ياربـي ياخـــــالقي عبـــدك راه نكب *** نرجاك يامول العزة تداوي حـــــالو
طــــــاح الشيب ع النـــواظر اشـــهب *** ذا رهــــــدان قطــا روس اجـــــبالو
منيـــــن دار الفلك والحـــال تقلـــــب *** اصعابت ايام ودقايق عنـــــا اطوالو
تمســـــات عنــــــا شمـــس المـــغرب *** وغــــاب البدر وليــــالينا اكــــحالو
طـــــــاح القيــــــم رعــــــدو سحــب *** يضــــرب زندة وبــــروق يشــــــالو
الريـــــح المسرد عن ترعتــــنا هـــب ***طيــــــح سورنا وجنــــان دهــــمالو
خدعــــــتنا الغــــرارة فـــي عز الاب *** منيــــن ختلتنا راها صـــــــدت توالو
صـــــــهيب وليدي لســــع يتكــركب *** صـــغير مسكين ما يعـــــــــرف والو
عـــــــشا يتبــع في الوحش الــهارب *** منـــــين يطــــل راه يجــــــيه قبـالو
عــــــادت المدامــــع بغزارة تكـــــب *** نعــــت المـــــزن مجــــــهد هوطــالو
ظـــــــفر الدمــعة في خدودو يـــندب *** هــــردهم بادي من روس نجــــــــالو
حلـــــــيلو كميـــــتي جــــوفو لــهب *** نســــــفات الشوق قاديــــة مشـعالو
لــــي كان هنـــايا خــــلا المضــــرب *** وخـــــلا فـــراش يهشـــــــم تخمــالو
طيـــر عقاب في شامـــخ مصركــــب *** تخـــــشاه جبال ميـن يتعنى عـــلالو
سبــــــع الهـــــــدة ع الترعة يلــولب *** ما تحـانكش جيرتو عكلية ترجــــــالو
اليــــوم هاجــــــر الوكــــــر قصــــب *** طـــــار تعـــــلى ودرق عــــنا خيالو
المراســــم تضابــــح لونها اشـــــحب *** الوكــــر الزين مصـــباحو طفـــــــالو
خبــــــر مشــــوم في الشــلف تقلـــب *** وهـــــــدت قــــــع قواشي توالــــو
قالــــــو طيـــركم طاح في المنـــشب *** صـــادو كماش الموت مرشق نبــــالو
اضيـــمي يوم مـــوتو قداه مغضــــــب *** تلاقـــــات فيه محاين وهموم اثـقالو
فجــــعنا وطارت ظلـــفة من القلــــــب *** اتفـــــتت اكبادنا والمــلامح اكـحالو
تمســــى ذاك القـــــمر عنــــا قــــرب *** ونجوم في ســــمانا ماعـــادو يلالو
صهــــيب مولفو في حجــرو يلعــــــب *** وبعــــد فراقــــو ما عادت تــــحلالو
يبكـــــــي بكـــــي غير مزن اصـــــب *** ويــــــرقي رقـــــي ذا البر زلـــزالو
ياصهيب وليـــــدي ذا ربـــــي كتــــب *** ذا امــــــــر المليك واعص تبـــــدالو
حكـــــم الرايـــــد عنــــا راه اجــــهلب *** واش تصــــالب في لي كبير بكـمالو
الامـــــر المزمم مايفــــيد فيــه طــــــب *** ولاعقـــــار قنــــدوز من ثمة تيجالو
لــــي صد عــنا مايـــوليش يرقــــــــب *** يبـــــــقى في لشـــواف غير خـيالو
زين الصغات ماتعيد فضــــلو وتحســب *** والبـــدر الطالع بلــسلوم ماتصــفالو
الرجـــلة والنيــــف ذو عــــــز المكسب *** والملـــيح لامات حي تتـــعاد خصالو
الصـــــبر ياولدي للمـــــومن واجــــــب *** والمـــكتوبة حكمـــات بعدها تبقالو
انـــــا مــــــثلك رانــــي فــاقــــد الاب *** جرحـــي يا مـــــعتاه دمومو ســالو
خلاني فـــــــي حـــــالة ما تعـــــــجب *** فـــي وسط الصـــدر دق مشــــعالو
واش يقــــــول لــــي بقـــــا متغـــــرب *** واش يــــــدير لــــــي خطــــاه دلالو
يصــــبر للمحنة ويرجا فــــــي الـــــرب *** يغطـــــيه برحمتو ســترو و حيـــالو
هـاذي الدنيـــــا شقـــــفة وتتـــــــقلب *** كل عــــــبد علـى عقــــوبة افـعالو
قـــــداه من حاكـــــم كان يرهـــــــــب *** وقـــداهن قايد كــان شايع بابطالو
وقــــــــداه من غني دينـــــارو ذهـــب *** كحان صدادو خلى اهـــــلو ومـــالو
يعيـــــــا يجري في الـوطا والعرقـــب *** غــــــير لي كاتـــبو المولـى ينـــالو
سعــــــد الزاهـــــد في الدنيا مرتـــــب *** مادي ليه عوين يـــــزكي اعــــمالو
الله يصــــــبرك يا وليـــــدي صهيــــــب *** ويســـــلك غزلك من بــعد تـخـــبالو
جمـــيل الرحمة والغفران لينا مطــــــلب *** وجنـــة الفردوس بربي جملة ننـــالو
بقلمي(زفزافي الحاج)
( تقرير عن مشاركة سيئة )، و الموجودة أسفل كل مشاركة .
2016-02-23, 18:22
ياصــهيب
العرض العادي
