راني قريب نهبل ساعدوني

[مشكلتي]

السلام عليكم عاونوني يا خاوتي
في دارنا 3 بنات وانا كبيرة مهم والله كل يوم نبكي علاه دوك نقولكم
انا نضلي نقضي غغسل ونتواياج وهوما يقعدو يشوفو فيا تقول ضرتهم وحتى امي معهم علاه ومعلاباليش دارنا كبيرة وعريضة بزززاف شوفو والله عظيم نوض صباح نروح نقي شومبرة وايا نروح نتواياج وهوما يدو صوالح خفاف يكملو ويشعلو ميكرو وبورطاب ويقعدو مجمعين وانا نظلي نقضي مكاش لي يجي يطل عليا ولا يقول نسيق معاها نتواياج انا من نسمع ضياف جايين نقضي دار كامل نسيق ونخمل وديكوراسيو ومن تهدر عليا امي تقولهم تع رقدام وخواتاتي اخرين تقولهم يضلو يقضو والله عظيم مع هذا تعب نقصت ما فيا والو مرات نقول هاذي دارنا اذا مقضيتهاش يشكون ينقي
وخطرة قتلهم اقضو معايا عاونوني انا منقدرش لازم معاونة يقولولي انت خفيفة في قضيان اقضي روحك من يجو ضياف يباتو عندنا يخلعو فيا يقولولي الله يبارك مع اني صغيرة في عمري لكن قضياني تع وحدة متزوجة في دارها
اعطوني حل والله ما سبت ما نقول عيت نبكي مع اني ندس في قلبي منحكيش قتلهم صباح اقضو وعاونو وحشية حلو فايسبوك جمعو قسمو وقتتهم والله ما يصنتو عياو ويخطبو فيا قاتلهم امي ما تقضي ماوالوو تعييكم وحدة تقربلي قاتلها معليش انا شفتها وشفت قضيانها
والله تقول راني عند عجوزتي ما شي هاك مع انو متزوجات يشكو بلاك عند عجوزتي وحماتي نصيب بلاك رحمة والله ما تغيضك عند اهل زوج لانهم من تزوجتي باينة تقضي وتعاوني الخ لكن دارنا هاك والله راني نحكي ونبكي
مالقيت ماندير اعطوني حل عاونوني يلقاو غبار يقعددو يشوفو فيه يلقاو ضياف يقعدو يجمعو ينساو فطور قهوة كلشي نضلي نجري لهنا لهنا معلابالهم بوالو وحتى راهو صغارر يتعلمو غير في تبهليل في قعاد من يديرو ديار كي يصرى والله بارح من شفت هكذا وليت نطلب يجي ولد حلال ونتزوج ونقضي غاديك ونخمل على راحتي
مرات نقوق لازم ندير حيلة مثلهم بصح نعيا منقضيش نهار نحس روحي فاشلة والفت قضيان وتخمال ومرات يقولولي انت كبيرة وام ثانية انت تقضي وحنا نريحو مع امي معاهم دير فطور وتجي تريح تقولك تعبت
عاونوني بغيتو ربي اعطوني حلول وان شاء الله يدرجو موضوع في اقرب وقت

[محارب الحمق]

مانكدبش عليك الاخت مشاكل النسوان بين بعض تعبني كي نقراها ونفشل حتى نعلق عليها. وش راح نقلك اللي فيها الخير ربي يجيبو ليك في اقرب وقت. بعبارة اخرى: المسألة ومافيها انك في سن الزواج ولديك رغبة هائلة في الزواج والاستقلال ببيتك. ربي يجوزك بولد لحلال

[نُـون]

سلام ورحمة
يقولو الدالة تفك الحالة
يعني وزعي المهام وهني بالك وهنينا
ما تبكي ما تعيطي
اليوم دالتي (دوري) وغدوة دالتك (دورك) وبعدها دالتك
وارتحنا

[إكتفآء]

السلام عليكم

اختي انت منا تشكي وتقولي تعبت من شغل الدار
وتقولي بعدها كي مانقضيش الشغل نفشل لاني والفت الشغل
فهنا عندك شوية تناقض ماعلينا منه

