إخوتي قلبي يتمزق ألما

[مشكلتي]

السلام عليكم و رحمة الله

أنا فتاة 19 سنة لكن تحملت من الهموم ما جعلني أكبر سنآ بكثــيير ملي فتحت عينيا و أنا فالمشاكل العائلية لا تنفك تنتهي مشكلة حتى تظهر أخرى بالرغم من أني راح نطول عليكم مي معليش حابتكم تفهموني و تنصحوني لأني فقدت الثقة بمن حولي لا أصدقاء و لا أقارب عايشة تحت شعار الموت على قيد الحياة

أنا طالبة جامعية و الحمد لله أدرس في كلية الطب وهادا عامي الاول (أدعولي نكمل الى أبعد الحدود) من عائلة لاباس بها (ماقصديش باش نفوخ لكن هادي نعمة من عند الله و راني نعترف بنعمه عزوجل) عايشة أنا و 4 خاوتي خرين 2 بنات و 3 ولاد خويا لكبير طالب جامعي شريعة يقرا سنة ثانية .. و أكيد يما و بابا و جدتي (الرأس المدبر الله يسامحها) ملي كنا صغار رسخت فينا جدتي عادات قديمة لا تصب الا في بحر الجهل ماكناش نعرفو الا لما كبرنا و قرينا تآمن بزاف بالمشعوذين و الشوافات و تتخذ من غير الله شريكا مثلا إذا حبت تدعي على عبد تقول :جدودي راهم قاويين و بركة سيدي عبيد ...(وتدعي على هاداك الانسان) (راح تقولولي بينها و بين ربي لكن أنا ماقصديش باش نفضحها و إنما هادا جزء من الحكاية المرة اللي عايشينها) شحال من مرة نحاولو نخرجوها من الحيز المظلم بنصحها بالتتي هي أحسن لكن ماتفهمش و تقولنا نتوما ما تخافوش ربي نصحنا نصحنا مي عيينا خليناها على هواها لأنها ماتاخذش بالقول وهاد العادات و الافكار لصقتها في الوالد ( الله يسامحو) وأصبح يامن بهاد العفايس..أمي المظلومة(ربي يشافيها) إنسانة أمية لا حول لها ولاقوة تحب تعيش كيما الناس لكن لا علاقات لها بهاد الافكار

