شوفو حكايتي مع زوجتي

[مشكلتي]

اخوتي في الله ...انا شاب من ولاية سكيكدة اتمنى ان اجد من يفهمني ويشور عليا بالراي الصواب

انا من سكان بلدية عزابة التابعة لولاية سكيكدة..تعرفت على فتاة سكيكدية عن طريق خالتي .*هي جارت خالتي * ... وانا من النوع الي خاطيه لبنات والدراغاج في الطريق شاب مستقيم ولا ازكي نفسي ....من الخدمة للدار ..ومن الدار للخدمة ..لا اتعاطى لا الخمر ولا المخدرات
واعمل في ميناء سكيكدة في مركز لا باس به .....

.وهي...تعمل في احدى الادرات العمومية في ولاية سكيكدة .......الحق يقال في مرحلة الخطبة كنت اسعد انسان على وجه الارض
فهي تتمتع بحسن الخلق والخليقة ومتربية الحق وعاقلة ..وكانت مطيعة جدا ...في بادئ الامر
. في ايام الخطبة..كنا نلتقي ...وكنت احرص على ان لا اترك الشيطان يدخل بيننا فكنا نلتقي دائما في اماكن الغير مشبوهة والعامة
وتحدثنا على كل الامور االبيت ...العمل ...الاولاد ..التربية ....تقريبا تحدثنا في كلش ...خصوصا عملها قلتلها...انا لست ضد المراة الي تخدم بصح ضد انو مرا تهمل عايلتها على جال الخدمة واتفاهمنا خلاص فضينا .

. وش ايا .....قلتلها كون انجيبو دراري وانحس بلي ***...قصتني وقاتلي مااتكملش انا وحدي انبطل الخدمة ...ايا متفاهمين متفاهمين .
.
.صراحتها بكلش ..قلتلها .انا املك غرفة في بيت العائلة ولكن باش تلقى راحتها .....عندي خالي عندو دار مقفولة قالي هادي اعتبرها دارك خصوصا وانه لا يملك اولاد ........ولعجوز هي الي رباتو كبر وخدم وعايش في اوروبا ودارو مقفولة هنا قلتلها نسكنو فيها اي دارك حتى ايفرج ربي .....** اشكون يلقى دار في الوقت الحاظر الناس اي تطايش في لغراااابا ***
كتب ربي واتزوجنا ومانحكيلكمش ...علابالكم واشيااا...كدت اجن من الفرح فانا لا املك تجارب سابقة ...وهي كانت كالملاك..قلت ربي عوضني عن صبري خيرا ...
عدات اشهر حتى جاء الخبر السعيد زوجتي حامل ....احساس الابوة احساس عظيم مااتحسش بيه الا عندما تصبح ابا .
رزقنا ببنت بهية الطلعة ...حمدت الله وشكرته ....سميناها حنان ربي ايخليهالي .
.
اشهر بعد دالك بدا الانقلاب في مزاج وتصرفات زوجتي يصبح
insupportable..
وبدات المشاكل ...تصورو معي انوض على الخمسة تاع الصباح انهز مرتي وبنتي في الطونوبيل نديها لدار امها باش يحكمولنا الطفلة رغم ان بيت امي لا بعد الا ب5 دقايق عن سكني في عزابة ..
.
.لا نديها لل500 اتحط بنتها وتبقى تما حتى السبعة ونص اتروح تخدم لاني لازم ندخل على ال7 صباحا دونك لازم انوصلهم قبل .
.
ومن بعد كي نخرج على الخسة واحيانا
je suis obliger
نتوخر انروح على ال8 ولا ال9 تاع الليل انزيد انروح لل500 انجيبها باش اتروح معايا للعزابة
وقلت ماعليش كل يوم 6 ايام في الاسبوع

واحيانا نخرج بكري نخدم نص نهار ....كوم هي تخدم وبنتي عن دار نسابي نقعد برا نستنى حتى اتفض الخدمة ..نتغدى برا . اتقول مامزوجش .
.
راتبها الشهري ..جامي قلتلها ويني لاباي تاعك جامي في خلقي ...انا الحمد لله راتبي يكفيني والحمد لله ....كي نصرف على داري هاديك اي داري ماعندي مانهدر
المهم بعد ..لولادة تاع الطفلة ..مرتي اتبدلت وليت مثلا كون نتخاصمو على حااااااااجة تافهة جدا جدا جدا ..اتهز التلفون اتعيط لامها
نص ساعة نلقى باباها وامها جاو اتهز قشها واتروح معاهم ...