مدامك كتبتي هنا فالاكيد راكي عيانة من الشغل
راح ننصحك نصيحة تنفعك
قولي لامك تقسم لكم الشغل على العدد الموجود واخدمي جزءك وانتهت الحكاية
وكل هذا يتحاسب على حصته
بقات في اخوات يخدموا او يقعدوا هذي مسؤولية الام والاب
مسؤوليتك تنتهي عند انجاز شغلك وفقط

[بـــيِسَة]

أختي معليش قضيان الدار و باش تتعلمي تاني
تمام
و لازم تجمعي مع الاخوات و الام و تقسموا العمل
المعاونة تغلب السبع كيما يقولوا
مثال انت سيقي و وحدة المواعن و وحدة الغسيل تع الملابس و هكذا و ماماك الطبخ
ربي يجيبلك مكتوبك و بالتوفيق .

[أم رقية نسرين]

شوفي ختي نتي باينة إنسانة طيبة بصح اسمحيلي نقولك نتي لي ولفتيهم تخدمي وحدك ... دركا بدلي عقليتك و اقعدو مع بعض و اقسمو شغل الدار بالدالة قرري تخدمي دالتك برررررك مليحة ليك و لخواتاتك يتعلمو شوية
ربي يرزقك الزوج الصالح لي يهنيك

[ريتال2]

سلام اختي

نصيحتي اليك وهي تتفاهمي معاهم وتقسمي مهام وكل يوم تقضي شيء هكذا ولا احد يعيى وتكوني متساويين ربي معاك

[amialamia]

و الله انا تاني نفس المشكل مع اختي انا ندير كلش و كي نقولها عاونيني تبدى تزبط وجهها و تخبط علينا

[ابو سليمان10]

هذا المشكل اصبح منتشر...الام تزير البنت الاولى اما الصغيرات فيقضين اوقاتهن في الانترنت...نعم هو امر متعب و يحز في النفس لاكن الاخوات راهم يضرو انفسهم دون علم لانهن لن يصبحن ابدا نساء حقيقيات و يتحملن المسؤولية و مثلهن كثيرات جدا...اما انت ما شاء الله العكس

[عسجدة]

بارك الله فيك
شوفي اختي هذي يسموها حقرة وانتي واش راكي ديري هبال ، انتي انسان من حقك تريحي ماكيش بونيشة ولهذا نفضي الغبار على روحك من ظروك ، وغدوى كي تتزوجي العجوزة واللوسات ياكلوك انتي .
ولهذا اول خطوة ديريها هي تضربي وحد السمانة وانتي قاعدة ديري روحك مريضة نهار كرشي نهار راسي وهي رايحة وشوفي واش يديروا ، كي تدري الغبار ياكلهم من العينين متنفضيش يدبروا راسهم ، علابالك درك ماماك متزوجكش غير بالسبة الشغل ، اليوم بونيشة على خواتاتك وغدوى على نساء خاوتك .....
ديروا الدالة في كلش حتى في طياب القهوة حب اللي حب وكره من كره.
مليحة هذي انا نخدم واختي تفيسبوكي والله غيرى قلبت الدار على ريسانهم .
اختي لازم تتعلمي مايكلكش قلبك مغسلوش المواعن خليهم لا بغاو يقعدوا شهر بلا غسيل .
خليهم يتعلموا يتحملوا المسؤولية معاك.

ايه درك هما يتزوجوا وانتي اقعدي تتبونشي وتغسلي وتسيقي .
يااختي والله لا شغل الدار يقنط ولكن لازم كل واحد يلزم حدودوا .

احنا كنا في بيت وحدة ونساء عمومي و جدة احنا لبنات دارتنا دالة مع نساء عمومي حتى وكي جبنا نساء خاوتي وكناين عمي وداروا دالة وانتما غير شوية وحاصلين في تقسام الشغل .

روحي اختي ديري اجتماع طارئ وديروا دالة ولا محبوش ديري دالة في راسك ......

سلام من قلب يحب السلام

والله لا قلقتيني ....