والدي(الله يسامحو) كان يخدم في ولاية غير الولاية اللي عايشين فيها درك راهو متقاعد مدمن خمر لدرجة أنو كان مايشربش لليلة واحدة نرفدوه للمستشفى أمي قاسات و عانات طيلة الأعوام اللي عاشتهم معاه يدخل علينا كل ليلة ثمل يشريهالها على أبسط الحاجات و يضربها يردها زرقة و حنا نشوفو عشنا المر أنا و خاوتي بكينا وحدنا و لاسندا لنا الى الله عزوجل لكن من وجد الله فماذا خسر الناس كانو يحبو بابا ظاهريا فقط على جال دراهمو لكن في ظهروا يضحكوا علينا ووو... جا النهار اللي بابا قرر يتوب فرحنا كامل و بثت فينا روح الأمل ماركا هوا و يما في الحج لكن ماخرجوش فقرر يديروا عمرة في شهر رمضان راحو وأنا و خويا تحملنا مسؤولية الدار و قمنا بالواجب تهلينا في خاوتي و ماشي مزية (خاوتي 6 سنين 10 سنين و ختي 14سنة جا النهار اللي روحو فيه كامل فرحانين الا أهل الوالد (عماتي و زوجات عمامي) حسدو أمي و قالو ماتستهلش وحدة كيما هاديك ماتعرفش راسها من رجليها راحت لمكة و زاد الدار وولاد ناجحين و الطوموبيل بلا مانهدر على المشاكل اللي داروهملي أنا شخصيا لما كانو والديا غايبين لكن مايعرفوش باللي هاد السعادة زائفة و باللي في دارنا فرحة ماتكمل و فرحة ماتدوم .... ايه ماقتلكمش نهار اللي روحو فيه جاونا بزاف ناس و جداتي لتم بهدلتني و دارتلي العفسة اللي ماننسهاش طول حياتي بحكم أني درت كلش وحدي و عملت على روحي و مادخلتش عمتي و بنات عمتي باسكو كان علابالي باللي ماهمش معانا بالقلب الصافي بهدلتني قدام الناس و سمعتني كلام مايتصورش لعقل وأنا منكذبش عليكم الهم اللي كنت مخبياتو خرجتو وطرطقت في وجها بالبكا .....فاتو ليامات و بابا لحد الساعة من المسجد للدار من الدار لفاميلتو الى غاية هاداك النهار المسود اللي طاح علينا كي الصاعقة أنعم إيــــــــــــــــه بابا رجع يشرب كيما عوايدو أو بالأحرى المعتمر رجع للشراب و السبب عجزنا عن معرفته (حنا قبل مايروح اجتمعنا في قعدة في ليلة من ليالي رمضان مع جداتي أنا و خويا لكبير و قلنالها لوكان زعما بابا مايناحيش من عوايدو و يعاود يولي للشراب قالتلنا نقتلوا و هوا يشوف) و كان عكس ذلك تماما سانداتو و بررتلو و اللي يهدر عليه تنوض في وجهو (حنا حبينا نتغيرو للأفضل و ديما نقولولها يا جداتي أهدري معاه عيب راهو في عمرو 55 سنة ومازال يدير في عفايس شباب الوقت هادا واعيين عليه وهي غير تبررلو و تقولنا واحد ماراح يرقد في قبرو- مع العلم أنه تم التقدم لي من طرف شاب لكن لما سأل باباه علينا قالولو غير خطيك ماديرش يدك في يد الساكارجي و هادي اللي خلاتلي مارة في حياتي و خلاتني نحقد على بابا و على تصرفاتو الصبيانية و نكره معيشتي ( أنا مانيش ملهوفة على الزواج راضية بقدري و الحمد لله للكن علابالي كيما قال هاد الانسان راح يقولو ألف غيرو نفس هدرتو) فاتو ليامات و بابا ولا كل ليلة شارب و إذا مايسهرش برا يجيب معاه للدار ... كرهنا من حالتنا و يما مانحكيلكمش لوكان لقات كيفاه دير نهاية لحياتها راهي دارت مع المرض عندها الروماتيزم كرهت لمعيشة في دارنا و مالقاتش حل و بابا كلما يديها تداوي يعايرها و يقولها ماتستاهليش نخسر عليك لملاين وصل وين ماولاش سامع بيها و مايديهاش و كي تشكي من حاجة يقولنا أي تكذب و ماتامنوهاش راهي تمثل ؟؟...(حسبي الله و نعم الوكيل) و جداتي لا دور لها في الاصلاح و إنما فقط في الهدم وبدات تخرف على بابا قاتلو أك مسحور لازم تشوف رقاي و الرقاي اللي يعرفوه هوما ماشي بالرقية الشرعية بالقرآن و إنما بالاعشاب ولحروزات و البخور مافهمنا والوا ...الناس ولاو يشوفو فينا بنظرة ماشي مليحة و يحكمو علينا نفس الحكم بسبب تصرفات الأب لدرجة أنو و الله ياخاوتي أقولها و قلبي يحرق لما نخرج من الدار ولاد الحومة يبداو يقولو فيا عفايس ماشي ملاح و لوكان نقول كلمة ردا على وقاحتهم يعايروني ببابا .... يما راهي غايبة على الدار هادو 3 شهور كرهت بعدما كثرلها بابا بالمشاكل . بابا حلف يطلقها و أنا درت عطلة مرضية و قعدت نتهلا في خاوتي الصغار اللي وين نشوفهم نبكي سمحت في قرايتي علاجالهم و الله قلبي يتقطع كيما نشوف فالدار و نتخيل يما فيها كيفاش كانت تتهلا فينا كيفاش كانت تجيبلي الماكلة لحد عندي كيما تكون عندي قرايا و تقولي (أقراي ابنتي باش متقعديش للتمرميد كيما أنا) ودوك مالقيتش اللي جيبلي كاس ما.جداتي و عمتي خدمتهوم القيل و القال و دارونا سوق من نهار اللي خرجت فيه يما من الدار .أني حالفة نهار يفيض الكاس كامل يعرفو بلايصهم وين ؟؟ واحد ماعلابالو بينا بابا صرالو كيما هاداك اللي قالك طول الايام سكرات و فالجمعة الصلاة ..خويا بدل من الجامعة اللي كان فيها و راح لولاية خرا و مازدناش سمعنا حتى خبر عليه أنا مستقبلي مجهووووووووووووووووووووووووووووول سييت نهدر مع بابا و نصلح مي هوا عينو في مرا وحدة خرا وقالي لوكان تنطقي كلمة يانقتلك يا تلحقي يماك و نحيك من الكارني دفامي أنا عييت كرهت مالقيتش حل راني نبكيي ليل و نهار أنا اللي كنت نحلم من صغري بعايلة متكاملة و تجوز نهار بلامشاكل أنا اللي كنت نحلم نولي طبيبة و درست من أجل هادا تخلاص عليا ضحية قاعدة فالدار فاميلتي يستشفاو فيا و يضحكو زعما وصلت الواد و ماشربتش أنصحونــــــــــــــــــــي على وجه ربي منآ حامية منآ تكوي واش ندير ؟؟؟ إذا وقفت قدام بابا راح يتبرى مني و منين نعيش أنا (الماديات عندهم دور في مستقبلي ويما ماعندها حتى مدخول) ؟؟ إذا سبلت في يما (يما مريضة شكون يتهلا فيها لوكان منكونش أنا ؟؟؟؟ راني نحوس على رضايتهم لكن ماعطاونيش فرصة وحابة نقول (يا ربي وكلت لك أمري ) إن شاء الله اللي كان السبب ربي يسامحو و اللي يستشفا فيا و اللي ظلمني نقولو الدنيا دوارة و غدوة تجي دالتك و نوكل عليك ربـــــــــــــــــــــــي .. .توحشتكــــــ يا يما لعزيــــــــــــــــزة وراهو يعلم بيا غير ربي