مرة دارت كسرة مسوسة انسات ماحطتش الملح ولا مانيش عارف ..وانا جيت عيان من الخدمة كي دقت الكسرة ..ازعفت قلتها علاش ماعاودتيهاش كوم علابالك بلي مسوسة علاش اتحتميلي فيها ؟؟ وزعفت خرجت .
.
خرجت باش نتكالما وقلت نشري الخبز في طريقي ...ابقيت شوية مع صحابي اتوخرت خاطر روحت انصلي كي ارجعت القيتها مكاش في الدار
.اتخلعت هزيت اتلفون عيطتلها هز عليا باباها ....قالي جيب باباك وعمك وارواح للدار .
.
.انا ابقيت امشوكي هزيت بابا مسكين مريض وعمي ..وروحت عندهم ..
.ابداو ...واحنا وبنتنا ومامدياهلكش باش تغبها
وانا يا الحاج اتقي الله او ماهدرتلها والو
قالي وانت وين تعرف الكسرة لمليحة من المسوسة طيبتلك كول وخلاص
؟؟؟؟؟؟؟؟؟؟؟؟؟؟؟؟؟؟؟.
يا الحاج ...يا الحاج ..قالي بنتي ما ترجعش حتى تطلب منها السماح قدامنا ؟؟؟.
.
شفت معاه مع بابا ومع عمي وقوتلو .....ايا بابا انروحو ...وخليتها تم .....سمانة ماعيطتليش .
.ويما ورايا انعل الشيطان روح رجع مرتك ..كدى ولبنات تاع دورك شوناعات وكدى .
..روحت رجعتها وكيما ايقولو ..باش انقص عليا المشاكل طلبت منها السماح على وج بنتي باسكو اتوحشتها بزاااااف
رجعت للدار ....يومين من بعد كي رجعت ...هبطت يما عندها باش اتصفي لقلوب واتهدنها .....
ما سلمتش على يما .....وماحطتلهاش حتى قرعة..ماء ...
.لا علينا ..
.
.غدوة من داااك
...عيطت لامها وامها عيطت لباباها ...وجا و اداوها علاش ؟؟؟.
.
قالك داركم داخلين خارجين عليا ماانحسش روحي في داري ؟؟؟.
..خرجت من الخدمة مالقيتهاش في الدار ..عيطت قالي باباها ارواح نتفاهمو ..
.واش لعب الدري هدا .
.
.انا كنت عيان قلت خرجت برضايتها ماانروحش .خليتها في دارهم 10 ايام ..من بعد عيطتلي وكيفاش اتخليني ومااتسقسيش عليا وكدى . احكينا تقريبا 4 سوايع في التلفون وفهمتها بلي دارها ا وراجلها اولى بيها
...وانا كوم الحق انحبها..... وانموت عليها..... اعفست على كلش وروحت انرجها...كي وصلت للدارهم في ال500 ادخلت ......القيتها امها قاتلي شوف ابني انا بنتي ماترجعش معاك حتى اديرلها دار وحدها ؟؟؟؟.
.
.انا اتشوكيت عيان من الخدمة ..وقلت اليوم انرجع مرتي ودورك برك كنت نحكي معاها ..ومتفاهمين كي روحت انجيبها .
القيت فيلم اخر .
قولتلها علاش عندها دار؟ظ قاتلي هاديك ماش دارك لازم تكري ........بصح كي انروح نكري ...ونخسر سوارد انمدهم لمول الدار ؟؟؟ بلا سبة عندي بلاصة في دارنا.. اتجي اتعيش معايا في دارنا ... ماحبتش .
