الامهات الجدد ارواحو نفهمكم

*رحيق الجوري* · 2014-09-09, 16:39

راح نحكي على اكل البيبي حذااااااري تبدايلو قبل ستة اشهر معدة تاعو رهيفة متتقبلش

والعسل انا شفت بعيني ليمدوه مع انو خطير لازم حتى بعد عام
بوتي سويس تقدري في اواخر خمسة اشهر

وفي ستة تبداي بالخضار بيون خفيف بطاطا جريوات جزر وورقة سلاطة وتغطيهم لازم تغطي باه ميروحوش لي فيتامين وتخليهم ربع ساعة لا اكثر وترحيهم مليح بلماء تاعهم شوية لانو معمر بالفيتامينات

ومع لوقت تعودي
ديريه جامد شوية وياكلو بلمغرف

ممكن تعودي تزيدي مع لوقت كابويا و بيضنجان. وكرافس و لوبيا خضرة

البروكلو ولفت يديرولو الغازات
ونتي لازم تكوني ذكية وتلاحظي اذا ولدك عندو امساك نقصي الجزر وزيدي الجريوات والعكس صحيح

ومديريش الملح خلاص لان الخضرة اصلا فيها الاملاح

ومديريش الزبدة ديري زيت زيتون مفيد جدا جدا وخاصة ادا عندو الامساك يمشي الكرش

في حالة الاسهال شربيلو ما الارز غلي طرف روز ولماء تاعو ديري بيه البيبرون وشربيلو ولا الماء تاع الجزر

بالنسبة للفورماج متوكليلوش اي نوع بل وكليلو كيري لانو هو لخفيف للرضع لا فاش كيري ثقيل يوجعو
ممكن تزيدي للخضار صفار بيضة

بالنسبةللفاكهة

من الافضل ياكلها كومبوت خير اخطيك من لي تتباع وديريها وحدك في الدار ابداي بالتفاح قشريه ووقطعيه قطع صغيرة وحطيه في كاسرول صغيرة ونظيفة ومعاه شوية ماء وطيبيها مغطية طبعا على ليفيتامين ووارحليها ولي تقول لازم ندير السكر نقولها متفوتيش مغرف صغيرة انا عن نفسي منديرش السكر

الفرينة والكومبوت لي تتباع لا انصح بها ابداااا

اذا عجبكم الموضوع اضغط على كلمة شكر و لي عندها سؤال تتفضل مادامني هنا ان شاء الله في موضوع اخر

التـــــــــــــــــــائهة · 2014-09-09, 17:53

شكرالك
انا بنتي عندها 4 اشهر و 7 ايام راني نمدلها لابلامين مرة واحدة في النهار و في البيبرون
ندير 120 تاع الماء 03 مغرف حليب و 01 مغرف لابلامين
صحيح واش راني ندير و لا لالا

*رحيق الجوري* · 2014-09-09, 18:08

هاديك ديريها نوغمال ممكن في الليل تعمليلها المقدار المعتاد تاعها تاع لحليب وتنقصي مغرف وتعوضيها بلفرينة في اخر رضعة ليها تاع الليل السبب باه ترقد مليح خاطر تشبعها ومتبقاش كل مرة تنوضلك
بصح الا عطيتهالها في النهار معندها حتى معنى خلااااااااص الحليب وحدو يكفي ويعطيها كامل لي فيتامين لي محتاجتهم
كتعود تشرب حقها كامل تاع لحليب كوني متهنية عليها
حسب عمر بنتك اعطيها 210ملل كل ستة ساعات الى خمسة ساعات ونصف معناها عندك رضعة على الثمنية والثانية على السعتين والثالثة على الثمنية والرابعة على السعتين تاع الليل 8/14/8/2
واذا حبيتي تقربي ممكن 180تنقصي في الساعات وصدقيني راح يعطيها واش تحتاج

لاي سؤال انا حاضرة للاجابة

*رحيق الجوري* · 2014-09-09, 18:11

اختي 120تعبك ياسر

التـــــــــــــــــــائهة · 2014-09-09, 18:14

حاولت نمدلها 210 ماحبتش ترضعهمة
راني نمدلها 120 كل 03 سوايع
1 على 7 و نصف صباح
2- على 11 و نصف

...
عل 8 تاع الليل نملها لابلامين
و على 00 نمدلها ببرون تاع حليب هكدا ترقد ماتنةضش كامل في الليل
سؤال ىخر
هاد النهارات مراهيش كامل ترضع مليح حسب رايك واش هو السبب
شكرا

*رحيق الجوري* · 2014-09-09, 18:37

ادا العرف تاعها هاكا يعني مترضعش بزاف واذا تكون كانت ترضع مليح ونقصت كاين زوج احتمالات
اذا كانت تتقيا ممكن ڤراجمها ولا تنبات
واذا معندها حتى اعراض ومام سخانة ماكانش (السخانة جامي تتقاص باليد لازم تغموماتخ والاحسن في المؤخرة ) يتسمى متخافيش دوك ترجع هاذي مرت بيا شحال من مرة معناها تزيد النمو مع الرضاعة تاعها وكتنقص شغل راها تثبت في النمو تاعها دوك ترجع هادي لحالة مطولش بلاك بنتك عندها امساك على بيها
نتي كمتحبش ترضع متحتميش عليها تولي تتقياه وننصحك رقي بنتك ممكن عينوها

وماشاء الله عليها كترقدلك كل الليل متحكيش للناس وحصنيها كل صباح وقبل مترقد ربي يحفظهالك ان شاء الله

