شوفي واش يصرى كي تلعبي بالعجين ههههه

إلهام07 · 2013-02-21, 10:55

الوصفة 11

صباح الخير عليكم كاااااامل
ساعات ساعات يبدا راسي يخرف ، قالي واش تقولي كون نديرو حاجة جديدة واحد مادارها ، هاذوك العضوات نتاع المنتدى دوخونا ما خلاو حتى حاجة نخلعوهم بيها ، قلت هات واش عندك دبر عليا ، قالي واش تقولي كون تقلي المطلوع قتلو آآآآو هذي خشينة شوية ، قالي واش فيها بالاك جيبي حاجة بومبة هههه ، أنا نقولو ياراجل هني روحك وهو يقلي والو جربي ماعندك ما خسرت ، قداش من يوم وحنا هكذا غلبني البارح قلت نجربها بالاك يسكت علي .

* مكونات العجين : 250غ سميد رطب + 100 غ فرينة+1 ملعقة كبيرة سكر + 1 ملعقة كبيرة خميرة+ملح + ملعقة كبيرة زيت + ماء دافئ ، شوفو واش درت بنفس العجين :

1- مطلوع عادي أو مطلوع محشي ( فكرة أم رامي ) أو مطلوع الشحمة ، راني حطيت الوصفة من قبل :

2- بطبوط : بعد ما نتحصل على العجين ( بدون تخمار ) نرش الطاولة بشوية فرينة و نطرحها بالحلال و نقص دوائر بالكاس أو حاجة أكبر منو ( أنا قصيت بسكرية نتاع بكري وزمان لقيتها مخبية بلافايدة هههه ) ، نحط الدوائر فوق منديل و نغطيهم ونخليهم يخمرو و من بعد نسخن مقلاة على نار متوسطة و نطيبهم على الجيهتين :

شوفو من داخل فارغة :

و هنا حشيتهم بطاطا مقلية باتي دجاج و زيتون أخضر و جبن و مايوناز و طماطم:

3- بطبوط مقلي : بنفس الطريقة حضرت البطبوط ( ولكن العجين رقيقة أكثر ) و حطيت حشو وغطيتها بدائرة أخرى و قفلت الأطراف مليح و خليتها تخمر و قليتها .

شوفو فارغين من داخل :

4- بانيي : بنفس طريقة البطبوط المقلي درت بانيي ، حشيتو بالمربى وحبة حشيتها عسل و خمرتهم و قليتهم و رمدتهم في السكر ( من الأحسن سكر رطب )
هههه جربت 2 حبات وكليتهم نسيت نصورهم

، على العموم نفس النتيجة نتاع البطبوط المقلي .

5- دونات : نفس الطريقة درت دوائر رقاق و ثقبتهم في الوسط بالبوشون نتاع قرعة سعيدة صغيرة .

6- كرواسون : هنا بدا التخلاط نتاع الصح

، خدمت كرواسون بنفس الطريقة نتاع وصفة الكرواسون و شكلتو ودهنتو وخمرتو و طيبتو في الفرن و دهنتو من فوق بالعسل و حمرتو من فوق

هنا الشكل راهو كرواسون بصح الطعم خبز ههههه ، بصراحة ما عجبنيش ، جربت حوايج أخرين بصح ما عجبتنيش النتيجة

قولولي

أنتم ثاني يخلط عليكم راسكم هكذا ؟

*ام رامي* · 2013-02-21, 11:00

هههههههههههههههههههههههههه قتلتيني بالضحك
بصح رووووعة يا الهام سيرتواالبطبوط اللي طيبتيه في المقلاة جا فوووور
يعطيك الصحة
حتى انا راسي يشيخ عليا بزااااف

*بيتي مملكتي* · 2013-02-21, 11:01

ماينة أعطيك الصحة عجبني البطبوط أكثر لخرين زادا ملاح

إلهام07 · 2013-02-21, 11:07

اقتباس:

المشاركة الأصلية كتبت بواسطة *ام رامي*

هههههههههههههههههههههههههه قتلتيني بالضحك
بصح رووووعة يا الهام سيرتواالبطبوط اللي طيبتيه في المقلاة جا فوووور
يعطيك الصحة
حتى انا راسي يشيخ عليا بزااااف

هههه ، هذي راهي غير الحلقة الأولى ، كون تشوفي الحلقة 2 واش تقولي ، الأسبوع المقبل إن شاء الله نحطها ، خفت نحطهم مع بعض تقولو الطفلة هبلت

اقتباس:

المشاركة الأصلية كتبت بواسطة أم إياد أحمد أمين

ماينة أعطيك الصحة عجبني البطبوط أكثر لخرين زادا ملاح

والله تعبة لـ 12 نتاع الليل وانا في المطبخ ، صبحت مزرولة هههه ، ربي يعيشك ، راهو البطبوط المقلي جا مليح في الطعم ( طعم بانيي ) و خفيف

