تسهيلات اللغة العربية باك

Omaima mina · 2018-05-02, 18:45

بسم الله الرحمن الرحيم .
السلام عليكم أحبتي .
في هذا المنشور أوضح للذين لم يبدؤوا مراجعة العربية ويريدون اختيار النثر .
ركزوا معايا مليح .
شوفو عندكم في امتحان العربية 3 حوايج البناء الفكري عليه10 نقاط كل أسئلة تاعو من النص تجاوبو عليها ، كاين حاجة كل عام تجي فيه هي التلخيص يقولك لخص النص ، التلخيص عليه 2 نقطتين . كيفاش تلخصو النص ؟ كي تلخص نص ترجع الحجم تاعو الربع ، يعني يكون فيه 20 سطر ترجعها 3 سطور ، لازم تلخيصكم لا يتجاوز3 سطور باش تدو نقطة ، وسؤال لي يجيكم ايضا في البناء الفكري وهو سؤال كل عام كاين يقولك حدد نمط النص، نمط النص غالبا في النثر يكون إما وصفي أو حجاجي أو تفسيري ، حجاجي يكون في المقال بزاف لانو الكاتب يكون راح يقنع القارئ بموضوعه وفكرته ، وتفسيري يكون بزاف في النثر العلمي لي يهدر على ظاهرة علمية معينة ، وباقي الأسئلة جوابها من النص ويزيدك معاها ما نوع النص أو الفن الذي ينتمي إليه النص وفي النثر يكون واحد من هادو 3 : إما مقال أو نثر علمي أو نثر علمي متأدب .
وبعدها يجي البناء اللغوي عليه6 نقاط / فيه سؤال يجي كل عام لي هو الإعراب ، يمدلك زوج كلمات تعربهم وزوج جمل . إعراب الجمل راني نشرتو من قبل حوسو عليه مهم بزاف يجي كل عام .
والسؤال لي يجي أيضا دايمن الأسلوب يقولك مثلا ما الأسلوب المعتمد في النص أو يمدلك جملة معينة ويقولك ما نوع الأسلوب فيها ، والأسلوب نوعان لا غير إما خبري أو إنشائي وراح نعاود ننشرلكم هاد الدرس راني حطيتو من قبل وعليه 1.5 أو 1 .
شوفو الأسلوب الإنشائي عندنا نوعين :
طلبي : يعني كي نقولك هداك الكلام راني نستنى في حاجة منك يعني طلب .
وفيه ما يلي :
الأمر : كي نقولك : اقرأ فالقراءة تنمي العقل . هنا راني نطلب منك تقرا على هدا قلنا طلبي .
الاستفهام : هل ستتوقف عن التأجيل ؟ هنا راني نطلب منك جواب علبيا قلنا أسلوب إنشائي طلبي .
وكاين النداء : يا معشر الطلاب تفاءلوا .
النهي : لا تفقد ثقتك بنفسك .
التمني : ليتك تبدأ في المراجعة .
هادو قاع طلبيين ، كي نهدر معاك يعني راني نستنى منك حاجة تلبيها لي .
وعندنا غير الطلبي :
التعجب مثلا : ما أروع الصدق . هنا راني نتعجب برك منيش نطلب في حاجة .
المدح أو الذم : نعم الرجل هو : راني نمدح في الشخص بدون انتظار طلب معين .
القسم : تا الله لا ينجح الكسول . راني نقسم ومرانيش نننتظر في طلب معين .
كي يعطيك جملة فيها حاجة من هادو كيفاش تجاوب ؟؟
تقول : أسلوب إنشائي طلبي جاء على صيغة ( كي قلنا طلبي يعني الصيغة تكون إما أمر ، أو نداء أو استفهام ، أو تمني أو نهي ) غرضه : ( الغرض حسب الجملة يقدر يكون غرضه النصح والإرشاد ، غرضه التأكيد والتحذير ، الغرض الحاجة لي تفهموها من الجملة كتبوها في جملة مفيدة )
وكي يكون غير طلبي تقولو : أسلوب إنشائي غير طلبي جاء على صيغة ( إما التعجب ، القسم ، المدح ) غرضه: تقولو واش فهمتو من الجملة ، يعني الكاتب واش هدفه من الجملة هاديك .