غير نحي من بالك ان العجوزة ستكون ارحم من والدتك ، لان العجوزة تحب بناتها فقط والله غيرى طيراتلك اللحم الا من رحم ربي
بالتوفيق

[Fifioo]

وعليكم السلام
ربي يفرج عليك اختي
صراحة انتي لي ولفتيهم لانوا خواتاك الصغار يلقاو كلشي مقضي فلاه يتعبوا رواحهم هوما
الله غالب هذه عقلية تع بنات ظرك و امك تقول عندي بنتي قايمة بكلش و تحب تخدم خليها
ونتي راكي تهلكي في روحك قبل ....كي تتزوجي صح تلقاي روحك عارفة حوايج مي تلقاي صحتك في هاوية
ومكانش لي يرحمك الا اذا كنت بدار مستقلة وحدك ....لانوا صدقيني عن تجربة شفتها قريبتي كانت في دارهم دايريين دالة
ومتعاونين حتى من صغار لي في ابتدائي يخدموا يعانوا مكانش تفنيين ذا و كي زوجت زعما عارفة حوايجها و فحلة و عجوزتها قاتلها متعرفي والوا زعما راها قريبة ليها و كانت بكري تشكر فيها ....لذا انتي اقفزي مع روحك و ديري واجبك لي هو جزء
وكل وحدة وش دير لعدتي نتي كبيرة و ام ثانية قوليلهم مالا اسمعوني و هاني نعلم فيكم
مش ام ثانية غي في خدمة كاملة
وان شاء الله اذا كنت في مقاس زواج يجيك ولد الحلال لي صح يقدرك
اما عجوزة تلقايها تحن عليك هاذي غي نحيها من بالك حتى وا ن كااااانت ما شاء الله عليها و متظلمش
الحل و بكل بساطة
قسموا الدالة ووقت الراحة يدبروا راسهم فيه

[ريشة خير]

وعليكم السلام ورحمة الله

ربي يطمن قلبك أختي أحببت أن أقول لكِ أنك لست وحدك تعانين من هذه الحالة بل تقريب أغلب العائلات التي تتعدد فيها الفتيات أو النساء

ربما هناك حلول كثيرة أفضلها تقاسم الأدوارلكن هناك الكثير لا ينصاع لذلك ولا يتقبلالأمر خاصة عندما لا يأتي من الأم. في نفس الوقت لا يمكنك أن تزعجي والدتك لمجرد عمل كهذا لأنك ستندمين.

بالنسبة لأمر الزواج والشكر وما لذلك.. بالفعل هناك هذه الأمور ربي يهدي بعض الأولياء ويوفقهم للكلام الصائب

لكن أمرين فقط أردت أن أقولهما لك؛
ما كتبه الله لك تأكدي لن يمنعه بشر بكلامه ولا فعله
وما لم يكتب لك لو اجتمعوا جميعا يمدحون ويثنون لن يفيدك فيه من ذلك شيء عَنْ ابْنِ عَبَّاسٍ ، قَالَ: " كُنْتُ خَلْفَ رَسُولِ اللَّهِ صَلَّى اللَّهُ عَلَيْهِ وَسَلَّمَ يَوْمًا،

فَقَالَ: ( يَا غُلَامُ إِنِّي أُعَلِّمُكَ كَلِمَاتٍ ، احْفَظِ اللَّهَ يَحْفَظْكَ ، احْفَظِ اللَّهَ تَجِدْهُ تُجَاهَكَ ، إِذَا سَأَلْتَ فَاسْأَلِ اللَّهَ ، وَإِذَا اسْتَعَنْتَ فَاسْتَعِنْ بِاللَّهِ ،
وَاعْلَمْ أَنَّ الأُمَّةَ لَوْ اجْتَمَعَتْ عَلَى أَنْ يَنْفَعُوكَ بِشَيْءٍ لَمْ يَنْفَعُوكَ إِلَّا بِشَيْءٍ قَدْ كَتَبَهُ اللَّهُ لَكَ ، وَلَوْ اجْتَمَعُوا عَلَى أَنْ يَضُرُّوكَ بِشَيْءٍ
لَمْ يَضُرُّوكَ إِلَّا بِشَيْءٍ قَدْ كَتَبَهُ اللَّهُ عَلَيْكَ ، رُفِعَتِ الأَقْلَامُ وَجَفَّتْ الصُّحُفُ )

أما بالنسبة لنشاطك احمدي الله أنه فضلك على أخواتك في هذا كيف لا ونحن نتعوذ صباح مساء من العجز والكسل.