وعندي دار خالي فارغة ماحبتش ...وقالك لازم تكري .
.
اخرجت من دارهم القيت باباها جاي من الجامع احكتو يا الحاج هاي كيفاش ...هاي كيفاش ....هاي كيفاش .
قالي عندك الحق ...عندك الحق وغير يسمع وايقولولي عندك الحق اطلعنا انا وهو للدار ادخل وانا اقعدت في الصالون وحد النص ساعة واا وحدي نلعب مع بنتي ...جاء باباها ...انا قلت صاي فراها .
.
قالي بنتي تسكن وحدها دبر راسك .....هدا واش عندي ...وبدات امها تهدر... وهي تهدر.. وباباها يهدر...... وانا وحدي.. حسيت روحي محقور ....وهوما بقاو يضغطو عليا يضغطو عليا ...... وانا هدا وين جيت من الخدمة عيان ومتزوج وعايش سيليباتار وبابا مريض ..كلش اتخلط عليا قوتلو يا الحاج ماكنتش تهدر هكدا برا .
قالي الهدرة تاع برا تقعد برااا.
قولت لمرتي ..وانت كيفاش اتشوفي ؟؟ قاتلي انا ماعنديش هدرة فوق هدرة بابا .
قالي بنتي اي عندي وانت اخبط راسك في الحيط تكريلها هنا في سكيكدة ربي ايسهل عليك .
قوتلو نكريلها هنا ؟؟؟ ايمالا بنت اي مطلقة .....وخرجت .
......حق ربي انسوق ونبكي ..نبكي خاطر كنت انعاملها اتقول ملكة انخاف ربي فيها وكنت حاب انلم الشمل مي هي حابة اترجعني كي بوها مرتو الي تحكم فيه .
.
قعدت شهر في دارهم كل 3 ايام انعيطلها ..والو هاديك هيا لحكاية ...كي فض الشهر ...عيطتلي وتبكي وارواح اديني انروح وكدى ....
روحت اديتها ...في الطريق قاتلي باش تعطيني 4 ملاين انمدهم ليما حق ما قعدت عندهم قلتلها ولاباي تاعك ويني ؟؟؟ قاتلي عندي عام ماخلصتش انا قلت صح بالاك .
.
مديتلها .....اداتهم لامها ....وراها ب 4 ايام ربي باش يكشف ...القيت الكرني دشاك تاعها منصف
...نحيت ورقة وروحت اجبدت الرولوفي القيتها تخلص كل شهر .......كي روحت قلتلها انت او تخلصي قاتلي لا .
.
.حطيتلها الرولوفي وخرجت من الدار كي جيت القيتها تبكي ..واسمحلي وغلطت وراني انعاون بيهم في يما وكدى قلتلها حاجتك هادوك ادراهمك اتمديهم تحرقيهم شغلك انا ما نستناش منك اتعاوننيني . بصح قوليلي ماتكدبيش عليا وفرا المشكل وبتنا
.
نورمال نضحكو نتمسخرو .....كي راحت لدارهم احكات لامها ......عيطتلي امها .وانا في الخدمة
.
.قاتلي انت ماش راجل؟؟؟؟؟ وكيفاش اتروح اتشوف الكونط تاع مرتك .؟؟ ..مامدايرش فيها تقة ومكان مادخلك وهادو دراهمها وانا ساكت ساكت ساكت ..كي فضت درتها كالة ماهدرتش.