[blanche rose]

آلمني كلامك كثيرا
ولا أعلم ماذا أقول
أنتظر ردود المدافعين عن أمهات الازواج..بالتحديد تلك اللواتي لا يخفن الله..
أمهات لا يعرفن للخير طريقا
أمهات لا يعرفن سوى تخريب البيوت




عودي لدراستك واكمليها ولا تضحي بها
وبخصوص الخطاب
لا تخافي
فكم من فتاة والدها سكير وتزوجت
امر الزواج يعتمد على مدى تقربك لله عز وجل
قولي حسبي الله ونعم الوكيل
استغفر الله واتوب اليه
الحمد لله
الذكر
اذكار الصباح والمساء
الصلاة
..الخ

جدتك حسابها عسير مع الله عز وجل
حسبي الله ونعم الوكيل فيها وفي أمثالها

غاليتي ارمي حملك على الله عز وجل
فهو أحن عليك من والديك

لا تهتمي لما يقولون
فلن يرفعوك ولن ينزلوك
اهتمي بسمعتك واخلاقك

حملي برنامج كنوز في هاتفك
وبالتحديد الخاص بالاذكار
لانه سيساعدك على الذكر

حسبي الله ونعم الوكيل في كل ظالم وظالمة

ربي يفرج عليك ويسعدك أنت وأسرتك

[melissa lola]

والله مشكلتك قاستني بزاف ربي يفرج عليكم ويهدي باباك هذا واش نقول لاختي ماتضيعيش قرايتك ومكاش اللي ماعندوش مشكل في حياتو انتي على الاقل قريتي مالقري نشاتي في ظروف صعبة ادعي بدعاء سيدنا يونس لا اله الا انت سبحانك اني كنت من الظالمين وربي يفرجها من عندو

[أم ريتاج زهرة]

