شكون تديرني كي ختها وتعلمني الطياب؟

[الماسة البراقة]

السلام عليكم خواتاتي ران حابة نتعلم نطيب الله غالب معنديش لي يعلمني شكون تقبل تعلمني ولو القليل من اصول الطبخ ران منعرف والو ونشاله رب يجازيها ران نستنا فيكم خياتي متبخلونيش

[أ م ساجد وسيم]

شوفي ختي راه طياب ساهل لازم تحبيه باش ماكلتك تجيك بنينة...وكي تحكمي الاساسيات تماك تقدري تبداي تنوعي في طيابك وتحطي لعجب من يديك ....لازم تتعلمي البهارات.....وطرق بسيطة باش تجيم لماكلة بنينة كيما ماتمرقيش بزاف ....قلي ماكلتك مليح...ماتكثريش الملح لازم ديري كوراج وتحكمي لكوزينة غير بشوي....ابداي بلاطباق لي تجيك ساهلة ولي في خاطرك تتعلميها المنتدى عاااااامر وصفات اختاري وحدة مال ليها قلبك. نصحك بداي بلاسهل ..جربيها وتبعي الخطوات واذا حصلتي في اي حاجة رانا هنا ختي

[om mouez]

فعلا كيما قالت الاخت ام ساجد وسيم مكانش اسهل من الطياب وخاصة اذا حبيتيه وطيبتي من قلبك المنتدى الله يبارك مليان بالوصفات الرائعة رح يخليك تحبي و تتعلمي الطياب بسيف عليك وربي يوفقك ان شاء الله

[om_nour]

اللَّهُمَّ يا مَنْ يُجِيرُ وَلاَ يُجَارُ عَليْهِ.. أَجِرْنا مِنْ النَّارِ وَمِنْ خِزْيِ النَّارِ.. وَمِنْ كُلِّ عَمَلٍ يُقَرِّبُنا مِنَ النَّارِ وَأَدْخِلْنا الْجَنَّةَ مَعَ الأَبْرارِ بِرَحْمَتِكَ يا عَزِيزُ يا غَفَّارُ. اللَّهُمَّ

اشْفِنا

بِشِفائِكَ.. وَدَاوِنا بِدَوَائِكَ.. وَاغْنِنَا بِفَضْلِكَ عَمَّنْ سِوَاكَ.. لاَ إِلَهَ إِلاَّ اللهُ.. لاَ إِلَهَ إِلاَّ اللهُ الْحَقُّ الْمُبِينُ.. مُحَمَّدٌ رَسُولُ اللهِ الصَّادِقُ الوَعْدِ الأَمِينُ. اللَّهُمَّ يا غَنِيُّ يا

حَمِيدُ.. اغْنِنَا بِحَلاَلِكَ عَنْ حَرَامِكَ.. وَبِطَاعَتِكَ عَنْ مَعْصِيَتِكَ.. وَبِفَضْلِكَ وَجُودِكَ وَكَرمِكَ عَمَّنْ سِوَاكَ. اللَّهُمَّ اهْدِنا وَاهْدِ بِنا.. وَاجْعَلنا هُداةً مُهتَدِينَ.. لاَ ضَالِّينَ

وَلاَ مُضِليِّنَ، اللَّهُمَّ أَصْلِحْنَا وَأَصْلِحْ بِنا وَاجْعَلنا صَالِحِينَ مُصْلِحِينَ بِمَنِّكَ وَكَرَمِكَ يا أَكْرَمَ الأَكْرَمِينَ.

اللَّهُمَّ اجْعَلْ عَمَلِي كُلَّهُ صَالِحاً وَاجْعَلْهُ لِوَجْهِكَ خَالِصاً.