.قولتلها جوزيلي احلام قولتلها اتهلاي في الطفلة ودرت كالة والو ما صرااا
. روحت جبت مرتي روحنا للدار ....ماهدرت والو ....في اليوم ال4 تاع رمضان عرضت امها وباباها واختها يفطرو عندنا
..اقريب مليون ونص قضيان طابلة حتى ما القاتش وين اتحط .
لا علينا نورمال .
.
قولتلها السمانة الجاية نعرضو يما وبابا ....قاتلي اوكي .
حق ربي طيبتلهم ....جاري ومرقة زيتون ....وبوراك وسلاطة وقرعة كوكا وانا قضيت كلش ...كي ادخلت القيت..يما هي الي اطيب ...
.وكوم يما اتخمم على بنها ماحبتش اطيب من لحوايج الي قضيتهم قاتلت خلي القضيان ياكلوه بيناتهم .
.
وهي لعبتها مريضة في حالة وماقدراش ومافطرتش حتى معاهم ؟؟؟؟.....انا فطرت مطوفي ...كي روحت يما وبابا .
.ناضت ونورمال وقاتلي اني حاسة روحي مليحة...
.
.غزلت انا قلتلها كدابة وتلعبي فيها...الامهم اتقابضنا كيما اي ازواج في العالم وخرجت ..
.
....انصلي التراويح.... كي ارجعت من التراويح اقعدت شوية ..صونا التلفون تاعها كوبات..وخرجت.من الشومبرا . اعرفتها .
.شوية هكا
القيت باباها وامها جاو قاعد ايقولها ايا هزي قشك القيتها اوموجدة الفاليزا ...وخرجت كي وصلت للباب قولتلها ...احلام راكي خارجة من الدار...؟؟؟ كون اتعتبي الباب راكي مطلقة ...شافت معايا خرجت ..هنا الحق ادمرت خلاص ...وهكاك وابقيت حاكم فيها لاخر درجة
.
.كملت رمضان وحدي نفطر في دار يما ونهبط نرقد في داري ..اتوحشت بنتي ماتقدروش تتصورو ...وماحبيتش انعيطلها .
.جاء العيد مامبا جابتلي بنتي والله الدمعة طاحتلي صبحة العيد اكل مع ولادهم ...غير انا ؟؟ هزيت عيطتلهم قولتلهم اعطوني الطفلة قاتلي اتجي اتشوفها داكوووغ ..بصح باش تديها لا .
.
.
.هنا انا اطوفيت .....هزيت روحي وروحت للمحامي ورفعت قضية في الطلاق يما عيات اتحاول فيا بصح خلاص ماعدتش قادر .
.
.وليت نرقد بالكاشيات ..
امها تتحكم بزاااف فيها .وحابين ايحطوني تحت رجليهم ..
.
.وانا رغم محاوالاتي الكتيرة للم شمل العائلة ..لكن يعودون دائما لعاداتهم .
.
.كل ما يحز في نفسي هي ابنتي ..وحتى زوجتي فانا احبها و
خفت انكون ضالمها ...ولحساسية الموضوع كيما قتلك ما كانش ساهل عليا نحكيه لواحد من صحابي قلت انفرغ قلبي هنا بشكل عفوي ..لعل وعسى نلقى نصيحة مليحة من عندكم .كل ما قلته صحيح ...وما زدت عليها حتى كلمة واعدروني كان طولت وشكرا اخي ميرادور على طول بالك معايا ..والسلام عليكم