اختي عجز اللسان على الرد انا نقولك حاجة واحدة برك اياك وتفرطي في قرايتك اللي تعبتي عليها هي اللي توصلك بعيد ضدقيني و لما تقعدي في الدار مع هاد المشاكل تولي جاهلة و انتي الله يبارك عليك طبيبة المستقبل انا من رايي طيحي و نوضي على قرايتك و باش توقفي مع يماك مسكينة و باباك يجي النهار اللي يندم و يا ريت قبل فوات الاوان و على جداتك حسابها مع رب العالمين عسيرا بالتوفيق حبيبتي و طمنينا عليك اختي موفقة باذن المولى عز و جل اسال الله ان يفرج عنك كربتك

[oum souhaib]

يااحبيبتى واش راكى راافدة الله يكون معااك الله يكون معااك.شوفى سلااااااحك قرايتك متفرطيش فيها مهما كان الحال .باباك الله يهديه كثري الاستغفار ضاعت منى الكلمات الصراحة

[Tamalou]

اختي العزيزة،الحل الوحيد لكل هذه المشاكل هو ابعاد الوالد عن البيت و لكن بشرط ان يبقى معيلا لكم. و هذا يمكن تحقيقه بتزويجه بامرأة اخرى مع اشتراط العدل بين الزوجات.يعني بالمختصر المفيد: يماك تتهنى منو ،ؤباش تتهنى اكتر، تبعت لعجوزة عند لمرة الجديدة.
ربي يهدينا و يهدي باباك، امين

[ROMMEL]

المشاركة الأصلية كتبت بواسطة tamalou

اختي العزيزة،الحل الوحيد لكل هذه المشاكل هو ابعاد الوالد عن البيت و لكن بشرط ان يبقى معيلا لكم. و هذا يمكن تحقيقه بتزويجه بامرأة اخرى مع اشتراط العدل بين الزوجات.يعني بالمختصر المفيد: يماك تتهنى منو ،ؤباش تتهنى اكتر، تبعت لعجوزة عند لمرة الجديدة.
ربي يهدينا و يهدي باباك، امين

حل جميل و انا معك في هذا الطرح

[Yeah]

سلام عليك فرض نفسك عليهم ديري القران كل يوم صلي قدامهم

متسمحيش في قرايتك ..... لا اعرف ان كنت من ذالك النوع لكن اجبدي على الناس شوية التهي بداكم و خليهم يهدروا

24 ساعة = 6 نوم + 6شغل منزل خوتك+ 8 دراسة جامعة +2 شوفي الوالدة ديالك + 2 دراسة منظمة

شوفي خوك متسمحيش فيك

الوالد و جدة حدثيهم عن مرض السرطاة و سكرات الموت و عن مالك .......

الوالدة متسمحيش فيها

صلي + ديري الخير قدر المستطاع

[Yeah]

عماتك الافضل شئ ديرهلهم هو انكي تخرحي طبيبة la vengeance est un plat qui se mange froid

[first first]

قصتك اختي توجع القلب .
باختصار اختي.............خممي الان في الحلول العملية...وحاولي الخروج باقل الخسائر.
درتي عطلة مرضية......للضروف المزية التي تعانين منها..............عين العقل.وربي يجازيك فوق ماتتصوري.
ايه صح مستقبلك خاطرتي بيه...............الحمد لله راكي مسجلة طب.............شعبة ربما حلمتي بها.............قد يضيع هذا العام لاباس............... لكن كما قلت لك ربي يعوضك ويسهلك امورك فيما بعد لاتقلقي............لانو الصراحة اخوتك صغار........والمخاطرة بثلاث اشخاص في امس الحاجة للرعاية والاهتمام اعضم من المخاطرة بعام دراسي مخلوف في جميع الاحوال.


