سأموت ساعدوني أرجوكم

[مشكلتي]

السلام عليكم إخواتي إخوتي
أرجو أن تساعدوني وتنصحوني في ما أنوي فعله
أنا متزوجة وأم لطفلين صغيرين مشكلتي تتمثل في أني في بيت والدي منذ يوم الأحد ولا أنوي الرجوع لمنزل الزوجية لأن زوجي لا يعطيني قيمتي كزوجة له بالعربية إذا قضى يجيب سمانة وهو يقول اني قضيتلك إذا اداني عند ناس نعزي ولا ولادة ولا مناسبة يجيب شهر وهو يهدر اني اديتك اذا كانت مناسبة مفاجئة يخليني انا ويدي يماه وانا ما يدينيش ويزيد ما يصرفش على ولادو انا اللي نصرف عليهم لاني أستاذة في الثانوية ليكوش نتاعهم وحليبهم ولبستهم هو يقضي للدار الاساسيات فقط ويزيد يدبر عليا في واش نصرف اذا شريت حاجة لعمري يقعد سمانة وهو يقول عليا مبذرة وانا نبان طلابة والله مرت خويا اللي قاعدة في الدار تلبس خير مني سواء لبسة برا ولا لبسة الدار بغيت نخليه المشاكل معاه ما تفراش ومسكني في سكن هش دار باباه شراها وهي قديمة خدمتها فرنسا للقومية زمان الاستعمار لا تصلح للعيش كي نقولو نرحلو نكريو يقولي علاه رانا كافيين رواحنا وهو يخدم خضار مرة يخدم وعشرة لا
المشكل أن مكان عملي هو في البلدية اللي نسكن فيها ما فيهاش المواصلات بزاف ودار بابا في بلدية أخرى ويوم الاحد العمل وراني عندي ترسيم يوم الاحد اللي جاي ما فهمت فيها والو نخمم نخلي الخدمة والرزق على ربي سبحانو حتى خدمة الذل ما عندي ما ندير بيها كرهت كلش بسبتو وراني خايفة بابا يقولي ما تخليش خدمتك وارجعي لدارك وانا مانيش حابة نرجع كرهتو وكرهت الخدمة بسبتو دبرو عليا واش ندير تعبت بزاف بزاف

[saydek xxo]

تخلي الخدمة ومعولة ترجعي لدار باباك وعندك ترسام ...؟!!! الرزق على ربي صح ولكن الانسان ياخد بالاسباب نضن انتي على جال ترسام صرالك ضغط رجعتيه في زوجك ..انا نقول احمدي ربي على النعمة ولكان زوجك فيه غير الهدرة مع الوقت بشوية يتعدل انتي حاولي فقط انتي لي قبلتي بيه وجبتي لولاد خممي شوية في مصير ولادك

[الفتاة الهادئة]

معرفتش كيفاش نقدرو نعالجو مشكلتك ولكن ربي هو اللي يهدي ونادام راكي تخدمي زيدي اخدمي اللي تصرا في الدار تموت وتدفنيها في الدار ،حتى واحد ماراهو يعيش معاك لازم تباني قدام غيرك مراية وفي دارك حاجة أخرى ومادام راه يشري الاساسيات الحمد لله ياربي باسكو كاين اللي الاساسيات مينفقهمش على مراتو ومادام يدي ماماه مم هذا خير باسكو كاين اللي من نهار تزوج ونسا ماماه .
هذا مابغيت نقولك لهذا المشكلة وربي هو اللي يهدي المقصود من هذا ابشي ارجعي لخدمتك .
والباقي على ربي ...

[ابو سليمان10]

اجتازي الترسام باي ثمن و بعدها ستهون الامور....ان كنت ستخسرين فلا تخسري كل شىء...زوجك غير معترض على عملك و لم تذكري انه سبب المشاكل بل بالعكس يسهل عليك الامور بما ان عمل زوجك غير مستقر

ثم المشاكل الاخرى لها حل...اذا كان زوجك ثرثار فخير من ان يكون مدمن مخدرات او زاني....و كم من الرجال يحوي في بيته زوجة لا تكف عن الثرثرة

[قدور بن عاشور]

هذه ليست مشاكل و لا يمكن أن تكون سببا في طلب الطلاق.
كل ما في يدك هو فتح نقاش هاديء معه لحل هذه الأمور التافهة.