[* الحلم سكر *]

نصيحة اخت اذا اللي قلته كما هو .. انسى الطلاق مي : خليها في دار باباه و ما تسقسيش عليها اضغط على روحك
هي مشكلتها التعمار امها وراها .... خليها تحس لي راك قادر تستغنى عليها لانك والفتها الترجاع بهواها
لا تتصل لا تروح وقت مليح درك وحدها تتحرق و ترجع للطريق
ربي معاك و يهديها ان شاء الله

[*غامضـﮧْ بطبعـﮯ*]

يا خويا مرتك هي الغالطة لأنها دخلت امها و باباها في تفاصيل حياتها الشخصية و ما بقاتش معاها هدرة

إضغط على نفسك و ما تتصلش بيها أبدا و ذرك تشوفها هي لي ترجعلك

["أوريانة"]

الله الله عليك يا اخي واش كنت رافد ....يعطيك الصحة و كيما نقولو jte tire chapeau
انا نعطيك الحق 100فالـ100....... الا في قضية الطلاق لا لا اعطيلها فرصة ممكن تكون خذات درس ما تنساهش
صدقني غير عجز لساني عن التعبير انا عامين و راجلي ينحيلي فالشهرية نتاعي و جامي تجرات و قلت لماما و لبابا حتان فاض بيا الكاس في رمضان باش طرطقت و شكيتلهم

[aymen01]

عييتني كاتب نص قراءة

تهدر بزاف و تشكي بزاف نورمالمو هي تجي تكتب مشكلة عليك

كون جيت انا راني قتلتها من يوم لول باين فيك نيه طلقها و ادي بنتك و عيش حياتك يخي حالا النسا هذو وين حابين يطيرو كلش عندهم و مش حامدين ربي

رايح جاي رايج جاي ماعندكش كلمة انت شافوك عاقل قاعدين يلعبو بيك و انت تقلي مازلت نحبها كخخخخ ي كون جات تحبك ماديرش فيك هذا كامل

[وصال سلام]

لا حول ولا قوة الا بالله العلي العظيم

نعرف وحدة امها تتدخل في كل صغيرة وكبيرة حتى سفاسف الامور حتى خربتلها عشها و تطلقت وهي صغيرة

ربي يفرج عليك ويسهلك امووورك

ربي يهدي مرتك امها مسيطرة عليها بطريقة فظيعة والضحية هي البنت الصغيرة

[sara guelma]

f le7kaya kamel messkina tofla sghira tetraba b3ida 3la wa7ed men waldiha
c nn mra kima hadi ma3andek ma tdir biha
ngolek khoya l7al ta3ek ida ma 6ala9t'hech
anek tar7el men skikda khlass
chouf kifeh tbedel khadmtek l alger wella ayi blassa b3ida w bla ma tgolha beli bel3ani
sa7 ra7 tzid 3lik lmassarif surtou mochkel essokna mi hada ho l7al
tba3edha 3la dar waldiha hado li kol d9i9a yjiwha
dork telgak ghir nta w ghir darha

[امرأة من ذاك الزمان]

سلام خويا
شوف خويا اذا كان هذه القصة ماكانش حوائج ما بين السطور
فعلا قصة محزنة جداً ولكن خويا اياااااااك والطلاق على وجه ربي
خليها في دارهم أشهر وحاول تصبر
ملاحظة هكذا نوع من القصص التحكيم فيهم يكون بسماع الطرفين
ربي يفرج عليك وعلينا

[تراتيـل صبــح]

في البداية أخي لدي ملاحظة وهي لا تعتمد على ردودنا كلية في اتخاذ قرارك
فهذه حياتك ثم أنت وحدك تعيش المشكلة ومهما صورتها فلن نحيط بجميع جوانبها
من خلال قراءتي للقصة فهمت أن المشكلة ظهرت بعد ازدياد الطفلة ربي يحفظها
هنا يوجد احتمالين :
الاحتمال الأول هو أن زوجتك تغيرت نفسيتها بعد الانجاب وهذا يحصل كثيرا
التفسير الثاني وهو أن الوقت الذي تقضيه زوجتك عند أهلها جعلهم يؤثرون عليها وتفكيرها
فأصبحت تحكي لهم كل كبيرة وصغيرة عن حياتها الخاصة ويبدو أن أمها متسلطة قليلا
ويمكن أن يجتمع الاحتمالان معا وتكون زوجتك غير مدركة لما تفعل فلا أحد يريد أن يخرب بيته
حتى أمها هي تعتقد أن ما تمليه على ابنتها راهو فصالحها لكن للأسف..