هذا النشاط نعمة وفضل حُرِمَه الكثير ممن سُلِبَ الهمة أو أنهكه المرض فهناك من هي مريضة تكتفي بالمشاهدة والتألم وتتمنى لو أنها تستطيع القيام بكل الأعمال

فتواجدك أصلا في مكان منظم ونظيف يُعطيك راحة وصحة ثم نصيحة نفعني بها أخي يوما وكما قُلتِ أنت المنزل كبير

وكل الأشغال على عاتقي لوحدي إضافة إلى العمل خارج المنزل لعدة ساعات فكان كلما رآني- حفظه الله وعافاه- يقول لي احتسبي فإنه لك فيه الأجر

فصرت كلما أتعب يذهب عني كل تعب بذكراحتساب الأجر عند الله فهذه الدنيا لا تساوي شيئا حبيبتي فكل فعل حسن ندخره لنا ليوم لا ينفع فيه شيء ولا أحد غير أعمالنا الصالحة
فأخواتك هنا يثيرون الشفقة لما هم عليه من الضياع والغفلة هدانا الله وإياهم فكوني عاقلة بما لديك ولا تتكلمين إلا للنصح.

[اَشْرَفْ اَنيِسْ]

ماديري والو والو نقي شومبرتك نقطة و خلي الدار تتهلك بش يحسو بقيمتك و قاومي نفسك و شوفي وش راح يديرو

[* قمر*]

الاعضاء مخلاو والوا ديري كما قالولك يا تقسموا الاعمال يا حكمي شمبرتك عدليها و اقعدي خلي الدار حتى يعرفو قيمتك و لا قاتلك يماك قلها كامل منقدرش تقسم عليكم الخدمة و هاك هذا راه ظلم نورمالمون الوالدة تعدل بيناتكم مهما يكونوا جايحات شكون اللي متعرفش تسيق و لا تكنس و تغسل الاواني طفلة عمرها 7سنين تعرف
ربي يهنيك

[تاج الوقار16]

نجيك من الاخير اختي العزيزة
المشكل راه عندك
انت عندك نزعة الاخت الكبرى
تحسي انك مسؤولة على كلش واذا ما
درتيهش انت واحد ما يديرو مسقم
ومن بعد تولي تشكي باه يتعاطف معاك
الناس
انت عندك طاقة أنثى ترغب في تكوين أسرة
تحب تخدم زوج واطفال صغار لاننا
اذا خدمنا ناس قادرين وكبار نحسو بالاستغلال
نجم تقولك انو وجودك جيح خواتاتك ورجعهم فنيانات
عندك خيارين إما تخدمي واستمتع
باش خدمتي وبلا شكوى وتحتسبي أجر عندك الله
وانا تخدم واش تقدري اتخلي لهم الباقي
وما تحسي روحك مستغلة
وراكي تحوسي على اللي يثمن تعبك وبشكرك ديري في بالك ربما حتى زوجك تتعبي ويقولك بلا مزيتك
وتزيد كون تريحي ويخدمو خواتاتك كل شي
تحسي بالتهميش
تشغلي وقتك بشيء آخر قرأن صلاة هواية حتى يجي مكتوب
ماشي من حقك تلقي الأوامر على خواتاتك هذا دور الام
العقلية تاعك علابالي صعيب تبدليها ولكن نصيحة لوجه الله اخرجي من قوقعتك وعيشي الحياة ببساطتها ولا تملي القوانين على أحد ونهار تخدمي استمتعي باش خدمتي ولا تمنيه على أحد
واذا بقيتي بهذا العقلية راح تنتهي بيك للانفجار من التفاهات
وكثري من قول
ربي اني لما أنزلت إلي من خير فقير