*رحيق الجوري* · 2014-09-09, 18:40

وقت متحتاجيني اني هنا اختي سمونة اوكي يا زينة

اسماء47 · 2014-09-09, 20:21

جازاك الله خيرا الاخت رحيق
بنتي راهي قريب تغلق ستة اشهر
مامديتلها والو قبل ستة اشهر ماعدى حليب صدري
و دوكة بديت نديرلها خضار مهروسة
حابة نسقسيك
راني نرحيلها موزة كي نشوف عندها اسهال
و تاني راني نمدلها بتي سويس هاذاك اللي يجي ملون غوز و ازرق و اصفر
و البيسكوي واش من ماركة تنصحيني بيها
و الاجاص و العنب و البطيخ الاصفر نمدلها و لا لا
و شكراااااااااااااااااا
الله ينورك

صُبح الأندلس · 2014-09-10, 14:38

بالنسبة للأكل كل رضيع و طاقته و حاجته
أنا مثلا ابني في 4 أشهر أصابه الليل أو لا أدري فكره الحليب يعني إذا لم يشرب الحليب ماذا أعطيه ؟ مؤكد لابد من إدخال الأكل و هذا بنصيحة الطبيب خاصة أنه لا يشرب في الرضعة إلا 90 ملل هذا طبعا بعد أن عانيت معه حتى أصبح يشرب مجددا لكن بكميات قليلة و بفترات متباعدة
يعني كل رضيع و حالته و لا يمكن ان نطبق الأمور و النصائح على كل الرضع
بالنسبة للكومبوت أكيد الذي يحضر في البيت أحسن
لكن الفرينة لا أرى فيها مشكل بل يجب تجريب أكثر من نوع لنرى ما النوع الذي يحبه الرضيع

ام مهدي2010 · 2014-09-11, 00:13

بارك الله فيك على الموضوع القيم

التـــــــــــــــــــائهة · 2014-09-14, 11:38

اين انت اختي يا ريت موضوعك يبفى دائما في المقدمة

*رحيق الجوري* · 2014-09-14, 14:19

اقتباس:

المشاركة الأصلية كتبت بواسطة اسماء47

جازاك الله خيرا الاخت رحيق
بنتي راهي قريب تغلق ستة اشهر
مامديتلها والو قبل ستة اشهر ماعدى حليب صدري
و دوكة بديت نديرلها خضار مهروسة
حابة نسقسيك
راني نرحيلها موزة كي نشوف عندها اسهال
و تاني راني نمدلها بتي سويس هاذاك اللي يجي ملون غوز و ازرق و اصفر
و البيسكوي واش من ماركة تنصحيني بيها
و الاجاص و العنب و البطيخ الاصفر نمدلها و لا لا
و شكراااااااااااااااااا
الله ينورك

سامحيني حبوبتي طولت عليك بالنسبة للفواكه لا متبديلهاش بهادو بلعقل عندك لي تقدر تاكلهم تفاح وبنان وخوخ وايجاص
الدلاع والبطيخ ولفراز ووو مازال وقتهم

بالنسبة للبيسكوي لازم ميكونش حلو بزاف ومافيهش شوكولا افضل نوع هو طوم ولا قاطو كاسكروت ماشي حلوين بزاف
وكاين نوع تاني للرضع نسيت اسمو المهم عرفتي لخانسيب تجنبي لي يكون حلو وفيه السكر بزاف

*رحيق الجوري* · 2014-09-14, 14:28

اقتباس:

المشاركة الأصلية كتبت بواسطة صُبح الأندلس

بالنسبة للأكل كل رضيع و طاقته و حاجته
أنا مثلا ابني في 4 أشهر أصابه الليل أو لا أدري فكره الحليب يعني إذا لم يشرب الحليب ماذا أعطيه ؟ مؤكد لابد من إدخال الأكل و هذا بنصيحة الطبيب خاصة أنه لا يشرب في الرضعة إلا 90 ملل هذا طبعا بعد أن عانيت معه حتى أصبح يشرب مجددا لكن بكميات قليلة و بفترات متباعدة
يعني كل رضيع و حالته و لا يمكن ان نطبق الأمور و النصائح على كل الرضع
بالنسبة للكومبوت أكيد الذي يحضر في البيت أحسن
لكن الفرينة لا أرى فيها مشكل بل يجب تجريب أكثر من نوع لنرى ما النوع الذي يحبه الرضيع

صح كل واحد وحاجتو وطاقتو تاني بصح هدا هو لبخانسيب تقدي تقولي راه متفق عليه عالميا

الفرينة ابنة خالتي طبيبة وكانت تعمل بطريقة ياسمين اي مغرف واحدة في الليل تنقص من الحليب وتعوضها فرينة انا شخصيا لم استعملها

بالنسبة للعمر عالميا متفق على ستة اشهر وبما ان ابنك ضعيف فالطبيب ادرى بحالته لكن حذاري من انواع اكل ربما تضره اكثر مما تنفعه

هذا البرنامج من المؤكد انه موجه للرضع العاديين اما من لديه مشكلة كانعدام الشهية او التقيا المتواصل وغيرها هنا الطبيب وحده من يقرر ولا يمكن الاستفتاء في هذا الامر

اجدادنا كانو يطعمون الرضيع في الثلاثة اشهر ما يعرف ب ((العصيدة)) وها نحن في كامل صحتنا لكن الوقت تغير وكثرت الامراض والمشاكل

*رحيق الجوري* · 2014-09-14, 14:31

اقتباس:

المشاركة الأصلية كتبت بواسطة ام مهدي2010

بارك الله فيك على الموضوع القيم

وفيك بركة غاليتي نورتي

*رحيق الجوري* · 2014-09-14, 14:32

اقتباس:

المشاركة الأصلية كتبت بواسطة الياسمين الحرة

اين انت اختي يا ريت موضوعك يبفى دائما في المقدمة

شكرا حبيبتي ياسمين انا في الخدمة نورتي