[نوال عيسى]

اهلا بك اختي
الله يبارك الاخوات كفاو و وفاو وزيد مادام عندك النية فالتعلم اكيد رح تنجحي لما تجربي ديري الكوراج وكيما قالو الاخوات ابداي بالحاجة الساهلة
المنتدى مليء بما لذ وطاب وافكار في القمة وكل حاجة تنسيك في الاخرى وبما انك مبتدئة ابداي باطباق لام رامي صراحة اكلها يشهي ومن خلالها عرفت المنتدى هنا ونظن انه كاين دروس للطبخ للاستاذة ام رامي وايضا الاستاذة ام كوثر جربي منهم
وننصحك ما تياسيش من اول محاولة جربي وعاودي مرة تجي ناقصة ملح مرة ناشفة وكل ما تغلطي رح تزيدي تكسبي خبرة
وحبي الطبخ هذا اهم شي

[naima10]

الطياب راه كيما الفن إذا حبيتيه تتعلميه وماشي حاجة صعيبة مادام عندك الإرادة باسكو كاين لتقولك علاش نتعلم كلش راه يتباع
كيما قالتلك الأخت أم ساجد لازم تتعلمي الأساسيات مثل البهارات واش تستعملي للمرقة البيضة والحمراء وثاني لازم تقلي طيابك مليح قبل التمراق باه اللحم ولا الجاج نتاع والخصرة تشرب هاذو البهارات وتجيك بنة مليحة وثاني في التمراق ما تكثريش الما بزاف باه الماكلة ما تجيش سامطة
ويصراو الغلطات كي تكوني تتعلمي لي منهم رايحة تستفادي وتولي ماهرة إن شاء الله
والحمد لله راه كاين أخوات الله يبارك عليهم كل صبع بصنعة رايحة تستفادي منهم

[الماسة البراقة]

شكرا اخواتاتي تبارك الله فيكم انا مشكلتي فالتقلية منعرفش واش لازم ندير وش لال وباش نبدا وكفاش نقلي الخضرة ساعدوني ربي يخليكم

[أ م ساجد وسيم]

ابداي بالبصل ولحم لي حابة ديري قليه شوية ومنبعد زيدي خضرتك لي حابة تقليها معاهم وتوابل تاوعك قلي على نار قليلة وحركي مرة على مرة ماتخليهاش تحرق ومنبعد مرقي قيس لي يتغطالك لحم تقريبا وغلقي عليها طيب وعينك ميزانك في وقت طياب يعني على حسب لمرقة لي درتي ونوع لحم

[الماسة البراقة]

شكرا اختي ام ساجد وسيم ممكن تعطيني شحال ندير البصل والزيت والثوم والتوابل شحال نستعمل ساعديني ختي ربي يهنيك ران دايرة فيك ثقتي

[امّ اياد]

اختي الطياب حاجة ساهلة واكثر حاجة تتعلمي منها هي يوتيوب كي تشوفي بعينك احسن وكمية البصل والتوابل على حساب كمية لي تحوسي طيبيها حنا دائما نستعملو حبة واذا كانت كبيرة ديري نصفها وزيت ديري ثلاث ملاعق لي ناكلو بيهم وتوابل ديري بملعقة صغيرةكاين لي يجب توابل وكاين لي ميحبش يكثر انتي دائما قلي مليح البصل واللحم مليح واذا كان مرق يحتاج الخضر ضيفيهم وزيدي قلي وضيفي الملح ومبعد توابل اول حاجة ترميها في توابل فلفل اسود ومبعد يجو توابل الاخرين وطاس ماء تكوني موجدتيه بالقرب منك باش ميتحرقوش توابل بمجرد تلحي لصقو في قاع طنجرة مرقي بقليل كن الماء فقط ومرقي بجيه مدريش الماء فوق اللحم والخضر باش متغسليهمش من التوابل وخليهم يتجمرو مدة 2 د الى 5د ثم ضيفي كمية الماء المتبقية حتان يغطى اللحم بواحد سنتيم يعني متكثريش الماء باش تجي ماكلتك بنينة
البصل نستعملوه في كلش معادا الشربة (فارمسال او تاع الزريع باش تفهي الشربة لي راني نقصد فيها ) هذي يجيها ثوم بدون بصل قصبر او الحشيشة المقطفة ترافق المرق الاحمر اما معدنوس يرافق المرق الابيض الرند يجي لطاجين الزيتون ورميه في اخر لحضة مرات يكون مر
التوابل
الكمون : يجي لجميع بقوليات مثل الحمص واللوبيا والعدس
الفلفل الاسود : تستعمليه في كلش والغراتان ايضا
الكركم يجي لونو اصفر:تستعمليه لطواجن والمرق الابيض باش يعطيه لون ويخثرو
@القرفة: اتعملها في شربه في طاجين لحلو في جلبانة والزيتون تعطيهم مذاق هايل
حبة الحلاوة : مرحية في طاجين لحلو وغي مرحية في الخبز واحيانا يدقوها مع القصبر اليابس
القصبر اليابس : لبعض المرق الاحمر والحريرة
الزنجبيل : انتي وذوق نتاعك تحبي تستعمله
الشلاضة اوراق دائما اغسليها وخليها تقطر مليحة رابي فيها سنة ثوم تعطيها ذوق جميل ايضا الجزر المرابي
المهم انتي ذرك شمري على يديك وقولينا الحاجة لي تحوسي طيبيها ونقلك كامل تفاصل وكي متنجحيش اول مرة متفشليش ومتحكميش على نفسك خلي غيرك هو لي يعطيك رايك

