ورشه 17 قفطان حريم السلطان... سطايفيه

stayfiya · 2014-05-22, 21:27

السلام عليكم و رحمة الله و بركاته
كيف احوالكم
القفطان هذا واحد من بين القفاطن المشاركه في مسابقه القفطان

كل وحده فينا دارت مجهودها باش تقدم احسن ماعندها
نشكر كل حباباتي لي شاركو معانا كانت تجربة رائعة توجنا باللقب جميعنا
نشكر الاخ عمر على صبرو معانا
و كل من شجعتنا و تابعتنا

حبيتكم تشوفو طريقه انجازو من الالف الى الياء

الخطوه الأولى كانت رسم التصميم على مانكان
وهاي الفكره نتاعي

كاين خطوه من قبلها من الحماس رحت شريت لقماش و الحرج. و حطيتهم
هاو ليكم الكتان والله ما نعرف اسمو مليح.

حنا نقولولو جُهْرٓه 3ميطرات ب 1100دج
و الدخلاني كوسموس ميطرتين

الغالون ب 80دج /8متر 2بوبينات ليزيستراس ب 700 دج

و لي بوني و لاستيك و لي زاكروش و سكراتش و كبه خيط خضرا

اول شي فصلت الدخلاني
هو جومب سويت و يبدى من تحت الصدر

لخياطه جي من الخلف

و هاذو لي بوني و الطرف تاع الظهر

و الطرف لي يجي منقوش فوق لي بوني من بعد يبان في لخياطه

و من بعد البراني و هاذا الباترون نتاعو خدمتو ب
قياسات ختي

كيما قلتلكم القماش مطبق على 2

و هذي الصوره تبين الامام و الخلف و أعلى المونش

كيما راكم تشوفو راني طراسيت لي بانس من امام والخلف

عرضهم 2 سم

و هنا تفصلي الجزء التحتاني تاع المونش

الفتحه جي في وسط المونش و اسفل المونش

يجي مجمول بلا خياطه

انا رفدلي 1 متر

كي نفصلو المونش تاعنا ندخلو ب 1 سم توال الطابق

من امام نقطعو يعني

و من بعد توكلت على ربي و بديت الخدمه

[CENTER]يتبع.....

stayfiya · 2014-05-22, 21:28

السلام عليكم صباح النور

واشراكم حبيباتي

اليوم لكان كتب المولى راحين نكملو خياطه القفطان

هو يحتاج منك تركيز بسيط و راح تفهمي

اشربي قهوتك و ارواحي

بلاك تخبطلك في راسك تخيطي واحد

و تحبي تعملي تغييرات انت حرّه

باسم الله

اول شي تعمليه

جيبي الطراف نتاوعك لي فصلتيهم

و تسرفليهم ( يعني تعمليلهم زيقزاق على لحواشي

الهدف ما يتسنسرش لقماش

و جيك خياطه متقونه و باهيه و دايمه )

تكفي طرف المونش الزايد

لي مونش انا حبيت نديرهم يركبو و يتنحاو

صافي هنا استعملت السكراتش لي ما يعرفوش

هذاك لي يقفلو بيه السبادري

هنا حبيت نوريلك المونش بلي يجي مجمول من اسفل

و مفتوح من فوق

نركبو السكراتش تحت المونش الفوقاني

و فوق التحتاني هكذا

لازم يكون تطابق باش ما يفضلكش ولا

يجي ناقص

( حبيت نقول ملاحظه هنا انو السكراتش يهلك لقماش

كي يكون رقيق و فيه لحرير يعني هاذ النقطه

انا تعلمت منها منزيدش نغلطها )

من بعد تحطي الطرف الزايد اكوتي

و تجملي الامام و الخلف

هنا انا ماخدمتش يالفيزلين خدمت بكانفا

تتباع تلصق وحدها بلا حديد

دوبليتها و مشيت بيها على حواف القفطان

بهاذ الطريقه

غير في دوران الرقبه

كرونتيت الكانفا باش نتحكم في الدوره و ما يجيش التكماش

تبداي تلصقي السفيفه نتاعك

ليسباس لي خليتو راح نعمر بيه لي زيستراس

شريت كاليتي مليح تاع الزجاج ماشي النيلو

و هادو ما يزنجروش و ما يلصقوش في القش

انا ماحبيتش شكل ليزيستراس يجي متباعد

صافي هزلي الدوبل بصح يجي خير

مالازمش الواحد يشح في الخدمه

اخدمي حاجه مليحة و ماتخميش في لخساره

السوارد راهم يجيو و يروحو المهم الاتقان

و تحكميهم بالخيط و لبرا

( هنا مانحكيش على لاسوفرونس ...)