ربي يهديك ارجعي لعقلك

[noursm]

يا اختي عندك ثم عندك ثم عندك تبطلي من الخدمة
ماهي خدمة ذل ماوالو بالعكس الخدمة هي اللي تعززك و تخليك وحدة ما تعول حتى على واحد
الناس راهي تحوس عليها و انتي تبطلي
كون تبطلي شكون لي رايح يصرف على ولادك
صدقيني كون تبطلي تندمي ندم شديد و تزيدي للطين بلة و تتبهدلي صح و تعودي تحسي بروحك عالة في المجتمع
راني فاهمتك راكي في ضغط و ظروف خلاتك تتخذي هاد القرار
بالصح يا اختي كاين ربي ، و رحمة ربي كاينة، سلمي امرك له و ادعي يسهلك امورك.
ما تدريش يا اختي غدوة يفرج عليك ربي و ينوب عليكم بدار ، و زوجك يصلح حاله.
انتي تفاءلي و ما تربطيش الامور ببعضاها.

[سَامِيَة]

في هذه المرحلة بالذات لا تتنازلي عن العمل..على الأقل في الفترة الحالية
انت ربما الآن تتكلمين بسبب ضغط التثبيت ومشاكل الزواج
لذا من الأحسن أن لا تتخذي أي قرار متهور تندمين عليه لاحقا
ركزي على التثبيت ثم فكري كيف تحلين مشكلتك مع زوجك

بالتوفيق

[أم يوسف2]

اختي راني حاسة بيك وماتفرطيش فخدمتك اولا هي اللي راهي معيشاتك نتي وولادك بالاكي تغلطي وتخليها وماتخميش الان فالطلاق خمي فولادك مساكن وروحي للدعاء الدعاء الدعاء دائما نقولها ادعي لزوجك بالهداية وشدي فربي ان شاء الله ربي يفرج

[زبدة ذايبة]

خليه مسكين

علاه راكي ديريلو هكذا

مرة يخدم وعشرة لا

وحتى الهدرة حبيتي تقطعي حسو في الدار

لا مستوى دراسي عالي

لا خدمة ثابتة ومدخولها ثابت

بالنسبة ليك هو أقل من المستوى المطلوب

الحمد لله وماشاء الله تبارك الله

ماراه يسب فيك

ما يسب في مواليك

يخليك تروحي لداركم

ويخليك تخدمي

ويخليك تخرجي

ويخليك تشري لأولادك وتشري لروحي

الحمد لله

ماشيكتي منو أنه تاع ........ ولا فاسد أخلاق

وش هذا ؟؟؟؟؟

جبيتيه يكون ليك عبد

هذا الخدمة نهار كاين عشرة لا لا

وفوق هذا كي خلاك رحتي لداركم تبدلي جو وتشوفيهم

فكرتي ديريلوا الضربة وما ترجعيش

وتزيدي تطلقي من الفوق

يا إلهي !!!!!!!!

تفكري غير في نفسك فقط

المهم رايك اللي يمشي

ولو كان غير جا رايك مسقم لو كان قلنا ماعليش

لكن انت حابة تخلطيها من كل جيه


راجلك ما عندو حتى ذنب

نهار ما جا خطبك كنتي عارفة أنه خضار

ما نظنش قالك أنه رئيس منتدى رجال الأعمال

موافقتك عليه يعني الموافقة على كل ظروف حياته

خضار يعني (لكواجة تاع الخضرة) ما يعنيش مدير مؤسسة

وخاصة أنك قلتي أنه مرة كاين مرة ماكانش

ونزيدلك قبلتي تسكني مع دارهم

إذن تحملي

ماشي كي جبتي الذراري حبيتي تهربي

كرهتيه لأنك بديتي تحسي الفارق بينك وبينه في المستوى

أنت أستاذة في ثانوية وهو خضار

وزيد خضار مايسكتش كسرلك راسك

وبين احتقارك له وبين حصولك على مبتغاك من الزواج (الأطفال)

تكون قصة هذا الخضار قد انتهت بالنسبة إليك

لكن نقولك حاجة

الطلاق مشكل وليس حل

وزوجك رجل عادي كباقي الرجال

ماكاين حتى فرق بينه وبين الطبيب والأستاذ في الجامعة والأستاذ في الثانوية


كل هذه الأفكار والوساوس منبعها أنك رايحة تترسمي

وتولي أستاذة راجلها خضار .