باباك سكير.....................والله الخمر ام الخبائث............ومع هذا ربي يهديه............وباباك ادعيلو في كل صلاة وكلام المجتمع اجعليه في سلة القمامة حاليا.......................صح السمعة راهي غالية....لكن الله غالب.............................ومادامك انسانة نظيفة وبهذا العطاء فلك تنحني جميع الرؤوس احتراما لتضحياتك وصبرك وليس العكس.
حسب فهمي اختي امك غادرت البيت......ولاتريد العودة؟؟؟ معدورة طبعا..............لكن ان كانت تتقبل العودة لكن الوالد لم يكلف خاطره لارجاعها ولاالجدة تدخلت لدلك فاني اعتقد ان تضحيتك تعزز موقفهما.يعني لقاوك متهلية في خوتك ولاقية حل على حساب نفسك لاخطائهم لذا فهم لايفكرون في حجم غياب الوالدة عن البيت
مع هدا يااختي.......والله تهليك في خوتك وتضحيتك راهي عين العقل.
اما عن دفاع الجدة عن ابنها.................براي مقبول...............هي اكيد تشوفو غلطان لكن ربما تدافع عنه للابقاء بعض الهيبة لديكم يبقى ابنها ويبقى باباكم.....يعني رد فعلها عادي حسب رايي؟
ماعليهش اختي................ان مع العسرا يسرا................وان شاء الله ربي يفرج عليك وعلى الوالدين وعلى اخوتك............وتخرجي من هدي التجربة بخير عضيم في الدارين...................واتفكري هدرتي هادي..............لكن واجهي بصبر واستعيني بالله.
في الاخير اختي
الله المستعان............عليك بالدعاء................ادعي ربي يفرج على باباك بالهداية ويشفي الوالدة ويحفضكم من كل سوء
الاستغفار مفتاح الفرج استغفري .........واستغفري للوالد.

[Espoiire]

قصة مؤثرة..
ربي يفرج عليييكم

[الرميصاءْ]

ربي بفرج عليك

[..بسمة أمل ..]

السلام عليكم اختي

لا حول و لا قوة الا بالله

العلي العظيم

ربي يفتح عليك يا اختي

ويفرج كل همومك و الله

كلماتك قطعتلي قلبي ربي

يفتح عليك كل ابوابو في القريب

العاجل يا اختي حاولي تكري هاذ

الدعاء

الهم , دعاء
دعاء الهم والكرب
رب عبدك قد ضاقت به الاسباب
وأغلقت دونه الأبواب
وبعد عن جادة الصواب
وزاد به الهم والغم والاكتئاب
وانقضى عمره ولم يفتح له الى فسيح مناهل الصفو والقربات باب
وانت المرجوّ سبحانك لكشف هذا المصاب
يا من اذا دعي اجاب
يا سريع الحساب
يا رب الأرباب
يا عظيم الجناب
يا كريم يا وهّاب
رب لا تحجب دعوتي
ولا ترد مسأ

[billel84]

السلام عليكم اختي والله المني كثيرا وضعك للاسف الشديد العائلة مشتتة بسببين بسبب ام الخبائث وبسبب حسد عجوز مكارة ربي يهديها ول يديها المهم عليك بالصبر والاستغفار ولا تخسري ابيك مهما كانت الضروف فهو ضحية امه التي لا تخاف الله ولا تعظمه بل تخاف المشعوذين وتعظم خرافاتهم فمن شدة كرهها لامك رضيت بادخال ابنها النار والعيااذ بالله وانصحك مرة اخرى لا تخسرري ابيك وادعي ربي في اوقات الااجابة فقلوبنا بين اصبعييه ولعل االوالد يرجع لرشده ونحن فخورين بصمودك ولا تلتفتين لكلاب الحي فهمهم تحطيم الناجحين امثالك ويحسدون عفتك رعاك الله اختي وسدد خطاك

[الطيب الجزائري34]

ربي يفرجها عليك .
مشاكل البيت تاتي من الاب السكير ربي يهديه و من الجدة
كحل نهائي ان ضاقت بكم السبل اقبلوا ان يتزوج بمراة ثانية ان كانت امك تقبل هذا الامر . في المقابل ان تشترطوا عليه ان يشتري لكم منزلا باسم امك مع النفقة + تفروا من المشاكل و تبني مستقبلك مع اخوتك و امك بعيدا عن المنكرات .