[أ م ساجد وسيم]

هاهي ام اياد ربي يفرحها شرحتلك احكمي مام قناة سميرة لصقي فيها. لا شوفي لي فيديو تاعها في ليوتيوب راهي ناس ولات طير بيها رجعو كلش يتفننو فيه انا نعرف عجوزة كثر من ستين سنة رجعت دير لي قاطو لي راسك يحبس كي تشوفيهم برك من قناة سميرة تابع الحصة....تكتب الوصفة وطريقة وثم ثم طبق

[ميمي ناصر 22]

السلام عليكم ورحمة الله تعالى وبركاته
اختي بما انو راكي حابة تتعلمي راح تجيك ساهلة
اول حاجة ابداي بالحوايج الساهلة و من بعد المتوسطة ومن بعد الواعرة
كي تفشلي مرة و متصلحلكش الحاجة عاوديها ومتقولوش خلاص مصلحتش منديرهاش لالا غاوديها حتان تنجحلك
تاني لازم تعرفي اساسيات الطبخ كيما البهارات التسمية نتاعهم ولواش يستعملوهم مثلا للمرقة البيضة ولا الحمرة ولا الغراتان تتبيلة السلاطة
لازم تاني تعرفي التمريق مالازمش تمرقي بزاف و التقلية لازم تقلي مليح
الا عدتي رايحة تديري لحم ولا جاج ولا حوت بالتتبيلة لازم تعطيلهم وقتهم باه التتبيلة تدخل في اللحم ويتشربها ويجي بنين
الكمية تاع البصل والبهارات انت اللي تحديها على الخضرة والمرقة اللي راح تديريهم يعني عينك ميزانك وبالشوي بالشوي راح تولي تديريها سوا سول
في الاخير كاين هنا وصفات روعة اختاري في الاول الوصفات المجربة وصفات طباخاتنا راهم في القمة
ربي يوفقك حنونة وتولي اشطر وحدة في الطبخ

[الماسة البراقة]

شكرا ليكم اخواتاتي والله فرحتوني شكرا لكن كل وحدة باسمها وكي نحتاج.اسئلة معليش نلقاكم هنا تساعدوني؟

[أ م ساجد وسيم]

رانا هنا ختي ابداي باول طبق واذا قدرتي تصوريه هكذا نكونو معاك وذوق انتي لي تعرفي ابداي برك وتوكلي على الله

[الماسة البراقة]

والله ياختي ام ساجدوسيم انتي حنينة بزاف شوفي اختي انامنعرفش ندير صلصة الطماطم نظن هي القاعدة لي يطيبو بها ويحمسو بها الاطباق ولا ران غالطة ختي