و كي تخلصي ركبي لي زاكروش عند فتحه الصدر

و كفي قفطانك و لبسيه لزوليخه يخطي الطريق

اشربي قهوتك و ارواحي نكملو الطرف الدخلاني

راه ساهل ليه ليه تخلصيه بشرط تبعي التفاصيل

و تايك ايت ايزي

يتبع............

stayfiya · 2014-05-22, 21:29

عدنا

راح نكملو مع بعض الجزء السفلي او الدخلاني

اول شي راح تلصقي الفيزلين ل لي بوني لي فصلناهم

(ملاحظه هنا لقماش نتاعي يدور و شيطني باش حددتو من الافضل

نتي لصقي الفيزلين في الطرف لي رايحه تفصلي فيه

و من بعد فصلي وسرفلي و خيطي)

هادو لي بوني نتاوعي

كي نجملهم راني دوبليتهم

نروحو للدرابي لي يجي فوق الصر

كل وحده حره كيفاش تخدم

انا حبيت نخدو كروازي بعقده في النص

ومنها نبروفيتي في الكتان

هنا تبانلكم صعيبه بصح راهي ساهله تبعوني

تفصلي زوج طراف 50سم وعرضهم 25سم

طبقي الاول على 2 و تحيطيه و تخلي 5 سم مفتوحه

هاذي ندخلو فيها الطرف الثاني و

نوليو نخيطوه كي خوه شوفي الصوره تفهمي

نركبوالدرابي من فوق الصدر و نخليو

ايسباس ندخلو فيه لبروتالات

و من بعد نثبت فيه لي

بوني تاع السوتيان لي شريتهم مع اللوازم

و نبداو نخدمو النقشات نتاوعنا على الكوتي

و نقصو الزوائد

البروتالات تفصليهم اون بيي (يكون الكتان مايل )

باش يجي فليكسيبل

انا طولهم درتو 32 سم و نتي قيسي على حسابك

الفراغ لي خليناهولهم كيما خيطنا قبيل ندخلوهم ثم و نخيطو بطريقه نظيفه

انا حبيت نزيد وحد لبياسه باش تخفي مكان خروج البروتال

شوفي كيفاش خيطتها

هاي كيفاش تبان لبياسه

ضك نجملو على لي كوتي

مع لبياسه تاع الظهر و نلصق فيه

السروال من اسفل بعد مانكونو جملناه

نبداو نمشيو لاستيك عند الظهر

على 3طرق باش يشبحلنا الصدر

و يسهل علينا نلبسوه و نحيوه

و نكملو نلصقو لبروتالات من خلف

و هاي كملت من امام

و هاي ليك زوليخه

السانتوره نتاعو انا شريتها ب 6800دج

حبيتها خيرمن تاع القيطان

و هاذو الصور النهائيه لبساتو ختي و صورتها

هنا راهم راكبين ليمونش

و هنا منحيين

باش يكون براتيك و خفيف حتى تحبي

تنحي السنتورة و تستبدليها ب حزام رقيق تاع ليزيستراس

راح يجي مليح

و خلصنا

علابالي هرجتكم و كثرت عليكم

بصح والله راني بسطتلكم على قدما نقدر

ماذابيا تستفادو و لو حاجه قليله

و نفرح لوكان وحده فيكم طبق معليش ميش كيفو

اخيرا عندي طلب معليش في قلوبكم

ادعولي لابي بالرحمه و المغفره و جنات النعيم

والسلام عليكم و رحمة الله

اختكم السطايفيه

fadilasor · 2014-05-22, 22:54

الله يبارك هبلني القفطان هدا ىيعطيك الصحة

زنجبيل11 · 2014-05-22, 23:03

دخلت من اجلك سطايفية فرحت بعودتك
الله يجعل كل خير تقدمينه لاخوتك صدقة لكي و لوالديكي و في ميزان حسناتك

AZIZA1 · 2014-05-22, 23:10

الله يبارك رووووووعة
بشحال شريتي القماشات للمترة
و ليستراس ويت درتيهم

AZIZA1 · 2014-05-22, 23:11

و منين شريتي لقماشات ادا من سطيف قولينا منين بالضبط

sarra5 · 2014-05-22, 23:29

واااااو قفطاااان من لكباااااااار

في انتظار الورشة سطايفية

فاطمة شمس الاصيل · 2014-05-22, 23:58

يعطيك الصحة و العافية حبيبتي
ما شاء الله الله يبارك تحفة رائعة
الله ينورك ويسعدك في حياتك
ويجزيك خير على كل شئ
يا صاحبة العطاء الجميل
بارك الباري فيك
شكرا اااااااااااااااا

ام مريم اسراء · 2014-05-23, 00:28

الله الله ائعو دائما سطوفتي
للاسف متبعتش نهاية المسابقة ... لظروف .... لكن لقفطان تحفة بكل القاييس
دمتي فنانة و متالقة و متميزة
سطوفة ياك القفطان راه يلبس 44 ههههههه

نور الامل 12 · 2014-05-23, 01:27

lالحمد الله على عودتك لينا وان شاء الله تكوني بخير وتنوري المنتدى كيما عود تينا ياغالية علينا يابحر من العطاءلاينفذ

djazia87holi · 2014-05-23, 13:31

رووووووووووووووووووووووووووووووووووووووووووووعة

حورية38 · 2014-05-23, 15:24

جعلها الله في ميزان حسناتك وصدقة لروح الوالد الكريم رحمه الله ربي يوفقك ويجعلك دايما في خدمة الناس يا صاحبة القلب الكبير وفقك الله وسدد خطاك متابعة للورشة ان شاء الله فالقفطان تحفة

الماضوية · 2014-05-23, 17:05

شكرا على هدا الشرح وجزاك الله خير الا اني لم استوعب التفصيل جيدا باعتباري مازلت مبتدءة من فضلك اريد شرحا مبسطا في كيفية التفصيل وكدا طريقة الخياطة

ام هاديل وياسين · 2014-05-23, 18:28

باهييييييييييييين