الزواج صبر وتحمل من الطرفين

واللي صعيبة اليوم ساهلة غدوة

ماكانش اللي لقات وش تحب وكيما تحب

وحتى هو أكيد عندو نظرة في شخصيتك وتصرفاتك

ممكن انتقاده لك لأسباب حقيقية وجوهرية

أنت غافلة عنها

وهذاك التكعرير اللي تسمعيه منو ما هو إلا إحساسه بعدم الارتياح معك

على هذا هو لايرضى أن يستقل معك ببيت لوحدكما

لأنه أصلا هو مرتاح مع أهله وليس معك

حاولي تسترجعي زوجك وأبو أولادك

وحاولي تتخلصي من الوساوس التي لامعنى لها سوى خراب بيتك

وضياع أطفالك

تحمليه واصبري عليه

مهما كان مستواه التعليمي والوظيفي منخفض

فيكفيك شرفا أنه والد لأبنائك.

يحملون اسمه وينتسبون إليه

لست ضحية من وجهة نظري

بل مخطئة.

الله يهديك

[رندة.]

تفكيرك راهو مشوش الفترة هاذي بسبب التثبيت، وعلى هذا حاولي تتجنبّي أنك تتخذّي أي قرار مصيري تندمي عليه.
الحياة الزوجية تتطلّب الصبر وناس بكري يقولو " الّي صبرت دارها عمرت"، والحمد لله كي راكي خدّامة وقادرة تصرفي على روحك وأولادك وتعاوني زوجك خاصة أنو نهار يكون عندو ونهار والو يعني كل نهار وخيرو، والحمد لله أنو قادر يوفّرلكم الأساسيات على حسب استطاعتو.
كبّري بالك وأرجعي لدارك وماتخليش الشيطان يتغلّب عليك ويخربلك دارك.

[hayla.star]

نصيحتي ليك متسمحيش في حدمتك روحي وجدي روحك اترسمي اضمنتي خدمتك ليك وولادك ابنتي او كلش في يدك ادعلي برك ربي يفرج عليك وانت راكي بولادك حتى ادا مقدرتيش تكملي معيشة مع هاد الراجل الحضانة اي ليك والسكنة ليك يكريلك حتى في مكان قريب لعملك او قراية ولادك انت نتي لي تشرطي

[براءة سامية]

هذا عواقب اللي تتزوج واحد قلمنها في النيفوو..... خضار و زايد داير فيك الشر... يخي حاالة يخي... ربي يقدرك ان شاء الله

[visa uk]

كل هدا وش قلتي شافينو في بعض الرجال لي هم انانيين جدا في كل شيء ويحبو صلاحهم فقط فقط نفسي ومن بعدي طوفان فط وهدا نوع ايضا بخيل جدا نعيطولهم جوعان في مخو وراسو مالقري تلقايه عندو دراهم سواء شهرية فور او مليحة او حتي تلقايه تاجر او مهنة حرة تلقايه فري مسمار في جيبو وعقلو نعيطولهم جيفة هدا الشخص صراحة مكروه ومنبود جدا حتي من اقرباؤو لايطاق لايختمل ناس تخلص نورمال متواضعة حتي عايشة تاكل تشرب تلبس تصرف باين قاتلك بالشر

[mimalove]

خوءذي راي باباك

[afrimat]

ارجعي للخدمة ارجعي للخدمة ارجعي للخدمة فقط
الباقي يتصلح و لكان جاك صعيب بباك في جنبك ماتخافيش