انتبه يا أخي أنك أعلنت الطلاق على زوجتك مرتين وبقت طلقة واحدة
يعني فكر جيدا قبل اتخاذ القرار فالطلاق ليس قرار نتخذه في حالة غضب او رغبة في انتقام أو استعادة كرامة
ولا تنسى أن ابنتك التي تشتاق اليها وتريدها في حضنك قد تلومك في يوم ما لأنك حرمتها أمها وشمل العائلة
لذلك احسبها صح!
زوجتك اتركها لا تتصل بها حتى تتصل وحدها وستفعل
ابنتك زرها حين تشتاق اليها كما قالت ولا تقصر تجاهها
تحمل من أجلك ومن أجل ابنتك
وزوجتك ستتصل بك لأنها عاجلا أم آجلا ستمل من بيت أهلها
وحين تتصل اطلب لقاءها في مكان بعيدا عن الأهل حتى لا يؤثروا عليها
وتحدثوا حديث كبار ناضجين وهنا يمكنك وضع النقاط على الحروف
هنا عليك التفاهم معها على العمل وتدخل أهلها في حياتكم
اخبرها أنك كنت معها ومع أهلها رجلا لكن هي خيبت أملك لكن أنك تتمنى أن تفتح معها صفحة جديدة
ولا بأس لو تذكرها بحبك لها وأيام خطوبتكما الجميلة علها تتأثر ويعود لها عقلها
كلمها عن أحلامكما معا ورغبتك في تربية ابنتكما معا ووو
والأهم هو توضيح كل الأمور في هذه الجلسة
وابتعد عن الغضب وحاول أن تكون هادئ الأعصاب
ولا داعي أن تذكرها بأمور مصت أو تذكر اهلها بسوء
ان شاء الله تكون واعية وتفهم محاولتك لاصلاح الأمور
موفق أخي.

[أمّ عبد الودود]

السلام علبكم
إذا كنت تريد الحل
فما عليك الا ان تتركها في منزل والدها
فترة من الزمن وفي هذه المدة عليك بالدعاء في كل سجدة وبقيام الليل
وبالصدقة بنية أن يوفقك الله للراي الصواب (والله هذا هو الحل الوحيد) اما الطلاق أو عودتهاالى منزلك
إن كنت صادقا في كل ما ذكرته فلا أظن أن لديها شخصية لحل مشاكلها دون
العودة الى والديها وللأسف مادام والدها ليست له كلمة فتأكذ أنك ستعاني كثيرا
دع عنك العاطفة الآن فإنه لا خيار لك
إما أن تعيش كرجل له مكانته وهيبته في المنزل وإما أن تعيش تحت ذل وتسلط والديها
كما انه يجب عليك أن تجد طرفا أخر مثلا صديقك زوجته على اتصال بزوجتك تكون واسطة خير
وتخبرها بأن تدخل الوالدين في كل كبيرة وصغيرة يخرب بيتها

تأكذ الدعاء ثم الدعاء ثم الدعاء
فرج الله همك

[هند222]

اسمحلي أخي نهدر بصراحة
المشكل راهو فيك انت نعن فيك انت انت لي خلعاتك مرا واش هذه الحالة

النهار الأول كاش واحدة تلقا دار وحدها وتشرط سكانة كامل مع العايلة وصبرنا وحملنا ونهار فرج ربي مزال العلاقة مليحة والحمد لله
سكتها على الكذب نتاعها نتاع الشهرية صح متسالهاش في شهريتها بصح باش تكذب عليك لالالالالالالالالالالالالا راهي غلطة كبيرة انا عندي عقلية الي موالف يكذب مرة يكذب الف مرة
وزاد بزيادة كيفاش من جهة حابة يكون عندها دار خصوصي ومن جهة متعاونك في الشهرية كيما قالت الأخت اللي قبلي رانا نحطو في شهريتنا وساكتين ونقولوا معليش الحياة مشتركة
وثاني كيفاش تجي يماك وباباك الفطور وفي شهر الرحمة ومتفطرش معاهم اذا لةكان تحبك شوية برك ديرك الخاطر
وكيفاش تعطيها 4 ملاين كي قعدت عند باباها تعرف هذه لقات عندك ديفو انك مخلوع فيها وتحبها بزاف حبت تركب فوق راسك بصح اخويا الحب لازم يكون عندو شروط باش تقدر السفينة تمشي الا انت تحبها وهي تعاملك بالمثل اللهم بارك والا ايا ياخي انا راني مرا ومتزوجة بصح نقولك البنات راهم على راسهم هددها
لو كان انا جيت منك قولها حبيتي تكري اكري بدراهمك
وخليها في دار باباها مترفع قضية ماوالو زيدلها شوية وقت واعصر على قلبك كي تتوحش بنتك خليها عند يماها تعرف النعمة اللي كانت عايشة فيها ومحمدتش ربي
وربي يكون في عونك