*أم كوثر* · 2013-02-21, 11:07

يعطيك الصحة
هدا راس والا بلاش ههههههههههه

أم هداية · 2013-02-21, 11:09

يعطالبطبوطيك الصحة الهام عشية كاملة ونتي تلوزي في راسك حتان تعبتي مبصح تعبك ماراحش هكاك راهم جاو هايلين بالمنظر نشا الله نجرب

حياتي نبع امل · 2013-02-21, 11:22

هههههههههههههه
الهام اسم على مسمى عندك الالهام واش يقولك راسك اديري مليح بالصح دايما ديري في بالك ماشي دايما حاكمة
كيما هنا حكمتلك مع البطبوط عجبني هايل بارك الله فيك
والتجربة خير برهان نجربو ونرجعلك كيفاش خرج شكل ومضمون

ام ساجد · 2013-02-21, 11:28

يعطيك الصحة الهام الله يبارك اختي
قوليلي البطبوط تاع المقلة تضربيه رقيق ولا خشين شوي

إلهام07 · 2013-02-21, 11:29

اقتباس:

المشاركة الأصلية كتبت بواسطة *أم كوثر*

يعطيك الصحة
هدا راس والا بلاش ههههههههههه

هههه و الله ساعات نقول نفاشيه ما نزيدش خلاص نهدر معاه بصح يرجع يغيضني ، ساعات ثاني يجيب فكاير ملاح :d

اقتباس:

المشاركة الأصلية كتبت بواسطة أم هداية

يعطالبطبوطيك الصحة الهام عشية كاملة ونتي تلوزي في راسك حتان تعبتي مبصح تعبك ماراحش هكاك راهم جاو هايلين بالمنظر نشا الله نجرب

ههههه ، و الله راسي لضرك راهو يصطر ، تخلاط نتاعو راهو كثر هاذو الأيام ههه

bissan.sousou · 2013-02-21, 11:32

يعطيك الصحة لكن قوليلي كيفاه منخمرش العجينة في البلاستيك ديريكت نعجن ولا كيفاه ?????

إلهام07 · 2013-02-21, 11:39

اقتباس:

المشاركة الأصلية كتبت بواسطة حيهتى كلها امل

هههههههههههههه
الهام اسم على مسمى عندك الالهام واش يقولك راسك اديري مليح بالصح دايما ديري في بالك ماشي دايما حاكمة
كيما هنا حكمتلك مع البطبوط عجبني هايل بارك الله فيك
والتجربة خير برهان نجربو ونرجعلك كيفاش خرج شكل ومضمون

هههه ، ربي يعيشك حنونة

اقتباس:

المشاركة الأصلية كتبت بواسطة ام ساجد

يعطيك الصحة الهام الله يبارك اختي
قوليلي البطبوط تاع المقلة تضربيه رقيق ولا خشين شوي

لازم يكون رقييق ( حواي 2-3 مم ) وإلا ما يتنفخش ، بصح ما يفسدش ، حتى إذا ما تنفخش يجي خفيف من داخل بصح يجي تقولو مطلوع هههه ، صراتلي مرة درت كمية كبيييرة كانو عندنا ضياف )هاذي عندها 5 سنين ) و جات ماما تحوس تفوخ بي قالتلهم تعلمت إلهام البطبوط راهو روعة ضرك تاكلوه ، كي يطيب يتنفخ في المقلاة ، قعدت خالتي مسكينة كل حبة طيب نقولها بالاك مازال ماخمرش الحبة الجاية تشوفي كيفاش تتنفخ ، تبهديلة ما ننساهاش

أم محمد تاج · 2013-02-21, 11:40

هههههههههههههههههه الله يبارك ماخليتي والو للفطور والغدا والعشا وحتى السهرية هههههههه كلش بفرد عجينة وانت تهنيتي وهنيتينا يعطيك الصحة والله يبارك فيك حبيبتي

إلهام07 · 2013-02-21, 11:43

اقتباس:

المشاركة الأصلية كتبت بواسطة bissan.sousou

يعطيك الصحة لكن قوليلي كيفاه منخمرش العجينة في البلاستيك ديريكت نعجن ولا كيفاه ?????

هيه ، تخلطي المكونات و تعجنيه شوية برك و تطرحي العجين رقيقة و تقصي دوائر و تخمريهم و طيبيهم في المقلاة
كون تخمريها من قبل ثم تطرحيها راهي ما تتنفخش ( هذي عن تجربة )، جيك فقط هشوشة من داخل

ريم الفلى · 2013-02-21, 11:46

هايلة يا الهام فووووووووووووووور انا تاني نخلط بزاف ههههههههههههههههه

إلهام07 · 2013-02-21, 11:49

اقتباس:

المشاركة الأصلية كتبت بواسطة bissan.sousou

يعطيك الصحة لكن قوليلي كيفاه منخمرش العجينة في البلاستيك ديريكت نعجن ولا كيفاه ?????

اقتباس:

المشاركة الأصلية كتبت بواسطة ريم الفلى

هايلة يا الهام فووووووووووووووور انا تاني نخلط بزاف ههههههههههههههههه

هههههههه ، الحمد لله ماشي غير أنا