هذا فيما يخص الأسلوب الإنشائي ,
نروحو ضروك للخبري : ونقولو أسلوب خبري وليس إخباري ، لي يكتب إخباري يدي صفر .
كي يعطيك أي جملة ميكونش فيها نوع ملي قلناها ، يعني مفيهاش أمر ولا تعجب ولا نداء ولا قسم ,
تكون جملة عادية تخبرنا على حاجة معينة .
هدا هو الخبري :
مثلا كي نقولك : القراءة غذاء العقل ، الجو جميل ، الصدق خلق نبيل ، طالب العلم الحقيقي لا يغش .
هادو قاع راني نخبر فيك بيهم ، يعني قتلك القراءة مفيدة والصدق حاجة مليحة و.....
كيفاش تجاوبو : تقول أسلوب خبري غرضه ....... وتكتب في الغرض الجملة لي فهمتها .
تجاوبو بهاد الطريقة ، ويجيك ايضا سؤال آخر من القواعد تاع البرنامج مثلا يقولك استخرج من النص صيغة منتهى الجموع أو جمع قلة أو ....
وعندنا بعدها التقويم النقدي عليه 4 نقط والتقويم النقدي الخاص بالنثر سهل سهل جدا لازم تفهموه مليح وتحفظو باش تجيبو 4 نقط بكل سهولة . شوفو معايا واش فيه ؟
النثر النص تاعو إما يكون مقال وإما نثر علمي بنوعيه سواء نثر علمي أو نثر علمي متأدب . هذا واش يجيكم فيه ، كاين القصة والمسرح ، عندهم مدة طويلة طويلة مجاوش إما يروحو مع العتبة ولا الأساتذة ميلحقولهمش في البرنامج .
يعني تركزو على زوج حوايج النثر العلمي والمقال ,
والمقال كان يتكرر سنوات على التوالي ، مثلا جاء في 2015 , 2016, 2017 .
إذن بلاك هاد العام يجيكم نثر علمي . والله أعلم
لمهم كي تجو تراجعو تقويم نقدي عندكم هاد النقاط :
المقال : تعريفه ، مراحله ، أسباب ظهوره وأهدافه ، رواده ,
النثر العلمي : تعريفه ، أنواعه ، رواده ، خصائصه .
وتراجعو خصائص أدب عصر الضعف وأسباب ضعف الأدب لأانو النثر العلمي ظهر في عصر الضعف ، ربما يقولك في أي عصر ظهر النثر العلمي وما خصائص أدب ذلك العصر ؟
وتراجعو خصائص المدرسة الكلاسيكية والرومنسية لأانو كاين كتاب كتبوا في المقال وعندهم شعر ، يقدر يقولك إلى أي مدرسة ينتمي الكاتب .
مثلا ميخائيل نعيمة يجيك في المقال ، هو ينتمي للمدرسة الرومنسية .
وحلوا النصوص لي جات في العوام لي قبل باش تشوفو طريقة الأسئلة .
عندكم نص لمالك بن نبي ، كاين نص لطه حسين / كاين محمد أمين . هادو قاع كتبوا في المقال
نرجعو للنقطة المهمة كيفاش تبداو تقراوها
سجلو في كراس قاع المعلومات لي تخص التقويم النقدي لي قلت عليها وبداو تقراو فيها ، خصصوا لها يوم قراو فيه كلش ، لي يساعدكم سواء في الليل او النهار .
وبعدها روحو حلو مواضيع سابقة تلقاو فيها طرق الأسئلة الخاصة بالبنا الفكري وحوسو على تصحيح الموضوع شوفو طريقة الجواب تولي عندكم نظرة ولمحة تقدرو بيهم تجاوبو على أي سؤال بنفس الطريقة .
وبعدها روحو للقواعد لخصوها في جهة اخرى من الكراس ، ركزو على إعراب الجمل مليح والأسلوب .
متقدروش تراجعو الدروس برك هدا غير كافي لازم تحلو أكبر قدر من المواضيع باش تتدربوا مليح نهار الباك يروح لكم الخوف وتكونو جربتو من قبل حل موضوع .