[ضحى تسابيح]

ربي يكون في العون أخي الكريم........ ننصحك ما تتسرعش في الطلاق ........ ربي يصلح الأحوال

قصتك مشابهة ....عندي زوجة سلفي من نهار إلي ولدت ولات دير في المشاكل لزوجها و للعائلة ككل تحملناها عادي بصح زوجها ما قدرش يحمل تصرفاتها راهو عندها 5 أشهر في دار باباها قال ما نرجعهاش حتى تتربى هي و أهلها.... و حلف لأمه و خاوته ما يدخلوش روحهم باش يجيبوها.........ربي يقدر الخير

[shams7]

والله الا بكيت مين قريت الموضوع
مشي حق على مرتك دير هاك
كان لازم دير بالها عليك اكثر
قاع الناس يقولو المراة من تجيب الاطفال تتغير ياربي ما نتغيرش
بصراحة انا نحب خطيبي بزاف وكون نحس روحي نموت الف موتة وموتة مانعامله بهذه الطريقة وراني متوحشة نتعرف على ماماه واخوته لان هم راه يكونو عايلتي
وانا ماما دايما تقولي كون تتزوجي وراجلك ولا اهله يشكولي منك انا نتبرى منك وانت ما بنتي وانا ما امك...
الله يهدي مرتك
ونصيحة اليك
لا تتصل بها اتركها تفكر فيما قد تخسره ان نسيتها

[salem1985]

السلام عليكم لغالب خويا كل واحد وظهروا في الدنيا هادي بصح شوف الدار الي تلقى مرة تسيرها عمرها ما ربحت وحنا اصلا في الصحراء ما نخطبوش من العائلات الي تلقى الرجال ماعندهمش كلمة في الدار كي تقول ليه راني جايكم بالحسب والنسب ويقول ليك دوك نسقسي يماها خلاص روح وما تلفتش وراك واكبر حاجة تغلط فيها الامهات انها تعمر بنتها على راجلها وما علبالهاش بالي راهي تخرب دار بنتها وزيد مرتك خدامة وراسها فارغ كان حتى ولو امها وبابها غلطو هي تقول لالا داري بنتي واش يصرى في الدار يبقى في الدار لانو الوالدين الى دخلوا غير يهلكوا الحالة بالعاطفة خصوصا الام املا طلقها وهني راسك وكي تبقى ليهافي الدار رافدة اسم مطلقة تم تبكي الدم وما ينفعهاش ومن حق الراجل المرة انتاعوا يحبسها من الخدمة يقولها انت الشرع حللك لي انا نحتاجك الصبح العشية الليل ديما تكوني حداية والى حاب تتهنى بلا ما تتطلق شوف ارحل بيها للغرب ولا للصحراء وبعدها من دارهم وقول ليها مرة في العام تشوفي داركم تم كي تتغرب تحس بقيمتك وربي يوفقك خويا وباين هادي طفلة صغيرة موش ناضجة اصلا ما تقدرش تربي حتى بنتك ربي يصبرك خويا السلام

[mamia20]

و الله يا اخي اثرت فيا قصتك انت راجل بمعنى الكلمة يا خويا انا كون جيت في مكانها منحوش على عامل المهم زوج يحبني و يخاف ربي اتمنى ان زوجتك تندم و يرجع المياه الى مجاريها لان البنت هي لسوف تضيع و في بعض الاحيان الولدين بش ينصحو يخسرو بين البنت و زوجها اسأل الله العظيم ان يفرج عنك يارب لانك انسان رائع و لا يمكن ان تضيع ربي معاك اخي