلة وفيها مفارقات عجيبة*
استعن بالدعاء بش ربي يكتبلك الخير*
ومادمت غير قادر ماديا ماكالاه تتحسر ولا تخمم في التعدد الخيرة فيمااختاره الله*
موفق*

[متفائلة في زمن الياس]

هذه نزغة من نزغات الشيطان فاحذر واياك من الاسترسال في تلك الخواطر والافكار اولا لانها محرمة قطعا وثانيا تزيد في العذاب النفسي وفقط فاغلق عنك ذلك الباب لان الشيطان يستغل كل فرصة لبني ادم ليفسد عليه حياته وخااااصة التفريق بين الزوجين فارضى بما كتبه الله لك واجعل بيتك ذو مودة ورحمة فالخيرة فيما اختاره الله

[ع.عيسى]

ماهيش من نصيبك ...حتى وان عاد بك الزمن الف مرة وحاولت تتزوجها بالف طريقة رايحة تبطل بالف سبب ..لذلك تحاول او لا تحاول نفس الشي ..الزواج قسمة ونصيب ولا تختار الا ما اختاره الله لك .

[ADERAL]

اعقلها و توكل على الله

[نورسين.داية]

السلام عليكم

مجموعة أسئلة إستكشافية تحليلة : ما هو سبب طرح فكرة الزواج بها ؟
لا تقنعني أنك أحببتها .................أبدا لن أصدقك

يعني لو كنت مقتدر ماديا سوف تتزوجها ؟؟؟

هل هي سوف تقبل بك ؟
هل هي مخطوبة ؟ متزوجة ؟ مطلقة ؟؟؟؟؟

ماهو هدفك من الزواج أصلا ؟؟؟؟ أسرة ؟ أطفال ؟ .......شكل ظاهري ؟ .............

أخيرا مثى و ثلاث و رباع ..............

تذكر أن تجد حلا جدريا لكيفية إستخراج أي فكرة من عقلك تريد أن تلغيها من عقلك ، لأنها سوف تكون احدى عقد حياتك التي سوف تأرقك طويييييييلا مع كل زهرة

بالتوفيق